Read Aramaic Peshita Ezekiel 20 Bible Online

Ezekiel 20 - Aramaic Peshita bible

Ezekiel 20

¹ܘܲܗܘ̤ܵܐ ܒܫܲܢ̄ܬܵܐ ܫܒ̣ܝܼܥܵܝܬܵܐ ܒܲܥܣܲܪܬܵܐ ܒܝܲܪܚܵܐ ܚܡܝܼܫܵܝܵܐ: ܐܸܬ̣ܵܘ ܓܲܒ̣ܪܹ̈ܐ ܡ̣ܢ ܣܵܒܹ̈ܐ ܕܝܼܣܪܵܝܹܠ: ܠܡܸܫܐܲܠ ܡ̣ܢ ܡܵܪܝܵܐ: ܘܝܼܬܸܒ̣ܘ ܩܕܼܵܡܲܝ.

²ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

³ܒܲܪܢܵܫܵܐ: ܡܲܠܸܠ ܥܲܡ ܣܵܒܹ̈ܐ ܕܲܒ̣ܢܲܝ̈ ܝܑܼܣܪܵܝܹܠ: ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܲܡܫܲܐܵܠܘܼܬܲܢܝ ܐܵܬܹ̇ܝܢ ܐ̄ܢܬ̇ܘܿܢ: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܐܸܬܸ̇ܠ ܠܟ̣ܘܿܢ ܦܸܬ̣ܓ̣ܵܡܵܐ.

⁴ܕܘܼܢ ܐܸܢܘܿܢ: ܕܘܼܢ ܐܸܢܘܿܢ ܒܲܪܢܵܫܵܐ: ܘܚܵܘܵܐ ܐܸܢܘܿܢ ܛܲܢܦܘܼܬ̣ܵܐ ܕܐܲܒ̣ܵܗܲܝ̈ܗܘܿܢ: ܘܐܸܡܲܪ ܠܗܘܿܢ.

⁵ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܝܵܘܡܵܐ ܕܲܓ̣ܒܹܝܬ̣ ܠܝܼܣܪܵܝܹܠ ܐܲܪܝܡܹ̇ܬ̣ ܐܝܼܕܼܝ ܥܲܠ ܙܲܪܥܵܐ ܕܒܹܝܬ̣ ܝܲܥܩܘܿܒ̣: ܘܐܸܬ̣ܓ̇ܠܝܼܬ̣ ܠܗܘܿܢ ܒܐܲܪܥܵܐ ܕܡܸܨܪܹܝܢ: ܘܐܲܪܝܼܡܹ̇ܬ̣ ܐܝܼܕܼܝ ܘܐܸܡ̇ܪܹܬ̣ ܠܗܘܿܢ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ.

⁶ܒܹܗ ܒܝܵܘܡܵܐ ܗܵܘܿ: ܐܲܪܝܼܡܹ̇ܬ̣ ܠܗܘܿܢ ܐܝܼܕܼܝ ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܠܐܲܪܥܵܐ ܕܝܸܗ̄ܒܹ̇ܬ̣ ܠܗܘܿܢ: ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ: ܫܘܼܒ̣ܚܵܐ ܗ̄ܝܼ ܕܟ̣ܠܗܹܝܢ ܡܕܼܝܼ̈ܢܵܬ̣ܵܐ.

⁷ܘܐܸܡ̇ܪܹܬ̣ ܠܗܘܿܢ: ܐܲܥܒܲܪܘ ܐ̄ܢܵܫ ܦܬܲܟ̣ܪܹܗ ܡ̣ܢ ܥܲܝܢܵܘ̈ܗܝ: ܘܲܒ̣ܕܸܚ̈ܠܵܬ̣ܵܐ ܕܡܸܨܪܹܝܢ ܠܵܐ ܬܸܬ̇ܛܲܢܦܘܿܢ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ.

