Read Aramaic Peshita Lamentations 3 Bible Online

Lamentations 3 - Aramaic Peshita bible

Lamentations 3

¹ܐܹܝܠ ܓܲܢ̄ܒܵܪܵܐ ܚܙܝܼ ܫܘܼܥܒܵܕ݂ܝ: ܒܫܲܒ̣ܛܵܐ ܕܪܘܼܓ̣ܙܹܗ.

²ܠܝܼ ܕܒܲܪ: ܘܗܲܠܟܲܢܝ ܒܚܸܫܘܿܟ݂ܵܐ ܘܠܵܐ ܒܢܲܗܝܼܪܵܐ.

³ܒܪܲܡ ܒܝܼ ܢܬ̣ܘܼܒ̣: ܘܢܲܗܦܸܟ݂ ܐܝܼܕܹܗ ܟܠܹܗ ܝܵܘܡܵܐ.

⁴ܒܲܠܝܼ ܡܸܫܟ̇ܝ ܘܒܸܣܪܝ: ܘܬܲܒܲܪ ܓܲܪ̈ܡܲܝ.

⁵ܒܢ̣ܵܐ ܥܠܲܝ: ܘܐܲܟ݂ܪ̱ܟܲܢܝ ܡܸܪܕܵܐ ܘܚܘܼܪܒܵܐ.

⁶ܒܚܸܫܘܿܟ݂ܵܐ ܐܵܘܬ̇ܒܲܝܝ ܐܲܝܟ݂ ܡܝܼܬ̣ܵܐ ܠܥܵܠܲܡ.

⁷ܣܵܓ̣ ܒܐܲܦܲܝ̈ ܕܠܵܐ ܐܸܦܘܿܩ: ܘܐܲܥܫܸܢ ܐܲܣܘܼܪ̈ܲܝ.

⁸ܘܐܵܦܸܢ ܐܸܒ̣ܥܸܐ ܘܐܹܨܲܠܹܐ ܠܵܐ ܫܵܡܲܥ ܨܠܘܿܬ̣ܝ.

⁹ܣܵܓ̣ ܐܘܼܪ̈ܚܵܬ̣ܝ ܒܟ݂ܘܼ̈ܒܹ̇ܐ: ܘܲܫܒ̣ܝܼ̈ܠܲܝ ܥܲܩܸܡ.

¹⁰ܕܹܐܒ̣ܵܐ ܟܲܡܵܢܵܐ ܗܘ̤ܵܐ ܠܝܼ: ܘܐܲܪܝܵܐ ܒܛܘܼܫܝܵܐ.

¹¹ܐܘܼܪ̈ܚܵܬ̣ܝ ܥܲܩܸܡ̣: ܦܲܫܚܲܢܝ ܘܣܵܡܲܢܝ ܠܲܚܒ̣ܵܠܵܐ.

¹²ܡ̣ܠܵܐ ܩܸܫܬܹ̇ܗ ܘܐܲܩܝܼܡܲܢܝ ܐܲܝܟ݂ ܢܝܼܫܵܐ ܠܓܹܐܪܹ̈ܐ.

¹³ܗܵܐ ܐܲܥܸܠ ܒܟ݂ܘܿܠ̈ܝܵܬ̣ܝ ܓܹܐܪ̈ܵܘܗܝ.

¹⁴ܗܘܹ̇ܝܬ̣ ܓܘܼܚܟܵܐ ܒܟ݂ܠܗܘܿܢ ܥܲܡܡܹ̈ܐ: ܘܲܙܡܝܼܪ̈ܵܬ̣ܗܘܿܢ ܟܠܹܗ ܝܵܘܡܵܐ.

¹⁵ܐܲܣܒ̇ܥܲܢܝ ܡܪܵܪܹ̈ܐ: ܘܐܲܪ̱ܘܝܲܢܝ ܓܸܕ̇ܕܹ̈ܐ.

¹⁶ܘܬܲܒܲܪ ܒܟܹܐܦܵܐ ܫܸܢܲܝ̈: ܘܦܵܠܢܝ ܒܩܸܛܡܵܐ.

¹⁷ܘܐܸܬ̇ܛܲܥܝܲܬ̤ ܡ̣ܢ ܫܠܵܡܵܐ ܢܲܦ̮ܫܝ: ܘܲܛܥܹ̇ܝܬ̣ ܛܵܒ̣ܬ̣ܵܐ.

¹⁸ܘܐܸܡ̇ܪܹܬ̣ ܕܐܸܒܲܕ݂ܘ ܢܸܨܚܵܢܲܝ̈: ܘܣܲܒ̣ܪܝ ܡ̣ܢ ܡܵܪܝܵܐ.

