Read Aramaic Peshita Lamentations 4 Bible Online

Lamentations 4 - Aramaic Peshita bible

Lamentations 4

¹ܐܲܝܟܲܢܵܐ ܡܸܣܬ̇ܠܹܐ ܕܲܗܒ̣ܵܐ ܛܵܒ̣ܵܐ: ܘܫܵܢܹ̇ܐ ܨܘܼܒ̣ܥܵܐ ܫܲܦܝܼܪܵܐ: ܡܸܫ̈ܬܲܕ݂ܝܵܢ ܟܹܐܦܹ̈ܐ ܕܩܘܼܕ݂ܫܵܐ ܒܪܹܫ ܟܠܗܘܿܢ ܫܘܼܩܹ̈ܐ.

²ܒܢܲܝ̈ ܨܸܗܝܘܿܢ ܝܲܩܝܼܪܹ̈ܐ ܕܲܡܝܲܬ̇ܪܝܼܢ ܗ̄ܘܼܵܘ ܡ̣ܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܐܲܝܟܲܢܵܐ ܐܸܬ̣ܚ̄ܫܸܒ̣ܘ ܐܲܝܟ݂ ܡܵܐܢܹ̈ܐ ܕܚܸܨܦܵܐ: ܥܒ̣ܵܕ݂ ܐܝܼ̈ܕܲܝܵܐ ܕܦܲܚܵܪܵܐ.

³ܓܠܲܝ̈ ܐܲܝܟ݂ ܝܵܪܘܿܪܹ̈ܐ ܬܕܲܝܗܹܝ̈ܢ: ܘܐܲܝܢܸܩ ܓܪ̈ܲܝܗܹܝܢ. ܗܘ̤ܵܬ̣ ܥܲܡܝ ܠܲܡܚܘܿܬ̣ܵܐ ܕܠܲܝܬ̇ ܠܵܗ̇ ܐܵܣܝܘܼܬ̣ܵܐ: ܘܐܲܝܟ݂ ܢܲܥܵܡܵܐ ܒܡܲܕ݂ܒ̇ܪܵܐ.

⁴ܕܒܸܩ ܠܸܫܵܢܹܗ ܕܝܲܥܩܘܿܒ̣ ܕܝܲܠܘܼܕ݂ܵܐ ܠܲܫܡܲܝ̈ ܚܸܟܹ̇ܗ ܒܨܲܗܝܵܐ: ܛܠܵܝܹ̈ܐ ܫܐܸܠ̣ܘ ܠܲܚܡܵܐ: ܘܠܲܝܬ̇ ܕܩܵܨܹ̇ܐ ܘܝܵܗܹ̇ܒ̣ ܠܗܘܿܢ.

⁵ܗܵܢ̇ܘܿܢ ܕܐܵܟ݂ܠܝܼܢ ܗ̄ܘܼܵܘ ܦܘܼܢܵܩܹ̈ܐ: ܗܵܐ ܣܝܼܡܝܼܢ ܒܫܘܼܩܹ̈ܐ. ܕܐܸܬ̣ܪܲܒ̇ܝܼܘ ܥܲܠ ܙܚܘܿܪ̈ܝܵܬ̣ܵܐ: ܗܵܐ ܕܵܡ̇ܟ̇ܝܼܢ ܒܩܸܩ̈ܠܵܬ̣ܵܐ.

⁶ܘܲܣܓ̣ܝܼ ܥܵܘܼܠܵܗ̇ ܕܒܲܪܬ̣ ܥܲܡܝ ܡ̣ܢ ܚܛܝܼܬ̣ܵܗ̇ ܕܲܣܕ݂ܘܿܡ: ܕܐܸܬ̣ܗܲܦܟܲܬ̤ ܡ̣ܢ ܫܸܠܝܵܐ ܘܠܵܐ ܠܐ̈ܝܼ ܒܵܗ̇ ܐܝܼ̈ܕܲܝܵܐ.

⁷ܙܟ݂ܝܼܘ ܢܙܝܼܪܹ̈ܝܗ̇ ܡ̣ܢ ܬܲܠܓܵܐ: ܘܲܚܘܲܪܘ ܡ̣ܢ ܚܲܠܒ̣ܵܐ ܒܡܲܪ̈ܗܝܵܬ̣ܗܘܿܢ: ܣ̣ܡܲܩܘ ܓܲܪ̈ܡܲܝܗܘܿܢ ܡ̣ܢ ܣܲܪܕ̇ܘܿܢ ܘܡ̣ܢ ܣܲܦܝܼܠܵܐ ܓܘܼܫ̱ܡܗܘܿܢ.

