Read Aramaic Peshita Ezekiel 31 Bible Online

Ezekiel 31 - Aramaic Peshita bible

Ezekiel 31

¹ܒܲܫܢܲܬ̤ ܚܕܲܥܸܣܪܹ̈ܐ ܒܝܲܪܚܵܐ ܬܠܝܼܬܵܝܵܐ ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܐܸܡܲܪ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܲܠܥܘܼܫܢܹܗ: ܠܡܲܢ ܕܡܲܝܬ̇ ܒܪܲܒ̇ܘܼܬ̣ܵܟ.

³ܗܵܐ ܐܵܬ̣ܘܿܪܵܝܵܐ ܐܲܪܙܵܐ ܕܠܸܒ̣ܢܵܢ: ܕܫܲܦܝܼܪ̈ܵܢ ܣܵܘ̈ܟܵܘܗܝ: ܘܥܲܒ̇ܝܼܛ ܛܸܠܵܠܹܗ: ܘܪܵܡܵܐ ܩܵܘܡܬܹܗ: ܘܒܲܝܢܵܬ̣ ܥܲܒ̇ܝܼ̈ܛܹܐ ܗܘ̤ܵܬ̣ ܡܵܘܥܝܼܬܹܗ.

⁴ܡܲـ̈ـܝܵܐ ܪܲܒ̇ܝܘܼܗܝ: ܘܲܬ̣ܗܘܿܡܵܐ ܐܲܪܝܼܡܹܗ: ܘܥܲܠ ܢܲܗܪ̈ܵܘܵܬ̣ܵܐ ܚܸܕܼܪܲܬ̤ ܢܸܨܒ̇ܬܹܗ: ܘܣܵܘܟܵܘ̈ܗܝ ܐܲܪܡܝܼ ܥܲܠ ܟܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ.

⁵ܡܸܛܠ ܗܵܢܵܐ ܐܸܬ̇ܬ̇ܪܝܼܡܲܬ̤ ܩܵܘܡܬܹܗ ܛܵܒ̣ ܡ̣ܢ ܟܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ: ܘܲܣܓܝܼ̈ ܣܲܪ̈ܥܸܦܝܵܬܹܗ ܘܝܼܪܸܟ ܣܵܘ̈ܟܵܘܗܝ: ܡ̣ܢ ܣܘܿܓ̣ܵܐܐ ܕܡܲـ̈ـܝܵܐ ܕܪܲܒ̇ܝܼܘܗܝ.

⁶ܒܣܵܘ̈ܟܵܘܗܝ ܐܲܩܢܲܬ̤ ܟܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ: ܘܲܬ̣ܚܹܝܬ̣ ܥܵܘܦܵܘ̈ܗܝ ܝܸܠܕܲܬ̤ ܟܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܘܲܒ̣ܛܸܠܵܠܹܗ ܝܼܬܸܒ̣ܘ ܥܲܡܡܹ̈ܐ ܣܲܓ̇ܝܼ̈ܐܹܐ.

⁷ܘܫܲܦܝܼܪ ܗ̄ܘܼܵܐ ܒܪܲܒ̇ܘܼܬܹܗ ܘܲܒ̣ܣܘܿܓ̣ܵܐܐ ܕܣܵܘ̈ܟܵܘܗܝ: ܡܸܛܠ ܕܲܗܘ̤ܵܘ ܥܸܩܵܪ̈ܵܘܗܝ ܒܡܲـ̈ـܝܵܐ ܣܲܓ̇ܝܼ̈ܐܹܐ.

⁸ܐܲܪ̈ܙܹܐ ܠܵܐ ܥܲܒ̣ܪܘܼܗܝ ܒܦܲܪܕܲܝܣܹܗ ܕܐܲܠܵܗܵܐ: ܘܥܲܪ̈ܩܹܐ ܠܵܐ ܕܡܵܘ ܠܣܵܘ̈ܟܵܘܗܝ: ܘܕܼܘܼ̈ܠܒܹ̇ܐ ܠܵܐ ܗܘ̤ܵܘ ܐܲܝܟ ܥܵܘܦܵܘ̈ܗܝ: ܘܟ̣ܠ ܐܝܼܠܵܢ ܒܦܲܪܕܲܝܣܹܗ ܕܐܲܠܵܗܵܐ ܠܵܐ ܕܵܡܹ̇ܐ ܠܹܗ ܒܫܘܼܦܪܹܗ.

