Read Aramaic Peshita Ezekiel 3 Bible Online

Ezekiel 3 - Aramaic Peshita bible

Ezekiel 3

¹ܘܐܸܡܲܪ ܠܝܼ: ܒܲܪܢܵܫܵܐ: ܡܸܕܸ̇ܡ ܕܡܸܫܟܲܚ ܐܲܢ̄ܬ̇ ܐܲܟ̣ܘܿܠ: ܐܲܟ̣ܘܿܠܲܝܗܝ ܠܟܸܪܟܵܐ ܗܵܢܵܐ: ܘܙܸܠ ܡܲܠܸܠ ܥܲܡ ܒܢܲܝ̈ ܝܑܼܣܪܵܝܹܠ.

²ܘܦܸܬ̣ܚܹ̇ܿܬ̣ ܦܘܼܡܝ ܘܐܵܘܟ̇ܠܲܢܝ ܟܸܪܟܵܐ ܗܵܘܿ.

³ܘܐܸܡܲܪ ܠܝܼ: ܒܲܪܢܵܫܵܐ: ܡܠܝܼ ܟܲܪܣܵܟ ܘܲܡܥܲܝ̈ܟ ܡ̣ܢ ܟܸܪܝܵܐ ܗܵܢܵܐ ܕܝܵܗܹ̇ܒ̣ ܐ̄ܢܵܐ ܠܵܟ: ܘܐܸܟܲܠܬܹ̇ܗ ܘܲܗܘ̤ܵܐ ܒܦܘܼܡܝ ܐܲܝܟ ܕܸܒ̣ܫܵܐ ܚܲܠܝܵܐ.

⁴ܘܐܸܡܲܪ ܠܝܼ: ܒܲܪܢܵܫܵܐ: ܙܸܠ ܥܘܿܠ ܠܲܫܒ̣ܝܼܬ̣ܵܐ ܠܘܵܬ̣ ܒܢܲܝ̈ ܝܑܼܣܪܵܝܹܠ: ܘܐܸܡܲܪ ܠܗܘܿܢ ܦܸܬ̣ܓ̣ܵܡܲܝ̈.

⁵ܡܸܛܠ ܕܠܵܐ ܗ̄ܘܼܵܐ ܥܲܠ ܥܲܡܵܐ ܥܲܡܝܼܩ ܡܲܡܠܠܵܐ ܘܲܠܥܸܠ ܠܸܫܵܢܵܐ ܫܲܕܲܪܬܵܟ: ܥܲܠ ܕܒܹܝܬ̣ ܝܑܼܣܪܵܝܹܠ.

⁶ܘܐܵܦܠܵܐ ܥܲܠ ܥܲܡܡܹ̈ܐ ܣܲܓ̇ܝܼ̈ܐܹܐ ܕܠܵܐ ܫܵܡܲܥ ܐܲܢ̄ܬ̇ ܡܲܡܠܲܠܗܘܿܢ: ܘܐܸܠܘܼ ܥܠܲܝܗܘܿܢ ܫܲܕܲܪܬܵܟ ܫܵܡ̇ܥܝܼܢ ܗ̄ܘܼܵܘ ܠܵܟ.

⁷ܕܒܹܝܬ̣ ܝܑܼܣܪܵܝܹܠ ܕܹܝܢ ܠܵܐ ܫܵܡ̇ܥܝܼܢ ܠܵܟ: ܡܸܛܠ ܕܠܵܐ ܨܵܒܹ̇ܝܢ ܠܡܸܫ̱ܡܥܲܢܝ ܕܟ̣ܠܹܗ ܓܹܝܪ ܒܹܝܬ̣ ܝܑܼܣܪܵܝܹܠ: ܥܲܫܝܼܢ ܒܹܝܬ̣ ܥܲܝܢܲܝ̈ܗܘܿܢ ܘܲܩܫܸܐ ܠܸܒ̇ܗܘܿܢ.

⁸ܗܵܐ ܐܲܥܫܢܹ̇ܬ̣ ܐܲܦܲܝ̈ܟ ܠܘܼܩܒܲܠ ܐܲܦܲܝ̈ܗܘܿܢ: ܘܒܹܝܬ̣ ܥܲܝܢܲܝ̈ܟ ܐܲܫ̇ܪܹܬ̣ ܠܘܼܩܒܲܠ ܒܹܝܬ̣ ܥܲܝܢܲܝ̈ܗܘܿܢ.

⁹ܐܲܝܟ ܫܵܡܝܼܪܵܐ ܕܥܲܫܝܼܢ ܡ̣ܢ ܛܲܪܵܢܵܐ ܥܸܒ̣ܕܹ̇ܬ̣ ܒܹܝܬ̣ ܥܲܝܢܲܝ̈ܟ: ܠܵܐ ܬܸܕܼܚܲܠ ܡܸܢܗܘܿܢ: ܘܠܵܐ ܬܙܘܼܥ ܡ̣ܢ ܩܕܼܵܡܲܝܗܘܿܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

¹⁰ܘܐܸܡܲܪ ܠܝܼ: ܒܲܪܢܵܫܵܐ: ܟܠ ܦܸܬ̣ܓ̣ܵܡܲܝ̈ ܕܐܵܡܲܪ ܐ̄ܢܵܐ ܠܵܟ ܩܲܒܸ̇ܠ ܒܠܸܒܵܟ ܘܲܫܡܲܥ ܒܐܸܕܼܢܲܝ̈ܟ.