¹⁹ܐܸܬ̇ܕܲܟ݂ܪ ܫܘܼܥܒܵܕ݂ܝ ܘܡܲܪܕ̇ܘܼܬ̣ܝ: ܕܲܡܪܵܪܹ̈ܐ ܘܲܕ݂ܓܸܕ̇ܕܹ̈ܐ.

²⁰ܐܸܬ̇ܕܲܟ݂ܪ ܘܐܲܦܢܵܐ ܢܲܦ̮ܫܝ ܥܠܲܝ.

²¹ܗܵܕܹܐ ܐܲܬ̣ܝܼܒ̣ ܥܲܠ ܠܹܒ̇ܝ: ܡܸܛܠ ܗܵܢܵܐ ܐܹܣܲܟܹ̇ܐ ܠܹܗ.

²²ܚܸܣܕ݂ܵܘ̈ܗܝ ܕܡܵܪܝܵܐ ܕܠܵܐ ܛܵܠܩܝܼܢ: ܘܠܵܐ ܓܵܡ̇ܪܝܼܢ ܪ̈ܲܚܡܵܘܗܝ.

²³ܒܚܘܼܕܵܬ̣ܵܐ ܕܨܲܦܪܵܐ ܣܲܓ̇ܝܼܵܐܐ ܗܲܝܡܵܢܘܼܬ̣ܵܟ݂ ܡܵܪܝܵܐ.

²⁴ܐܸܡܪܲܬ̤ ܢܲܦ̮ܫܝ ܡܢܵܬ̣ܝ ܗ̄ܘܼ. ܡܸܛܠ ܗܵܢܵܐ ܐܹܣܲܟܸ̇ܐ ܠܹܗ.

²⁵ܛܵܒ̣ ܡܵܪܝܵܐ ܠܡܲܢ ܕܲܡܣܲܟܸ̇ܐ ܠܹܗ ܘܲܠܢܲܦ̮ܫܵܐ ܕܒ̣ܵܥ̇ܝܵܐ ܠܹܗ.

²⁶ܛܵܒ̣ ܠܡܲܢ ܕܲܡܣܲܒܲܪ ܒܩܘܼܫܬܵܐ ܠܦܘܼܪܩܵܢܹܗ ܕܡܵܪܝܵܐ.

²⁷ܛܵܒ̣ ܠܓܲܒ̣ܪܵܐ ܟܲܕ݂ ܢܸܫܩܘܿܠ ܢܝܼܪܵܟ݂ ܒܛܲܠܝܘܼܬܹܗ.

²⁸ܘܢܸܬܸ̇ܒ̣ ܒܲܠܚܘܿܕ݂ܵܘܗܝ ܘܢܸܫܬ̇ܘܿܩ: ܡܸܛܠ ܕܩܲܒܸ̇ܠ ܥܠܵܘܗܝ ܢܝܼܪܵܟ݂.

²⁹ܢܸܬܸ̇ܠ ܒܥܲܦܪܵܐ ܦܘܼܡܹܗ ܡܸܛܠ ܕܐܝܼܬ̣ ܣܲܒ̣ܪܵܐ.

³⁰ܢܸܬܸ̇ܠ ܦܲܟܹ̇ܗ ܠܡܲܢ ܕܡܵܚܹ̇ܐ ܠܹܗ: ܘܢܸܣܒܲܥ ܚܸܣܕܵܐ.

³¹ܡܸܛܠ ܕܠܵܐ ܛܵܥܹ̇ܐ ܡܵܪܝܵܐ ܠܥܵܠܲܡ.

³²ܐܸܠܵܐ ܡܡܲܟܸ̇ܟ݂ ܘܲܡܪܲܚܸܡ: ܐܲܝܟ݂ ܣܘܿܓ̣ܵܐܬ̣ ܪ̈ܲܚܡܵܘܗܝ.

³³ܡܸܛܠ ܕܠܵܐ ܥܵܢܹ̇ܐ ܡ̣ܢ ܠܸܒܹ̇ܗ: ܘܲܡܡܟܸ̇ܟ݂ ܒܢܲܝ̈ ܓܲܢ̄ܒܵܪܹ̈ܐ.

³⁴ܠܲܡܟܲܒܵܫܘܼ ܬܚܹܝܬ̣ ܪܸ̈ܓ̣ܠܵܘܗܝ ܟܠܗܘܿܢ ܐܲܣܝܼܪܹ̈ܐ ܕܐܲܪܥܵܐ.

