Read Aramaic Peshita Ezekiel 33 Bible Online

Ezekiel 33 - Aramaic Peshita bible

Ezekiel 33

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܡܲܠܸܠ ܥܲܡ ܒܢܲܝ̈ ܥܲܡܵܟ: ܘܐܸܡܲܪ ܠܗܘܿܢ: ܐܲܪܥܵܐ ܡܵܐ ܕܡܲܝܬܸ̇ܐ ܐ̄ܢܵܐ ܥܠܹܝܗ̇ ܚܲܪܒܵܐ: ܢܸܕܼܒ̇ܪܘܼܢ ܥܲܡܵܐ ܕܐܲܪܥܵܐ ܓܲܒ̣ܪܵܐ ܚܲܕܼ ܡܸܢܗܘܿܢ: ܘܢܸܥܒ̇ܕܼܘܼܢܹܗ ܠܗܘܿܢ ܕܵܘܩܵܐ.

³ܘܡܵܐ ܕܲܚܙ̣ܵܐ ܚܲܪܒܵܐ ܕܐܵܬ̣ܝܵܐ ܥܠܲܝܗܘܿܢ: ܢܸܩܪܹܐ ܒܩܲܪܢܵܐ ܘܲܢܙܲܗܲܪ ܠܥܲܡܵܐ.

⁴ܘܡܲܢ ܕܫܵܡܲܥ ܩܵܠܵܐ ܕܩܲܪܢܵܐ ܘܠܵܐ ܡܸܙܕ̇ܗܲܪ: ܘܐܵܬ̣ܝܵܐ ܚܲܪܒܵܐ ܘܢܵܣܒܵܐ ܠܹܗ: ܕܡܹܗ ܒܪܹܫܹܗ.

⁵ܘܐܸܢ ܢܸܙܕ̇ܗܲܪ: ܢܲܦ̮ܫܹܗ ܡܦܲܨܹܐ.

⁶ܕܵܘܩܵܐ ܕܹܝܢ ܡܵܐ ܕܲܚܙ̣ܵܐ ܚܲܪܒܵܐ ܕܐܵܬ̣ܝܵܐ: ܘܠܵܐ ܩ̣ܪܵܐ ܒܩܲܪܢܵܐ: ܘܲܠܥܲܡܵܐ ܠܵܐ ܙܲܗܲܪ: ܘܐܸܬܲܬ̤ ܚܲܪܒܵܐ ܘܢܸܣܒܲܬ̤ ܡܸܢܗܘܿܢ ܢܲܦ̮ܫܵܐ: ܗܵܝ̇ ܢܲܦ̮ܫܵܐ ܒܲܚܛܵܗܹ̈ܝܗ̇ ܐܸܬ̣ܢܲܣܒܲܬ̤: ܘܲܕܼܡܵܗ̇ ܡ̣ܢ ܐܝܼܕܼܵܘ̈ܗܝ ܕܕܼܵܘܩܵܐ ܐܸܬ̣ܒܲܥ.

⁷ܐܲܢ̄ܬ̇ ܕܹܝܢ ܒܲܪܢܵܫܵܐ: ܕܵܘܩܵܐ ܝܲܗ̄ܒ̣ܬܵܟ ܠܲܕܼܒܹܝܬ̣ ܝܑܼܣܪܵܝܹܠ: ܕܬܸܗܘܹܐ ܫܵܡܲܥ ܡ̣ܢ ܦܘܼܡܝ ܡܸܠܬ̣ܵܐ ܘܲܬ̣ܙܲܗܲܪ ܐܸܢܘܿܢ ܡܹܢܝ.

⁸ܡܵܐ ܕܐܸܡ̇ܪܹܬ̣ ܠܥܵܘܿܠܵܐ ܕܲܡܡܵܬ̣ ܬܡܘܼܬ̣: ܘܠܵܐ ܐܸܡܲܪܬ̇ ܠܹܗ ܠܥܵܘܿܠܵܐ ܕܢܸܙܕ̇ܗܲܪ ܡ̣ܢ ܐܘܼܪܚܹܗ: ܗܵܘܿ ܥܵܘܿܠܵܐ ܒܥܵܘܼܠܹܗ ܢܡܘܼܬ̣: ܘܲܕܼܡܹܗ ܡ̣ܢ ܐܝܼܕܲܝ̈ܟ ܐܸܬ̣ܒܲܥ.

