Read Aramaic Peshita Ezekiel 17 Bible Online

Ezekiel 17 - Aramaic Peshita bible

Ezekiel 17

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܐܲܚܘܿܕܼ ܐܘܼܚܕ̇ܬ̣ܵܐ: ܘܐܲܡܬܸ̇ܠ ܡܲܬ̣ܠܵܐ ܥܲܠ ܕܒܹܝܬ̣ ܝܑܼܣܪܵܝܹܠ.

³ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܸܫܪܵܐ ܪܲܒܵܐ ܕܪܵܘܪܒ̣ܝܼܢ ܓܸܦܵܘ̈ܗܝ: ܘܐܲܪܝܼܟ̣ܝܼܢ ܓܸܠܦܵܢܵܘ̈ܗܝ: ܘܡܲܠ̈ܝܵܢ ܛܸܦܪ̈ܵܘܗܝ: ܘܥܲܒ̇ܝܼܛ ܡܸܠܓܹ̇ܗ: ܐܸܬ̣ܵܐ ܠܠܸܒ̣ܢܵܢ: ܘܲܢܣܲܒ̣ ܡ̣ܢ ܓܒܲـ̈ـܝܵܐ ܕܥܲܪ̈ܩܹܐ.

⁴ܘܲܩ̣ܛܲܡ ܪܹܫ ܡܲܪܒ̇ܝܼܬܹܗ: ܘܐܲܝܬ̇ܝܹܗ ܠܐܲܪܥܵܐ ܕܲܟ̣ܢܲܥܢ: ܘܣܵܡܹܗ ܒܲܡܕܼܝܼܢ̄ܬܵܐ ܕܬܲܓܵܪܹ̈ܐ.

⁵ܘܲܢܣܲܒ̣ ܡ̣ܢ ܙܲܪܥܵܐ ܕܐܲܪܥܵܐ: ܘܐܲܪܡܝܼ ܒܡܲܕܼܒ̇ܪܵܐ: ܢܸܨܒ̇ܬ̣ܵܐ ܥܲܠ ܡܲـ̈ـܝܵܐ ܣܲܓ̇ܝܼ̈ܐܹܐ: ܘܣܵܡܵܗ̇ ܠܕܼܵܘܩܵܐ.

⁶ܘܝܼܥܵܬ̤ ܘܲܗܘ̤ܵܬ̣ ܓܦܸܬܵܐ ܡܪܲܥܲܕ̇ܬ̣ܵܐ ܘܡܲܟ̇ܝܼܟܲܬ̣ ܩܵܘܡܬ̣ܵܐ: ܕܢܸܬ̣ܚܙܘܿܢ ܫܲܒ̇ܘܼܩܹ̈ܝܗ̇ ܥܠܵܘܗܝ: ܘܥܸܩܵܪܹ̈ܝܗ̇ ܢܸܗܘܘܿܢ ܬܚܘܿܬ̣ܵܘܗܝ: ܘܲܗܘ̤ܵܬ̣ ܓܦܸܬܵܐ ܘܥܸܒܲܕܲܬ̤ ܫܲܒ̇ܘܼܩܹ̈ܐ: ܘܦܸܫܛܲܬ̤ ܥܢܵܩܹ̈ܝܗ̇.

⁷ܗܵܐ ܢܸܫܪܵܐ ܐ̄ܚܪܹܢܵܐ ܪܲܒܵܐ ܕܪܵܘܪܒ̣ܝܼܢ ܓܸܦܵܘ̈ܗܝ: ܘܣܲܓ̇ܝܼܵܐ̈ܢ ܛܸܦܪ̈ܵܘܗܝ: ܘܲܓ̣ܦܸܬܵܐ ܗܵܕܹܐ ܐܲܟ̣ܪ̱ܟܲܬ̤ ܥܸܩܵܪܹ̈ܝܗ̇ ܥܠܵܘܗܝ: ܘܕܼܵܠܝܵـ̈ـܬ̣ܵܗ̇ ܠܲܪܡܝܲܬ̤ ܥܠܵܘܗܝ: ܕܢܲܫܩܹܝܗ̇ ܡ̣ܢ ܡܸܕܼܪܵܐ ܕܢܸܨܒ̇ܬ̣ܵܗ̇.

⁸ܒܚܲܩܠܵܐ ܫܲܦܝܼܪܵܬܵܐ ܘܲܒ̣ܡܲـ̈ـܝܵܐ ܣܲܓ̇ܝܼ̈ܐܹܐ ܢܨܝܼܒ̣ܵܐ: ܕܬܸܥܒܸ̇ܕܼ ܛܲܪ̈ܦܹܐ ܘܬܸܛܥܲܢ ܦܹܐܪܹ̈ܐ: ܘܬܸܗܘܹܐ ܓܦܸܬܵܐ ܫܒ̣ܝܼܚܬܵܐ.