⁸ܘܡܲܪܡܪܘܼܢܝ ܘܠܵܐ ܨܒ̣ܵܘ ܠܡܸܫܡܲܥ: ܘܠܵܐ ܐܲܥܒܲܪܘ ܦܬܲܟ̣ܪܹ̈ܐ ܡ̣ܢ ܥܲܝܢܲܝ̈ܗܘܿܢ: ܘܠܵܐ ܫܒܲܩ̣ܘ ܕܸܚ̈ܠܵܬ̣ܵܐ ܕܡܸܨܪܹܝܢ: ܘܐܸܡ̇ܪܹܬ̣ ܕܐܹܫܘܿܕܼ ܚܸܡܬ̣ܝ ܥܠܲܝܗܘܿܢ: ܘܐܹܫܲܡܠܸܐ ܪܘܼܓ̣ܙܝ ܒܗܘܿܢ ܒܓ̣ܵܘ ܐܲܪܥܵܐ ܕܡܸܨܪܹܝܢ.

⁹ܘܚܵܣܹ̇ܬ̣ ܡܸܛܠ ܫܹܡܝ ܕܠܵܐ ܢܸܬ̇ܛܵܘܲܫ ܒܹܝܬ̣ ܥܲܡܡܹ̈ܐ: ܕܐܸܬ̣ܓ̇ܠܝܼܬ̣ ܥܠܲܝܗܘܿܢ ܠܥܹܢܲܝܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.

¹⁰ܘܐܲܦܩܹ̇ܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܐܲܝܬ̇ܝܼܬ̣ ܐܸܢܘܿܢ ܠܡܲܕܼܒ̇ܪܵܐ.

¹¹ܘܝܸܗ̄ܒܹ̇ܬ̣ ܠܗܘܿܢ ܦܘܼܩ̈ܕܵܢܲܝ: ܘܕܼܝܼܢܲܝ̈ ܐܵܘܕ̇ܥܹ̇ܬ̣ ܐܸܢܘܿܢ: ܕܐܸܢ ܥܵܒܹ̇ܕܼ ܠܗܘܿܢ ܒܲܪܢܵܫܵܐ ܚܵܝܹ̇ܐ ܒܗܘܿܢ.

¹²ܘܐܵܦ ܫܲܒܲܝ̈ ܝܸܗ̄ܒܹ̇ܬ̣ ܠܗܘܿܢ: ܕܢܸܗܘ̈ܝܵܢ ܐܵܬ̤ܵܐ ܒܲܝܢܲܝ ܘܲܠܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸ̇ܫ ܠܗܘܿܢ.

¹³ܘܡܲܪܡܪܘܼܢܝ ܕܒܹܝܬ̣ ܝܑܼܣܪܵܝܹܠ ܒܡܲܕܼܒ̇ܪܵܐ: ܘܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܘ. .ܕܼܝܼܢܲܝ̈ ܐܲܣܠܝܼܘ: ܕܐܸܢ ܥܵܒܹ̇ܕܼ ܠܗܘܿܢ ܒܲܪܢܵܫܵܐ ܚܵܝܹ̇ܐ ܒܗܘܿܢ: ܘܫܲܒܲܝ̈ ܛܵܘܸܫܘ: ܘܐܸܡ̇ܪܹܬ̣ ܕܐܹܫܘܿܕܼ ܪܘܼܓ̣ܙܝ ܥܠܲܝܗܘܿܢ ܒܡܲܕܼܒ̇ܪܵܐ ܘܐܵܘܒܸ̇ܕܼ ܐܸܢܘܿܢ.

¹⁴ܘܚܵܣܹ̇ܬ̣ ܡܸܛܠ ܫܹܡܝ: ܕܠܵܐ ܢܸܬ̇ܛܵܘܲܫ ܠܥܹܝܢ ܥܲܡܡܹ̈ܐ ܕܐܲܦܩܹ̇ܬ̣ ܐܸܢܘܿܢ ܠܥܹܢܲܝܗܘܿܢ.

¹⁵ܐܵܦ ܐܸܢܵܐ ܐܲܪܝܼܡܹ̇ܬ̣ ܠܗܘܿܢ ܐܝܼܕܼܝ ܒܡܲܕܼܒ̇ܪܵܐ: ܕܠܵܐ ܐܲܥܸܠ ܐܸܢܘܿܢ ܠܐܲܪܥܵܐ ܕܝܸܗ̄ܒܹ̇ܬ̣ ܠܗܘܿܢ: ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ: ܫܘܼܒ̣ܚܵܐ ܗ̄ܝܼ ܕܟ̣ܠܗܹܝܢ ܡܕܼܝܼ̈ܢܵܬ̣ܵܐ.