⁹ܫܲܦܝܼܪܵܐ ܥܒܲܕ̇ܬܹ̇ܗ ܒܣܘܿܓ̣ܵܐܐ ܕܣܵܘܟܵܘ̈ܗܝ: ܘܛܲܢܵܘ ܒܹܗ ܟܠܗܘܿܢ ܐܝܼܠܵܢܹ̈ܐ ܕܲܥܕܸܢ ܦܲܪܕܲܝܣܹܗ ܕܐܲܠܵܗܵܐ.

¹⁰ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̇ܬ̇ܪܝܼܡ ܒܩܵܘܡܬܹܗ: ܘܫܸܘܚܲܬ̤ ܡܵܘܥܝܼܬܹܗ ܒܲܝܢܵܬ̣ ܥܲܒ̇ܝܼܛܹ̈ܐ: ܘܐܸܬ̇ܬ̇ܪܝܼܡ ܠܸܒܹ̇ܗ ܒܪܵܡܘܼܬܹܗ.

¹¹ܐܲܫ̱ܠܡܝܼܘܗܝ ܒܝܲܕܼ ܬܲܩܝܼܦܵܐ ܕܥܲܡܡܹ̈ܐ: ܘܢܸܥܒܸ̇ܕܼ ܠܹܗ ܐܲܝܟ ܚܛܝܼܬܹܗ ܘܢܵܘܒ̇ܕܼܝܼܘܗܝ.

¹²ܘܢܵܘܒ̇ܕܼܘܼܢܹܗ ܢܘܼܟ̣ܪ̈ܵܝܹܐ ܥܲܫܝܼܢܹ̈ܐ ܕܥܲܡܡܹ̈ܐ: ܘܢܲܪܡܘܿܢܹܗ ܒܛܘܼܪܹ̈ܐ: ܘܲܒ̣ܟ̣ܠܗܘܿܢ ܢܲܚ̈ܠܹܐ ܢܸܦ̈ܠܵܢ ܣܵܘ̈ܟܵܘܗܝ: ܘܢܸܬ̇ܬܲܒ̇ܪ̈ܵܢ ܣܲܪ̈ܥܸܦܝܵܬܹܗ ܒܟ̣ܠܗܘܿܢ ܢܲܚ̈ܠܹܐ ܕܐܲܪܥܵܐ: ܘܢܸܚܬܘܼܢ ܡ̣ܢ ܛܸܠܵܠܹܗ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܘܢܸܫܒ̇ܩܘܼܢܹܗ.

¹³ܘܡܵܐ ܕܲܢܦܲܠ̣: ܬܸܫܟܲܢ ܥܠܵܘܗܝ ܟܠܵܗ̇ ܦܵܪܲܚܬܵܐ ܕܲܫܡܵܝܵܐ: ܘܲܬ̣ܚܹܝܬ̣ ܣܲܪ̈ܥܸܦܝܵܬܹܗ ܬܸܗܘܹܐ ܟܠܵܗ̇ ܚܲܝ̄ܘܬ̣ܵܐ ܕܕܲܒ̣ܪܵܐ.

¹⁴ܕܠܵܐ ܢܸܬ̇ܬ̇ܪܝܼܡܘܼܢ ܒܩܵܘ̈ܡܵܬ̣ܗܘܿܢ ܟܠܗܘܿܢ ܐܝܼܠܵܢܹ̈ܐ ܕܡܲـ̈ـܝܵܐ: ܘܠܵܐ ܢܸܫ̱ܘ̈ܚܵܢ ܡܵܘ̈ܥܝܵܬ̣ܗܘܿܢ ܒܲܝܢܵܬ̣ ܥܲܒ̇ܝܼܛܹ̈ܐ: ܘܠܵܐ ܢܩܘܼܡܘܼܢ ܘܠܵܐ ܢܸܗܘܘܿܢ ܐܲܟ̣ܘܵܬ̣ܗܘܿܢ ܟܠ ܕܫܵܬܹ̇ܝܢ ܡܲـ̈ـܝܵܐ: ܡܸܛܠ ܕܟ̣ܠܗܘܿܢ ܠܡܵܘܬܵܐ ܐܸܣܬ̇ܠܸܡܘ: ܒܐܲܪܥܵܐ ܬܲܚܬܵܝܬܵܐ: ܒܲܝܢܵܬ̣ ܒܢܲܝ̈ܢܵܫܵܐ ܕܢܵܚܬ̇ܝܼܢ ܠܓ̣ܘܼܒܵܐ.

¹⁵ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܝܵܘܡܵܐ ܕܲܢ̣ܚܸܬ̣ ܠܲܫܝܘܿܠ: ܥܸܒ̣ܕܹ̇ܬ̣ ܐܸܒ̣ܠܵܐ: ܘܟܲܣܝܼܬ̣ ܥܠܵܘܗܝ ܬܗܘܿܡܵܐ: ܘܲܟ̣ܠܹ̇ܝܬ̣ ܢܲܗܪ̈ܵܘܵܬܹܗ: ܘܐܸܬ̣ܟ̇ܠܝܼܘ ܡܲـ̈ـܝܵܐ ܣܲܓ̇ܝܼ̈ܐܹܐ: ܘܐܲܟ̣ܡ̇ܪܹܬ̣ ܥܠܵܘܗܝ ܠܠܸܒ̣ܢܵܢ: ܘܟ̣ܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ ܐܸܬ̣ܥܲܝܲܦܘ.

¹⁶ܡ̣ܢ ܩܵܠܵܐ ܕܡܲܦܘܼܠܬܹ̇ܗ ܐܸܬ̇ܬ̇ܙܝܼܥܲܬ̤ ܐܲܪܥܵܐ: ܘܟܲܕܼ ܐܲܚܸܬ̇ܬܹ̇ܗ ܠܲܫܝܘܿܠ ܥܲܡ ܢܵܚ̈ܬܲܝ ܓܘܼܒܵܐ: ܐܸܬ̣ܒܲܝܲܐܘܼ ܒܐܲܪܥܵܐ ܬܲܚܬܵܝܬܵܐ: ܟܠܗܘܿܢ ܐܝܼܠܵܢܹ̈ܐ ܕܲܥܕܸܢ: ܘܲܓ̣ܒܲـ̈ـܝܵܐ ܫܲܦܝܼܪܹ̈ܐ ܕܠܸܒ̣ܢܵܢ ܕܫܵܬܹ̇ܝܢ ܡܲـ̈ـܝܵܐ.

¹⁷ܐܵܦ ܗܸܢܘܿܢ ܢܚܸܬ̣ܘ ܥܲܡܹܗ ܠܲܫܝܘܿܠ ܠܘܵܬ̣ ܩܛܝܼܠܲܝ̈ ܣܲܝܦܵܐ: ܘܙܲܪܥܹܗ ܝܼܬܸܒ̣ ܒܛܸܠܵܠܹܗ ܒܲܝܢܵܬ̣ ܥܲܡܡܹ̈ܐ.

¹⁸ܠܐܲܝܢܵܐ ܡ̣ܢ ܐܝܼܠܵܢܹ̈ܐ ܕܲܥܕܸܢ ܐܸܬ̇ܕܲܡܝܼܬ̇ ܒܫܘܼܒ̣ܚܵܐ ܘܲܒ̣ܪܲܒ̇ܘܼܬ̣ܵܐ: ܘܲܢ̣ܚܸܬ̇ܬ̇ ܥܲܡ ܐܝܼܠܵܢܹ̈ܐ ܕܲܥܕܸܢ ܠܐܲܪܥܵܐ ܬܲܚܬܵܝܬܵܐ: ܒܲܝܢܵܬ̣ ܥܘܼܪ̈ܠܹܐ ܬܸܫܟܲܒ̣: ܥܲܡ ܐܲܝܠܹܝܢ ܕܲܩܛܝܼܠܝܼܢ ܒܣܲܝܦܵܐ: ܗܵܢܵܘ ܦܸܪܥܘܿܢ ܘܟܠܹܗ ܚܲܝܠܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.