⁹ܐܲܢ̄ܬ̇ ܕܹܝܢ ܐܸܢ ܙܲܗܪܬܵܝܗܝ ܠܥܵܘܿܠܵܐ ܕܢܸܗܦܘܿܟ ܡ̣ܢ ܐܘܼܪܚܹܗ ܘܠܵܐ ܗܦܲܟ: ܗ̤ܘ ܒܥܵܘܼܠܹܗ ܢܡܘܼܬ̣: ܘܐܲܢ̄ܬ̇ ܢܲܦ̮ܫܵܟ ܦܲܨܝܼܬ̇.

¹⁰ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܸܡܲܪܬ̇ܘܿܢ: ܕܥܵܘܼܠܲܢ ܘܲܚܛܵܗܲܝ̈ܢ ܥܠܲܝܢ ܐܸܢܘܿܢ: ܘܲܒ̣ܗܘܿܢ ܡܸܬ̣ܡ̱ܣܹܝܢ ܚ̄ܢܲܢ ܐܲܝܟܲܢܵܐ ܚܵܐܹ̇ܝܢ ܚ̄ܢܲܢ.

¹¹ܐܸܡܲܪ ܠܗܘܿܢ: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܨܵܒܹ̇ܐ ܐ̄ܢܵܐ ܒܡܵܘܬܹ̇ܗ ܕܥܵܘܿܠܵܐ: ܐܸܠܵܐ ܕܲܢܬ̣ܘܼܒ̣ ܥܵܘܿܠܵܐ ܡ̣ܢ ܥܘܼܠܹܗ ܘܢܸܚܹܐ: ܬܘܼܒ̣ܘ ܘܐܸܬ̣ܦܢܵܘ ܡ̣ܢ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܠܵܐ ܬܡܘܼܬ̣ܘܼܢ ܕܒܹܝܬ̣ ܝܑܼܣܪܵܝܹܠ.

¹²ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ ܠܲܒ̣ܢܲܝ̈ ܥܲܡܵܟ: ܙܲܕ̇ܝܩܘܼܬܹܗ ܕܙܲܕ̇ܝܼܩܵܐ ܠܵܐ ܡܦܲܨܝܵܐ ܠܹܗ ܒܝܵܘܡܵܐ ܕܚܵܛܹ̇ܐ: ܘܥܵܘܿܠܵܐ ܠܵܐ ܡܸܬ̇ܬ̇ܩܸܠ ܒܥܵܘܼܠܹܗ ܒܝܵܘܡܵܐ ܕܡܸܬ̣ܦ̄ܢܸܐ ܡ̣ܢ ܥܵܘܼܠܹܗ: ܘܙܲܕ̇ܝܼܩܵܐ ܠܵܐ ܚܵܝܹ̇ܐ ܒܝܵܘܡܵܐ ܕܚܵܛܹ̇ܐ.

¹³ܡܵܐ ܕܐܸܡ̇ܪܹܬ̣ ܠܙܲܕ̇ܝܼܩܵܐ ܕܡܸܚܵܐ ܢܸܚܹܐ: ܘܐܸܬ̇ܬ̇ܟܸܠ ܥܲܠ ܙܲܕ̇ܝܼܩܘܼܬܹܗ ܘܒ̣ܵܬܲܪܟܸ̇ܢ ܥ̣ܒܲܕܼ ܥܵܘܼܠܵܐ: ܟܠܵܗ̇ ܙܲܕ̇ܝܼܩܘܼܬܹܗ ܕܲܥܒܲܕܼ ܠܵܐ ܬܸܬ̇ܕ̇ܟܲܪ ܠܹܗ: ܐܸܠܵܐ ܒܥܵܘܼܠܵܐ ܕܲܥܒܲܕܼ ܢܡܘܼܬ̣.