¹¹ܘܙܸܠ ܥܘܿܠ ܠܲܫܒ̣ܝܼܬ̣ܵܐ ܠܘܵܬ̣ ܒܢܲܝ̈ ܥܲܡܵܟ: ܘܡܲܠܸܠ ܥܲܡܗܘܿܢ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܒܲܪ ܢܸܫ̱ܡܥܘܼܢ ܘܲܢܙܘܼܥܘܼܢ.

¹²ܘܲܫܩܲܠܬܲܢܝ ܪܘܼܚܵܐ: ܘܫܸܡ̇ܥܹܬ̣ ܒܵܬܲܪܝ ܩܵܠܵܐ ܕܙܵܘܥܵܐ ܪܲܒܵܐ ܕܐܵܡܲܪ: ܒܪܝܼܟ̣ܘܼ ܐܝܼܩܵܪܹܗ ܕܡܵܪܝܵܐ ܡ̣ܢ ܐܲܬ̣ܪܹܗ.

¹³ܘܩܵܠܵܐ ܕܓܸܦܹ̈ܐ ܕܚܲܝ̈ܘܵܬ̣ܵܐ ܕܛܵܪܦܝܼܢ ܚܲܕܼ ܠܚܲܕܼ: ܘܩܵܠܵܐ ܕܓ̣ܝܼ̈ܓ̣ܠܹܐ ܥܲܡܗܘܿܢ: ܘܩܵܠܵܐ ܕܙܵܘܥܵܐ ܪܲܒܵܐ.

¹⁴ܘܲܫܩܲܠܬܲܢܝ ܪܘܼܚܵܐ ܘܐܵܘܒܸ̇ܠܬܲܢܝ: ܘܐܸܙܹ̇ܠ̄ܬ̣ ܒܚܹܐܦܵܐ ܕܪܘܼܚܝ: ܘܐܝܼܕܹܗ ܕܡܵܪܝܵܐ ܥܸܫܢܲܬ̤ ܥܠܲܝ.

¹⁵ܘܥܸܠܹ̇ܬ̣ ܠܲܫܒ̣ܝܼܬ̣ܵܐ ܠܬܸܠܐܟ̣ܝܼܒ̣ ܕܝܵܬܹ̇ܒ̣ ܥܲܠ ܢܗܲܪ ܟܒܲܪ: ܘܝܸܬ̣ܒܹ̇ܬ̣ ܬܲܡܵܢ ܫܲܒ̣ܥܵܐ ܝܵܘ̈ܡܝܼܢ: ܟܲܕܼ ܬܲܡܝܼܗ ܐ̄ܢܵܐ ܒܲܝܢܵܬ̣ܗܘܿܢ.

¹⁶ܘܡ̣ܢ ܒܵܬܲܪ ܫܲܒ̣ܥܵܐ ܝܵܘ̈ܡܝܼܢ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁷ܒܲܪܢܵܫܵܐ: ܕܵܘܩܵܐ ܝܲܗ̄ܒ̣ܬܵܟ ܠܲܕܼܒܹܝܬ̣ ܝܑܼܣܪܵܝܹܠ: ܕܬܸܗܘܹܐ ܫܵܡܲܥ ܡ̣ܢ ܦܘܼܡܝ ܦܸܬ̣ܓ̣ܵܡܹ̈ܐ: ܘܲܬ̣ܙܲܗܲܪ ܐܸܢܘܿܢ ܡܹܢܝ.

¹⁸ܡܵܐ ܕܐܵܡܲܪ ܐ̄ܢܵܐ ܠܚܲܛܵܝܵܐ ܕܲܡܡܵܬ̣ ܬܡܘܼܬ̣: ܘܠܵܐ ܙܲܗܲܪܬܵܝܗܝ ܘܠܵܐ ܐܸܡܲܪܬ̇ ܠܹܗ ܠܚܲܛܵܝܵܐ ܕܢܸܙܕ̇ܗܲܪ ܡ̣ܢ ܐܘܼܪܚܹܗ ܘܢܸܚܹܐ: ܗܵܘܿ ܚܲܛܵܝܵܐ ܒܥܵܘܼܠܹܗ ܢܡܘܼܬ̣: ܘܲܕܼܡܹܗ ܡ̣ܢ ܐܝܼܕܼܵܟ ܐܸܬ̣ܒܲܥ.