¹⁶ܥܲܠ ܕܐܲܣܠܝܼܘ ܕܝܼܢܲܝ̈: ܘܫܲܒܲܝ̈ ܛܵܒ̣ ܛܵܘܸܫܘ: ܘܒ̣ܵܬܲܪ ܦܬܲܟ̣ܪ̈ܲܝܗܘܿܢ ܐܸܙܲܠ̣ ܠܸܒ̇ܗܘܿܢ.

¹⁷ܘܚܵܣܲܬ̤ ܥܲܝܢܝ ܥܠܲܝܗܘܿܢ: ܕܠܵܐ ܐܹܚܲܒܲܠ ܐܸܢܘܿܢ: ܘܠܵܐ ܐܲܣܝܼܦ ܐܸܢܘܿܢ ܒܡܲܕܼܒ̇ܪܵܐ.

¹⁸ܘܐܸܡ̇ܪܹܬ̣ ܠܲܒ̣ܢܲܝ̈ܗܘܿܢ ܒܡܲܕܼܒ̇ܪܵܐ: ܒܦܘܼܩ̈ܕܵܢܹܐ ܕܐܲܒ̣ܵܗܲܝ̈ܟ̇ܘܿܢ ܠܵܐ ܬܗܲܠܟ̣ܘܿܢ: ܘܕܼܝܼܢܲܝ̈ܗܘܿܢ ܠܵܐ ܬܸܛܪܘܼܢ: ܘܒܲܦܬܲܟ̣ܪ̈ܲܝܗܘܿܢ ܠܵܐ ܬܸܬ̇ܛܲܢܦܘܼܢ.

¹⁹ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ: ܒܦܘܼܩ̈ܕܵܢܲܝ ܗܲܠܸܟ̣ܘ: ܘܕܼܝܼܢܲܝ̈ ܛܲܪܘ ܘܲܥܒܸܕܼܘ ܐܸܢܘܿܢ.

²⁰ܘܩܲܕܸ̇ܫܘ ܫܲܒܲܝ̈ ܘܢܸܗܘ̈ܝܵܢ ܐܵܬ̤ܵܐ ܒܲܝܢܲܝ ܘܲܠܟ̣ܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ.

²¹ܘܡܲܪܡܪܘܼܢܝ ܒܢܲـ̈ـܝܵܐ ܘܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܘ: ܘܕܼܝܼܢܲܝ̈ ܠܵܐ ܢ̣ܛܲܪܘ: ܘܠܵܐ ܥܒܲܕܼܘ ܐܸܢܘܿܢ: ܕܐܸܢ ܥܵܒܹ̇ܕܼ ܠܗܘܿܢ ܒܲܪܢܵܫܵܐ ܚܵܝܹ̇ܐ ܒܗܘܿܢ: ܘܫܲܒܲܝ̈ ܛܵܘܸܫܘ: ܘܐܸܡ̇ܟܹ̇ܬ̣ ܕܐܹܫܘܿܕܼ ܚܸܡܬ̣ܝ: ܘܐܹܫܲܡܠܹܐ ܥܠܲܝܗܘܿܢ ܪܘܼܓ̣ܙܝ ܒܡܲܕܼܒ̇ܪܵܐ.

²²ܘܚܵܣܹ̇ܬ̣ ܡܸܛܠ ܫܹܡܝ: ܕܠܵܐ ܢܸܬ̇ܛܵܘܲܫ ܒܹܝܬ̣ ܥܲܡܡܹ̈ܐ ܕܐܲܦܩܹ̇ܬ̣ ܐܸܢܘܿܢ ܠܥܹܢܲܝܗܘܿܢ.

²³ܐܸܠܵܐ ܐܲܪܝܼܡܹ̇ܬ̣ ܠܗܘܿܢ ܐܝܼܕܼܝ ܒܡܲܕܼܒ̇ܪܵܐ: ܕܐܹܒܲܕܲܪ ܐܸܢܘܿܢ ܒܥܲܡܡܹ̈ܐ: ܘܐܸܕܼܪܸܐ ܐܸܢܘܿܢ ܒܐܲܪ̈ܥܵܬ̣ܵܐ.

