Read Aramaic Peshita Ezekiel 36 Bible Online

Ezekiel 36 - Aramaic Peshita bible

Ezekiel 36

¹ܘܐܲܢ̄ܬ̇ ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܛܘܼܪܹ̈ܐ ܕܝܼܣܪܵܝܹܠ: ܘܐܸܡܲܪ ܠܛܘܼܪܹ̈ܐ ܕܝܼܣܪܵܝܹܠ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ.

²ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܡܲܪ ܥܠܲܝܟ̇ܘܿܢ ܒܥܸܠܕܒ̣ܵܒ̣ܵܐ ܐܲܚܵܢ: ܘܐܸܡܲܪ ܕܪ̈ܵܡܵܬ̣ܵܐ ܕܡ̣ܢ ܥܵܠܲܡ ܕܝܼܠܲܢ ܐܸܢܹܝܢ ܝܘܼܪܬܵܢܵܐ.

³ܡܸܛܠ ܗܵܢܵܐ ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܨܛܲܥܲܪܬ̇ܘܿܢ ܘܐܸܬ̣ܚܪܸܒ̣ܬ̇ܘܿܢ: ܘܐܸܬ̣ܓܲܕܲܦܬ̇ܘܿܢ ܡ̣ܢ ܐܲܝܠܹܝܢ ܕܲܚܕܼܝܼܪܝܼܢ ܠܟ̣ܘܿܢ: ܘܲܗ̤ܘܲܝܬ̇ܘܿܢ ܝܘܼܪܬܵܢܵܐ ܠܫܲܪܟܵܐ ܕܥܲܡܡܹ̈ܐ: ܘܲܢܦܲܠܬ̇ܘܿܢ ܒܡܲܡܠܠܵܐ ܕܠܸܫܵܢܹ̈ܐ ܘܲܒ̣ܪܸܢܵܝܵܐ ܕܥܲܡܡܹ̈ܐ.

⁴ܡܸܛܠ ܗܵܢܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ: ܛܘܼܪܹ̈ܐ ܕܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܛܘܼܪܹ̈ܐ ܘܲܠܪ̈ܵܡܵܬ̣ܵܐ ܘܲܠܢܲܚ̈ܠܹܐ: ܘܲܠܥܘܼܡܩܹ̈ܐ ܘܲܠܚܲܪ̈ܒ̣ܵܬ̣ܵܐ ܕܨܲܕܼܝܵـ̈ـܢ: ܘܠܲܡܕܼܝܼ̈ܢܵܬ̣ܵܐ ܕܐܸܫܬ̇ܒܸܩ: ܘܲܗ̤ܘܲܝ̈ ܠܒܸܙܬ̣ܵܐ ܘܲܠܡܘܼܝܵܩܵܐ ܠܫܲܪܟܵܐ ܕܥܲܡܡܹ̈ܐ ܕܲܚܕܼܝܼܪܝܼܢ ܠܗܘܿܢ.

⁵ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܢܘܼܪܵܐ ܕܲܛܢܵܢܝ ܡܲܠܠܹ̇ܬ̣ ܥܲܠ ܫܲܪܟܵܐ ܕܥܲܡܡܹ̈ܐ ܘܥܲܠ ܟܠܵܗ̇ ܐܲܕܼܘܿܡ: ܥܲܠ ܕܲܥܒܲܕܼܘ ܠܗܘܿܢ ܐܲܪܥܝ ܝܘܼܪܬܵܢܵܐ: ܒܚܲܕܼܘܼܬ̣ܵܐ ܕܠܸܒ̇ܗܘܿܢ ܨܲܥܲܪܘ ܢܲܦ̮̈ܫܵܬ̣ܵܐ: ܕܢܸܫܒ̇ܘܿܢ ܐܸܢܹܝܢ ܘܢܸܒ̇ܙܘܼܢ ܐܸܢܹܝܢ.

