Read Aramaic Peshita Ezekiel 19 Bible Online

Ezekiel 19 - Aramaic Peshita bible

Ezekiel 19

¹ܐܲܢ̄ܬ̇ ܕܹܝܢ ܒܲܪܢܵܫܵܐ ܫܩܘܿܠ ܐܘܿܠܝܼܬܵܐ ܥܲܠ ܪܵܘܪ̈ܒ̣ܵܢܹܐ ܕܝܼܣܪܵܝܹܠ.

²ܘܐܸܡܲܪ: ܡܵܢܲܐ ܗ̄ܝܼ ܐܸܡܵܟ ܓܘܼܪܝܵܐ ܕܐܲܪܝܵܐ: ܕܒܲܝܢܵܬ̣ ܐܲܪ̈ܝܵܘܵܬ̣ܵܐ ܪܲܒ̇ܝܼܥܵܐ: ܘܒܲܝܢܵܬ̣ ܐܲܪ̈ܝܵܘܵܬ̣ܵܐ ܪܲܒ̇ܝܲܬ̤ ܓܪܹ̈ܝܗ̇.

³ܘܲܪܒ̣ܵܐ ܚܲܕܼ ܡ̣ܢ ܓܪܹ̈ܝܗ̇ ܘܲܗܘ̤ܵܐ ܐܲܪܝܵܐ: ܘܝܼܠܸܦ ܠܡܸܬ̣ܒܲܪ ܬܒ̣ܵܪܵܐ: ܘܐܸܟܲܠ ܒܲܪܢܵܫܵܐ.

⁴ܘܲܫ̣ܡܲܥܘ ܛܸܒܹ̇ܗ ܥܲܡܡܹ̈ܐ: ܘܒܲܡܨܝܼܕ̇ܬ̇ܗܘܿܢ ܐܸܬ̇ܬ̇ܚܸܕܼ: ܘܐܲܝܬ̇ܝܼܘܗܝ ܒܲܒ̣ܠܵܡܵܐ ܠܐܲܪܥܵܐ ܕܡܸܨܪܹܝܢ.

⁵ܘܟܲܕܼ ܚܙܵܬ̤ ܐܸܡܹܗ ܕܐܸܬ̣ܟܲܪܗܲܬ̣ ܘܐܸܒܲܕܼ ܠܹܗ ܣܲܒ̣ܪܵܗ̇: ܢܸܣܒܲܬ̤ ܡ̣ܢ ܓܪܹ̈ܝܗ̇ ܘܲܥܒܲܕܼܬܹܗ ܐܲܪܝܵܐ.

⁶ܘܗܲܠܸܟ ܒܲܝܢܵܬ̣ ܐܲܪ̈ܝܵܘܵܬ̣ܵܐ: ܘܲܗܘ̤ܵܐ ܐܲܪܝܵܐ: ܘܝܼܠܸܦ ܠܡܸܬ̣ܒܲܪ ܬܒ̣ܵܪܵܐ: ܘܐܸܟܲܠ̣ ܒܲܪܢܵܫܵܐ.

⁷ܘܗܲܠܸܟ ܒܥܘܼܫܢܹܗ: ܘܲܡܕܼܝܼ̈ܢܵܬܵܐ ܐܲܚܪܸܒ̣: ܘܚܒܸ̇ܠ ܐܲܪܥܵܐ ܒܲܡܠܹܐܵܗ̇ ܒܩܵܠܵܐ ܕܢܸܗ̱ܡܬܹܗ.

⁸ܘܐܸܬ̣ܟܲܢܲܫܘ ܥܠܵܘܗܝ ܥܲܡܡܹ̈ܐ ܡ̣ܢ ܡܕܼܝܼ̈ܢܵܬ̣ܵܐ ܕܲܚܕܼܵܪ̈ܵܘܗܝ: ܘܲܦܪܲܣܘ ܥܠܵܘܗܝ ܡܨܝܼܕ̇ܬ̇ܗܘܿܢ: ܘܒ̣ܵܗ̇ ܐܸܬ̇ܬ̇ܚܸܕܼ.

