Read Aramaic Peshita Ezekiel 22 Bible Online

Ezekiel 22 - Aramaic Peshita bible

Ezekiel 22

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ: ܠܡܹܐܡܲܪ.

²ܐܲܢ̄ܬ̇ ܕܹܝܢ ܒܲܪܢܵܫܵܐ: ܕܘܼܢ ܠܲܡܕܼܝܼܢ̄ܬܵܐ ܕܲܕܼܡܵܐ: ܘܐܵܘܕ̇ܥܹܝܗ̇ ܟܠܵܗ̇ ܛܲܢܦܘܼܬ̣ܵܗ̇.

³ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܕܼܝܼܢ̄ܬܵܐ ܕܐܸܬ̣ܐ̱ܫܸܕܼ ܕܡܵܐ ܒܓ̣ܵܘܵܗ̇: ܡܲܛܝܼ ܙܲܒ̣ܢܵܗ̇: ܘܥܸܒ̣ܕܲܬ̣ ܦܬܲܟ̣ܪܹ̈ܐ ܒܓ̣ܵܘܵܗ̇ ܘܐܸܬ̇ܛܲܢܦܲܬ̤.

⁴ܒܲܕܼܡܵܐ ܕܐܹܫܲܕ̇ܬ̇ܝ ܐܸܬ̣ܚܲܝܲܒ̣ܬ̇ܝ: ܘܒܲܦܬܲܟ̣ܪܹ̈ܐ ܕܲܥܒܲܕ̇ܬ̇ܝ ܐܸܬ̇ܛܲܡܲܐܬ̇ܝ: ܩ̣ܪܸܒ̣ܘ ܝܵܘܡܲܝ̈ܟ̇ܝ ܘܡܲܛܝܼ ܙܲܒ̣ܢܵܐ ܕܲܫܢܲܝ̈ܟ̇ܝ: ܡܸܛܠ ܗܵܢܵܐ ܝܲܗ̄ܒ̣ܬܹ̇ܟ̣ܝ ܚܸܣܕܵܐ ܠܥܲܡܡܹ̈ܐ: ܘܡܘܼܝܵܩܵܐ ܠܟ̣ܠܗܹܝܢ ܡܕܼܝܼ̈ܢܵܬ̣ܵܐ.

⁵ܐܲܝܠܹܝܢ ܕܪ̈ܲܚܝܼܩܵܢ ܡܸܢܹܟ̣ܝ: ܘܐܲܝܠܹܝܢ ܕܩܲܪ̈ܝܼܒ̣ܵܢ ܠܹܟ̣ܝ: ܢܡܲܝ̈ܩܵܢ ܒܹܟ̣ܝ ܘܢܹܐܡܪ̈ܵܢ: ܛܲܢܦܬ̣ܵܐ ܕܲܫ̈ܡܵܗܵܬ̣ܵܗ̇: ܘܣܲܓ̇ܝܼܐܲܬ̣ ܒܥܵܘ̈ܠܹܝܗ̇.

⁶ܗܵܐ ܪܵܘܪ̈ܒ̣ܵܢܹܐ ܕܝܼܣܪܵܝܹܠ: ܐ̄ܢܵܫ ܠܫܲܪܒ̇ܬܹܗ ܗܘ̤ܵܘ ܒܹܟ̣ܝ ܕܢܹܐܫܕ̇ܘܼܢ ܕܡܵܐ.

⁷ܠܐܲܒ̣ܵܐ ܘܠܐܸܡܵܐ ܨܲܚܝܼܘ ܒܹܟ̣ܝ: ܘܠܲܐܝܢܵܐ ܕܡܸܬ̣ܦܢܸܐ ܠܘܵܬ̣ܝ ܛܠܲܡ̣ܘ ܒܓ̣ܵܘܹܟ̣ܝ: ܘܲܠܝܲܬ̣ܡܹ̈ܐ ܘܠܲܐܪ̈ܡܠܵܬ̣ܵܐ ܥ̣ܠܲܒ̣ܘ ܒܹܟ̣ܝ.

