Read Aramaic Peshita Ezekiel 35 Bible Online

Ezekiel 35 - Aramaic Peshita bible

Ezekiel 35

¹ܘܲܗܘ̤ܵܐ ܥܠܲܝ ܦܸܬ̣ܓ̣ܸܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܛܘܼܪܵܐ ܕܣܵܥܝܼܪ: ܘܐܸܬ̣ܢܲܒܵܐ ܥܠܵܘܗܝ.

³ܘܐܸܡܲܪ ܠܹܗ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ ܛܘܼܪܵܐ ܕܣܵܥܝܼܪ: ܘܐܲܪܝܼܡ ܐܝܼܕܼܝ ܥܠܲܝܟ: ܘܐܸܥܒ̇ܕܼܵܟ ܠܲܚܒ̣ܵܠܵܐ ܘܲܠܬܸܡܗܵܐ.

⁴ܘܲܡܕܼܝܼ̈ܢܵܬ̣ܵܟ ܐܸܥܒܸ̇ܕܼ ܠܚܘܼܪܒܵܐ: ܘܐܲܢ̄ܬ̇ ܬܸܗܘܹܐ ܠܲܚܒ̣ܵܠܵܐ: ܘܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ.

⁵ܥܲܠ ܕܲܗܘ̤ܵܬ̣ ܠܵܟ ܒܥܸܠܕ̇ܒ̣ܵܒ̣ܘܼܬ̣ܵܐ ܠܥܵܠܲܡ: ܘܐܲܫܠܸܡ̣ܬ̇ ܠܲܒ̣ܢܲܝ̈ ܝܑܼܣܪܵܝܹܠ ܠܐܝܼܕܼܵܐ ܕܣܲܝܦܵܐ ܒܙܲܒ̣ܢܵܐ ܕܥܵܩܲܬ̣ܗܘܿܢ: ܘܲܒ̣ܙܲܒ̣ܢܵܐ ܕܥܵܘܼܠܵܐ ܕܩܸܨܗܘܿܢ.

⁶ܡܸܛܠ ܗܵܢܵܐ ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܲܕܼܡܵܐ ܐܸܥܒ̇ܕܼܵܟ: ܘܲܕܼܡܵܐ ܢܸܪܕ̇ܦܵܟ: ܕܡܵܐ ܕܲܣܢܲܝܬ̇: ܗ̤ܘ ܕܡܵܐ ܢܸܪܕ̇ܦܵܟ.

⁷ܘܐܸܥܒ̇ܕܼܝܼܘܗܝ ܠܛܘܼܪܵܐ ܕܣܵܥܝܼܪ ܠܲܚܒ̣ܵܠܵܐ ܘܲܠܬܸܡܗܵܐ: ܘܐܵܘܒܸ̇ܕܼ ܡܸܢܹܗ ܕܥܵܒܲܪ ܘܲܕ̇ܬ̣ܵܐܹܒ̣.

⁸ܘܐܸܡܠܹܐ ܛܘܼܪ̈ܵܘܗܝ ܡ̣ܢ ܚܪ̈ܝܼܒ̣ܵܘܗܝ: ܫܩܝܼܦܲܝ̈ܟ ܘܪ̈ܵܡܵܬ̣ܵܟ ܘܢܲܚܠܲܝ̈ܟ: ܚܪ̈ܝܼܒܹܐ ܕܣܲܝܦܵܐ ܢܸܦܠܘܼܢ ܒܗܘܿܢ.

⁹ܘܐܸܥܒ̇ܕܵܟ ܚܘܼܪܒܵܐ ܠܥܵܠܲܡ: ܘܲܡܕܼܝܼ̈ܢܵܬ̣ܵܟ ܠܵܐ ܢܸܬ̣̈ܝܲܬ̇ܒ̣ܵܢ: ܘܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ.

¹⁰ܥܲܠ ܕܐܸܡܪܬ̇ ܕܲܬ̣ܪܹܝܢ ܥܲܡܡ̈ܝܼܢ ܘܬܲܪܬܹ̇ܝܢ ܡܲܠ̈ܟ̇ܘܵܢ ܕܝܼܠܝ ܐܸܢܹܝܢ: ܘܐܸܢܵܐ ܐܹܪܲܬ̣ ܐܸܢܹܝܢ: ܘܡܵܪܝܵܐ ܬܲܡܵܢ ܗ̄ܘܼܵܐ.

¹¹ܡܸܛܠ ܗܵܢܵܐ ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܐܸܥܒܲܕܼ ܠܵܟ ܐܲܝܟ ܪܘܼܓ̣ܙܵܟ: ܘܐܲܝܟ ܒܥܸܠܕ̇ܒ̣ܵܒ̣ܘܼܬ̣ܵܟ ܕܲܥܒܲܕ̇ܬ̇ ܘܲܣܢܲܝܬ̇ ܐܸܢܘܿܢ: ܘܐܸܬ̣ܓ̇ܠܹܐ ܒܗܘܿܢ ܡܵܐ ܕܕܼܵܐܹ̇ܢ ܐ̄ܢܵܐ ܠܵܟ.

¹²ܘܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ: ܫܸܡ̇ܥܹܬ̣ ܟܠܹܗ ܓܘܼܕܵܦܵܟ: ܕܐܸܡܲܪܬ̇ ܥܲܠ ܛܘܼܪܹ̈ܐ ܕܝܼܣܪܵܝܹܠ: ܕܚܲܪܒ̇ܝܼܢ ܐܸܢܘܿܢ: ܘܡܹܐܟ̣ܘܼܠܬܵܐ ܐܸܢܘܿܢ ܕܝܼܠܲܢ.

¹³ܘܐܵܘܪܸܟ̣ܬ̇ܘܼܢ ܥܠܲܝ ܦܘܼܡܟ̣ܘܿܢ: ܘܐܲܣܓ̇ܝܼܬ̇ܘܼܢ ܥܠܲܝ ܡܸܠܲܝ̈ܟ̇ܘܿܢ: ܘܐܸܢܵܐ ܫܸܡ̇ܥܹܬ̣.

¹⁴ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܛܘܼܪܵܐ ܕܣܵܥܲܪ ܕܲܫܪܸܐ ܒܚܲܕܼܘܼܬ̣ܵܐ ܕܟ̣ܠܵܗ̇ ܐܲܪܥܵܐ: ܠܲܚܒ̣ܵܠܵܐ ܐܸܥܒ̇ܕܼܵܟ.

¹⁵ܥܲܠ ܕܲܚ̣ܕܼܝܼܬ̇ ܠܝܵܪܬܘܼܬ̣ܵܐ ܕܒܹܝܬ̣ ܝܑܼܣܪܵܝܹܠ ܕܚܸܪܒܲܬ̤: ܗܵܟܲܢܵܐ ܐܸܥܒܸ̇ܕܼ ܠܵܟ: ܠܲܚܒ̣ܵܠܵܐ ܬܸܗܘܹܐ ܛܘܼܪܵܐ ܕܣܵܥܝܼܪ: ܘܐܲܕܼܘܿܡ ܟܠܵܗ̇: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.