⁹ܘܚܲܒ̣ܫܘܼܗܝ ܒܢܵܡܲܪܬܵܐ: ܘܐܵܘܒ̇ܠܘܼܗܝ ܠܡܲܠܟܵܐ ܕܒ̣ܵܒܹܠ: ܘܐܲܥܠܹܗ ܠܒܹܝܬ̣ ܚܒ̣ܘܼܫܝܵܐ: ܕܬ̣ܘܼܒ̣ ܠܵܐ ܢܸܫܬ̇ܡܲܥ ܩܵܠܹܗ ܒܛܘܼܪܹ̈ܐ ܕܝܼܣܪܵܝܹܠ.

¹⁰ܐܸܡܵܟ ܐܲܝܟ ܓܦܸܬܵܐ ܒܲܕܼܡܵܟ: ܥܲܠ ܡܲـ̈ـܝܵܐ ܢܨܝܼܒ̣ܵܐ. ܦܹܐܪܹ̈ܝܗ̇ ܘܥܵܘܦܹ̈ܝܗ̇ ܗܘ̤ܵܘ ܒ̈ܡܲܝܵܐ ܣܲܓ̇ܝܼ̈ܐܹܐ.

¹¹ܘܲܗܘ̤ܵܘ ܠܵܗ̇ ܚܘܼܛܪܹ̈ܐ ܥܲܫܝܼܢܹ̈ܐ ܥܲܠ ܫܲܒ̣̈ܛܹܐ ܕܪܵܘܪ̈ܒ̣ܵܢܹܐ: ܘܬܸܬ̇ܬ̇ܪܝܼܡܲܬ̤ ܩܵܘܡܲܬ̣ܗܘܿܢ ܡ̣ܢ ܒܲܝܢܵܬ̣ ܢܘܼܪ̈ܒܹ̇ܝܗ̇: ܘܐܸܬ̣ܚܙܝܼܘ ܒܪܵܘܡܗܘܿܢ ܘܲܒ̣ܣܘܿܓ̣ܵܐܐ ܕܕܼܵܠܝܵـ̈ـܬ̣ܗܘܿܢ.

¹²ܘܐܸܬ̣ܥ̱ܩܲܪܘ ܒܚܸܡܬ̣ܵܐ ܘܒܲܐܪܥܵܐ ܐܸܫܬ̇ܕܼܝܼܘ: ܘܪܘܼܚܵܐ ܕܫܵܘܒܵܐ ܐܵܘܒ̇ܫܲܬ̤ ܦܹܐܪܹ̈ܝܗ̇: ܘܐܸܬ̣ܦܲܪܲܩܘ ܘܝܼܒܸܫܘ ܚܘܼܛܪܹ̈ܐ ܕܥܘܼܫܢܵܗ̇: ܘܢܘܼܪܵܐ ܐܸܟܲܠܬ̣ܵܗ̇.

¹³ܡܸܟܹ̇ܝܠ ܐܸܬ̣ܢܲܨܒܲܬ̤ ܒܡܲܕܼܒ̇ܪܵܐ: ܒܐܲܪܥܵܐ ܨܗܝܼܬ̣ܵܐ ܘܨܵܕܼܝܼܬ̣ܵܐ.

¹⁴ܘܢܸܦܩܲܬ̤ ܢܘܼܪܵܐ ܡ̣ܢ ܚܘܼܛܪܹ̈ܝܗ̇ ܓܒܲـ̈ـܝܵܐ ܘܐܸܟܲܠܬ̤ ܦܹܐܪܹ̈ܝܗ̇: ܘܠܵܐ ܐܸܫܬ̇ܟܲܚ ܒܵܗ̇ ܬܘܼܒ̣ ܚܘܼܛܪܵܐ ܥܲܫܝܼܢܵܐ: ܐܵܘ ܫܲܒ̣ܛܵܐ ܕܢܸܗܘܹܐ ܫܲܠܝܼܛܵܐ. ܐܘܿܠܝܼܬ̣ܵܐ ܗ̄ܝܼ ܬܸܗܘܹܐ ܠܐܘܿܠܝܼܬ̣ܵܐ.