¹⁹ܐܸܢ ܬܙܲܗܲܪ ܕܹܝܢ ܠܚܲܛܵܝܵܐ: ܘܠܵܐ ܢܸܗܦܘܿܟ ܡ̣ܢ ܚܛܝܼܬܹܗ ܘܡ̣ܢ ܐܘܼܪܚܹܗ ܒܫܝܼܬܵܐ: ܗ̤ܘ ܒܲܚܛܵܗܵܘ̈ܗܝ ܢܡܘܼܬ̣: ܘܐܲܢ̄ܬ̇ ܢܲܦ̮ܫܵܟ ܬܦܲܨܹܐ.

²⁰ܘܟܲܕܼ ܙܲܕ̇ܝܼܩܵܐ ܢܸܗܦܘܿܟ ܡ̣ܢ ܙܲܕ̇ܝܼܩܘܼܬܹܗ ܘܢܸܥܒܸ̇ܕܼ ܥܵܘܼܠܵܐ: ܐܸܬܸ̇ܠ ܬܘܼܩ̱ܠܬ̣ܵܐ ܩܕܼܵܡܵܘܗܝ ܘܲܢܡܘܼܬ̣: ܥܲܠ ܕܠܵܐ ܙܲܗܲܪܬܵܝܗܝ ܒܲܚܛܵܗܵܘ̈ܗܝ ܢܡܘܼܬ̣: ܘܠܵܐ ܬܸܬ̇ܕ̇ܟܲܪ ܠܹܗ ܙܲܕ̇ܝܼܩܘܼܬܹܗ ܕܲܥܒܲܕܼ: ܘܲܕܼܡܹܗ ܡ̣ܢ ܐܝܼܕܲܝ̈ܟ ܐܸܬ̣ܒܲܥ.

²¹ܐܸܢ ܕܹܝܢ ܬܙܲܗܪ ܠܙܲܕ̇ܝܼܩܵܐ: ܕܠܵܐ ܢܸܚܛܹܐ ܘܠܵܐ ܚ̣ܛܵܐ: ܙܲܕ̇ܝܼܩܵܐ ܢܸܚܹܐ ܕܐܸܙܕ̇ܗܲܪ: ܘܐܲܢ̄ܬ̇ ܢܲܦ̮ܫܵܟ ܬܦܲܨܹܐ.

²²ܘܲܗܘ̤ܵܬ̣ ܥܠܲܝ ܬܲܡܵܢ ܐܝܼܕܹܗ ܕܡܵܪܝܵܐ: ܘܐܸܡܲܪ ܠܝܼ: ܩܘܼܡ ܦܘܿܩ ܠܲܦܩܲܥܬ̣ܵܐ: ܘܬܲܡܵܢ ܐܹܡܲܠܸܠ ܥܲܡܵܟ.

²³ܘܩܵܡܹ̇ܬ̣ ܢܸܦܩܹ̇ܬ̣ ܠܲܦܩܲܥܬ̣ܵܐ: ܘܬܲܡܵܢ ܩܵܐܹ̇ܡ ܗ̄ܘܼܵܐ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܐܲܝܟ ܫܘܼܒ̣ܚܵܐ ܕܲܚܙܹ̇ܝܬ̣ ܥܲܠ ܢܗܲܪ ܟܒܲܪ: ܘܢܸܦܠܹ̇ܬ̣ ܥܲܠ ܐܲܦܲܝ̈.

²⁴ܘܥܸܠܲܬ̤ ܒܝܼ ܪܘܼܚܵܐ: ܘܐܲܩܝܼܡܬܲܢܝ ܥܲܠ ܪܸ̈ܓ̣ܠܲܝ: ܘܡܲܠܸܠ ܥܲܡܝ ܘܐܸܡܲܪ ܠܝܼ: ܥܘܿܠ ܐܸܬ̣ܚܲܒ̣ܫ ܒܒܲܝܬܵܟ.

²⁵ܘܐܲܢ̄ܬ̇ ܒܲܪܢܵܫܵܐ: ܗܵܐ ܪܵܡܹ̇ܝܢ ܥܠܲܝܟ ܫܸܫ̈ܠܵܬ̣ܵܐ: ܘܐܵܣܪܝܼܢ ܠܵܟ ܒܗܹܝܢ: ܕܠܵܐ ܬܸܦܘܿܩ ܒܲܝܢܵܬ̣ܗܘܿܢ.

²⁶ܘܠܸܫܵܢܵܟ ܐܸܕܼܒܸ̇ܩ ܠܲܫܡܲܝ̈ ܚܸܟܵܟ: ܘܬܸܚܪܲܫ ܘܠܵܐ ܬܸܗܘܹܐ ܠܗܘܿܢ ܓܲܒ̣ܪܵܐ ܡܲܟ̇ܣܵܢܵܐ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

²⁷ܘܡܵܐ ܕܲܡܡܲܠܸܠ ܐ̄ܢܵܐ ܥܲܡܵܟ: ܦܵܬܲܚ ܐ̄ܢܵܐ ܦܘܼܡܵܟ ܕܬܹܐܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܫܵܡܲܥ ܢܸܫܡܲܥ: ܘܲܕܼܙܵܐܲܥ̇: ܢܙܘܼܥ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.