Read Aramaic Peshita Ezekiel 27 Bible Online

Ezekiel 27 - Aramaic Peshita bible

Ezekiel 27

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܨܘܿܪ.

³ܘܐܸܡܲܪ ܠܨܘܿܪ ܕܝܵܬ̣ܒܵܐ ܒܡܲܥܠܵܢܵܐ ܕܝܲܡܵܐ: ܬܹܐܓ̣ܘܼܪܬܵܐ ܕܥܲܡܡܹ̈ܐ ܘܲܕܼܓ̣ܵܙܪ̈ܵܬ̣ܵܐ ܣܲܓ̇ܝܼ̈ܐܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܨܘܿܪ: ܐܲܢ̄ܬ̇ܝ ܐܸܡܲܪܬ̇ܝ ܕܐܸܢܵܐ ܐ̄ܢܵܐ ܟܠܝܼܠܵܐ ܕܫܘܼܒ̣ܚܵܐ.

⁴ܬܚܘܼܡܲܝ̈ܟ̇ܝ ܒܠܸܒܵܐ ܕܝܲܡܡܹ̈ܐ: ܘܲܒ̣ܢܲܝ̈ܟ̇ܝ ܫܲܟ̣ܠܸܠܘ ܫܘܼܦܪܹܟ̣ܝ.

⁵ܥܲܪ̈ܩܹܐ ܘܕܲܦܹ̈ܐ ܐܲܝܬ̇ܝܼܘ ܠܹܟ̣ܝ ܡ̣ܢ ܣܵܢܝܼܪ: ܘܐܲܪ̈ܙܹܐ ܡ̣ܢ ܠܸܒ̣ܢܵܢ ܢܣܲܒ̣ܘ: ܕܢܸܥܒ̇ܕܼܘܼܢ ܠܹܟ̣ܝ ܥܵܕܼܪܹ̈ܐ.

⁶ܘܡ̣ܢ ܒܲܠܘܼܛܹ̈ܐ ܕܒܲܝܫܵܢ ܥ̣ܒܲܕܼܘ ܠܹܩܲܝ̈ܟ̇ܝ: ܘܕܲܦܲܝ̈ܟ̇ܝ ܥ̣ܒܲܕܼܘ ܕܫܸܢܵܐ ܕܦܝܼܠܵܐ: ܡ̣ܢ ܓܵܙܪ̈ܵܬ̣ܵܐ ܕܟܹܬ̣ܵܝܹ̈ܐ.

⁷ܘܲܩܪ̈ܵܡܹܐ ܕܒ̣ܘܼܨܵܐ ܕܨܸܒ̣ܬܹ̇ܟ̣ܝ ܐܲܝܬ̇ܝܼܘ ܡ̣ܢ ܡܸܨܪܹܝܢ: ܕܢܸܗܘܹܐ ܠܹܟ̣ܝ ܐܵܬ̤ܵܐ: ܘܬܸܟ̣ܠ̱ܬ̣ܵܐ ܘܐܲܪܓ̇ܘܵܢܵܐ: ܐܲܝܬ̇ܝܼܘ ܠܹܟ̣ܝ ܡ̣ܢ ܓܵܙܪܵܬ̣ܵܐ ܕܐܲܠܸܣ ܠܬܲܟ̣ܣܝܼܬܹܟ̣ܝ.

⁸ܥܲܡܘܿܪܹ̈ܐ ܕܨܲܝܕܵܢ ܘܕܲܐܪܘܲܕܼ ܗܘ̤ܵܘ ܕܵܒ̣ܪ̈ܲܝ ܠܹܩܲܝ̈ܟ̇ܝ: ܚܲܟ̇ܝܼܡܲܝ̈ܟ̇ܝ ܨܘܿܪ ܗܘ̤ܵܘ ܡܲܠܵܚܲܝ̈ܟ̇ܝ.

⁹ܣܵܒܹ̈ܐ ܕܲܓ̣ܒܸܠ ܘܚܲܟ̇ܝܼܡܹܝ̈ܗ̇: ܗܘ̤ܵܘ ܒܵܕܼܩܲܝ̈ ܒܕܼܵܩܲܝܟ̇ܝ̈: ܣܦܝܼܢܹ̈ܐ ܟܠܗܹܝܢ ܕܝܲܡܵܐ: ܘܡܲܠܵܚܲܝ̈ܗܹܝܢ ܗܘ̤ܵܘ ܡ̣ܢ ܡܲܥܪ̈ܵܒܲܝܟ̇ܝ.

