Read Aramaic Peshita Ezekiel 24 Bible Online

Ezekiel 24 - Aramaic Peshita bible

Ezekiel 24

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܒܫܲܢ̄ܬܵܐ ܬܫܝܼܥܵܝܬܵܐ: ܒܲܥܣܲܪܬܵܐ ܒܝܲܪܚܵܐ ܕܥܸܣܪܵܐ ܠܡܹܐܡܲܪ.

²ܒܲܪܢܵܫܵܐ: ܟܬ̣ܘܿܒ̣ ܠܵܟ ܫܡܹܗ ܕܝܵܘܡܵܐ ܗܵܢܵܐ: ܕܣܵܡܹ̇ܟ ܡܲܠܟܵܐ ܕܒ̣ܵܒܹܠ ܠܐܘܿܪܸܫܠܸܡ ܒܹܗ ܒܝܵܘܡܵܐ ܗܵܢܵܐ.

³ܘܐܲܡܬܸ̇ܠ ܡܲܬ̣ܠܵܐ ܥܲܠ ܒܲܝܬܵܐ ܡܡܲܪܡܪܵܢܵܐ: ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܦܝܼ ܩܲܕܼܣܵܐ ܘܣܘܿܟ ܒܹܗ ܡܲـ̈ـܝܵܐ.

⁴ܘܐܲܪܡܵܐ ܒܹܗ ܢܸܩܣܹ̈ܐ ܕܛܵܒ̣ܝܼܢ ܘܫܲܡܝܼܢܝܼܢ: ܟܲܬ̣ܦܵܐ ܕܲܫܡܝܼܛ ܓܲܪܡܵܗ̇ ܡ̣ܢ ܓܒܲـ̈ـܝܵܐ ܕܥܵـ̈ـܢܵܐ.

⁵ܘܓܲܪ̈ܡܹܐ ܬܚܹܝܬ̣ ܩܲܕܼܣܵܐ ܫܓ̣ܘܿܪ ܐܸܢܘܿܢ: ܘܐܵܘܩܸܕܼ ܐܸܢܘܿܢ ܬܚܘܿܬ̣ܵܘܗܝ.

⁶ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܘܿ ܡܕܼܝܼܢ̄ܬܵܐ ܕܲܕܼܡܵܐ ܕܩܲܕܼܣܵܐ ܬܦܸܐ ܒܵܗ̇: ܘܥܵܘܼܠܵܗ̇ ܠܵܐ ܢܦܲܩ̣ ܡܸܢܵܗ̇: ܗܲܕܵܡ ܗܲܕܵܡ ܦܘܼܣܩܘܼܗ̇: ܘܦܸܣܵܐ ܠܵܐ ܢܸܦܸܠ ܥܠܹܝܗ̇.

⁷ܡܸܛܠ ܕܲܕܼܡܵܗ̇ ܒܓ̣ܵܘܵܗ̇ ܗܘ̤ܵܐ: ܘܥܲܠ ܟܹܐܦܵܐ ܣܵܡ̇ܬܹ̇ܗ: ܘܠܵܐ ܐܹܫܲܕ̇ܬܹ̇ܗ ܒܐܲܪܥܵܐ ܕܠܵܐ ܢܸܬ̣ܟܲܣܸܐ ܥܠܵܘܗܝ ܥܲܦܪܵܐ.

⁸ܕܬܸܣܲܩ ܚܸܡܬ̣ܵܐ ܠܦܘܼܪܥܵܢܘܼܬ̣ܵܐ: ܝܸܗ̄ܒܹ̇ܬ̣ ܕܡܵܗ̇ ܥܲܠ ܟܹܐܦܵܐ ܫܲܥܝܼܥܬܵܐ ܕܠܵܐ ܢܸܬ̣ܟܲܣܸܐ.

⁹ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܘܿ ܡܕܼܝܼܢ̄ܬܵܐ ܕܲܕܼܡܵܐ: ܐܸܢܵܐ ܐܵܘܪܸܒ̣ ܡܲܥܡ̄ܪܵܐ: ܘܐܲܣܓܹ̇ܐ ܩܲܝܣܹ̈ܐ.

¹⁰ܘܐܸܫܒ̇ܘܿܩ ܢܘܼܪܵܐ: ܘܢܸܒ̣ܫܲܠ ܒܸܣܪܵܐ: ܘܐܲܪܬܲܚ ܪܸܬ̣ܚܵܐ ܘܓܲܪ̈ܡܹܐ ܢܹܐܩܕ̇ܘܼܢ.

¹¹ܘܐܲܩܝܼܡܝܼܘܗܝ ܪܸܬ̣ܚܵܐ ܥܲܠ ܓܘܼܡܪܹ̈ܐ: ܕܢܸܚܲܡ ܘܢܸܬ̣ܦܲܫܲܪ ܢܚܵܫܵܗ̇: ܘܬܸܬ̣ܡ̱ܣܸܐ ܒܓ̣ܵܘܵܗ̇ ܛܲܢܦܘܼܬ̣ܵܗ̇: ܘܢܸܫܠܲܡ ܦܘܼܪܥܵܢܵܗ̇.