¹⁴ܘܡܵܐ ܕܐܸܡ̇ܪܹܬ̣ ܠܥܵܘܿܠܵܐ ܕܲܡܡܵܬ̣ ܬܡܘܼܬ̣: ܘܢܸܗܦܘܿܟ ܡ̣ܢ ܚܛܵܗܵܘ̈ܗܝ ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܼܩܘܼܬ̣ܵܐ.

¹⁵ܘܡܸܫܟܵܢܵܐ ܕܲܢܣܲܒ̣ ܢܦܲܢܹܐ: ܘܡܸܕܸ̇ܡ ܕܲܛܠܲܡ ܢܸܦܪܘܿܥ: ܘܲܒ̣ܦܘܼܩ̈ܕܵܢܹܐ ܕܚܲܝܹ̈ܐ ܢܗܲܠܸܟ: ܘܠܵܐ ܢܸܥܒܸ̇ܕܼ ܥܵܘܼܠܵܐ: ܡܸܚܵܐ ܢܸܚܹܐ ܘܠܵܐ ܢܡܘܼܬ̣.

¹⁶ܘܲܚܛܵܗܹ̈ܐ ܟܠܗܘܿܢ ܕܲܥܒܲܕܼ ܠܵܐ ܢܸܬ̇ܕܲܟ̣ܪܘܼܢ ܠܹܗ: ܐܸܠܵܐ ܒܕܼܝܼܢܵܐ ܘܲܒ̣ܙܲܕ̇ܝܼܩܘܼܬ̣ܵܐ ܕܲܥܒܲܕܼ ܢܸܚܹܐ.

¹⁷ܘܐܵܡ̇ܪܝܼܢ ܒܢܲܝ̈ ܥܲܡܵܟ: ܠܵܐ ܫܲܦܝܼܪܵܐ ܐܘܼܪܚܹܗ ܕܡܵܪܝܵܐ: ܐܘܼܪ̈ܚܵܬ̣ܗܘܿܢ ܗ̄ܘܼ ܕܝܼܠܗܘܿܢ ܠܵܐ ܫܲܦܝܼܪ̈ܵܢ.

¹⁸ܘܟܲܕܼ ܢܸܗܦܘܿܟ ܙܲܕ̇ܝܼܩܵܐ ܡ̣ܢ ܙܲܕ̇ܝܼܩܘܼܬܹܗ ܘܢܸܥܒܸ̇ܕܼ ܥܵܘܼܠܵܐ ܒܥܵܘܼܠܹܗ ܢܡܘܼܬ̣.

¹⁹ܘܟܲܕܼ ܢܸܗܦܘܿܟ ܥܵܘܿܠܐ ܡ̣ܢ ܥܵܘܵܠܘܼܬܹܗ: ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܩܘܼܬ̣ܵܐ ܒܗܘܿܢ ܢܸܚܹܐ.

²⁰ܘܐܵܡ̇ܪܝܼܢ ܐ̄ܢܬ̇ܘܿܢ ܠܵܐ ܫܲܦܝܼܪܵܐ ܐܘܼܪܚܹܗ ܕܡܵܪܝܵܐ: ܐ̄ܢܵܫ ܐܲܝܟ ܐܘܼܪ̈ܚܵܬܹܗ ܐܹܕ̇ܢܟ̣ܘܿܢ ܒܹܝܬ̣ ܝܑܼܣܪܵܝܹܠ.

²¹ܒܲܫܢܲܬ̣ ܚܕܲܥܸܣܪܹ̈ܐ ܒܚܲܡܸܫܬܵܐ ܒܝܲܪܚܵܐ ܕܥܸܣܪܵܐ ܕܲܫܒ̣ܝܼܬ̇ܘܿܢ: ܐܸܬ̣ܵܐ ܠܘܵܬ̣ܝ ܕܐܸܬ̣ܦܲܨܝܼ ܡ̣ܢ ܐܘܿܪܸܫܠܸܡ: ܘܐܸܡܲܪ ܠܝܼ: ܐܸܬ̣ܚܲܪܒܲܬ̤ ܡܕܼܝܼܢ̄ܬܵܐ.