¹⁰ܦܵܪ̈ܣܵܝܹܐ: ܘܠܘܼ̈ܕܼܵܝܹܐ: ܘܦܘܿܛܵܝܹ̈ܐ: ܓܲܒ̣ܪܹ̈ܐ ܩܪܲܒ̣ܬ̣ܵܢܹ̈ܐ ܗܘ̤ܵܘ ܒܚܲܝ̈ܠܲܝܟ̇ܝ: ܣܲܟ̇ܪܹ̈ܐ ܘܣܲܢ̱ܘܪ̈ܵܬ̣ܵܐ ܬܠܵܘ ܒܹܟ̣ܝ: ܘܲܗܘ̤ܵܘ ܠܹܟ̣ܝ: ܫܘܒ̣ܚܵܐ.

¹¹ܒܢܲܝ̈ ܐܵܪܘܲܕܼ ܘܚܲܝܠܲܝܟ̇ܝ̈ ܩܵܝ̇ܡܝܼܢ ܗ̄ܘܼܵܘ ܥܲܠ ܫܘܼܪ̈ܲܝܟ̇ܝ: ܘܢܵܛܪܝܼܢ ܡܲܓܕܲܠܲܝܟ̇ܝ̈: ܫܵܠܛܲܝ̈ܗܘܿܢ ܬܠܵܘ ܥܲܠ ܫܘܼܪ̈ܲܝܟ̇ܝ ܟܲܕܼ ܚܵܕܼܪܝܼܢ: ܘܫܲܡ̣ܠܝܼܘ ܫܘܼܦܪܹܟ̣ܝ.

¹²ܬܲܪܫܝܼܫ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ ܘܣܘܿܓ̣ܵܐܐ ܕܥܘܼܬ̣ܪܹܟ̣ܝ: ܣܹܐܡܵܐ ܘܦܲܪܙܠܵܐ: ܘܐܵܢܟ̣ܵܐ ܘܐܲܒ̣ܵܪܵܐ: ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

¹³ܝܵܘܵܢ ܘܬ̣ܘܼܒܹܝܠ ܘܡܵܫܵܟ ܬܲܓܵܪ̈ܲܝܟ̇ܝ: ܒܢܲܦ̮̈ܫܵܬ̣ܵܐ ܕܲܒ̣ܢܲܝ̈ܢܵܫܵܐ ܘܡܵܐܢܹ̈ܐ ܕܲܢܚܵܫܵܐ.

¹⁴ܡ̣ܢ ܒܹܝܬ̣ ܬܘܼܓܲܪܡܵܐ: ܪ̈ܲܟ̣ܫܵܐ ܘܦܲܪ̈ܵܫܹܐ ܘܟ̣ܘܿܕܲܢ̈ܘܵܬ̣ܵܐ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

¹⁵ܒܢܲܝ̈ ܕܵܪܵܢ ܬܲܓܵܪ̈ܲܝܟ̇ܝ: ܘܓ̣ܵܙܪ̈ܵܬ̣ܵܐ ܣܲܓ̇ܝܼܵܐ̈ܬ̣ܵܐ: ܒܹܝܬ̣ ܬܹܐܓ̣ܘܼܪܬܵܐ ܕܐܝܼܕܲܝ̈ܟ̇ܝ: ܩܲܪ̈ܢܵܬ̣ܵܐ ܕܡܸܫܚܵܐ ܘܲܠܒ̣ܘܿܢ̄ܬܵܐ ܐܲܝܬ̇ܝܼܘ ܠܹܟ̣ܝ ܩܘܼܪ̈ܒܵܢܹܐ.

¹⁸ܕܲܪܡܣܘܿܩ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ ܘܣܘܿܓ̣ܵܐܐ ܕܲܥܒ̣ܵܕܲܝ̈ܟ̇ܝ ܘܣܘܿܓ̣ܵܐܐ ܕܥܘܼܬ̣ܪܹܟ̣ܝ: ܒܚܲܡܪܵܐ ܫܲܡܝܼܢܵܐ ܘܥܲܡܪܵܐ ܚܸܘܵܪܵܐ.

¹⁹ܘܕܼܵܢ ܘܝܵܘܵܢ: ܡ̣ܢ ܐܘܼܙܸܠ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ: ܦܲܪܙܠܵܐ ܕܬܸܦܠ̱ܚܝܼܢ. ܘܲܩ̈ܣܲܝܵܐ ܘܲܩ̈ܢܲܝܵܐ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

²⁰ܕܵܪܵܢ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ: ܐܲܝܬ̇ܝܼܘ ܠܹܟ̣ܝ ܣܘܿܓ̣ܵܐܐ ܕܲܒ̣ܥܝܼܪܵܐ ܛܲܪܩܬ̣ܵܐ.