³⁵ܠܡܸܨܠܵܐ ܕܝܼܢܵܐ ܕܓܲܒ̣ܪܵܐ ܠܘܼܩܒܲܠ ܐܲܦܲܝ̈ ܥܸܠܵܝܵܐ.

³⁶ܠܲܡܚܲܝܵܒ̣ܘܼ ܒܲܪܢܵܫܵܐ ܒܕ݂ܝܼܢܹܗ ܡܵܪܝܵܐ ܠܵܐ ܚܵܙܹ̇ܐ.

³⁷ܡܲܢܘܼ ܗܵܢܵܐ ܕܐܸܡܲܪ ܘܲܗ̤ܘܵܐ: ܕܡܵܪܝܵܐ ܠܵܐ ܦܩܲܕ݂.

³⁸ܡ̣ܢ ܦܘܼܡܹܗ ܕܥܸܠܵܝܵܐ ܠܵܐ ܢܵܦ̈ܩܵܢ ܒܝܼ̈ܫܵܬ̣ܵܐ ܘܛܵـ̈ـܒ̣ܵܬ̣ܵܐ.

³⁹ܡܵܢܵܐ ܡܸܬ̣ܚܲܫܲܒ̣ ܒܲܪܢܵܫܵܐ ܕܚܲܝ: ܘܓܲܒ̣ܪܵܐ ܥܲܠ ܚܛܵܗܵܘ̈ܗܝ.

⁴⁰ܢܸܒ̣ܨܹܐ ܐܘܼܪ̈ܚܵܬ̣ܲܢ ܘܢܸܒ̣ܕ̇ܘܿܩ: ܘܢܸܬ̣ܦܢܸܐ ܠܘܵܬ̣ ܡܵܪܝܵܐ.

⁴¹ܢܸܫܩܘܿܠ ܠܸܒܲܝ̈ܢ ܥܲܠ ܐܝܼܕܲܝ̈ܢ ܠܘܵܬ̣ ܐܲܠܵܗܵܐ ܠܲܫܡܲܝܵܐ.

⁴²ܚܢܲܢ ܐܲܥܠ̣ܝܼܢ ܘܡܲܪܡܲܪܢܵܟ݂: ܘܐܲܢ̄ܬ̇ ܠܵܐ ܫܒܲܩܬ̇.

⁴³ܛܲܠܸܠ̣ܬ̇ ܒܪܘܼܓ̣ܙܵܟ݂ ܘܲܪܕܲܦ̣ܬܵܢ: ܘܩܲܛܸܠ̣ܬ̇ ܘܠܵܐ ܚܵܣܬ̇.

⁴⁴ܛܲܠܸܠܬ̇ ܒܲܥܢܵܢܵܟ݂: ܘܐܲܥ̣ܒܲܪܬ̇ ܨܠܘܿܬܲܢ.

⁴⁵ܥܩܝܼܪܹ̈ܐ ܘܡܲܣ̈ܠܲܝܵܐ ܥ̣ܒܲܕ̇ܬܵܢ ܒܹܝܬ̣ ܥܲܡܡܹ̈ܐ.

⁴⁶ܥܲܝܢܝ ܕܵܡ̇ܥܵܐ ܘܠܵܐ ܫܵܠܝܵܐ: ܡ̣ܢ ܕܠܲܝܬ̇ ܦܘܼܝܵܓ̣ܵܐ.

⁴⁷ܥܕܲܡܵܐ ܕܲܢܕ݂ܝܼܩ ܘܢܸܚܙܹܐ ܡܵܪܝܵܐ ܡ̣ܢ ܫܡܲܝܵܐ.

⁴⁸ܥܲܝܢܝ ܐܸܬ̇ܛܲܪܦܲܬ̤ ܥܲܠ ܢܲܦ̮ܫܝ: ܡ̣ܢ ܟܠܗܹܝܢ ܒ̈ܢܵܬ̣ ܩܘܼܪ̈ܝܵܐ ܕܝܼܠܝ.

⁴⁹ܦܬܲܚ̣ܘ ܥܠܲܝܢ ܦܘܼܡܗܘܿܢ ܟܠܗܘܿܢ ܒܥܸܠܕ̇ܒ̣ܵܒܲܝ̈ܢ.

⁵⁰ܕܸܚ̱ܠܬ̣ܵܐ ܘܙܵܘܸܥܬ̣ܵܐ ܗܘ̤ܵܬ̣ ܠܲܢ ܓܘܼܡܵܨܵܐ ܘܲܬ̣ܒ̣ܵܪܵܐ.