¹²ܐܲܝܟ ܬܹܐܢܹ̈ܐ ܟܪ̈ܝܼܗܵܬ̣ܵܐ: ܘܠܵܐ ܢܸܦܘܿܩ ܡܸܢܵܗ̇ ܣܘܿܓ̣ܵܐܐ ܕܥܵܘܼܠܵܗ̇: ܐܸܠܵܐ ܒܢܘܼܪܵܐ ܢܸܗܘܹܐ ܦܘܼܪܥܵܢܵܗ̇.

¹³ܥܲܠ ܕܐܹܬ̇ܛܲܢܲܦܬ̇ܝ ܒܙܵܢܝܘܼܬ̣ܵܐ: ܘܥܲܠ ܕܕܲܟ̇ܝܼܬܹ̇ܟ̣ܝ ܘܠܵܐ ܐܸܬ̇ܕܲܟ̇ܝܼܬ̇ܝ ܡ̣ܢ ܛܲܢܦܘܼܬܹܟ̣ܝ: ܬܘܼܒ̣ ܠܵܐ ܬܸܬ̇ܕܲܟܹ̇ܝܢ: ܥܕܲܡܵܐ ܕܐܲܢܝܼܚ ܒܹܟ̣ܝ ܚܸܡܬ̣ܝ.

¹⁴ܐܸܢܵܐ ܡܵܪܝܵܐ ܐܸܡ̇ܪܹܬ̣: ܘܡܲܝܬܸ̇ܐ ܐ̄ܢܵܐ ܘܥܵܒܹ̇ܕܼ ܐ̄ܢܵܐ: ܘܠܵܐ ܐܹܪܲܚܸܦ: ܘܠܵܐ ܐܹܚܘܼܣ ܘܠܵܐ ܐܹܪܲܚܸܡ: ܘܐܲܝܟ ܐܘܼܪ̈ܚܵܬܹܟ̣ܝ ܘܐܲܝܟ ܨܸܢ̈ܥܵܬܹܟ̣ܝ ܐܹܕ̇ܘܼܢܹܟ̣ܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁵ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܪܝܵܐ ܠܡܹܐܡܲܪ.

¹⁶ܒܲܪܢܵܫܵܐ: ܗܵܐ ܢܵܣܹ̇ܒ̣ ܐ̄ܢܵܐ ܡܸܢܵܟ ܪܸܓ̇ܬ̣ܵܐ ܕܥܲܝ̈ܢܲܝܟ ܒܲܡܚܘܿܬ̣ܵܐ ܕܡܸܢܫܹܠܝ: ܘܠܵܐ ܬܲܪܩܸܕܼ ܘܠܵܐ ܬܸܒ̣ܟܹ̇ܐ: ܘܠܵܐ ܬܲܫܚܸܠ ܕܸܡ̱ܥܬ̣ܵܟ.

¹⁷ܐܸܠܵܐ ܐܸܫܬܲܢܲܩ ܒܲܕܼܡܵܐ ܕܡܝܼ̈ܬܹܐ: ܘܒܹܝܬ̣ ܒܵܟܹ̇ܐ ܠܵܐ ܬܸܥܒܸ̇ܕܼ: ܘܡܵܐܢܲܝ̈ܟ ܚܙܘܿܩ ܥܠܲܝܟ: ܘܲܡܣܵܢܲܝ̈ܟ ܣܝܼܡ ܒܪܸ̈ܓ̣ܠܲܝܟ: ܘܠܵܐ ܬܸܬ̣ܥܲܛܲܦ ܥܲܠ ܣܸܦ̈ܘܵܬ̣ܵܟ: ܘܠܲܚܡܵܐ ܕܲܒ̣ܢܲܝ̈ܢܵܫܵܐ ܠܵܐ ܬܹܐܟ̣ܘܿܠ.

¹⁸ܘܐܸܡ̇ܪܹܬ̣ ܒܨܲܦܪܵܐ ܠܥܲܡܵܐ: ܘܡܝܼܬܲܬ̤ ܐܲܢ̄ܬܲܬ̣ܝ ܒܪܲܡܫܵܐ: ܘܲܠܨܲܦܪܹܗ ܕܝܵܘܡܵܐ ܐ̄̇ܪܹܢܵܐ: ܥܸܒ̣ܕܲܬ̣ ܐܲܝܟ ܕܐܸܬ̣ܦܲܩ̇ܕܹ̇ܬ̣.

¹⁹ܘܐܸܡܲܪܘ ܠܝܼ ܥܲܡܵܐ: ܠܵܐ ܡܚܵܘܹܐ ܐܲܢ̄ܬ̇ ܠܲܢ ܡܵܢܵܘ ܗܵܢܵܐ ܕܥܵܒܹ̇ܕܼ ܐܲܢ̄ܬ̇.

