Read Aramaic Peshita Ezekiel 21 Bible Online

Ezekiel 21 - Aramaic Peshita bible

Ezekiel 21

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܐܘܿܪܸܫܠܸܡ: ܘܚܘܼܪ ܒܡܲܩܕܲܫܗܘܿܢ: ܘܐܸܬ̣ܢܲܒܵܐ ܥܲܠ ܐܲܪܥܵܐ ܕܝܼܣܪܵܝܹܠ.

³ܘܐܸܡܲܪ ܠܐܲܪܥܵܐ ܕܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܐ ܥܠܲܝܟ̇ܝ: ܘܐܲܦܸܩ ܝܲܦ̮ܣܹܪܝ ܡ̣ܢ ܚܸܠܬ̣ܵܗ̇: ܘܐܵܘܒܸ̇ܕܼ ܡܸܢܹܟ̣ܝ ܙܲܕ̇ܝܼܩܵܐ ܘܚܲܛܵܝܵܐ.

⁴ܘܥܲܠ ܕܐܵܘܒ̇ܕܹܬ̣ ܡܸܢܹܟ̣ܝ ܙܲܕܝܼܩܵܐ ܘܚܲܛܵܝܵܐ: ܡܸܛܠܗܵܢܵܐ ܬܸܦܘܿܩ ܣܲܦ̮ܣܹܪܝ ܡ̣ܢ ܚܸܠܬ̣ܵܗ̇ ܥܲܠ ܟܠ ܒܣܲܪ: ܡ̣ܢ ܬܲܝܡ̄ܢܵܐ ܘܲܥܕܲܡܵܐ ܠܓܲܪܒ̇ܝܵܐ.

⁵ܘܢܸܕ̇ܥܘܼܢ ܟܠ ܒܣܲܪ: ܕܐܸܢܵܐ ܡܵܪܝܵܐ ܐܲܦܩܹ̇ܬ̣ ܣܲܦ̮ܣ݂ܹܪܝ ܡ̣ܢ ܚܸܠܬ̣ܵܗ̇: ܘܬ̣ܘܼܒ̣ ܠܵܐ ܬܸܗܦܘܿܟ.

⁶ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܬ̇ܬܲܢܲܚ ܒܲܬ̣ܒ̣ܵܪܵܐ ܕܚܲܨܵܐ: ܘܲܒ̣ܡܲܪܝܼܪܘܼܬ̣ܵܐ ܐܸܬ̇ܬܲܢܲܚ ܠܥܹܢܲܝܗܘܿܢ.

⁷ܘܐܸܢ ܐܵܡܪܝܼܢ ܠܵܟ ܠܡܵܢܵܐ ܡܸܬ̇ܬܲܢܲܚ ܐܲܢ̄ܬ̇: ܐܸܡܲܪ ܠܗܘܿܢ: ܥܲܠ ܛܸܒܵܐ ܕܐܵܬܹ̇ܐ: ܘܡܸܬ̣ܡ̱ܣܹܝܢ ܟܠܗܘܿܢ ܠܸܒܵـ̈ـܘܵܬ̣ܵܐ: ܘܡܸܬ̣ܪ̈ܲܫܥܵܢ ܟܠܗܹܝܢ ܐܝܼ̈ܕܲܝܵܐ: ܘܟ̣ܵܝ̈ܒܵܢ ܟܠܗܹܝܢ ܪ̈ܘܼܚܵܬ̣ܵܐ: ܘܟ̣ܠܗܹܝܢ ܒܘܼܪ̈ܟܹ̇ܐ ܡܲܪ̈ܕ̇ܝܵܢ ܡܲـ̈ـܝܵܐ: ܗܵܐ ܐܸܬܲܬ̤ ܘܗܵܘܝܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁸ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

⁹ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܝܦܵܐ ܣܲܝܦܵܐ ܐܸܬ̣ܠܲܛ̄ܫ.