²¹ܘܕܸܟ̣ܪܹ̈ܐ ܘܐܸܡܪܹ̈ܐ ܘܲܓ̣̈ܕܲܝܵܐ ܐܲܝܬ̇ܝܼܘ ܠܹܟ̣ܝ.

²²ܬܲܓܵܪܹ̈ܐ ܕܲܫܒ̣ܵܐ ܘܲܕܼܪܲܥܡܵܐ: ܒܸܣܡܵܢܹ̈ܐ ܛܲܪ̈ܩܹܐ ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ ܘܕܲܗܒ̣ܵܐ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

²³ܚܵܪܵܢ ܘܟܲܢܵܐ ܘܥܲܕܲܢ ܬܲܓܵܪ̈ܲܝ ܫܒ̣ܵܐ: ܘܐܵܬ̣ܘܿܪ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ.

²⁴ܗܵܠܹܝܢ ܐܸܢܘܿܢ ܬܲܓܵܪܲܝܟ̇ܝ: ܕܡܲܝܬܹ̇ܝܢ ܠܹܟ̣ܝ ܡܵܐܢܹ̈ܐ ܕܬܸܟ̣ܠ̱ܬܵܐ ܘܲܕܼܦܸܬ̣ܟܵܐ: ܘܣܝܼ̈ܡܵܬ̣ܵܐ ܛܵܒ̣ܵـ̈ـܬ̣ܵܐ ܟܕ ܚܙ̈ܝܼܩܵܢ ܒܚܲܒ̣̈ܠܹܐ ܘܒܸܐܠܦܹ̈ܐ ܕܥܲܪܩܵܐ.

²⁵ܒܢܲܝ̈ ܬܲܪܫܝܼܫ ܕܲܒ̣ܡܲܥܪ̈ܵܒܲܝܟ̇ܝ ܐܲܝܬ̇ܝܼܘ ܠܹܟ̣ܝ ܡܵܘ̈ܒ̇ܠܹܐ: ܘܐܸܬ̣ܡ̱ܠܝܼܬ̇ܝ ܘܲܥܫܸܢ̣ܬܝ ܛܵܒ̣ ܛܵܒ̣.

²⁶ܘܲܒ̣ܠܸܒܵܐ ܕܝܲܡܡܹ̈ܐ: ܘܲܒ̣̈ܡܲܝܵܐ ܣܲܓ̇ܝܼ̈ܐܹܐ ܐܲܥܠܘܼܟ̣ܝ ܕܵܒ̣ܪ̈ܲܝ ܠܹܩܲܝܟ̇ܝ݁: ܪܘܼܚܵܐ ܕܫܵܘܒܵܐ ܬܒܲܪܬܹܟ̣ܝ ܒܠܸܒܵܐ ܕܝܲܡܡܹ̈ܐ.

²⁷ܘܥܘܼܬ̣ܪܹܟ̣ܝ ܘܐܲܓ̣ܪܹܟ̣ܝ ܕܡ̣ܢ ܡܲܥܪ̈ܵܒܲܝܟ̇ܝ: ܟܠܗܘܿܢ ܓܒܲـ̈ـܝܵܐ ܩܪ̈ܲܒ̣ܬ̣ܵܢܲܝܟ̇ܝ ܘܡܲܠܵܚܲܝ̈ܟ̇ܝ ܘܒ̣ܵܕܼܩܲܝ̈ ܒܕܼܵܩܲܝ̈ܟ̇ܝ ܕܡ̣ܢ ܡܲܥܪ̈ܵܒܲܝܟ̇ܝ: ܟܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܲܝܟ̇ܝ: ܘܟ̣ܠܹܗ ܟܸܢܫܵܐ ܕܲܒ̣ܓ̣ܵܘܹܟ̣ܝ: ܢܸܦܠܘܿܢ ܒܠܒܵܐ ܕܝܲܡܡܹ̈ܐ ܒܝܵܘܡܵܐ ܕܡܲܦܘܼܠܬܹ̇ܟ̣ܝ.

²⁸ܠܩܵܠܵܐ ܕܝܼܠܠܲܬܵܐ ܕܣܲܦܵܢܲܝ̈ܟ̇ܝ ܢܙܘܼܥܘܼܢ ܕܲܚܕܼܵܪ̈ܲܝܟ̇ܝ.