⁶ܡܸܛܠ ܗܵܢܵܐ ܐܸܬ̣ܢܲܒܵܐ ܥܲܠ ܐܲܪܥܵܐ ܕܝܼܣܪܵܝܹܠ: ܘܐܸܡܲܪ ܠܛܘܼܪܹ̈ܐ ܘܲܠܪ̈ܵܡܵܬ̣ܵܐ ܘܲܠܢܲܚ̈ܠܹܐ ܘܲܠܥܘܼܡܩܹ̈ܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܡܲܠܠܹ̇ܬ̣ ܒܲܛܢܵܢܝ ܘܲܒ̣ܚܸܡܬ̣ܝ: ܥܲܠ ܕܩܲܒܸ̇ܠܬ̇ܘܿܢ ܚܸܣܕܵܐ ܕܥܲܡܡܹ̈ܐ.

⁷ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܐܲܪܝܼܡܹ̇ܬ̣ ܐܝܼܕܼܝ ܥܲܠ ܥܲܡܡܹ̈ܐ ܕܲܚܕܼܝܼܪܝܼܢ ܠܟ̣ܘܿܢ: ܕܲܢܩܲܒ̇ܠܘܼܢ ܚܸܣܕ̇ܗܘܿܢ.

⁸ܐܲܢ̄ܬ̇ܘܿܢ ܕܹܝܢ ܛܘܼܪܹ̈ܐ ܕܝܼܣܪܵܝܹܠ: ܥܘܼܦܝܼܟ̣ܘܼܢ ܬܸܬ̇ܠܘܼܢ: ܘܦܹܐܪ̈ܲܝܟ̇ܘܿܢ ܬܪܲܒ̇ܘܿܢ ܠܥܲܡܝ ܝܑܼܣܪܵܝܹܠ: ܡܸܛܠ ܕܲܩ̣ܪܸܒ̣ܘ ܠܡܹܐܬ̣ܵܐ.

⁹ܘܗܵܐ ܡܸܬ̣ܦܢܸܐ ܐ̄ܢܵܐ ܥܠܲܝܟ̇ܘܿܢ: ܘܬܸܬ̣ܦܲܠܚܘܿܢ ܘܬܸܙܕܲܪܥܘܼܢ.

¹⁰ܘܐܲܣܓܹ̇ܐ ܥܠܲܝܟ̇ܘܿܢ ܒܢܲܝ̈ܢܵܫܵܐ ܕܟ̣ܠܹܗ ܒܹܝܬ̣ ܝܑܼܣܪܵܝܹܠ: ܘܢܸܬ̣ܝܲܬ̇ܒ̣ܵـ̈ـܢ ܡܕܼܝܼ̈ܢܵܬ̣ܵܐ ܘܚܲܪ̈ܒ̣ܵܬ̣ܵܐ ܢܸܬ̣ܒܲܢܝܵܢ.

¹¹ܘܐܲܣܓܹ̇ܐ ܥܠܲܝܟ̇ܘܿܢ ܒܢܲܝ̈ܢܵܫܵܐ ܘܲܒ̣ܥܝܼܪܵܐ: ܘܢܸܟ̣ܒ̇ܪܘܼܢ ܘܢܸܣܓ̇ܘܿܢ: ܘܐܵܘܬܸ̇ܒ̣ܟ̣ܘܼܢ ܐܲܝܟ ܕܡ̣ܢ ܩܕܼܝܼܡ: ܘܐܲܛܐܸܒ̣ ܠܟ̣ܘܿܢ ܐܲܝܟ ܕܡ̣ܢ ܪܹܫܝܼܬ̣ܵܐ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

¹²ܘܐܹܗܲܠܸܟ ܒܟ̣ܘܿܢ ܒܢܲܝ̈ܢܵܫܵܐ ܠܥܲܡܝ ܝܑܼܣܪܵܝܹܠ: ܘܢܹܐܪܬ̇ܘܼܢܵܟ̣ܘܿܢ ܘܬܸܗܘܘܿܢ ܠܗܘܿܢ ܠܝܘܼܪܬܵܢܵܐ: ܘܬ̣ܘܼܒ̣ ܠܵܐ ܬܵܘܣܦܘܼܢ ܠܡܸܬ̣ܓܲܙܵܝܘܼ.