²⁰ܘܐܸܡ̇ܪܹܬ̣ ܠܗܘܿܢ: ܕܦܸܬ̣ܓ̣ܵܡܹܗ ܗ̄ܘܼ ܕܡܵܪܝܵܐ ܗܘ̤ܵܐ ܥܠܲܝ ܠܡܹܐܡܲܪ.

²¹ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܸܵܐ: ܗܵܐ ܡܛܵܘܸܫ ܐ̄ܢܵܐ ܡܲܩܕܲܫܝ ܫܘܼܒ̣ܚܵܐ ܕܥܘܼܫ̱ܢܟ̣ܘܿܢ: ܘܪܸܓ̇ܬ̣ܵܐ ܕܥܲܝܢܲܝ̈ܟ̇ܘܿܢ: ܘܚܘܼܣܵܝܵܐ ܕܢܲܦ̮̈ܫܵܬ̣ܟ̣ܘܿܢ: ܘܲܒ̣ܢܲܝ̈ܟ̇ܘܿܢ ܘܲܒ̣̈ܢܵܬ̣ܟ̣ܘܿܢ ܕܫܵܒ̣ܩܝܼܢ ܐ̄ܢܬ̇ܘܿܢ: ܒܚܲܪܒܵܐ ܢܸܦܠܘܿܢ.

²²ܘܬܸܥܒ̇ܕܼܘܼܢ ܐܲܝܟ ܕܥܸܒ̣ܕܹ̇ܬ̣: ܘܥܲܠ ܣܸܦ̈ܘܵܬ̣ܟ̣ܘܿܢ ܠܵܐ ܬܸܬ̣ܥܲܛܦܘܼܢ: ܘܠܲܚܡܵܐ ܕܲܒ̣ܢܲܝ̈ܢܵܫܵܐ ܠܵܐ ܬܹܐܟ̣ܠܘܼܢ.

²³ܘܣܲܥܪܟ̣ܘܿܢ ܠܵܐ ܢܸܣܬܲܦܲܪ: ܘܲܡܣܵܢܲܝ̈ܟ̇ܘܿܢ ܢܸܗܘܘܿܢ ܒܪܸ̈ܓ̣ܠܲܝܟ̇ܘܿܢ: ܘܠܵܐ ܬܸܒ̣ܟ̇ܘܿܢ ܘܠܵܐ ܬܲܪܩ̄ܕܼܘܼܢ: ܘܬܸܬ̣ܡ̱ܣܘܿܢ ܒܥܵܘܼܠܟ̣ܘܿܢ: ܘܬܸܬ̣ܒܲܝܐܘܼܢ ܐ̄ܢܵܫ ܥܲܠ ܐܲܚܘܼܗܝ.

²⁴ܘܢܸܗܘܹܐ ܠܟ̣ܘܿܢ ܚܲܙܩܝܼܐܹܝܠ ܐܵܬ̤ܵܐ: ܘܐܲܝܟ ܕܲܥܒܲܕܼ ܗܵܟܲܢܵܐ ܬܸܥܒ̇ܕܼܘܼܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܹܐ ܡܵܪ̈ܵܘܵܬ̣ܵܐ.

²⁵ܐܲܢ̄ܬ̇ ܕܹܝܢ ܒܲܪܢܵܫܵܐ: ܒܝܵܘܡܵܐ ܕܢܵܣܹ̇ܒ̣ ܐ̄ܢܵܐ ܡܸܢܗܘܿܢ ܥܘܼܫܢܵܐ ܕܚܲܕܼܘܼܬ̣ܵܐ ܕܫܘܼܒ̣ܚܗܘܿܢ: ܘܪܸܓ̇ܬ̣ܵܐ ܕܥܲܝܢܲܝ̈ܗܘܿܢ: ܘܚܘܼܣܵܝܵܐ ܕܢܲܦ̮̈ܫܵܬ̣ܗܘܿܢ: ܘܲܒ̣ܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ.

²⁶ܒܹܗ ܒܝܵܘܡܵܐ ܗܵܘܿ: ܢܹܐܬܹܐ ܠܘܵܬ̣ܵܟ ܡܸܬ̣ܦܲܨܝܵܢܵܐ: ܘܢܲܫ̱ܡܥܵܟ ܒܐܸܕܼܢܲܝ̈ܟ.

²⁷ܘܢܸܦ̮ܬܲܚ ܦܘܼܡܵܟ ܡܸܬ̣ܦܲܨܝܵܢܵܐ ܒܹܗ ܒܝܵܘܡܵܐ ܗܵܘܿ: ܘܲܬ̣ܡܲܠܸܠ ܘܬ̣ܘܼܒ̣ ܠܵܐ ܬܸܚܪܲܫ: ܘܬܸܗܘܹܐ ܠܗܘܿܢ ܐܵܬ̤ܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.