²⁴ܥܲܠ ܕܠܵܐ ܥ̣ܒܲܕܼܘ ܕܝܼܢܲܝ̈: ܘܐܲܣܠܝܼܘ ܦܘܼܩ̈ܕܵܢܲܝ ܘܛܵܘܸܫ̣ܘ ܫܲܒܲܝ̈: ܘܒ̣ܵܬܲܪ ܦܬܲܟ̣ܪܹ̈ܐ ܕܐܲܒ̣ܵܗܲܝ̈ܗܘܿܢ ܐܸܙܲܠ̣ ܥܲܝܢܲܝ̈ܗܘܿܢ.

²⁵ܘܐܸܢܵܐ ܝܸܗ̄ܒܹ̇ܬ̣ ܠܗܘܿܢ ܦܘܼܩܕܵܢܹ̈ܐ ܕܠܵܐ ܫܲܦܝܼܪܝܼܢ: ܘܕܼܝܼܢܹ̈ܐ ܕܠܵܐ ܢܸܚܘܿܢ ܒܗܘܿܢ.

²⁶ܘܛܲܢܦܹ̇ܬ̣ ܐܸܢܘܿܢ ܒܡܵܘ̈ܗܒ̣ܵܬ̣ܗܘܿܢ: ܡܵܐ ܕܲܡܩܲܪܒ̣ܝܼܢ ܒܘܼܟ̣ܪܹ̈ܐ: ܘܐܵܘܒܸ̇ܕܼ ܐܸܢܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

²⁷ܡܸܛܠ ܗܵܢܵܐ ܒܲܪܢܵܫܵܐ: ܡܲܠܸܠ ܥܲܡ ܕܒܹܝܬ̣ ܝܑܼܣܪܵܝܹܠ ܘܐܸܡܲܪ ܠܗܘܿܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܘܼܒ̣ ܒܗܵܕܹܐ ܓܲܕܸ̇ܦܘ ܩܕܼܵܡܲܝ ܐܲܒ̣ܵܗܲܝ̈ܟ̇ܘܿܢ: ܒܥܵܘܼܠܗܘܿܢ ܕܐܲܥ̣ܠܝܼܘ ܒܝܼ.

²⁸ܘܐܲܝܬ̇ܝܼܬ̣ ܐܸܢܘܿܢ ܠܐܲܪܥܵܐ ܕܐܲܪܝܼܡܹ̇ܬ̣ ܐܝܼܕܼܝ ܠܡܸܬ̇ܠܵܗ̇ ܠܗܘܿܢ: ܘܲܚܙܵܘ ܟܠ ܪܵܡܬ̣ܵܐ ܕܪܵܡܵܐ: ܘܟ̣ܠ ܐܝܼܠܵܢ ܕܡܲܛܲܠ: ܘܕܲܒܲܚ̣ܘ ܬܲܡܵܢ ܕܸܒ̣ܚܲܝ̈ܗܘܿܢ: ܘܩܲܪܸܒ̣ܘ ܬܲܡܵܢ ܩܘܼܪ̈ܒܵܢܲܝܗܘܿܢ: ܘܣܵܡ̣ܘ ܬܲܡܵܢ ܪܹܝܚܵܐ ܕܲܣܘܵܬ̣ܗܘܿܢ: ܘܢܲܩܝܼܘ ܬܲܡܵܢ ܢܘܼܩܵܝܗܘܿܢ.

²⁹ܘܐܸܡܪܹܬ̣ ܠܗܘܿܢ: ܡܵܢܲܐ ܗ̄ܝܼ ܦܪܲܟܵܐ ܕܐܵܬܹ̇ܝܢ ܐ̄ܢܬ̇ܘܿܢ ܠܬܲܡܵܢ: ܘܐܸܬ̣ܩܪܝܼ ܫܡܵܗ̇ ܦܪܲܟܵܐ ܥܕܲܡܵܐ ܠܝܵܘܡܵܢܵܐ.