²⁹ܘܢܸܚܬ̣ܘܼܢ ܡ̣ܢ ܣܦ̈ܝܼܢܲܝܗܘܿܢ ܟܠܗܘܿܢ ܕܵܒ̣ܪ̈ܲܝ ܠܹܩܹ̈ܐ: ܘܡܲܠܵܚܹ̈ܐ ܘܟ̣ܠܗܘܿܢ ܣܲܦܵܢܹ̈ܐ ܕܝܲܡܵܐ ܒܐܲܪܥܵܐ ܢܩܘܼܡܘܼܢ.

³⁰ܘܢܲܝܠܠܘܼܢ ܥܠܲܝܟ̇ܝ ܝܑܼܠܠܬܵܐ ܪܲܒ̇ܬ̣ܵܐ ܘܡܲܪܝܼܪܬܵܐ: ܘܢܲܪܡܘܿܢ ܥܲܦܪܵܐ ܒܪܸ̈ܫܲܝܗܘܿܢ: ܘܢܸܬ̣ܦܲܠܦܠܘܼܢ ܒܩܸܛܡܵܐ.

³¹ܘܢܸܓ̇ܙܘܼܢ ܥܠܲܝܟ̇ܝ ܪܹ̈ܫܲܝܗܘܿܢ: ܘܢܸܬ̣ܟܲܒ̣ܢܘܼܢ ܣܲܩܹ̈ܐ: ܘܢܸܒ̣ܟ̇ܘܿܢ ܥܠܲܝܟ̇ܝ ܡܲܪܝܼܪܵܐܝܼܬ̣ ܒܡܲܪ̈ܩܕܼܵܬ̣ܵܐ.

³²ܘܢܹܐܠܘܿܢ ܥܠܲܝܟ̇ܝ ܒܢܲܝ̈ܗܘܿܢ ܐܘܼܠ̈ܝܵܬܵܬ̣ܵܐ: ܘܢܹܐܡܪܘܼܢ: ܡܲܢ ܗ̄ܝܼ ܐܝܼܬ̣ ܗ̄ܘܼܵܬ̣ ܐܲܝܟ ܨܘܿܪ ܕܝܵܬ̣ܒܵܐ ܗ̄ܘܼܵܬ̣ ܒܓ̣ܵܘ ܝܲܡܵܐ.

³³ܟܲܕܼ ܢܦܲܩ̣ ܩܸܢܝܵܢܹܟ̣ܝ ܡ̣ܢ ܝܲܡܵܐ: ܐܲܣܒܲܥܬ̇ܝ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܡ̣ܢ ܣܘܿܓ̣ܵܐܐ ܕܥܘܼܬ̣ܪܹܟ̣ܝ ܘܲܕ̇ܬܹܐܓ̣ܘܼܪܬܹ̇ܟ̣ܝ: ܐܲܥܬܲܪܬ̇ܝ ܡܲܠ̈ܟܹ̇ܐ ܕܐܲܪܥܵܐ.

³⁴ܒܙܲܒ̣ܢܵܐ ܕܐܸܬ̇ܬ̇ܒܲܪܬ̇ܝ ܘܲܢܦܲܠܬ̇ܝ ܒܥܘܼܡܩܵܘ̈ܗܝ ܕܝܲܡܵܐ: ܬܹܐܓ̣ܘܿܪܬܹ̇ܟ̣ܝ ܘܟ̣ܠܹܗ ܟܸܢܫܹܟ̣ܝ ܢܦܲܠ̣ܘ ܒܓ̣ܵܘܹܟ̣ܝ.

³⁵ܟܠܗܘܿܢ ܥܵܡܪ̈ܲܝ ܓܵܙܪ̈ܵܬ̣ܵܐ ܬܡܲܗܘ ܥܠܲܝܟ̇ܝ: ܘܡܲܠܟܲܝ̈ܗܘܿܢ ܬܘܲܪܘ ܘܕܲܡܲܥ ܐܲܦܲܝ̈ܗܘܿܢ.

³⁶ܬܲܓܵܪܹ̈ܐ ܕܥܲܡܡܹ̈ܐ ܐܲܫܪܸܩ̣ܘ ܥܠܲܝܟ̇ܝ: ܠܐܲܒ̣ܕܵܢܵܐ ܗ̤ܘܲܝܬ̇ܝ ܘܠܲܝܬ̇ ܐܲܢ̄ܬ̇ܝ ܠܥܵܠܲܡ.