¹⁰ܘܐܸܬ̇ܛܲܝܲܒ̣ ܕܬܸܩܛܘܿܠ ܩܸܛܠܵܐ: ܕܬܲܒ̣ܪܸܩ ܘܐܸܬ̇ܛܲܝܲܒ̣ ܠܡܲܪܬܵܥܘܼ ܠܫܲܪܒ̇ܬܹܗ ܕܒܹܪܝ: ܘܐܲܣܠܵܐ ܟܠ ܩܹܝܣ.

¹¹ܘܝܲܗ̄ܒܹ̇ܗ ܠܛܘܼܝܵܒ̣ܵܐ: ܘܲܠܡܹܐܚܲܕܼ ܐܝܼܕܼܵܐ ܕܣܲܝܦܵܐ ܠܛܝܼܫܵܐ ܘܲܡܛܲܝܒ̣ܵܐ: ܕܢܲܫ̱ܠܡܝܼܘܗܝ ܒܐܝܼܕܼܵܐ ܕܩܵܛܘܿܠܹ̈ܐ.

¹²ܓܠܝܼ ܘܐܲܝܠܸܠ ܒܲܪܢܵܫܵܐ: ܡܸܛܠ ܕܗ̤ܘ ܗܘ̤ܵܐ ܥܲܠ ܥܲܡܝ: ܘܥܲܠ ܟܠܗܘܿܢ ܪܵܘܪ̈ܒ̣ܵܢܹܐ ܕܝܼܣܪܵܝܹܠ.

¹³ܩܘܿܫ ܟܲܦܵܐ ܡܸܛܠ ܕܐܸܙܕܲܕ̇ܩܲܬ̤ ܗܵܕܹܐ: ܘܐܸܢ ܫܲܪܒ̇ܬ̣ܵܐ ܐܸܣܬܲܠܝܲܬ̤: ܠܵܐ ܬܸܗܘܹܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁴ܐܲܢ̄ܬ̇ ܕܹܝܢ ܒܲܪܢܵܫܵܐ ܐܸܬ̣ܢܲܩܵܐ: ܘܩܘܿܫ ܟܲܦܵܐ ܐܝܼܕܼܵܐ ܥܲܠ ܐܝܼܕܼܵܐ: ܘܢܸܬ̣ܐ̱ܥܸܦ ܣܲܝܦܵܐ: ܘܣܲܝܦܵܐ ܕܲܬ̣ܠܵܬ̣ܵܐ ܕܲܩܛܝܼ̈ܠܹܐ ܗ̄ܘܼ: ܘܣܲܝܦܵܐ ܕܲܩܛܝܼ̈ܠܹܐ ܕܪܲܒܵܐ ܗ̄ܘܼ ܕܲܡܙܝܼܥ ܠܗܘܿܢ.

¹⁵ܕܢܸܬ̇ܬ̇ܒܲܪ ܠܸܒ̇ܗܘܢ: ܘܢܸܣܓ̇ܘܿܢ ܟܪ̈ܝܼܗܹܐ ܒܟ̣ܠ ܬܲܪ̈ܥܲܝܗܘܿܢ: ܐܲܫ̱ܠܡܹ̇ܬ̣ ܐܸܢܘܿܢ ܠܣܲܝܦܵܐ ܕܲܠܛܝܼܫ ܘܡܲܒ̣ܪܸܩ: ܘܲܡܛܲܝܲܒ̣ ܠܩܸܛܠܵܐ.

¹⁶ܚܲܡܣܸܢܝ ܝܲܡܝܼܢܝ ܘܚܲܡܣܸܢܝ ܣܸܡܵܠܝ: ܠܐܲܬܲܪ ܕܲܡܛܲܝ̈ܒ̣ܵܢ ܐܲܦܲܝ̈.

¹⁷ܐܵܦ ܐܸܢܵܐ ܐܸܩܘܿܫ ܟܲܦܵܐ ܐܝܼܕܼܝ ܥܲܠ ܐܝܼܕܼܝ: ܚܸܡܬ̣ܝ: ܐܸܢܵܐ ܡܵܪܝܵܐ ܐܸܡ̇ܪܹܬ̣.