¹³ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܵܡ̇ܪܝܼܢ ܠܹܟ̣ܝ ܐܵܟ̣ܠܲܬ̣ ܒܢܲܝ̈ܢܵܫܵܐ ܐܲܢ̄ܬ̇ܝ: ܘܲܡܓܲܙܝܲܬ̣ ܥܲܡܵܗ̇.

¹⁴ܡܸܟܹ̇ܝܠ ܒܢܲܝ̈ܢܵܫܵܐ ܠܵܐ ܬܹܐܟ̣ܠܝܼܢ: ܘܥܲܡܹܟ̣ܝ ܬܘܼܒ̣ ܠܵܐ ܬܸܓܹ̇ܙܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁵ܘܬ̣ܘܼܒ̣ ܠܵܐ ܐܲܫܡܲܥ ܥܠܲܝܟ̇ܝ ܚܸܣܕܵܐ ܕܥܲܡܡܹ̈ܐ: ܘܨܲܥ̱ܪܗܘܿܢ ܬܘܼܒ̣ ܠܵܐ ܬܩܲܒ̇ܠܝܼܢ: ܘܥܲܡܹܟ̣ܝ ܬܘܼܒ̣ ܠܵܐ ܬܓܸ̇ܙܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁶ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁷ܒܲܪܢܵܫܵܐ: ܕܒܹܝܬ̣ ܝܑܼܣܪܵܝܹܠ ܝܵܬ̣ܒ̇ܝܼܢ ܒܐܲܪ̱ܥܗܘܿܢ: ܘܛܲܢܦܘܼܗ̇ ܒܐܘܼܪ̈ܚܵܬ̣ܗܘܿܢ ܘܲܒ̣ܨܸܢ̈ܥܵܬ̣ܗܘܿܢ: ܘܐܲܝܟ ܛܵܡܐܘܼܬ̣ܵܐ ܕܟܸܦ̮ܣܵܢܝܼܬ̣ܵܐ: ܗܵܟܲܢܵܐ ܗܘ̤ܵܬ̣ ܩܕܼܵܡܲܝ ܐܘܼܪܚ̄ܗܘܿܢ.

¹⁸ܘܐܹܫ̇ܕܹܬ̣ ܪܘܼܓ̣ܙܝ ܥܠܲܝܗܘܿܢ: ܡܸܛܠ ܕܡܵܐ ܕܐܹܫܲܕܼܘ ܒܐܲܪܥܵܐ: ܘܛܲܢܦܘܼܗ̇ ܒܲܦܬܲܟ̣ܪ̈ܲܝܗܘܿܢ.

¹⁹ܘܒܲܕ̇ܪܹܬ̣ ܐܸܢܘܿܢ ܒܥܲܡܡܹ̈ܐ: ܘܲܕܼܪܹܝܬ̣ ܐܸܢܘܿܢ ܒܲܡܕܼܝܼ̈ܢܵܬ̣ܵܐ: ܘܐܲܝܟ ܐܘܼܪ̈ܚܵܬ̣ܗܘܿܢ ܘܐܲܝܟ ܨܸܢ̈ܥܵܬ̣ܗܘܿܢ ܕܵܢܹ̇ܬ̣ ܐܸܢܘܿܢ.

²⁰ܘܐܸܙܲܠ̣ܘ ܠܒܹܝܬ̣ ܥܲܡܡܹ̈ܐ: ܘܛܵܘܫ̣ܘ ܫܡܵܐ ܕܩܘܼܕܼܫܝ: ܘܐܵܡ̇ܪܝܼܢ ܗ̄ܘܼܵܘ ܠܗܘܿܢ ܥܲܡܡܹ̈ܐ: ܗܵܠܹܝܢ ܥܲܡܹܗ ܐܸܢܘܿܢ ܕܐܲܠܵܗܵܐ ܘܡ̣ܢ ܐܲܪܥܹܗ ܢܦܲܩ̣ܘ.