⁸ܘܩܘܼܕܼܫܲܝ̈ ܐܲܣ̣ܠܝܼܬ̇ܝ: ܘܫܲܒܲܝ̈ ܛܵܘܸܫܬ̇ܝ.

⁹ܘܓܲܒ̣ܪܹ̈ܐ ܬܲܓܵܪܹ̈ܐ ܗܘ̤ܵܘ ܒܹܟ̣ܝ: ܕܢܹܐܫܕ̇ܘܼܢ ܕܡܵܐ: ܘܥܲܠ ܛܘܼܪܹ̈ܐ ܐܸܟܲܠܘ ܒܹܟ̣ܝ: ܘܲܚܛܝܼܬ̣ܵܐ ܥ̣ܒܲܕܼܘ ܒܓ̣ܵܘܹܟ̣ܝ.

¹⁰ܘܦܘܼܪܣܵܝܵܐ ܕܐܲܒ̣ܵܐ ܓܠܵܘ ܒܹܟ̣ܝ: ܘܛܲܢܦܘܼܬ̣ܵܐ ܕܟܸܦ̮ܣܵܢܝܼܬ̣ܵܐ ܥ̣ܒܲܕܼܘ ܒܓܵܘܹܟ̣ܝ.

¹¹ܘܲܓ̣ܒܲܪ ܠܐܲܢ̄ܬ̇ܬ̣ ܚܲܒ̣ܪܹܗ ܛܵܢܸܦ̣ܘ: ܘܲܓ̣ܒܲܪ ܠܟܲܠܬܹܗ ܛܲܢܸܦ̣ܘ ܒܙܵܢܝܘܼܬ̣ܵܐ: ܘܲܓ̣ܒܲܪ ܠܚܵܬܹܗ ܒܲܪܬ̣ ܐܲܒ̣ܘܼܗܝ ܨܲܥܪܘ ܒܹܟ̣ܝ.

¹²ܘܫܘܼܚܕܵܐ ܢܣܲܒ̣ܘ ܒܹܟ̣ܝ ܕܢܹܐܫܕ̇ܘܼܢ ܕܡܵܐ: ܘܪܸܒ̇ܝܼܬ̣ܵܐ ܢܣܲܒ̣ܘ ܒܹܟ̣ܝ: ܘܝܲܬ̇ܝܼܪܵܐ ܫܩܲܠ̣ܘ ܒܹܟ̣ܝ: ܘܲܢܟܲܠܘ ܠܪ̈ܵܚܡܲܝܗܘܿܢ ܒܲܛܠܘܼܡܝܵܐ: ܘܠܝܼ ܛܥܲܝܬ̇ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹³ܐܵܦ ܐܸܢܵܐ ܐܸܛܲܪܸܦ ܐܝܼܕܼܝ ܥܲܠ ܐܝܼܕܼܝ: ܥܲܠ ܥܵܘܼܠܵܐ ܕܲܥܒܲܕ̇ܬܝ: ܘܥܲܠ ܕܡܵܐ ܕܐܸܬ̣ܐ̱ܫܸܕܼ ܒܓ̣ܵܘܹܟ̣ܝ.

¹⁴ܐܸܢ ܩܵܐܹ̇ܡ ܠܸܒܹ̇ܟ̣ܝ: ܘܐܸܢ ܡܚܲܡܣ̈ܢܵܢ ܐܝܼܕܲܝ̈ܟ̇ܝ ܠܝܵܘ̈ܡܵܬ̣ܵܐ ܕܥܵܒܹ̇ܕܼ ܐ̄ܢܵܐ: ܐܸܢܵܐ ܡܵܪܝܵܐ ܡܲܠܠܹ̇ܬ̣ ܘܥܸܒ̣ܕܹ̇ܬ̣.

¹⁵ܘܐܹܒܲܕ̇ܪܹܟ̣ܝ ܒܥܲܡܡܹ̈ܐ ܘܐܸܕܼܪܹܝܟ̣ܝ ܒܲܡܕܼܝܼ̈ܢܵܬ̣ܵܐ.

¹⁶ܘܐܲܪܬܹܟ̣ܝ ܠܥܹܝܢ ܥܲܡܡܹ̈ܐ: ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ.