²²ܘܥܲܕܼܠܵܐ ܢܹܐܬܹܐ ܠܘܵܬ̣ܝ ܗܵܘܿ ܕܐܸܬ̣ܦܲܨܝܼ: ܗܘ̤ܵܬ̣ ܐܝܼܕܹܗ ܕܡܵܪܝܵܐ ܥܠܲܝ ܒܪܲܡܫܵܐ: ܘܲܦܬܲܚ ܦܘܼܡܝ ܥܕܲܡܵܐ ܕܐܸܬ̣ܵܐ ܠܘܵܬ̣ܝ ܗܵܘܿ ܕܐܸܬ̣ܦܲܨܝܼ ܒܨܲܦܪܵܐ: ܘܟܲܕܼ ܐܸܬ̣ܦܬܲܚ ܦܘܼܡܝ ܬܘܼܒ̣ ܠܵܐ ܐܸܬ̇ܬ̇ܚܸܕܼ.

²³ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²⁴ܒܲܪܢܵܫܵܐ: ܐܲܝܠܹܝܢ ܕܥܵܡ̇ܪܝܼܢ ܒܚܲܪ̈ܒ̣ܵܬ̣ܵܐ ܗܵܠܹܝܢ ܕܐܲܪܥܵܐ ܕܝܼܣܪܵܝܹܠ ܐܵܡ̇ܪܝܼܢ: ܐܲܒ̣ܪܵܗܵܡ ܕܚܲܕܼ ܗ̄ܘܼܵܬ̣ ܝܼܪܸܬ̣ ܐܲܪܥܵܐ: ܚܢܲܢ ܕܣܲܓ̇ܝܼ̈ܐܹܐ ܚ̄ܢܲܢ ܠܵܐ ܝܵܪܬ̇ܝܼܢܲܢ ܠܵܗ̇.

²⁵ܡܸܛܠ ܗܵܢܵܐ ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܡܵܐ ܐܵܟ̣ܠܝܼܢ ܐ̄ܢܬ̇ܘܿܢ: ܘܥܲܝ̈ܢܲܝܟ̇ܘܿܢ ܠܲܦܬܲܟ̣ܪ̈ܲܝܟ̇ܘܿܢ ܡܪܝܼܡܝܼܢ ܐ̄ܢܬ̇ܘܿܢ: ܘܲܕܼܡܵܐ ܫܵܬܹ̇ܝܢ ܐ̄ܢܬܘܿܢ: ܘܨܵܒܹ̇ܝܢ ܐ̄ܢܬ̇ܘܿܢ ܠܡܹܐܪܲܬ̣ ܐܲܪܥܵܐ.

²⁶ܩܵܝܡ̇ܝܼܢ ܐ̄ܢܬ̇ܘܿܢ ܥܲܠ ܣܲܝܦܲܝ̈ܟ̇ܘܿܢ: ܘܥܵܒ̣ܕ̇ܝܼܢ ܐ̄ܢܬ̇ܘܿܢ ܛܲܢܦܘܼܬ̣ܵܐ: ܘܐ̄ܢܵܫ ܐܲܢ̄ܬܲܬ̣ ܚܲܒ̣ܪܹܗ ܡܛܲܢܦܝܼܢ ܐ̄ܢܬ̇ܘܿܢ: ܘܨܵܒܹ̇ܝܢ ܐ̄ܢܬ̇ܘܿܢ ܠܡܹܐܪܲܬ̣ ܐܲܪܥܵܐ.

²⁷ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܚܲܝ ܐ̄ܢܵܐ: ܕܟ̣ܠ ܕܲܒ̣ܚܲܪ̈ܒ̣ܵܬ̣ܵܐ ܐܸܢܘܿܢ ܒܚܲܪܒܵܐ ܢܸܦܠܘܿܢ: ܘܟ̣ܠ ܕܲܒ̣ܚܲܩܠܵܐ ܡܹܐܟ̣ܘܼܠܬܵܐ ܠܚܲܝ̄ܘܼܬ̣ܵܐ ܐܸܬܸ̇ܠ ܐܸܢܘܿܢ: ܘܟ̣ܠ ܕܲܒ̣ܦܲܥܪܹ̈ܐ ܘܒܲܡܥܲܪܹ̈ܐ ܒܡܵܘܬܵܢܵܐ ܢܡܘܼܬ̣ܘܼܢ.

