Read Aramaic Peshita Ezekiel 11 Bible Online

Ezekiel 11 - Aramaic Peshita bible

Ezekiel 11

¹ܘܲܫܩܲܠܬܲܢܝ ܪܘܼܚܵܐ: ܘܐܲܝܬ̇ܝܵܬܲܢܝ ܠܬܲܪܥܵܐ ܡܲܕܼܢ̱ܚܵܝܵܐ ܕܒܲܝܬܹ̇ܗ ܕܡܵܪܝܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬ̣ ܒܡܲܥܠܵܢܵܐ ܕܬܲܪܥܵܐ ܥܸܣܪܝܼܢ ܘܚܲܡܫܵܐ ܓܲܒ̣ܪ̈ܝܼܢ: ܘܲܚܙܹ̇ܝܬ̣ ܒܲܝܢܵܬ̣ܗܘܿܢ ܠܝܲܥܙܲܢܝܵܐ ܒܲܪ ܥܵܙܘܿܪ: ܘܠܲܦܠܲܛܝܵܐ ܒܲܪ ܒܢܵܝܵܐ ܪܵܘܪ̈ܒ̣ܵܢܹܐ ܕܥܲܡܵܐ.

²ܘܐܸܡܲܪ ܠܝܼ ܡܵܪܝܵܐ: ܒܲܪܢܵܫܵܐ: ܗܵܠܹܝܢ ܐܸܢܘܿܢ ܓܲܒ̣ܪܹ̈ܐ ܕܡܸܬ̣ܚܲܫܒ̣ܝܼܢ ܥܸܬܵܐ: ܘܡܵܠܟ̇ܝܼܢ ܡܸܠ̈ܟܹ̇ܐ ܒܝܼܫܹ̈ܐ ܒܲܡܕܼܝܼܢ̄ܬܵܐ ܗܵܕܹܐ.

³ܘܐܵܡ̇ܪܝܼܢ: ܠܵܐ ܗ̄ܘܼܵܐ ܒܓ̣ܵܘܵܗ̇ ܒܢܲܝܢ ܒܵـ̈ـܬܹ̇ܐ: ܗ̤ܝ ܩܲܕܼܣܵܐ ܘܲܚܢܲܢ ܒܸܣܪܵܐ.

⁴ܡܸܟܹ̇ܝܠ ܐܸܬ̣ܢܲܒܵܐ ܥܠܲܝܗܘܿܢ: ܐܸܬ̣ܢܲܒܵܐ ܒܲܪܢܵܫܵܐ.

⁵ܘܢܸܦܠܲܬ̤ ܥܠܲܝ ܪܘܼܚܹܗ ܕܡܵܪܝܵܐ: ܘܐܸܡܲܪ ܠܝܼ: ܐܸܡܲܪ ܗܵܟܲܢܵܐ ܐܵܡܲܪ ܡܵܪܐ ܡܵܪ̈ܵܘܵܬ̣ܵܐ: ܗܵܟܲܢܵܐ ܪܚܸܡ̣ܬ̇ܘܿܢ ܒܢܲܝ̈ ܝܑܼܣܪܵܝܹܠ: ܘܬܲܪ̈ܥܝܵܬ̣ܵܐ ܕܪܘܼܚܟ̣ܘܿܢ ܐܸܢܵܐ ܝܵܕܲܥ ܐ̄ܢܵܐ ܠܗܹܝܢ.

⁶ܐܲܣܓ̇ܝܼܬ̇ܘܿܢ ܩܛܝܼܠܲܝ̈ܟ̇ܘܿܢ ܒܲܡܕܼܝܼܢ̄ܬܵܐ ܗܵܕܹܐ: ܘܲܡܠܲܝܬ̇ܘܿܢ ܫܘܼܩܹ̈ܝܗ̇ ܚܪ̈ܝܼܒܹܐ.

⁷ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܚܪ̈ܝܼܒܲܝܟ̇ܘܿܢ ܕܐܲܪܡܝܼܬ̇ܘܿܢ ܒܓ̣ܵܘܵܗ̇: ܗܸܢܘܿܢ ܐܸܢܘܿܢ ܒܸܣܪܵܐ ܘܗ̤ܝ ܩܲܕܼܣܵܐ: ܘܲܠܟ̣ܘܿܢ ܡܲܦܸܩ ܐ̄ܢܵܐ ܡ̣ܢ ܓܵܘܵܗ̇.