⁸ܚܫܸܟ݂ ܡ̣ܢ ܫܘܼܚܵܪܹ̈ܐ ܚܸܙ̱ܘܗܘܿܢ: ܘܠܵܐ ܐܸܬ̣̱ܝܼܕܲܥܘ ܒܫܘܼܩܹ̈ܐ: ܩܦܘܿܕ݂ ܡܸܫܟ̇ܗܘܿܢ ܥܲܠ ܓܲܪ̈ܡܲܝܗܘܿܢ: ܝܼܒܸܫ̣ ܘܲܗܘ̤ܵܐ ܐܲܝܟ݂ ܩܲܝܣܵܐ.

⁹ܛܵܒ̣ܝܼܢ ܗ̄ܘܼܵܘ ܩܛܝܼ̈ܠܲܝ ܚܲܪܒܵܐ ܡ̣ܢ ܩܛܝܼܠܲܝ̈ ܟܲܦܢܵܐ: ܕܕ݂ܵܒ̣ܘ ܐܲܝܟ݂ ܗܵܢ̇ܘܿܢ ܕܲܡܡܲܚܹܝܢ ܘܲܫܕܹܝܢ ܒܚܲܩܠܵܐ.

¹⁰ܐܝܼܕܲܝ̈ ܢܸܫܹ̈ܐ ܡܪ̈ܲܚܡܵܢܝܵܬ̣ܵܐ ܒܲܫܸܠ̣ ܒܢܲܝ̈ܗܹܝܢ: ܘܲܗܘ̤ܵܘ ܠܗܹܝܢ ܠܡܹܐܟ݂ܘܼܠܬܵܐ ܒܲܬ̣ܒ̣ܵܪܵܗ̇ ܕܒܲܪܬ̣ ܥܲܡܝ.

¹¹ܫܲܡܠܝܼ ܡܵܪܝܵܐ ܚܸܡܬܹܗ: ܘܐܸܫܲܕ݂ ܚܸܡܬ̣ܵܐ ܕܪܘܼܓ̣ܙܹܗ: ܘܲܫܒܲܩ ܢܘܼܪܵܐ ܒܨܸܗܝܘܿܢ: ܘܫܲܠܗܹܒ̣ܝܼܬ̣ܵܐ ܐܸܟ݂ܠܲܬ̤ ܫܲܬ̣ܐ̱ܣܹ̈ܝܗ̇.

¹²ܠܵܐ ܗܲܝܡܸܢܘ ܡܲܠ̈ܟܹ̇ܐ ܕܐܲܪܥܵܐ: ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܬܸܒܹܝܠ: ܕܐܵܬܹ̇ܐ ܘܥܵܐܹ̇ܠ ܒܥܸܠܕ̇ܒ̣ܵܒ̣ܵܐ ܘܐܵܠܘܿܨܵܐ ܒܬܲܪ̈ܥܹܝܗ̇ ܕܐܘܿܪܸܫܠܸܡ.

¹³ܡܸܛܠ ܚܛܵܗܹ̈ܐ ܕܲܢܒ̣̈ܝܹܝܗ̇: ܘܥܵܘܼܠܵܐ ܕܟ݂ܵܗ̈ܢܹܝܗ̇: ܕܐܸܫܲܕ݂ܘ ܒܓ̣ܵܘܵܗ̇ ܕܡܵܐ ܕܙܲܕ̇ܝܼܩܹ̈ܐ.

¹⁴ܢܲܕ݂ܘ ܪܵܘܪ̈ܒ̣ܵܢܹܝܗ̇ ܒܫܘܼܩܹ̈ܝܗ̇: ܘܐܸܬ̣ܦܲܠܦܲܠܘ ܒܲܕ݂ܡܵܐ: ܘܠܵܐ ܐܸܫܟܲܚ̣ܘ ܕܢܸܩ̱ܪܒ̣ܘܼܢ ܠܲܠܒ̣ܘܼܫܲܝ̈ܗܘܿܢ.