³⁰ܡܸܛܠ ܗܵܢܵܐ: ܒܲܪܢܵܫܵܐ: ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܢ ܒܐܘܼܪܚܵܐ ܕܐܲܒ̣ܵܗܲܝ̈ܟ̇ܘܿܢ ܡܸܬ̇ܛܲܢܦܝܼܢ ܐ̄ܢܬ̇ܘܿܢ: ܘܒ̣ܵܬܲܪ ܦܬܲܟ̣ܪ̈ܲܝܗܘܿܢ ܛܵܥܹ̇ܝܢ ܐ̄ܢܬ̇ܘܿܢ.

³¹ܘܲܡܩܲܪܒ̣ܝܼܢ ܐ̄ܢܬ̇ܘܿܢ ܡܵܘܗ̈ܒ̣ܵܬ̣ܟ̣ܘܿܢ: ܘܡܲܥܒ̇ܪܝܼܢ ܐ̄ܢܬ̇ܘܿܢ ܒܢܲܝ̈ܟ̇ܘܿܢ ܒܢܘܼܪܵܐ: ܘܡܸܬ̇ܛܲܢܦܝܼܢ ܐ̄ܢܬ̇ܘܿܢ ܒܲܦܬܲܟ̣ܪ̈ܲܝܟ̇ܘܿܢ ܥܕܲܡܵܐ ܠܝܵܘܡܵܢܵܐ: ܘܨܵܒܹ̇ܝܢ ܐ̄ܢܬ̇ܘܿܢ ܕܬܸܫ̱ܐܠܘܼܢ ܡܹܢܝ ܒܹܝܬ̣ ܝܑܼܣܪܵܝܹܠ: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܐܸܬܸ̇ܠ ܠܟ̣ܘܿܢ ܦܸܬ̣ܓ̣ܵܡܵܐ.

³²ܘܗܵܝ ܕܲܒ̣ܪܸܥܝܵܢܟ̣ܘܿܢ ܠܵܐ ܬܸܗܘܹܐ: ܕܐܵܡ̇ܪܝܼܬ̇ܘܿܢ ܢܸܗܘܹܐ ܐܲܝܟ ܥܲܡܡܹ̈ܐ ܘܐܲܝܟ ܫܲܪ̈ܒ̣ܵܬ̣ܵܐ ܕܐܲܪܥܵܐ: ܘܲܢܫܲܡܸܫ ܠܩܲܝܣܹ̈ܐ ܘܲܠܟܹܐܦܹ̈ܐ.

³³ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܒ̣ܐܝܼܕܼܵܐ ܬܲܩܝܼܦܬܵܐ ܘܒܲܕܼܪܵܥܵܐ ܪܵܡܵܐ: ܘܲܒ̣ܪܘܼܓ̣ܙܵܐ ܐܲܫܝܼܕܼܵܐ ܐܲܡܠܸܟ ܥܠܲܝܟ̇ܘܿܢ.

³⁴ܘܐܲܦܸܩܟ̣ܘܿܢ ܡ̣ܢ ܥܲܡܡܹ̈ܐ: ܘܐܹܟܲܢܸܫܟ̣ܘܿܢ ܡ̣ܢ ܐܲܪ̈ܥܵܬ̣ܵܐ ܕܐܸܬ̣ܒܲܕܲܪܬ̇ܘܿܢ ܒܗܹܝܢ: ܘܒ̣ܐܝܼܕܼܵܐ ܥܲܫܝܼܢܬܵܐ ܘܒܲܕܼܪܵܥܵܐ ܪܵܡܵܐ: ܘܲܒ̣ܪܘܼܓ̣ܙܵܐ ܐܲܫܝܼܕܼܵܐ.

³⁵ܐܲܝܬܹ̇ܝܟ̣ܘܿܢ ܠܡܲܕܼܒ̇ܪܵܐ ܕܥܲܡܡܹ̈ܐ: ܘܐܹܕ̇ܢܟ̣ܘܿܢ ܬܲܡܵܢ ܐܲܦ̈ܝܼܢ ܠܘܼܩܒܲܠ ܐܲܦܝܼ̈ܢ.