²¹ܘܚܵܣܹ̇ܬ̣ ܥܲܠ ܫܡܵܐ ܕܩܘܼܕܼܫܝ: ܕܛܵܘܫܘܼܗܝ ܕܒܹܝܬ̣ ܝܑܼܣܪܵܝܹܠ ܒܹܝܬ̣ ܥܲܡܡܹ̈ܐ ܕܐܸܙܲܠ̣ܘ ܠܘܵܬ̣ܗܘܿܢ.

²²ܡܸܛܠ ܗܵܢܵܐ ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܗ̄ܘܼܵܐ ܡܸܛܠܵܬ̣ܟ̣ܘܿܢ ܥܵܒܹ̇ܕܼ ܐ̄ܢܵܐ ܒܹܝܬ̣ ܝܑܼܣܪܵܝܹܠ: ܐܸܠܵܐ ܡܸܛܠ ܫܡܵܐ ܕܩܘܼܕܼܫܝ: ܕܛܵܘܫܬ̇ܘܿܢ ܒܹܝܬ̣ ܥܲܡܡܹ̈ܐ ܕܐܸܙܲܠܬ̇ܘܿܢ ܠܘܵܬ̣ܗܘܿܢ.

²³ܕܐܹܩܲܕܸ̇ܫ ܫܹܡܝ ܪܲܒܵܐ: ܕܐܸܬ̇ܛܵܘܲܫ ܒܹܝܬ̣ ܥܲܡܡܹ̈ܐ ܕܛܵܘܫܬ̇ܘܿܢܵܝܗܝ ܒܲܝܢܵܬ̣ܗܘܿܢ: ܘܢܸܕ̇ܥܘܼܢ ܥܲܡܡܹ̈ܐ ܕܐܸܢܵܐ ܐ̄ܢܵܐ ܡܵܪܝܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܵܐ ܕܐܸܬ̣ܩܲܕ̇ܫܹ̇ܬ̣ ܒܟ̣ܘܿܢ ܠܥܹܢܲܝܗܘܿܢ.

²⁴ܘܐܸܕܼܒܲܪܟ̣ܘܿܢ ܡ̣ܢ ܥܲܡܡܹ̈ܐ: ܘܐܹܟܲܢܸܫܟ̣ܘܿܢ ܡ̣ܢ ܡܕܼܝܼ̈ܢܵܬ̣ܵܐ: ܘܐܲܝܬ̇ܝܟ̣ܘܿܢ ܠܐܲܪ̱ܥܟ̣ܘܿܢ.

²⁵ܘܐܸܪܘܿܣ ܥܠܲܝܟ̇ܘܿܢ ܡܲـ̈ـܝܵܐ ܕܟܲـ̈ـܝܵܐ: ܘܐܹܕܲܟܹ̇ܝܟ̣ܘܿܢ ܡ̣ܢ ܟܠܵܗ̇ ܛܲܢܦܘܼܬ̣ܟ̣ܘܿܢ: ܘܡ̣ܢ ܟܠܗܘܿܢ ܦܬܲܟ̣ܪ̈ܲܝܟ̇ܘܿܢ.

²⁶ܘܐܸܬܸ̇ܠ ܠܟ̣ܘܿܢ ܠܸܒܵܐ ܚܲܕܼܬ̣ܵܐ: ܘܪܘܼܚܵܐ ܚܕܲܬܵܐ ܐܸܬܸ̇ܠ ܒܓ̣ܵܘܟ̣ܘܿܢ: ܘܐܲܥܒܲܪ ܠܸܒܵܐ ܕܟܹܐܦܵܐ ܡ̣ܢ ܒܸܣ̱ܪܟ̣ܘܿܢ: ܘܐܸܬܸ̇ܠ ܠܟ̣ܘܿܢ ܠܸܒܵܐ ܕܒܸܣܪܹ̈ܐ.