⁸ܡ̣ܢ ܚܲܪܒܵܐ ܕܚܸܠܬ̇ܘܿܢ: ܘܚܲܪܒܵܐ ܐܲܝܬܸ̇ܐ ܥܠܲܝܟ̇ܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁹ܘܐܲܦܸܩܟ̣ܘܿܢ ܡ̣ܢ ܓܵܘܵܗ̇: ܘܐܲܫܠܸܡܟ̣ܘܿܢ ܒܐܝܼܕܼܵܐ ܕܢܘܼܟ̣ܪ̈ܵܝܹܐ: ܘܐܸܥܒܸ̇ܕܼ ܡܸܢܟ̣ܘܿܢ ܕܝܼܢܹ̈ܐ.

¹⁰ܒܚܲܪܒܵܐ ܬܸܦܠܘܿܢ: ܘܥܲܠ ܬܚܘܼܡܵܐ ܕܝܼܣܪܵܝܹܠ ܐܹܕ̇ܘܼܢܟ̣ܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

¹¹ܘܗ̤ܝ ܠܵܐ ܬܸܗܘܹܐ ܠܟ̣ܘܿܢ ܩܲܕܼܣܵܐ: ܘܐܲܢ̄ܬ̇ܘܿܢ ܠܵܐ ܬܸܗܘܘܿܢ ܒܓ̣ܵܘܵܗ̇ ܒܸܣܪܵܐ: ܥܲܠ ܬܚܘܼܡܵܐ ܕܝܼܣܪܵܝܹܠ ܐܹܕ̇ܢܟ̣ܘܿܢ.

¹²ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܬ̇ܘܿܢ: ܘܕܼܝܼܢܲܝ̈ ܠܵܐ ܥܒܲܕ̇ܬ̇ܘܿܢ: ܘܐܲܝܟ ܕܝܼܢܹ̈ܐ ܕܥܲܡܡܹ̈ܐ ܕܲܚܕܼܵܪ̈ܲܝܟ̇ܘܿܢ ܥܒܲܕ̇ܬ̇ܘܿܢ.

¹³ܘܟܲܕܼ ܐܸܬ̣ܢܲܒ̇ܝܼܬ̇: ܡܝܼܬ̣ ܦܠܲܛܝܵܐ ܒܲܪ ܒܢܵܝܵܐ: ܘܢܸܦܠܹ̇ܬ̣ ܥܲܠ ܐܲܦܲܝ̈: ܘܐܲܝܠܠܹܬ̣ ܒܩܵܠܵܐ ܪܵܡܵܐ: ܘܐܸܡ̇ܪܹܬ̣: ܐܘܿܗ ܡܵܪܹܐ ܡܵܪ̈ܵܘܵܬ̣ܵܐ: ܣܵܘܦܵܢܵܐ ܥܵܒܹ̇ܕܼ ܐܲܢ̄ܬ̇ ܠܫܲܪܟܹ̇ܗ ܕܝܼܣܪܵܝܹܠ.

¹⁴ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁵ܒܲܪܢܵܫܵܐ: ܐܲܚܲܝ̈ܟ ܐܲܚܲܝ̈ܟ ܐ̄ܢܵܫܵܐ ܕܲܫܒ̣ܝܼܬ̣ܵܟ: ܘܟ̣ܠܗܘܿܢ ܕܒܹܝܬ̣ ܝܑܼܣܪܵܝܹܠ ܢܣܘܼܦܘܼܢ: ܕܐܸܡܲܪܘ ܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܐܸܬ̣ܪܲܚܲܩܘ ܡ̣ܢ ܡܵܪܝܵܐ: ܠܲܢ ܗ̄ܘܼ ܓܹܝܪ ܐܸܬ̣ܝܲܗܒܲܬ̤ ܐܲܪܥܵܐ ܠܝܵܪܬ̇ܘܼܬ̣ܵܐ.

¹⁶ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܕܼܚܘܿܩ ܐܸܢܘܿܢ ܒܥܲܡܡܹ̈ܐ: ܘܐܹܒܲܕܲܪ ܐܸܢܘܿܢ ܒܐܲܪ̈ܥܵܬ̣ܵܐ: ܘܐܸܗܘܹܐ ܠܗܘܿܢ ܠܡܲܩܕ̇ܫܵܐ ܙܥܘܿܪܵܐ ܒܐܲܪ̈ܥܵܬ̣ܵܐ ܕܐܸܙܲܠ̣ܘ ܠܗܹܝܢ.