⁵¹ܬܲܦܹ̈ܐ ܕܡܲـ̈ـܝܵܐ ܐܲܪ̈ܕ̇ܝ ܥܲܝ̈ܢܲܝ ܥܲܠ ܬܒ̣ܵܪܵܗ̇ ܕܒܲܪܬ̣ ܥܲܡܝ.

⁵²ܡܨܵܕ݂ ܨܵܕ݂ܘܼܢܝ ܐܲܝܟ݂ ܨܸܦܪܵܐ ܒܥܸܠܕ̇ܒ̣ܵܒܲܝ̈ ܡܲܓܵܢ.

⁵³ܫܲܬܸ̇ܩ̣ܘ ܒܓ̣ܘܼܒܵܐ ܚܲܝܲܝ̈: ܫܕ݂ܵܘ ܒܝܼ ܟܹܐܦܹ̈ܐ.

⁵⁴ܛܵܦ̣ܘ ܡܲـ̈ـܝܵܐ ܠܥܸܠ ܡ̣ܢ ܪܹܫܝ: ܐܸܡ̇ܪܹܬ̣ ܐܸܬ̣ܪܲܚܩܹ̇ܬ̣.

⁵⁵ܩܪܹܝܬ̣ ܫܡܵܟ݂ ܡܵܪܝܵܐ: ܡ̣ܢ ܓܘܼܒܵܐ ܬܲܝܬܵܝܵܐ.

⁵⁶ܩܵܠܝ ܫ̣ܡܲܥܬ̇: ܠܵܐ ܬܲܪܟܸ̇ܢ ܐܸܕ݂ܢܵܟ݂. ܐܸܠܵܐ ܐܲܪܘܲܚ ܠܝܼ ܘܲܦܪܘܿܩܲܝܢܝ.

⁵⁷ܩ̣ܪܸܒ̣ܬ̇ ܒܝܵܘܡܵܐ ܕܲܩܪܹܝܬ̣ܵܟ݂: ܘܐܸܡܲܪܬ̇ ܠܝܼ ܠܵܐ ܬܸܕ݂ܚܲܠ.

⁵⁸ܕܵܢܬ̇ ܡܵܪܝܵܐ ܕܝܼܢܵܐ ܕܢܲܦ̮ܫܝ ܘܲܦܪܲܩ̣ܬ̇ ܚܲܝܲܝ̈.

⁵⁹ܚ̣ܙܲܝܬ̇ ܡܵܪܝܵܐ ܡܘܼܟܵܟ݂ܝ ܘܕ݂ܵܢ̣ܬ̇ ܕܝܼܢܝ.

⁶⁰ܚ̣ܙܲܝܬ̇ ܟܠܵܗ̇ ܢܩܲܡܬ̣ܗܘܿܢ: ܘܟ݂ܠ ܕܐܸܬ̣ܚܲܫܲܒ̣ܘ ܥܠܲܝ.

⁶¹ܫ̣ܡܲܥܬ̇ ܚܸܣܕ̇ܗܘܿܢ ܡܵܪܝܵܐ: ܘܟ݂ܠ ܕܐܸܬ̣ܚܲܫܲܒ̣ܘ ܥܠܲܝ.

⁶²ܣܸܦ̈ܘܵܬ̣ܵܐ ܕܩܵܝ̈ܡܵܢ: ܘܪ̈ܵܢܝܵܢ ܥܠܲܝ ܟܠܹܗ ܝܵܘܡܵܐ.

⁶³ܡܵܘܬܲܒ̣ܗܘܿܢ ܘܲܡܩܵܡܗܘܿܢ: ܐܸܣܬܲܟ̇ܠܹܬ̣ ܐܸܢܵܐ ܡ̣ܢ ܪܸܢܝܼܗܘܿܢ.

⁶⁴ܬܲܗܦܸܟ݂ ܠܗܘܿܢ ܦܘܼܪܥܵܢܗܘܿܢ ܡܵܪܝܵܐ: ܐܲܝܟ݂ ܡܲܥܒܸ̇ܕ݂ ܐܝܼܕܲܝ̈ܗܘܿܢ.

⁶⁵ܬܸܬܸ̇ܠ ܠܗܘܿܢ ܟܲܪܝܘܼܬ̣ܵܐ ܕܠܒܵܐ: ܘܲܡܚܘܿܬ̣ܵܟ݂ ܠܗܘܿܢ ܬܸܪܕ̇ܘܿܦ.

⁶⁶ܘܲܒ̣ܪܘܼܓ̣ܙܵܟ݂ ܬܵܘܒܸ̇ܕ݂ ܐܸܢܘܿܢ ܡ̣ܢ ܬܚܹܝܬ̣ ܫܡܲܝ̈ܟ ܡܵܪܝܵܐ.