¹⁷ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁸ܒܲܪܢܵܫܵܐ ܗܘ̤ܵܘܠܝܼ ܕܒܹܝܬ̣ ܝܑܼܣܪܵܝܹܠ ܡܲܣ̈ܠܲܝܵܐ ܟܠܗܘܿܢ: ܐܲܝܟ ܢܚܵܫܵܐ ܘܐܲܝܟ ܐܵܢܟ̣ܵܐ: ܘܐܲܝܟ ܦܲܪܙܠܵܐ: ܘܐܲܝܟ ܐܲܒ̣ܵܪܵܐ ܒܓ̣ܵܘ ܟܘܼܪܵܐ ܕܲܚܠܝܼܛܝܼܢ ܒܣܹܐܡܵܐ.

¹⁹ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̣ܚܠܸܛܬ̇ܘܿܢ ܟܠܟ̣ܘܿܢ: ܗܵܐ ܡܟܲܢܸܫ ܐ̄ܢܵܐ ܠܟ̣ܘܿܢ ܠܓ̣ܵܘ ܐܘܿܪܸܫܠܸܡ.

²⁰ܐܲܝܟ ܕܡܸܬ̣ܟܲܢܲܫ ܣܹܐܡܵܐ: ܘܲܢܚܵܫܵܐ: ܘܦܲܪܙܠܵܐ: ܘܐܲܢܟ̣ܵܐ: ܘܐܲܒ̣ܵܪܵܐ: ܒܓ̣ܵܘ ܟܘܼܪܵܐ: ܘܢܵܦܚܝܼܢ ܒܗܘܿܢ ܢܘܼܪܵܐ ܕܢܸܬ̣ܦܲܫܪܘܿܢ: ܗܵܟܲܢܵܐ ܐܹܟܲܢܸܫܟ̣ܘܿܢ ܒܪܘܼܓ̣ܙܝ: ܘܲܒ̣ܚܸܡܬ̣ܝ ܐܹܦܲܫܲܪܟ̣ܘܿܢ.

²¹ܘܐܹܦܘܿܚ ܥܠܲܝܟ̇ܘܿܢ ܢܘܼܪܵܐ ܕܪܘܼܓ̣ܙܝ: ܘܐܹܦܲܫܲܪܟ̣ܘܿܢ ܒܓ̣ܵܘܵܗ̇.

²²ܐܲܝܟ ܕܡܸܬ̣ܦܲܫܲܪ ܣܹܐܡܵܐ ܒܓ̣ܵܘ ܟܘܼܪܵܐ: ܗܵܟܲܢܵܐ ܬܸܬ̣ܦܲܫܪܘܿܢ ܒܓ̣ܵܘܵܗ̇: ܘܬܸܕ̇ܥܘܼܢ ܕܐܸܢܵܐ ܡܵܪܝܵܐ ܐܹܫ̇ܕܹ̇ܬ̣ ܚܸܡܬ̣ܝ ܥܠܲܝܟ̇ܘܿܢ.

²³ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²⁴ܒܲܪܢܵܫܵܐ: ܐܸܡܲܪ ܠܵܗ̇ ܐܲܢ̄ܬ̇ܝ ܐܲܪܥܵܐ ܠܵܐ ܗ̤ܘܲܝܬ̇ܝ ܕܲܟ̣ܝܵܐ: ܘܠܵܐ ܐܸܨܛܲܒܲܥܬ̇ܝ ܘܠܵܐ ܢܚܸܬ̣ ܥܠܲܝܟ̇ܝ ܡܸܛܪܵܐ.

²⁵ܡܸܪܲܕܼܘ ܢܒ̣ܝܹܝܗ̇ ܒܓ̣ܵܘܵܗ̇: ܐܲܝܟ ܐܲܪܝܵܐ ܕܢܵܗܹ̇ܡ ܘܬ̣ܵܒܲܪ ܬܒ̣ܵܪܵܐ: ܐܸܟܲܠܘ ܢܲܦ̮̈ܫܵܬ̣ܵܐ ܒܥܲܫܝܼܢܘܼܬ̣ܗܘܿܢ: ܘܐܝܼܩܵܪܵܐ ܕܣܵܚܪ̈ܵܬ̣ܗܘܿܢ ܢ̣ܣܲܒ̣ܘ.