¹⁵ܦܪܘܿܩ ܡܸܢܗܘܿܢ: ܘܛܲܡܹ̈ܐܐ ܩܪܵܘ ܐܸܢܘܿܢ. ܥܒܲܪܘ ܥܒܲܪܘ ܘܠܵܐ ܬܸܬ̣ܩܲܪܒ̣ܘܼܢ ܠܗܘܿܢ: ܡܸܛܠ ܕܐܲܪܓܸ̇ܙܘ ܐܵܦ ܐܸܬ̇ܛܲܪܲܦܘ: ܐܸܡܲܪܘ ܒܹܝܬ̣ ܥܲܡܡܹ̈ܐ ܕܬ̣ܘܼܒ̣ ܠܵܐ ܢܵܘܣܦܘܼܢ ܠܡܸܥܡܲܪ.

¹⁶ܥܲܕ݂ ܩܵܝܡ̇ܝܼܢ ܚ̄ܢܲܢ ܚ̣ܫܸܟ݂ ܥܲܝܢܲܝ̈ܢ ܡ̣ܢ ܥܘܼܕ݂ܪܵܢܲܢ: ܣܪܝܼܩܵܐܝܼܬ̣ ܕܵܩ̣ܘ ܕܵܘ̈ܩܲܝܢ ܠܘܵܬ̣ ܥܲܡܵܐ ܕܠܵܐ ܦܵܪܹܩ.

¹⁷ܦܲܪܨܘܿܦܹܗ ܕܡܵܪܝܵܐ ܦܲܠܸܓ̣ ܐܸܢܘܿܢ: ܘܠܵܐ ܢܵܘܣܸܦ ܠܲܡܚܵܪ ܒܗܘܿܢ: ܒܐܲܦܲܝ̈ ܟܵܗ̈ܢܹܐ ܠܵܐ ܢܣܲܒ̣ܘ: ܘܥܲܠ ܣܵܒܹ̈ܐ ܠܵܐ ܪܲܚܸܡ̣ܘ.

¹⁸ܨܵܕ݂ܘ ܠܲܕ̇ܕܲܩܕ̇ܝܼܢ ܠܕܲܡܗܲܠܟ݂ܝܼܢ ܒܫܘܼܩܹ̈ܐ. ܩ̣ܪܸܒ̣ ܩܸܨܲܝܢ: ܡܠܵܘ ܝܵܘ̈ܡܲܝܢ: ܡܸܛܠ ܕܐܸܬ̣ܵܐ ܥܸܕܵܢܲܢ.

¹⁹ܩܲܠܝܼܠܝܼܢ ܗ̄ܘܼܵܘ ܪ̈ܵܕ݂ܦܲܝܢ ܡ̣ܢ ܢܸܫܪ̈ܲܝ ܫܡܲܝܵܐ: ܥܲܠ ܛܘܼܪܹ̈ܐ ܪܲܕ݂ܦܘܼܢ: ܘܲܒ̣ܡܲܕ݂ܒ̇ܪܵܐ ܐܸܬ̣ܟܲܡܲܢܘ ܠܲܢ.

²⁰ܪܘܼܚܵܐ ܕܐܲܦܲܝ̈ܢ ܡܫܝܼܚܹܗ ܕܡܵܪܝܵܐ: ܐܸܬ̇ܬ̇ܚܸܕ݂ ܒܓ̣ܘܼܡܵܨܗܘܿܢ: ܗܵܘܿ ܕܐܸܡܲܪܢ ܕܲܒ̣ܛܸܠܵܠܹܗ ܢܸܚܹܐ ܒܹܝܬ̣ ܥܲܡܡܹ̈ܐ.

²¹ܕܘܼܨܝ ܘܲܚܕ݂ܵܝ ܒܲܪܬ̣ ܐܲܕ݂ܘܿܡ ܕܝܵܬ̣ܒܵܐ ܒܐܲܪܥܵܐ ܕܥܘܿܨ: ܐܵܦ ܠܹܟ݂ܝ ܢܸܡܛܸܐ ܟܵܣܵܐ: ܬܸܪܘܹܝܢ ܘܬܸܬ̇ܛܲܪܦܝܼܢ.

²²ܓܡܲܪܘ ܚܛܵܗܲܝ̈ܟ̇ܝ ܒܲܪܬ̣ ܨܸܗܝܘܿܢ: ܬܘܼܒ̣ ܠܵܐ ܢܵܘܣܸܦ ܠܲܡܓܲܠܵܝܘܼܬܹܟ݂ܝ ܐܸܬ̣ܦܩܸܕ݂ܘ ܚܵܘܒܲܝ̈ܟ̇ܝ ܒܲܪܬ̣ ܐܲܕ݂ܘܿܡ: ܘܐܸܬ̣ܓ̇ܠܝܼܘ ܚܛܵܗܲܝ̈ܟ̇ܝ.