¹⁸ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁹ܐܲܢ̄ܬ̇ ܕܹܝܢ ܒܲܪܢܵܫܵܐ: ܥܒܸܕܼ ܠܵܟ ܬܲܪܬܹ̇ܝܢ ܐܘܼܪ̈ܚܵܢ: ܕܢܹܐܬܹܐ ܣܲܝܦܹܗ ܕܡܲܠܟܵܐ ܕܒ̣ܵܒܹܠ: ܘܡ̣ܢ ܐܲܪܥܵܐ ܚܕܼܵܐ ܢܸܦܩܘܼܢ ܬܪ̈ܲܝܗܘܿܢ: ܘܐܝܼܕܼܵܐ ܓܒ̣ܝܼܬ̣ܵܐ ܥܲܠ ܪܹܫ ܐܘܼܪܚܵܐ ܕܲܡܕܼܝܼܢ̄ܬܵܐ ܓܒ̣ܝܼܬ̣ܵܐ.

²⁰ܘܲܥܒܸܕܼ ܐܘܼܪܚܵܐ ܕܢܹܐܬܹܐ ܣܲܝܦܵܐ ܥܲܠ ܪܲܒ̇ܬ̣ ܕܲܒ̣ܢܲܝ̈ ܥܲܡܘܿܢ: ܘܥܲܠ ܝܑܼܗܘܼܕܼܵܐ ܘܥܲܠ ܐܘܿܪܸܫܠܸܡ ܥܲܫܝܼܢܬܵܐ.

²¹ܡܸܛܠ ܕܩܵܡ ܡܲܠܟܵܐ ܕܒ̣ܵܒܹܠ: ܥܲܠ ܪܹܫ ܐܘܼܪܚܵܐ ܕܦܵܠܫܲܬ̣ ܐܘܼܪ̈ܚܵܬ̣ܵܐ ܠܡܸܩܨܲܡ ܩܸܨܡܵܐ: ܫܕܼܵܐ ܓܹܐܪܵܐ: ܘܲܫܐܸܠ ܒܲܦܬܲܟ̣ܪܹܗ: ܚܙ̣ܵܘ ܒܫܘܼܒ̣ܚܹܗ.

²²ܘܲܒ̣ܝܲܡܝܼܢܹܗ ܗܘ̤ܵܐ ܩܸܨܡܵܐ ܥܲܠ ܐܘܿܪܸܫܠܸܡ: ܕܢܲܟ̣ܡܸܢ ܥܠܹܝܗ̇ ܟܡܹܐܢܹ̈ܐ: ܘܢܸܦ̮ܬ̣ܚ ܦܘܼܡܹܗ ܒܥܘܼܫܢܹܗ: ܘܲܢܪܝܼܡ ܩܵܠܹܗ ܒܲܩܥܵܬ̣ܵܐ: ܘܲܢܩܝܼܡ ܬܸܠܹ̈ܐ ܠܘܼܩܒܲܠ ܬܲܪ̈ܥܹܝܗ̇: ܘܢܲܟ̣ܡܸܢ ܟܡܹܐܢܹ̈ܐ ܘܢܸܒ̣ܢܸܐ ܕܵܘܩܹ̈ܐ.

²³ܘܢܸܗܘܹܐ ܠܗܘܿܢ ܐܲܝܟ ܩܸܨܡܵܐ ܣܪܝܼܩܵܐ ܠܘܼܩܒܲܠ ܥܲܝܢܲܝ̈ܗܘܿܢ: ܘܗ̤ܘ ܢܸܬ̇ܕ̇ܟܲܪ ܥܵܘܼܠܵܐ ܘܢܸܬ̇ܬ̇ܚܸܕܼ.

²⁴ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̇ܕ̇ܟ̣ܪܬ̇ܘܿܢ ܥܵܘܼܠܟ̣ܘܿܢ ܒܲܫܒ̣ܝܼܬ̣ܵܐ ܕܲܚܛܵܗܲܝ̈ܟ̇ܘܿܢ: ܘܲܚܙܲܝܬ̇ܘܿܢ ܚܛܵܗܲܝ̈ܟ̇ܘܿܢ ܘܟ̣ܠܗܹܝܢ ܨܸܢ̈ܥܵܬ̣ܟ̣ܘܿܢ: ܒܐܝܼܕܼܵܐ ܬܸܬܲܚܕ̇ܘܼܢ.

