Read Aramaic Peshita Ezekiel 15 Bible Online

Ezekiel 15 - Aramaic Peshita bible

Ezekiel 15

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܡܵܢܵܐ ܢܸܗܘܹܐ ܠܩܲܝܣܵܐ ܕܲܓ̣ܦܸܬ̣ܵܐ ܡ̣ܢ ܟܠ ܩܹܝܣ: ܫܒܸܫܬܵܐ ܕܲܗܘ̤ܵܬ̣ ܒܩܲܝ̈ܣܹܐ ܕܥܵܒ̣ܵܐ.

³ܕܲܠܡܵܐ ܡܸܬ̣ܢ̱ܣܸܒ̣ ܡܸܢܵܗ̇ ܩܲܝܣܵܐ ܠܡܸܥܒܲܪ ܡܸܢܹܗ ܥܒ̣ܵܕܼܵܐ: ܐܵܘ ܢܵܣܒ̇ܝܼܢ ܡܸܢܵܗ̇ ܣܸܟ̇ܬ̣ܵܐ ܠܡܸܬ̣ܠܵܐ ܒܵܗ̇ ܡܵܐܢܹ̈ܐ.

⁴ܐܸܠܵܐ ܐܸܬ̣ܝܲܗܒܲܬ̤ ܡܹܐܟ̣ܘܼܠܬܵܐ ܠܢܘܼܪܵܐ: ܘܬܲܪܬܹ̇ܝܢ ܣܵܘ̈ܟܹ̇ܝܗ̇ ܐܸܟ̣ܠܲܬ̤ ܢܘܼܪܵܐ: ܘܓ̣ܵܘܵܗ̇ ܚܪܸܒ̣: ܕܲܠܡܵܐ ܐܵܙܵܠ̄ܐ ܠܲܥܒ̣ܵܕܼܵܐ.

⁵ܘܟܲܕܼ ܕܲܕܼܠܵܐ ܡܘܼܡ ܗ̄ܘܼܵܬ̣ ܠܵܐ ܐܵܙܵܠ̄ܐ ܗ̄ܘܼܵܬ̣ ܠܲܥܒ̣ܵܕܼܵܐ: ܗܵܫܵܐ ܕܐܸܟܲܠܬ̣ܵܗ̇ ܢܘܼܪܵܐ ܘܚܸܪܒܲܬ̤: ܐܲܝܟܲܢܵܐ ܐܵܙܵܠ̄ܐ ܠܲܥܒ̣ܵܕܼܵܐ.

⁶ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܝܟ ܕܝܸܗ̄ܒܹ̇ܬ̣ ܩܲܝܣܵܐ ܕܲܓ̣ܦܸܬ̣ܵܐ ܡ̣ܢ ܟܠܗܘܿܢ ܩܲܝܣܹ̈ܐ ܕܥܵܒ̣ܵܐ ܡܹܐܟ̣ܘܼܠܬܵܐ ܠܢܘܼܪܵܐ: ܗܵܟܲܢܵܐ ܝܸܗ̄ܒܹ̇ܬ̣ ܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ.

⁷ܘܐܸܬܸ̇ܠ ܪܘܼܓ̣ܙܝ ܒܗܘܿܢ: ܡ̣ܢ ܢܘܼܪܵܐ ܢܦܲܩ̣ܘ ܘܢܘܼܪܵܐ ܬܹܐܟ̣ܘܿܠ ܐܸܢܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܣܵܡܹ̇ܬ̣ ܪܘܼܓ̣ܙܝ ܥܠܲܝܗܘܿܢ.

⁸ܘܐܸܬ̇ܠܝܼܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ: ܥܲܠ ܕܲܥܒܲܕܼܘ ܥܵܘܼܠܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.