³⁶ܐܲܝܟ ܕܕܵܢܹ̇ܬ̣ ܥܲܡ ܐܲܒ̣ܵܗܲܝ̈ܟ̇ܘܿܢ ܒܡܲܕܼܒ̇ܪܵܐ ܕܐܲܪܥܵܐ ܕܡܸܨܪܹܝܢ: ܗܵܟܲܢܵܐ ܐܸܕ̇ܘܼܢ ܥܲܡܟ̣ܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

³⁷ܘܐܲܥܒܲܪܟ̣ܘܿܢ ܬܚܹܝܬ̣ ܫܲܒ̣ܛܵܐ: ܘܐܲܥܸܠܟ̣ܘܿܢ ܒܡܲܪܕ̇ܘܼܬ̣ܵܐ ܕܲܕܼܝܵܬܹܩܹܐ.

³⁸ܘܐܸܓ̣ܒܹ̇ܐ ܡܸܢܟ̣ܘܿܢ ܐܲܝܠܹܝܢ ܕܡܵܪܕ̇ܝܼܢ ܘܡܲܥܠܹܝܢ ܒܝܼ: ܡ̣ܢ ܐܲܪܥܵܐ ܕܒܹܝܬ̣ ܡܲܥܡܲܪܗܘܿܢ ܐܲܦܸܩ ܐܸܢܘܿܢ: ܘܠܲܐܪܥܵܐ ܕܝܑܼܣܪܵܝܹܠ ܠܵܐ ܢܸܥܠܘܼܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

³⁹ܐܲܢ̄ܬ̇ܘܿܢ ܕܹܝܢ ܕܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܢ ܠܵܐ ܫܵܡ̇ܥܝܼܢ ܐ̄ܢܬ̇ܘܿܢ ܠܝܼ: ܙܸܠܘ ܦܠܘܿܚܘ ܐ̄ܢܵܫ ܦܬܲܟ̣ܪ̈ܵܘܗܝ: ܘܬ̣ܘܼܒ̣ ܠܵܐ ܬܛܵܘܫܘܼܢ ܫܡܵܐ ܕܩܘܼܕܼܫܝ: ܒܡܵܘ̈ܗܒ̣ܵܬ̣ܟ̣ܘܿܢ ܘܒܲܦܬܲܟ̣ܪ̈ܲܝܟ̇ܘܿܢ.

⁴⁰ܡܸܛܠ ܕܲܒ̣ܛܘܼܪܵܐ ܕܩܘܼܕܼܫܝ: ܒܛܘܼܪܹ̈ܐ ܪ̈ܵܡܹܐ ܕܝܼܣܪܵܝܹܠ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܲܡܵܢ ܢܸܦ̱ܠܚܘܼܢܵܢܝ ܟܠܗܘܿܢ ܕܒܹܝܬ̣ ܝܑܼܣܪܵܝܹܠ ܓܡܝܼܪܵܐܝܼܬ̣: ܬܲܡܵܢ ܐܸܨܛܒܸܐ ܒܗܘܿܢ: ܘܬܲܡܵܢ ܐܸܦܩܘܿܕܼ ܪܹ̈ܫܝܵܬ̣ܗܘܿܢ ܘܪܹܫ ܥܲܠ̈ܠܵܬ̣ܗܘܿܢ: ܘܪܹܫ ܡܵܘ̈ܗܒ̣ܵܬ̣ܗܘܿܢ ܒܟ̣ܠ ܩܘܼܕܼܫܲܝ̈ܗܘܿܢ.

⁴¹ܒܪܹܝܚܵܐ ܒܲܣܝܼܡܵܐ ܐܹܩܲܒܸ̇ܠܟ̣ܘܿܢ: ܡܵܐ ܕܐܲܦܸܩ̇ܬ̇ܟ̣ܘܿܢ ܡ̣ܢ ܥܲܡܡܹ̈ܐ: ܘܟܲܢܸܫ̇ܬ̇ܟ̣ܘܿܢ ܡ̣ܢ ܡܕܼܝܼ̈ܢܵܬ̣ܵܐ ܕܐܸܬ̣ܒܲܕܲܪܬ̇ܘܿܢ ܒܗܹܝܢ: ܘܐܸܬ̣ܩܲܕ̇ܫܹ̇ܬ̣ ܒܟ̣ܘܿܢ ܠܥܹܝܢ ܥܲܡܡܹ̈ܐ.