⁹ܐܸܡܲܪ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܬܲܟ̣ܫܲܪ. ܐܸܠܵܐ ܥܸܩܵܪܹ̈ܝܗ̇ ܢܸܬ̣ܦܲܣܩܘܼܢ: ܘܦܹܐܪܹ̈ܝܗ̇ ܢܸܬ̣ܡ̱ܣܘܿܢ ܘܢܹܐܒ̣ܫܘܼܢ: ܘܟ̣ܠܗܘܿܢ ܛܲܪ̈ܦܹܐ ܕܡܵܘܥܝܼܬ̣ܵܗ̇ ܢܹܐܒ̣ܫܘܼܢ: ܘܠܵܐ ܒܲܕܼܪܵܥܵܐ ܪܵܡܵܐ ܘܠܵܐ ܒܥܲܡܡܹ̈ܐ ܣܲܓ̇ܝܼ̈ܐܹܐ: ܢܸܥܩ̄ܪܝܼܗ̇ ܡ̣ܢ ܥܸܩܵܪܵܗ̇.

¹⁰ܗܵܐ ܢܨܝܼܒ̣ܵܐ ܐܸܠܵܐ ܠܵܐ ܬܲܟ̣ܫܲܪ: ܘܡܵܐ ܕܢܸܫܒܲܬ̤ ܒܵܗ̇ ܪܘܼܚܵܐ ܕܫܵܘܒܵܐ: ܝܵܒ̣ܫܵܐ ܒܡܸܕܼܪܵܐ ܕܡܵܘܥܝܼܬ̣ܵܗ̇.

¹¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹²ܒܲܪܢܵܫܵܐ: ܐܸܡܲܪ ܠܒܲܝܬܵܐ ܡܡܲܪܡܪܵܢܵܐ: ܠܵܐ ܝܵܕܼܥܝܼܬ̇ܘܿܢ ܡܵܢܵܐ ܐܸܢܹܝܢ ܗܵܠܹܝܢ: ܐܸܡܲܪ ܠܗܘܿܢ: ܗܵܐ ܐܵܬܹ̇ܐ ܡܲܠܟܵܐ ܕܒ̣ܵܒܹܠ ܠܐܘܿܪܸܫܠܸܡ: ܘܕܼܵܒܲܪ ܠܡܲܠܟܵܗ̇ ܘܲܠܪܵܘܪ̈ܒ̣ܵܢܹܝܗ̇ ܘܡܵܘܒܸ̇ܠ ܠܗܘܿܢ ܠܒ̣ܵܒܹܠ.

¹³ܘܢܵܣܹ̇ܒ̣ ܡ̣ܢ ܙܲܪܥܵܐ ܕܡܲܠܟ̇ܘܼܬ̣ܵܐ: ܘܲܡܩܝܼܡ ܥܲܡܹܗ ܩܝܵܡܵܐ: ܘܥܵܐܹ̇ܠ ܥܲܡܹܗ ܒܡܵܘ̈ܡܵܬ̣ܵܐ: ܘܕܼܵܒܲܪ ܠܫܲܠܝܼ̈ܛܹܐ ܕܐܲܪܥܵܐ ܕܠܵܐ ܢܸܬ̇ܬ̇ܪܝܼܡܘܼܢ.

¹⁴ܐܸܠܵܐ ܬܸܗܘܹܐ ܡܲܠܟ̇ܘܼܬ̣ܗܘܿܢ ܡܲܟ̇ܝܼܟ̣ܵܐ: ܘܢܸܛܪܘܼܢ ܩܝܵܡܹܗ: ܘܲܢܩܝܼܡܘܼܢ ܥܲܡܹܗ.

¹⁵ܘܢܸܡܪܲܕܼ ܥܠܵܘܗܝ: ܘܲܢܫܲܕܲܪ ܐܝܼܙܓܲܕܵܘ̈ܗܝ ܠܡܸܨܪܹܝܢ: ܕܢܸܬ̇ܠܘܼܢ ܠܹܗ ܪ̈ܲܟ̣ܫܵܐ ܘܥܲܡܵܐ ܣܲܓ̇ܝܼܵܐܐ: ܠܵܐ ܢܲܟ̣ܫܲܪ ܘܠܵܐ ܢܸܬ̣ܦܲܨܹܐ ܡܲܢ ܕܗܵܟܲܢܵܐ ܥ̣ܒܲܕܼ.

¹⁶ܚܲܝ ܐ̄ܢܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܒܲܐܬ̣ܪܵܐ ܕܐܲܩܝܼܡܝܼܘܗܝ ܡܲܠܟܵܐ: ܘܫܵܛ̣ ܡܵܘ̈ܡܵܬ̣ܝ ܘܒܲܛܸܠ ܩܝܵܡܝ: ܒܓ̣ܵܘ ܒܵܒܹܠ ܢܡܘܼܬ̣.

