Read Aramaic Peshita Ezekiel 2 Bible Online

Ezekiel 2 - Aramaic Peshita bible

Ezekiel 2

¹ܘܐܸܡܲܪ ܠܝܼ: ܒܲܪܢܵܫܵܐ: ܩܘܼܡ ܥܲܠ ܪܸ̈ܓ̣ܠܲܝܟ ܐܹܡܲܠܸܠ ܥܲܡܵܟ.

²ܘܥܸܠܲܬ̤ ܒܝܼ ܪܘܼܚܵܐ ܟܲܕܼ ܡܡܲܠܸܠ ܥܲܡܝ: ܘܐܲܩܝܼܡܬܲܢܝ ܥܲܠ ܪܸ̈ܓ̣ܠܲܝ: ܘܫܸܡ̇ܥܹܬ̣ ܕܲܡܡܲܠܸܠ ܥܲܡܝ.

³ܘܐܸܡܲܪ ܠܝܼ: ܒܲܪܢܵܫܵܐ: ܡܫܲܕܲܪ ܐ̄ܢܵܐ ܠܵܟ ܥܲܠ ܒܢܲܝ̈ ܝܑܼܣܪܵܝܹܠ: ܥܲܠ ܥܲܡܵܐ ܡܵܪܘܿܕܼܵܐ ܕܲܡ̣ܪܲܕܼܘ ܥܠܲܝ ܗܸܢܘܿܢ ܘܐܲܒ̣ܵܗܲܝ̈ܗܘܿܢ: ܘܐܲܥܠܝܼܘ ܒܝܼ ܥܕܲܡܵܐ ܠܝܵܘܡܵܢܵܐ.

⁴ܘܥܲܠ ܒܢܲـ̈ـܝܵܐ ܕܩܲܫ̈ܝܵܢ ܐܲܦܲܝ̈ܗܘܿܢ: ܘܥܲܫܝܼܢ ܠܸܒ̇ܗܘܿܢ ܡܫܲܕܲܪ ܐ̄ܢܵܐ ܠܵܟ: ܐܹܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁵ܟܒܲܪ ܢܸܫ̱ܡܥܘܼܢ ܘܲܢܙܘܼܥܘܼܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ: ܘܢܸܕ̇ܥܘܼܢ ܕܲܢܒ̣ܝܼܵܐ ܐܲܢ̄ܬ̇ ܒܲܝܢܵܬ̣ܗܘܿܢ.

⁶ܘܐܲܢ̄ܬ̇ ܒܲܪܢܵܫܵܐ ܬܸܕܼܚܲܠ ܡܸܢܗܘܿܢ: ܘܡ̣ܢ ܡܸܠܲܝ̈ܗܘܿܢ ܠܵܐ ܬܙܘܼܥ: ܕܣܵܪܒ̇ܝܼܢ ܘܡܲܣܠܹܝܢ ܠܵܟ: ܡܸܛܠ ܕܒܲܝܢܵܬ̣ ܥܩܲܪ̈ܒܹܐ ܥܵܡܲܪ ܐܲܢ̄ܬ̇: ܠܵܐ ܬܸܕܼܚܲܠ ܡ̣ܢ ܡܸܠܲܝ̈ܗܘܿܢ: ܘܡ̣ܢ ܐܲܦܲܝ̈ܗܘܿܢ ܠܵܐ ܬܙܘܼܥ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

⁷ܐܸܠܵܐ ܐܸܡܲܪ ܠܗܘܿܢ ܦܸܬ̣ܓ̣ܵܡܲܝ̈: ܟܒܲܪ ܢܸܫ̱ܡܥܘܼܢ ܘܲܢܙܘܼܥܘܼܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

⁸ܐܲܢ̄ܬ̇ ܕܹܝܢ ܒܵܪܢܵܫܵܐ: ܫܡܲܥ ܡܸܕܸ̇ܡ ܕܐܵܡܲܪ ܐ̄ܢܵܐ ܠܵܟ: ܠܵܐ ܬܸܗܘܹܐ ܡܲܪܡܪܵܢ ܐܲܝܟ ܒܲܝܬܵܐ ܡܡܲܪܡܪܵܢܵܐ: ܐܸܠܵܐ ܦܬܲܚ ܦܘܼܡܵܟ: ܘܐܲܟ̣ܘܿܠ ܡܸܕܸ̇ܡ ܕܝܵܗܹ̇ܒ̣ ܐ̄ܢܵܐ ܠܵܟ.

⁹ܘܲܚܙܹ̇ܝܬ̣ ܘܗܵܐ ܐܝܼܕܼܵܐ ܐܸܬ̣ܦܲܫܛܲܬ̤ ܠܘܵܬ̣: ܘܐܝܼܬ̣ ܒܵܗ̇ ܟܸܪܟܵܐ ܕܣܸܦܪܵܐ.

¹⁰ܘܦܲܫܛܹܗ ܩܕܼܵܡܲܝ: ܘܲܟ̣ܬܝܼܒ̣ ܡ̣ܢ ܩܕܼܵܡܵܘܗܝ ܘܡ̣ܢ ܒܸܣܬ̇ܪܹܗ: ܘܲܟ̣ܬ̣ܵܝܼ̈ܒ̣ܵܢ ܒܹܗ ܩܝܼ̈ܢܵܬ̣ܵܐ: ܘܚܸܫ̈ܒܵܬ̣ܵܐ: ܘܐܘܿܠܝܵـ̈ـܬ̣ܵܐ.