⁴²ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܐܲܥܸܠܬ̇ܟ̣ܘܿܢ ܠܐܲܪܥܵܐ ܕܝܼܣܪܵܝܹܠ: ܠܐܲܪܥܵܐ ܕܐܲܪܝܼܡܹ̇ܬ̣ ܐܝܼܕܼܝ ܠܡܸܬ̇ܠܵܗ̇ ܠܐܲܒ̣ܗܲܝ̈ܟ̇ܘܿܢ.

⁴³ܘܬܸܬ̇ܕܲܟ̣ܪܘܼܢ ܬܲܡܵܢ ܐܘܼܪ̈ܚܵܬ̣ܟ̣ܘܿܢ: ܘܟ̣ܠܗܹܝܢ ܨܸܢ̈ܥܵܬ̣ܟ̣ܘܿܢ ܕܐܹܬܛܲܢܲܦܬ̇ܘܿܢ ܒܗܹܝܢ: ܘܢܸܬ̣ܩܲܡ̈ܛܵܢ ܐܲܦܲܝ̈ܟ̇ܘܿܢ ܒܟ̣ܠܗܹܝܢ ܒܝܼ̈ܫܵܬ̣ܵܐ ܕܲܥ̣ܒܲܕ̇ܬ̇ܘܿܢ.

⁴⁴ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܚܵܣܹ̇ܬ̣ ܥܠܲܝܟ̇ܘܿܢ ܡܸܛܠ ܫܹܡܝ: ܘܠܵܐ ܐܲܝܟ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܠܵܐ ܐܲܝܟ ܨܸܢ̈ܥܵܬ̣ܟ̣ܘܿܢ ܫܵܛ̈ܝܵܬ̣ܵܐ ܥܸܒ̣ܕܹ̇ܬ̣ ܠܟ̣ܘܿܢ ܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁴⁵ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

⁴⁶ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܐܘܼܪܚܵܐ ܕܬܲܝܡ̄ܢܵܐ: ܘܚܘܼܪ ܠܬܲܝܡ̄ܢܵܐ: ܘܐܲܬ̣ܢܲܒܵܐ ܥܲܠ ܥܵܒ̣ܵܐ ܕܲܒ̣ܬܲܝܡ̄ܢܵܐ.

⁴⁷ܘܐܸܡܲܪ ܠܥܵܒ̣ܵܐ ܕܲܒ̣ܬܲܝܡ̄ܢܵܐ: ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܫܵܒܹ̇ܩ ܐ̄ܢܵܐ ܒܵܟ ܢܘܼܪܵܐ: ܘܬܹܐܟ̣ܘܿܠ ܟܠܗܘܿܢ ܩܲܝܣܲܝ̈ܟ ܪ̈ܓܲܝܵܐ ܘܝܲܒ̇ܝܼܫܹ̈ܐ: ܘܠܵܐ ܬܸܕܼܥܲܟ ܫܲܠܗܹܒ̣ܝܼܬ̣ܵܐ ܕܡܸܬ̣ܓܵܘܙܠܵܐ: ܘܢܹܐܩ̈ܕܵܢ ܒܵܗ̇ ܟܠ ܐܲܦ̈ܝܼܢ: ܡ̣ܢ ܬܲܝܡ̄ܢܵܐ ܘܲܥܕܲܡܵܐ ܠܓܲܪܒ̇ܝܵܐ.

⁴⁸ܘܢܸܚܙܘܿܢܵܗ̇ ܟܠ ܒܣܲܪ: ܕܐܸܢܵܐ ܡܵܪܝܵܐ ܐܵܘܚܸܕ̇ܬܵܗ̇ ܘܠܵܐ ܬܸܕܼܥܹ̇ܟ.

⁴⁹ܘܐܸܡ̇ܪܹܬ̣ ܐܘܿ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܗܸܢܘܿܢ ܐܵܡ̇ܪܝܼܢ ܠܝܼ ܡܲܡܬܸ̇ܠ ܡܲܬ̣̈ܠܹܐ ܐܲܢ̄ܬ̇.