¹⁷ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܹܟܲܢܫܟ̣ܘܿܢ ܡ̣ܢ ܥܲܡܡܹ̈ܐ: ܘܐܹܩܲܪܸܒ̣ܟ̣ܘܿܢ ܡ̣ܢ ܐܲܪ̈ܥܵܬ̣ܵܐ ܕܐܸܬ̣ܒܲܕܲܪܬ̇ܘܿܢ ܒܗܹܝܢ: ܘܐܸܬܸ̇ܠ ܠܟ̣ܘܿܢ ܐܲܪܥܵܐ ܕܝܼܣܪܵܝܹܠ.

¹⁸ܘܢܸܥܠܘܿܢ ܠܵܗ̇: ܘܢܸܥܒ̇ܪܘܿܢ ܟܠܗܹܝܢ ܕܸܚ̈ܠܵܬ̣ܵܗ̇: ܘܟ̣ܠܗܹܝܢ ܛܲܢܦ̈ܘܵܬ̣ܵܗ̇ ܡܸܢܵܗ̇.

¹⁹ܘܐܸܬܸ̇ܠ ܠܗܘܿܢ ܠܸܒܵܐ ܚܲܕܼܬ̣ܵܐ: ܘܪܘܼܚܵܐ ܚܕܲܬܵܐ ܐܸܬܸ̇ܠ ܒܗܘܿܢ: ܘܐܲܥܒܲܪ ܠܸܒܵܐ ܕܟܹܐܦܵܐ ܡ̣ܢ ܒܸܣ̱ܪܗܘܿܢ: ܘܐܸܬܸ̇ܠ ܠܗܘܿܢ ܠܸܒܵܐ ܕܒܸܣܪܵܐ.

²⁰ܘܲܢܗܲܠܟ̣ܘܿܢ ܒܦܘܼܩ̈ܕܵܢܲܝ: ܘܢܸܛܪܘܼܢ ܕܝܼܢܲܝ̈ ܘܢܸܥܒ̇ܕܼܘܼܢ ܐܸܢܘܿܢ: ܘܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܗܘܿܢ ܐܲܠܵܗܵܐ.

²¹ܒܪܸܥܝܵܢܵܐ ܓܹܝܪ ܕܲܦܬܲܟ̣ܪ̈ܲܝܗܘܿܢ ܘܲܕܼܛܲܢܦ̈ܘܵܬ̣ܗܘܿܢ ܐܵܙܹ̇ܠ ܗ̄ܘܼܵܐ ܠܸܒ̇ܗܘܿܢ: ܐܘܼܪ̈ܚܵܬ̣ܗܘܿܢ ܐܹܦܪܘܿܥ ܒܪܹܫܗܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

²²ܘܐܲܪܝܼܡܘ ܟܪ̈ܘܿܒܹܐ ܓܸܦܲܝ̈ܗܘܿܢ: ܘܓ̣ܝܼ̈ܓ̣ܠܹܐ ܥܲܡܗܘܿܢ: ܘܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ ܠܥܸܠ ܡܸܢܗܘܿܢ.

²³ܘܐܸܬ̇ܬ̇ܪܝܼܡ ܫܘܼܒ̣ܹܚܹܗ ܕܡܵܪܝܵܐ ܡ̣ܢ ܓܵܘ ܡܕܼܝܼܢ̄ܬܵܐ: ܘܩܵܡ̣ ܥܲܠ ܛܘܼܪܵܐ ܕܲܒ̣ܡܲܕܼܢ̱ܚܵܝܵܗ̇ ܕܲܡܕܼܝܼܢ̄ܬܵܐ.

²⁴ܘܪܘܼܚܵܐ ܫܩܲܠܬܲܢܝ: ܘܐܲܝܬ̇ܝܵܬܲܢܝ ܠܐܲܪܥܵܐ ܕܟܲܠܕܵܝܹ̈ܐ ܠܲܫܒ̣ܝܼܬ̣ܵܐ: ܒܚܸܙܘܵܐ ܘܲܒ̣ܪܘܼܚܵܐ ܕܐܲܠܵܗܵܐ: ܘܲܦܪܲܩ̣ ܠܹܗ ܡܹܢܝ ܚܸܙܘܵܐ ܕܲܚܙܹ̇ܝܬ̣.

²⁵ܘܡܲܠܠܹ̇ܬ̣ ܥܲܡ ܫܒ̣ܝܼܬ̣ܵܐ: ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܕܚܵܘܝܲܢܝ.