Read Aramaic Peshita Ezekiel 32 Bible Online

Ezekiel 32 - Aramaic Peshita bible

Ezekiel 32

¹ܒܲܫܢܲܬ̣ ܚܕܲܥܸܣܪܹ̈ܐ ܒܝܲܪܚܵܐ ܕܲܬ̣ܪܸܥܣܲܪ: ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܐܸܡܲܪ ܠܹܗ: ܠܐܲܪܥܵܐ ܕܥܲܡܡܹ̈ܐ ܐܸܬ̇ܕܲܡ̣ܝܼܬ̇: ܘܐܲܢ̄ܬ̇ ܐܲܝܟ ܬܲܢܝܼܢܵܐ ܐܲܢ̄ܬ̇ ܕܝܲܡܡܹ̈ܐ: ܕܲܩܲܪܬ̇ ܒܢܲܗܪ̈ܵܘܵܬ̣ܵܟ: ܘܕܲܠܲܚ̣ܬ̇ ܡܲـ̈ـܝܵܐ ܒܪܸ̈ܓ̣ܠܝܟ: ܘܕܼܵܫܬ̇ ܢܲܗܪ̈ܵܘܵܬ̣ܗܘܿܢ.

³ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܦܵܪܹܣ ܐ̄ܢܵܐ ܥܠܲܝܟ ܡܨܝܼܕܬ̇ܝ: ܒܲܟ̣ܢܘܼܫܝܵܐ ܕܥܲܡܡܹ̈ܐ ܣܲܓ̇ܝܼ̈ܐܹܐ: ܘܲܢܲܣܩܘܼܢܵܟ ܒܲܡܨܝܼܕ̇ܬ̇ܝ.

⁴ܘܐܸܫܕܹ̇ܝܟ ܒܐܲܪܥܵܐ: ܘܥܲܠ ܐܲܦܲܝ̈ ܚܲܩܠܵܐ ܐܸܣܚ̄ܦܵܟ: ܘܐܲܫܟܸ̇ܢ ܥܠܲܝܟ ܟܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ: ܘܐܹܣܲܒܲܥ ܡܸܢܵܟ ܟܠܵܗ̇ ܚܲܝ̄ܘܼܬ̣ܵܐ ܕܐܲܪܥܵܐ.

⁵ܘܐܲܪܡܹܐ ܒܸܣܪܵܟ ܥܲܠ ܛܘܼܪܹ̈ܐ: ܘܢܸܬ̣ܡ̱ܠܘܼܢ ܢܲܚ̈ܠܹܐ ܡ̣ܢ ܪܸܡܬ̣ܵܟ.

⁶ܘܐܲܫܩܸܐ ܐܲܪܥܵܐ ܕܕܼܵܘܩܲܝ̈ܟ ܡ̣ܢ ܕܡܵܟ: ܘܛܘܼܪܹ̈ܐ ܘܢܲܚ̈ܠܹܐ ܢܸܬ̣ܡ̱ܠܘܼܢ ܡܸܢܵܟ.

⁷ܘܐܹܟܲܣܸܐ ܒܲܕܼܥܵܟ̣ܵܟ ܫܡܲܝܵܐ: ܘܐܲܥܡܸܛ ܟܵܘܟ̇ܒܲܝ̈ܗܘܿܢ: ܘܫܸܡܫܵܐ ܒܲܥܢܵܢܹ̈ܐ ܢܸܬ̣ܟܲܣܸܐ: ܘܣܲܗܪܵܐ ܠܵܐ ܢܲܢܗܲܪ ܢܘܼܗܪܹܗ.

⁸ܘܟ̣ܠܗܘܿܢ ܢܲܗܝܼܪܹ̈ܐ ܕܡܲܢ̱ܗܪܝܼܢ ܒܲܫܡܲܝܵܐ ܐܲܥܡܸܛ ܐܸܢܘܿܢ ܥܠܲܝܟ: ܘܐܸܥܒܸ̇ܕܼ ܚܸܫܘܿܟ̣ܵܐ ܒܐܲܪܥܵܟ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁹ܘܐܲܚܡܸܬ̣ ܠܸܒܵܐ ܕܥܲܡܡܹ̈ܐ ܣܲܓ̇ܝܼ̈ܐܹܐ: ܡܵܐ ܕܐܲܝܬ̇ܝܼܬ̇ ܬܒ̣ܵܪܵܟ ܒܹܝܬ̣ ܥܲܡܡܹ̈ܐ: ܘܒܲܡܕܼܝܼܢܵܬ̣ܵܐ ܕܠܵܐ ܝܵܕܲܥ ܐܲܢ̄ܬ̇ ܠܗܹܝܢ.

¹⁰ܘܐܲܬ̣ܡܲܗ ܥܠܲܝܟ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܡܲܠܟܲܝ̈ܗܘܿܢ ܢܸܕܼܚ̄ܠܘܼܢ: ܡܵܐ ܕܐܲܒ̣ܪ̱ܩܹ̇ܬ̣ ܣܲܝܦܝ ܥܲܠ ܐܲܦܲܝ̈ܗܘܿܢ: ܘܢܸܕܼܚ̄ܠܘܼܢ ܘܢܸܬ̣ܪܲܗܒ̣ܘܼܢ ܐ̄ܢܵܫ ܒܢܲܦ̮ܫܹܗ: ܒܝܵܘܡܵܐ ܕܡܲܦܘܼܠܬܵܟ.

¹¹ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܚܲܪܒܹ̇ܗ ܕܡܲܠܟܵܐ ܕܒ̣ܵܒܹܠ ܬܹܐܬܹܐ ܥܠܲܝܟ.

¹²ܒܚܲܪܒܵܐ ܕܓܲܢ̄ܒܵܪܹ̈ܐ ܐܲܪܡܸܐ ܥܘܼܫܢܵܟ: ܘܲܕܼܟ̣ܠܗܘܿܢ ܥܲܫܝܼܢܹ̈ܐ ܕܥܲܡܡܹ̈ܐ: ܘܢܸܒ̇ܙܘܼܢ ܥܘܼܫܢܵܗ̇ ܕܡܸܨܪܹܝܢ: ܘܢܸܬ̣ܒ̇ܙܸܙ ܟܠܹܗ ܥܘܼܬ̣ܪܵܗ̇.

¹³ܘܐܵܘܒܸ̇ܕܼ ܒܥܝܼܪܵܗ̇ ܡ̣ܢ ܡܲـ̈ـܝܵܐ ܣܲܓ̇ܝܼ̈ܐܹܐ: ܘܬ̣ܘܼܒ̣ ܪܸܓ̣ܠܹܐ ܕܒܲܪܢܵܫܵܐ ܠܵܐ ܬܕܲܠܲܚ ܐܸܢܘܿܢ: ܐܵܦܠܵܐ ܦܲܪܣܬ̣ܵܐ ܕܲܒ̣ܥܝܼܪܵܐ.

¹⁴ܗܵܝܕܹ̇ܝܢ ܐܲܬ̣ܩܸܢ ܡܲܝܲܝ̈ܗܘܿܢ: ܘܢܲܗܪ̈ܵܘܵܬ̣ܗܘܿܢ ܐܲܪܕܹ̇ܐ ܐܲܝܟ ܡܸܫܚܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁵ܡܵܐ ܕܲܥܒܲܕ̇ܬܵܗ̇ ܠܐܲܪܥܵܐ ܕܡܸܨܪܹܝܢ ܠܲܚܒ̣ܵܠܵܐ: ܘܬܸܚܪܲܒ̣ ܐܲܪܥܵܐ ܒܲܡܠܹܐܵܗ̇. ܡܵܐ ܕܲܡܚܹ̇ܝܬ̣ ܠܟ̣ܠܗܘܿܢ ܥܵܡܘܿܪܹ̈ܝܗ̇: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

¹⁶ܐܘܿܠܝܼܬ̣ܵܐ ܗ̄ܝܼ ܘܲܒ̣̈ܢܵܬ̣ܗܘܿܢ ܕܥܲܡܡܹ̈ܐ ܐܵܠ̈ܝܼܢ ܠܵܗ̇: ܥܲܠ ܡܸܨܪܹܝܢ ܘܥܲܠ ܟܠܹܗ ܥܘܼܬ̣ܪܵܗ̇ ܢܹܐ̈ܠܝܵܢܵܗ̇: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁷ܒܲܫܢܲܬ̣ ܚܕܲܥܸܣܪܹ̈ܐ ܒܚܲܡܸܫܲܥܸܣܪܵܐ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁸ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܚܲܝܠܵܗ̇ ܕܡܸܨܪܹܝܢ: ܘܐܲܚܸܬܲܝܗܝ ܥܲܡܵܗ̇ ܠܒܹܝܬ̣ ܥܲܡܡܹ̈ܐ ܥܲܫܝܼܢܹ̈ܐ: ܠܐܪܥܵܐ ܬܲܚܬܵܝܬܐ ܥܲܡ ܢܵܚܬܲܝ̈ ܓܘܼܒܵܐ.

¹⁹ܡ̣ܢ ܡܲـ̈ـܝܵܐ ܒܲܣܝܼܡܹ̈ܐ ܚܘܿܬ̣ ܘܲܕܼܡܵܟ ܥܲܡ ܥܘܼܪ̈ܠܹܐ.

²⁰ܘܥܲܡ ܩܛܝܼܠܲܝ̈ ܣܲܝܦܵܐ ܢܸܦܠܘܼܢ: ܘܲܢܢܲܓܘܼܢܹܗ ܘܲܠܟ̣ܠܹܗ ܚܲܝܠܹܗ.

²¹ܘܲܢܡܲܠܠܘܼܢ ܥܲܡ ܓܲܕ̇ܘܕܲܝ̈ܗܘܿܢ ܫܲܠܝܼܛܵܢܹ̈ܐ ܕܥܲܡܡܹ̈ܐ ܡܢ ܓܵܘ ܫܝܘܿܠ: ܘܢܸܚܬܘܼܢ ܘܢܸܫܟ̇ܒ̣ܘܼܢ ܥܘܼܪ̈ܠܹܐ ܥܲܡ ܩܛܝܼܠܲܝ̈ ܣܲܝܦܵܐ.

²²ܬܲܡܵܢ ܐܵܬ̣ܘܿܪ ܘܟ̣ܠܹܗ ܟܸܢܫܵܗ̇ ܚܕܼܵܪ ܩܲܒ̣ܪܹܗ: ܟܠܗܘܿܢ ܩܛܝܼ̈ܠܹܐ ܕܲܢܦܲܠܘ ܒܣܲܝܦܵܐ.

²³ܕܲܥ̣ܒܲܕܼܘ ܩܲܒ̣ܪܹܗ ܒܲܫܦ̈ܘܿܠܲܝ ܓܘܼܒܵܐ: ܘܲܗܘ̤ܵܐ ܟܸܢܫܹܗ ܚܕܼܵܪ ܩܲܒ̣ܪܹܗ: ܟܠܗܘܿܢ ܩܛܝܼ̈ܠܹܐ ܕܲܢܦܲܠ̣ܘ ܒܣܲܝܦܵܐ: ܥܲܠ ܕܲܥܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ.

²⁴ܬܲܡܵܢ ܥܝܼܠܲܡ ܘܟ̣ܠܹܗ ܚܲܝܠܵܗ̇ ܚܕܼܵܪ ܫܲܒ̣ܪܹܗ ܟܠܗܘܿܢ ܩܛܝܼ̈ܠܹܐ ܕܲܢܦܲܠܘ ܒܣܲܝܦܵܐ: ܘܲܢ̣ܚܸܬ̣ܘ ܥܘܼܪ̈ܠܹܐ ܠܐܲܪܥܵܐ ܬܲܚܬܵܝܬܵܐ: ܥܲܠ ܕܲܥ̣ܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ: ܘܩܲܒܸ̇ܠܘ ܨܲܥܪܗܘܿܢ ܥܲܡ ܢܵܚܬܲܝ̈ ܓܘܼܒܵܐ.

²⁵ܘܒܲܝܢܵܬ̣ ܩܛܝܼ̈ܠܹܐ ܥ̣ܒܲܕܼܘ ܠܹܗ ܡܲܫܟ̇ܒ̣ܵܐ ܡܸܨܥܲܬ̣ ܚܲܝܠܹܗ: ܘܲܚܕܼܝܼܪܝܼܢ ܠܩܲܒ̣ܪܹܗ ܟܠܗܘܿܢ ܥܘܼܪ̈ܠܹܐ ܕܲܩܛܝܼܠܝܼܢ ܒܣܲܝܦܵܐ: ܥܲܠ ܕܲܥ̣ܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ: ܘܩܲܒܸ̇ܠܘ ܨܲܥܪܗܘܿܢ ܥܲܡ ܢܵܚܬܲܝ̈ ܓܘܼܒܵܐ: ܘܒܲܝܢܵܬ̣ ܩܛܝܼܠܹܐ ܐܸܬ̣ܚ̄ܫܸܒ̣ܘ.

²⁶ܬܲܡܵܢ ܡܵܫܵܟ: ܘܬ̣ܘܼܒܹܝܠ ܘܟ̣ܠܹܗ ܚܲܝܠܵܗ̇ ܚܕܼܵܪ ܩܲܒ̣ܪܹܗ: ܟܠܗܘܿܢ ܥܘܼܪ̈ܠܹܐ ܕܲܩܛܝܼܠܝܼܢ ܒܣܲܝܦܵܐ: ܥܲܠ ܕܲܥܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ.

²⁷ܠܵܐ ܢܸܫܟ̇ܒ̣ܘܼܢ ܥܲܡ ܓܲܢ̄ܒܵܪܹ̈ܐ ܕܢܵܦܠܝܼܢ ܡ̣ܢ ܥܘܼܪ̈ܠܹܐ: ܕܲܢ̣ܚܸܬ̣ܘ ܠܲܫܝܘܿܠ ܒܡܵܐܢܲܝ̈ ܩܪܵܒ̣ܗܘܿܢ: ܘܣܵܡ̣ܘ ܣܲܝܦܲܝ̈ܗܘܿܢ ܬܚܹܝܬ̣ ܪܹܫܲܝܗܘܿܢ: ܘܲܗܘ̤ܵܐ ܥܵܘܼܠܗܘܿܢ ܥܲܠ ܓܲܪ̈ܡܲܝܗܘܿܢ: ܥܲܠ ܕܲܥܒܲܕܼܘ ܒܓܲܢ̄ܒܵܪܘܼܬ̣ܗܘܿܢ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ.

²⁸ܐܲܢ̄ܬ̇ ܕܹܝܢ ܒܲܝܢܵܬ̣ ܥܘܼܪ̈ܠܹܐ ܬܸܫܟܲܒ̣: ܘܬܸܕܼܡܲܟ ܥܲܡ ܩܛܝܼ̈ܠܲܝ ܣܲܝܦܵܐ.

²⁹ܬܲܡܵܢ ܐܲܕܼܘܿܡ ܘܡܲܠܟܹ̇ܝ̈ܗ̇ ܘܟ̣ܠܗܘܿܢ ܪܵܘܪ̈ܒ̣ܵܢܹܝܗ̇: ܕܐܸܬ̣ܚ̄ܫܸܒ̣ܘ ܒܓܲܢ̄ܒܵܪܘܼܬ̣ܗܘܿܢ ܥܲܡ ܩܛܝܼ̈ܠܲܝ ܣܲܝܦܵܐ: ܥܲܡ ܥܘܼܪ̈ܠܹܐ ܢܸܕܼܡ̱ܟ̣ܘܼܢ ܘܥܲܡ ܢܵܚܬܲܝ̈ ܓܘܼܒܵܐ.

³⁰ܬܲܡܵܢ ܫܲܠܝܼܛܵܢܹ̈ܐ ܕܓܲܪܒ̇ܝܵܐ ܘܟ̣ܠܗܘܿܢ ܨܲܝ̈ܕ̇ܢܵܝܹܐ: ܕܲܢܚܸܬ̣ܘ ܥܲܡ ܩܛܝܼܠܲܝ̈ ܣܲܝܦܵܐ: ܟܲܕܼ ܒܗܸܬ̣ܘ ܘܐܸܬ̇ܬ̇ܒܲܪܘ ܡ̣ܢ ܓܲܢ̄ܒܵܪܘܼܬ̣ܗܘܿܢ: ܘܲܕܼܡܸܟ̣ܘ ܥܘܼܪ̈ܠܹܐ ܥܲܡ ܩܛܝܼܠܲܝ̈ ܣܲܝܦܵܐ: ܘܩܲܒܸ̇ܠ̣ܘ ܒܸܗܬܲܬ̣ܗܘܿܢ ܥܲܡ ܢܵܚܬܲܝ̈ ܓܘܼܒܵܐ.

³¹ܠܗܵܠܹܝܢ ܢܸܚܙܹܐ ܦܸܪܥܘܿܢ ܘܢܸܬ̣ܒܲܝܲܐ ܥܲܠ ܟܠܹܗ ܚܲܝܠܹܗ ܩܛܝܼܠܲܝ̈ ܣܲܝܦܵܐ: ܦܸܪܥܘܿܢ ܗ̤ܘ ܘܟ̣ܠܹܗ ܚܲܝܠܹܗ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

³²ܥܸܒ̣ܕܹ̇ܬ̣ ܓܹܝܪ ܬܒ̣ܵܪܹܗ ܒܐܲܪܥܵܐ ܕܚܲܝܹ̈ܐ: ܘܐܲܕܼܡܸܟ̣ܬܹ̇ܗ ܒܲܝܢܵܬ̣ ܥܘܼܪ̈ܠܹܐ ܥܲܡ ܩܛܝܼܠܲܝ̈ ܣܲܝܦܵܐ: ܦܸܪܥܘܿܢ ܗ̤ܘ ܘܟ̣ܠܹܗ ܚܲܝܠܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.