²⁵ܐܲܢ̄ܬ̇ ܕܹܝܢ ܛܲܢܦܵܐ ܚܲܛܵܝܵܐ ܪܲܒܵܐ ܕܝܼܣܪܵܝܹܠ: ܕܲܡ̣ܛܵܐ ܝܵܘܡܵܟ ܘܙܲܒ̣ܢܵܐ ܕܥܵܘܼܠܵܟ ܘܚܲܪܬ̣ܵܟ.

²⁶ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܒ̣ ܡܸܢܵܟ ܡܲܨܢܲܦܬ̣ܵܐ: ܘܐܲܢܝܼܚ ܡܸܢܵܟ ܟܠܝܼܠܵܐ: ܡܲܟ̇ܝܼܟ̣ܵܐ ܐܲܪܝܼܡ: ܘܪܵܡܵܐ ܐܲܡܸܟ.

²⁷ܐܵܦ ܗܵܕܹܐ ܠܥܵܘܼܠܵܐ ܘܲܠܥܸܬܵܐ ܐܸܥܒ̇ܕܼܝܼܗ̇: ܥܕܲܡܵܐ ܕܢܹܐܬܹܐ ܡ̣ܢ ܕܕܼܝܼܠܹܗ ܗ̤ܘ ܕܝܼܢܵܐ ܘܐܲܫ̱ܠܡܝܼܘܗܝ ܠܹܗ.

²⁸ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܒܢܲܝ̈ ܥܲܡܘܿܢ ܘܥܲܠ ܚܸܣܕ̇ܗܘܿܢ: ܘܐܸܡܲܪ: ܣܲܝܦܵܐ ܣܲܝܦܵܐ: ܕܲܡܛܲܝܲܒ̣ ܠܩܸܛܠܵܐ: ܘܲܠܛܝܼܫ ܘܡܲܒ̣ܪܸܩ.

²⁹ܥܲܠ ܚܸܙ̱ܘܟ̣ܘܿܢ ܣܪܝܼܩܵܐ: ܘܥܲܠ ܩܸܨܡܟ̣ܘܿܢ ܕܲܓܵܠܵܐ: ܠܡܸܬ̇ܠܵܟ ܥܲܠ ܨܵܘܪ̈ܲܝܗܘܿܢ ܕܚܲܛܵܝܹ̈ܐ ܥܵܘܿܠܹܐ: ܕܲܡ̣ܛܵܐ ܝܵܘܡܗܘܿܢ ܘܙܲܒ̣ܢܵܐ ܕܥܵܘܼܠܗܘܿܢ ܘܩܸܨܗܘܿܢ.

³⁰ܐܸܬ̣ܚܲܡ̄ܠ ܒܚܸܠܬ̣ܵܟ ܒܐܲܬ̣ܪܵܐ ܕܐܸܬ̣̱ܝܼܠܸܕ̇ܬ̇ ܒܹܗ: ܘܬܲܡܵܢ ܐܸܕ̇ܘܢܲܟ.

³¹ܘܐܹܫܘܿܕܼ ܥܠܲܝܟ ܪܘܼܓ̣ܙܝ: ܘܲܒ̣ܢܘܼܪܵܐ ܕܚܸܡܬ̣ܝ ܐܸܦܘܿܚ ܒܵܟ: ܘܐܲܫ̱ܠܡܵܟ ܒܐܝܼܕܼܵܐ ܕܓܲܒ̣ܪܹ̈ܐ ܒܲܥܪܝܼܪ̈ܵܝܹܐ ܕܣܵܥ̇ܪܝܼܢ ܚܒ̣ܵܠܵܐ.

³²ܘܬܸܗܘܹܐ ܡܹܐܟ̣ܘܼܠܬܵܐ ܠܢܘܼܪܵܐ: ܘܲܕܼܡܵܟ ܢܸܗܘܹܐ ܒܓ̣ܵܘ ܐܲܪܥܵܐ: ܘܠܵܐ ܬܸܬ̇ܕ̇ܟܲܪ. ܡܸܛܠ ܕܐܸܢܵܐ ܡܵܪܝܵܐ ܡܲܠܠܹܬ̣.