¹⁷ܘܠܵܐ ܒܚܲܝܠܵܐ ܪܲܒܵܐ: ܘܐܵܦܠܵܐ ܒܪ̈ܲܟ̣ܫܵܐ ܣܲܓ̇ܝܼܵܐܐ: ܢܸܥܒܸ̇ܕܼ ܥܲܡܹܗ ܦܸܪܥܘܿܢ ܩܪܵܒ̣ܵܐ: ܐܸܠܵܐ ܒܲܟ̣ܡܹܐܢܹ̈ܐ ܘܲܒ̣ܕܼܵܘ̈ܩܹܐ ܢܵܘܒܸ̇ܕܼ ܢܲܦ̮̈ܫܵܬ̣ܵܐ ܣܲܓ̇ܝܼܵܐ̈ܬ̣ܵܐ.

¹⁸ܥܲܠ ܕܫܵܛ̣ ܡܵܘ̈ܡܵܬ̣ܵܐ ܘܒܲܛܸܠ ܩܝܵܡܵܐ: ܢܲܫܠܸܡ ܐܝܼܕܹܗ ܘܠܵܐ ܢܸܬ̣ܦܲܨܹܐ: ܥܲܠ ܕܲܥ̣ܒܲܕܼ ܗܵܠܹܝܢ ܟܠܗܹܝܢ.

¹⁹ܡܸܛܠ ܗܵܠܹܝܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. ܚܲܝ ܐ̄ܢܵܐ: ܥܲܠ ܕܫܵܛ̣ ܡܵܘ̈ܡܵܬ̣ܝ: ܘܒܲܛܸܠ̣ ܩܝܵܡܝ: ܐܲܣܩܝܼܗ̇ ܒܪܹܫܹܗ.

²⁰ܘܐܸܦܪܘܿܣ ܡܨܝܼܕ̇ܬ̇ܝ ܥܠܵܘܗܝ ܘܢܸܬ̇ܬ̇ܚܸܕܼ ܒܵܗ̇: ܘܐܵܘܒ̇ܠܝܼܘܗܝ ܠܒ̣ܵܒܹܠ ܠܐܲܪܥܵܐ ܕܟܲܠܕܼܵܝܹ̈ܐ: ܘܐܸܕ̇ܘܢܝܼܘܗܝ ܬܲܡܵܢ ܥܲܠ ܥܵܘܼܠܵܐ ܕܐܲܥܠܝܼ ܒܝܼ.

²¹ܘܟ̣ܠܗܘܿܢ ܚܹܐܪ̈ܵܘܗܝ ܘܟ̣ܠܗܘܿܢ ܩܲܪ̈ܝܼܒ̣ܵܘܗܝ ܢܸܦܠܘܿܢ ܒܚܲܪܒܵܐ: ܘܐܲܝܠܹܝܢ ܕܡܸܫܬܲܚܪܝܼܢ ܢܸܬ̇ܕܪܘܿܢ ܠܟ̣ܠ ܪܘܼܚ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܡܲܠܠܹ̇ܬ̣.

²²ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܹܣܲܒ̣ ܡ̣ܢ ܓܒܲـ̈ـܝܵܐ ܕܥܲܪ̈ܩܹܐ ܪܵܡܵܐ: ܘܡ̣ܢ ܪܹܫܹܗ ܐܸܩܛܘܿܡ ܠܸܒܹ̇ܗ: ܘܐܸܨܘܿܒ̣ ܥܲܠ ܛܘܼܪܹ̈ܐ ܪ̈ܵܡܹܐ ܘܲܡܥܲܠܲܝܵـ̈ـܐ.

²³ܒܛܘܼܪܹ̈ܐ ܕܝܼܣܪܵܝܹܠ ܐܸܨܒ̣ܝܼܘܗܝ: ܘܢܸܛܥܲܢ ܛܲܪ̈ܦܹܐ ܘܢܸܥܒܸ̇ܕܼ ܦܹܐܪܹ̈ܐ: ܘܢܸܗܘܸܐ ܐܲܪܙܵܐ ܫܒ̣ܝܼܚܵܐ: ܘܬܸܫܟܲܢ ܒܹܗ ܟܠܵܗ̇ ܦܵܪܲܚܬ̣ܵܐ ܕܓܸܦܵܐ: ܘܲܒ̣ܛܸܠܵܠܵܐ ܕܣܵܘ̈ܟܵܘܗܝ ܢܸܫܟ̇ܢܘܼܢ.

²⁴ܘܢܸܕ̇ܥܘܼܢ ܟܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ: ܕܐܸܢܵܐ ܡܵܪܝܵܐ ܐܲܡ̇ܟܹܬ̣ ܩܲܝܣܵܐ ܪܵܡܵܐ: ܘܐܲܪܝܼܡܹ̇ܬ̣ ܩܲܝܣܵܐ ܡܲܟ̇ܝܼܟ̣ܵܐ: ܘܐܵܘܒ̇ܫܹܬ̣ ܩܲܝܣܵܐ ܪܲܛܝܼܒ̣ܵܐ: ܘܐܵܘܥ̇ܝܼܬ̣ ܩܲܝܣܵܐ ܝܲܒ̇ܝܼܫܵܐ: ܐܸܢܵܐ ܡܵܪܝܵܐ ܡܲܠܠܹ̇ܬ̣ ܘܥܸܒ̣ܕܹ̇ܬ̣.