Read Aramaic Peshita Lamentations 5 Bible Online

Lamentations 5 - Aramaic Peshita bible

Lamentations 5

¹ܐܸܬ̇ܕܲܟ݂ܪ ܡܵܪܝܵܐ ܡܵܢܵܐ ܗܘ̤ܵܐ ܠܲܢ: ܚܘܼܪ ܘܲܚܙܝܼ ܚܸܣܕܲܢ.

²ܝܵܪܬ̇ܘܼܬܲܢ ܐܸܬ̣ܗܲܦܟܲܬ̤ ܠܢܘܼܟ݂ܪ̈ܵܝܹܐ: ܘܒ̣ܵܬܲܝ̈ܢ ܠܢܘܼܟ݂ܪ̈ܵܝܹܐ.

³ܝܲܬ̣ܡܹ̈ܐ ܗ̤ܘܲܝܢ ܕܠܵܐ ܐܲܒ̣ܵܐ: ܘܐܸܡ̈ܗܵܬܲܢ ܐܲܝܟ݂ ܐܲܪ̈ܡܠܵܬ̣ܵܐ.

⁴ܡܲܝ̈ܢ ܒܟܸܣܦܵܐ ܐܸܫ̣ܬ̇ܝܼܢ: ܘܩܲܝ̈ܣܲܝܢ ܒܲـ̈ـܕ݂ܡܲܝܵܐ.

⁵ܐܸܬ̣ܵܘ ܥܲܠ ܨܵܘܪܲܢ: ܐܸܬ̣̱ܪܕܸܦܢ ܘܲܠܐ̣ܝܼܢ ܘܠܵܐ ܐܸܬ̇ܬ̇ܢܝܼܚܝܢ.

⁶ܡܸܨܪ̈ܵܝܹܐ ܝܲܗ̄ܒ̣ܘ ܐܝܼܕ݂ܵܐ: ܘܐܵܬ̣ܘܿܪ̈ܵܝܹܐ ܠܲܡܣܲܒܵܥܘܼ ܠܲܚܡܵܐ.

⁷ܐܲܒ̣ܵܗܲܝ̈ܢ ܚܛܵܘ ܘܠܲܝܬ̇ ܐܸܢܘܿܢ: ܘܲܚܢܲܢ ܚܛܵܗܲܝ̈ܗܘܿܢ ܣܒܲܠܢ.

⁸ܓܲܒ̣ܕܹ̇ܐ ܐܸܫܬܲܠܲܛܘ ܒܲܢ: ܘܠܲܝܬ̇ ܕܦܵܪܹܩ ܠܲܢ ܡ̣ܢ ܐܝܼܕܲܝ̈ܗܘܿܢ.

⁹ܒܢܲܦ̮ܫܲܢ ܢܲܥܸܠ ܠܲܚܡܵܐ ܡ̣ܢ ܩܕ݂ܵܡ ܚܲܪܒܵܐ ܕܲܒ̣ܡܲܕ݂ܒ̇ܪܵܐ.

¹⁰ܡܸܫܟܲܝ̈ܢ ܐܲܝܟ݂ ܕܡ̣ܢ ܬܲܢܘܼܪܵܐ ܐܸܬ̣ܩ̄ܦܸܕ݂ܘ: ܘܲܩܢܵܐܘܼ ܡ̣ܢ ܩܕ݂ܵܡ ܛܘܼܪܵܦܵܐ ܕܟܲܦܢܵܐ.

¹¹ܢܸܫܹ̈ܐ ܒܨܸܗܝܘܿܢ ܨܲܥܲܪܘ: ܘܲܒ̣ܬ̣ܘܼ̈ܠܵܬ̣ܵܐ ܒܩܘܼܪ̈ܝܵܐ ܕܲܝܗܘܼܕ݂ܵܐ.

¹²ܪܵܘܪ̈ܒ̣ܵܢܹܐ ܒܐܝܼܕܲܝ̈ܗܘܿܢ ܐܸܬ̇ܬܲܠܝܼܘ: ܘܐܲܦܲܝ̈ ܣܵܒܹ̈ܐ ܠܵܐ ܝܲܩܲܪܘ.

¹³ܓܲܕ̇ܘܼ̈ܕܹܐ ܛܚܲܢܘ ܪܲܚܝܵܐ: ܘܲܥܠܲܝ̈ܡܹܐ ܒܩܲܝܣܹ̈ܐ ܐܸܬ̇ܬܲܩܲܠܘ.

¹⁴ܣܵܒܹ̈ܐ ܡ̣ܢ ܬܲܪܥܵܐ ܒܛܸܠܘ: ܘܓܲܕ̇ܘܼ̈ܕܹܐ ܡ̣ܢ ܚܲܕ݂ܘܲܬ̣ܗܘܿܢ.

¹⁵ܒܸܛܠܲܬ̤ ܚܲܕ݂ܘܼܬ̣ܵܐ ܕܠܸܒܲܢ: ܐܸܬ̣ܗܲܦܟܲܬ̤ ܠܐܸܒ̣ܠܵܐ ܚܲܕ݂ܘܼܬܲܢ.

¹⁶ܢܦܲܠ̣ ܟܠܝܼܠܵܐ ܕܪܹܫܲܢ: ܘܵܝ ܠܲܢ ܥܲܠ ܕܲܚܛܲܝܢ.

¹⁷ܡܸܛܠ ܗܵܢܵܐ ܗܵܐ ܕܵܘܹ̇ܐ ܠܸܒܲܢ: ܡܸܛܠ ܗܵܢܵܐ ܗܵܐ ܚܸܫ̈ܘܿܟ݂ܵܢ ܥܲܝ̈ܢܲܝܢ.

¹⁸ܥܲܠ ܛܘܼܪܵܐ ܕܨܸܗܝܘܿܢ ܕܲܚܪܸܒ̣: ܘܬܲܥ̈ܠܹܐ ܗܲܠܸܟ݂ܘ ܒܹܗ.

¹⁹ܘܐܲܢ̄ܬ̇ ܡܵܪܝܵܐ ܠܥܵܠܲܡ ܐܝܼܬܲܝܟ: ܘܟ݂ܘܼܪܣܝܵܟ݂ ܠܕ݂ܵܪܕܵܪ̈ܝܼܢ.

²⁰ܠܵܐ ܠܥܵܠܲܡ ܬܸܫܒ̇ܩܲܢ: ܘܬܸܛܥܹܝܢ ܢܘܼܓ̣ܪܵܐ ܕܝܵܘ̈ܡܵܬ̣ܵܐ.

²¹ܐܲܦܢܵܢ ܡܵܪܝܵܐ ܠܘܵܬ̣ܵܟ݂ ܘܢܸܬ̣ܦ̄ܢܸܐ: ܚܲܕܸ̇ܬ̣ ܝܵܘ̈ܡܵܬܲܢ ܐܲܝܟ݂ ܕܡ̣ܢ ܩܕ݂ܝܼܡ.

²²ܡܸܛܠ ܕܡܲܣܠܵܝܘܼ ܐܲܣܠܝܼܬܵܢ: ܘܲܪܓܸܙܬ̇ ܥܠܲܝܢ ܛܵܒ̣.