²⁸ܘܐܸܥܒ̇ܕܼܝܼܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ: ܘܢܸܒ̣ܛܲܠ ܡܸܢܵܗ̇ ܫܘܼܒ̣ܚܵܐ ܕܥܘܼܫܢܵܗ̇: ܘܢܸܨܕ̇ܘܼܢ ܛܘܼܪܹ̈ܐ ܕܝܼܣܪܵܝܹܠ ܡ̣ܢ ܒܠܲܝ ܕܥܵܒܲܪ.

²⁹ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܲܥܒܲܕ̇ܬܵܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ: ܡܸܛܠ ܟܠܵܗ̇ ܛܲܢܦܘܼܬ̣ܵܐ ܕܲܥܒܲܕܼܘ.

³⁰ܐܲܢ̄ܬ̇ ܕܹܝܢ ܒܲܪܢܵܫܵܐ: ܒܢܲܝ̈ ܥܲܡܵܟ ܕܪܵܢܹ̇ܝܢ ܒܵܟ ܥܲܠ ܓܸܢ̄ܒ̣ ܐܸܣܹ̈ܐ: ܘܲܒ̣ܬܲܪ̈ܥܹܐ ܕܒ̣ܵـ̈ـܬܹ̇ܐ: ܘܲܡܡܲܠܠܝܼܢ ܚܲܕܼ ܥܲܡ ܚܲܕܼ: ܓܲܒ̣ܪܵܐ ܥܲܡ ܐܲܚܘܼܗܝ: ܘܐܵܡ̇ܪܝܼܢ: ܬܵܘ ܫܡܲܥܘ ܡܵܢܵܐ ܦܸܬ̣ܓ̣ܵܡܵܐ ܢܦܲܩ̣ ܡ̣ܢ ܩܕܼܵܡ ܡܵܪܝܵܐ.

³¹ܘܐܵܬܹ̇ܝܢ ܠܘܵܬ̣ܵܟ ܥܲܡܵܐ ܘܝܵܬ̣ܒ̇ܝܼܢ ܩܕܼܵܡܲܝܟ: ܘܫܡ̇ܥܝܼܢ ܦܸܬ̣ܓ̣ܵܡܲܝ̈ܟ: ܘܠܵܐ ܥܵܒ̣ܕ̇ܝܼܢ ܠܗܘܿܢ: ܡܸܛܠ ܕܕܲܓܵܠܘܼܬ̣ܵܐ ܒܦܘܼܡܗܘܿܢ: ܘܒ̣ܵܬܲܪ ܬܲܪ̈ܥܝܵܬ̣ܵܐ ܗ̄ܘܼ ܕܠܸܒ̇ܗܘܿܢ ܐܵܙ̇ܠ̄ܝܼܢ.

³²ܘܲܚܫܝܼܒ̣ ܐܲܢ̄ܬ̇ ܠܗܘܿܢ ܐܲܝܟ ܙܡܝܼܪܬܵܐ: ܘܐܲܝܟ ܩܵܠܵܐ ܫܲܦܝܼܪܵܐ: ܘܐܲܝܟ ܟܸܢܵܪܵܐ ܚܲܠܝܵܐ: ܘܫܵܡ̇ܥܝܼܢ ܦܸܬ̣ܓ̣ܵܡܲܝ̈ܟ ܘܠܵܐ ܥܵܒ̣ܕ̇ܝܼܢ ܠܗܘܿܢ.

³³ܡܵܐ ܕܲܗܘ̤ܵܘ ܕܹܝܢ ܦܸܬ̣ܓ̣ܵܡܲܝ̈ܟ: ܗܵܝܕܹ̇ܝܢ ܢܸܕ̇ܥܘܼܢ ܕܲܢܒ̣ܝܵܐ ܐܲܢ̄ܬ̇ ܒܲܝܢܵܬ̣ܗܘܿܢ.