²⁶ܟܵܗܢܹ̈ܝܗ̇ ܐܲܥܠܝܼܘ ܒܢܵܡܘܿܣܝ ܘܛܲܘܫܘ ܩܘܼܕܼܫܝ: ܘܒܹܝܬ̣ ܩܘܼܕܼܫܵܐ ܠܛܲܢܦܵܐ ܠܵܐ ܦܪܲܫ̣ܘ: ܘܒܹܝܬ̣ ܡܣܲܝܒ̣ܵܐ ܠܕܲܟ̣ܝܵܐ ܠܵܐ ܝܼܕܲܥ̣ܘ: ܘܡ̣ܢ ܫܲܒܲܝ̈ ܐܲܡܸܟ̣ܝ ܥܲܝܢܲܝ̈ܗܘܿܢ: ܘܐܸܬ̇ܛܵܘܫܹܬ̣ ܒܲܝܢܵܬ̣ܗܘܿܢ.

²⁷ܪܵܘܪ̈ܒ̣ܵܢܹܝܗ̇ ܒܓ̣ܵܘܵܗ̇ ܐܲܝܟ ܕܐܒܹ̈ܐ ܚܵܛ̇ܦܝܼܢ ܠܡܹܐܫܲܕܼ ܕܡܵܐ: ܘܲܠܡܵܘܒܵܕܼܘ ܢܲܦ̮̈ܫܵܬ̣ܵܐ ܕܢܸܩܢܘܿܢ ܩܸܢܝܵܢܵܐ.

²⁸ܘܲܢܒ̣̈ܝܹܝܗ̇ ܛܪܵܘ ܠܵܗ̇ ܛܪܵܝܵܐ ܕܬܸܦܸܠ: ܚܙ̣ܵܘ ܠܗܘܿܢ ܣܪܝܼܩܘܼܬ̣ܵܐ: ܘܲܩܨܲܡ̣ܘ ܠܗܘܿܢ ܕܲܓܵܠܘܼܬ̣ܵܐ: ܘܐܵܡ̇ܪܝܼܢ: ܗܵܟܲܢܵܐ ܐܵܡܲܪ ܡܵܪܝܵܐ: ܘܡܵܪܝܵܐ ܠܵܐ ܐܸܡܲܪ.

²⁹ܠܥܲܡܵܐ ܕܐܲܪܥܵܐ ܛܠܲܡ̣ܘ ܘܬܲܟ̣ܘ: ܘܲܓܠܲܒ̣ܘ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ: ܘܠܲܕܼܡܸܬ̣ܦܢܸܐ ܠܘܵܬ̣ܝ ܛܠܲܡ̣ܘ ܕܠܵܐ ܒܕܼܝܼܢܵܐ.

³⁰ܘܲܒ̣ܥܹ̇ܝܬ̣ ܒܗܘܿܢ ܓܲܒ̣ܪܵܐ ܕܣܵܐܹ̇ܓ̣ ܣܝܵܓ̣ܵܐ: ܘܩܵܐܹ̇ܡ ܒܬ̣ܘܼܪ̱ܥܬ̣ܵܐ ܩܕܼܵܡܲܝ ܥܲܠ ܐܲܦܹ̈ܝܗ̇ ܕܐܲܪܥܵܐ ܕܠܵܐ ܐܹܚܲܒ̇ܠܝܼܗ̇: ܘܠܵܐ ܐܸܫܟ̇ܚܹܬ̣.

³¹ܘܐܹܫܕܹ̇ܬ̣ ܥܠܲܝܗܘܿܢ ܪܘܼܓ̣ܙܝ: ܘܲܒ̣ܢܘܼܪܵܐ ܕܚܸܡܬ̣ܝ ܐܲܣܝܼܦܹ̇ܬ̣ ܐܸܢܘܿܢ: ܐܘܼܪ̈ܚܵܬ̣ܗܘܿܢ ܦܸܪܥܹ̇ܬ̣ ܒܪܹܫܗܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.