²⁷ܘܐܸܬܸ̇ܠ ܪܘܼܚܝ ܒܓ̣ܵܘܟ̣ܘܿܢ: ܘܐܸܥܒܸ̇ܕܼ ܕܲܒ̣ܦܘܼܩ̈ܕܵܢܲܝ ܬܗܲܠܟ̣ܘܿܢ: ܘܕܼܝܼ̈ܢܲܝ ܬܸܛܪܘܼܢ ܘܬܸܥܒ̇ܕܼܘܼܢ ܐܸܢܘܿܢ.

²⁸ܘܬܸܬ̇ܒ̣ܘܼܢ ܒܐܲܪܥܵܐ ܕܝܸܗ̄ܒܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ: ܘܬܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܟ̣ܘܿܢ ܐܲܠܵܗܵܐ.

²⁹ܘܐܸܦܪܘܿܩܟ̣ܘܿܢ ܡ̣ܢ ܟܠܵܗ̇ ܛܲܢܦܘܼܬ̣ܟ̣ܘܿܢ: ܘܐܸܩܪܹܐ ܠܲܥܒ̣ܘܼܪܵܐ ܘܐܲܣܓܹ̇ܝܘܗܝ: ܘܠܵܐ ܐܲܝܬܸ̇ܐ ܥܠܲܝܟ̇ܘܿܢ ܟܲܦܢܵܐ.

³⁰ܘܐܲܣܓܹ̇ܐ ܦܹܐܪܹ̈ܐ ܕܐܝܼܠܵܢܹ̈ܐ: ܘܥܲܠ̈ܠܵܬ̣ܵܐ ܕܐܲܪܥܵܐ: ܘܬ̣ܘܼܒ̣ ܠܵܐ ܬܩܲܒ̇ܠܘܼܢ ܚܸܣܕܵܐ ܕܟܲܦܢܵܐ ܒܹܝܬ̣ ܥܲܡܡܹ̈ܐ.

³¹ܘܬܸܬ̇ܕܲܟ̣ܪܘܿܢ ܬܲܡܵܢ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܨܸܢ̈ܥܵܬ̣ܟ̣ܘܿܢ ܫܵܛ̈ܝܵܬ̣ܵܐ: ܘܢܸܬ̣ܩܲܡ̈ܛܵܢ ܐܲܦܲܝ̈ܟ̇ܘܿܢ ܒܥܵܘܼܠܟ̣ܘܿܢ ܘܲܒ̣ܛܲܢܦ̈ܘܵܬ̣ܟ̣ܘܿܢ.

³²ܘܕܲܥܘ ܕܠܵܐ ܗ̄ܘܼܵܐ ܡܸܛܠܵܬ̣ܟ̣ܘܿܢ ܥܵܒܹܕܼ ܐ̄ܢܵܐ ܗܵܠܹܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܗܲܬ̣ܘ ܘܐܸܬ̇ܬܲܟ̣̄ܣܘ ܡ̣ܢ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܠܵܐ ܬܡܘܼܬ̣ܘܼܢ ܕܒܹܝܬ̣ ܝܑܼܣܪܵܝܹܠ.

³³ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܝܵܘܡܵܐ ܕܲܡܕ̇ܟܸ̇ܐ ܐ̄ܢܵܐ ܠܟ̣ܘܿܢ ܡܢ ܟܠܹܗ ܥܵܘܼܠܟ̣ܘܿܢ: ܡܵܘܬܸ̇ܒ̣ ܐ̄ܢܵܐ ܡܕܼܝܼ̈ܢܵܬ̣ܵܐ ܘܒ̣ܵܢܹ̇ܐ ܚܲܪ̈ܒ̣ܵܬ̣ܵܐ.

³⁴ܘܐܲܪܥܵܐ ܕܚܲܪܒܵܐ ܗ̄ܘܼܵܬ̣ ܬܸܬ̣ܦܠܲܚ: ܕܨܲܕܼܝܵܐ ܗ̄ܘܼܵܬ̣ ܒܥܲܝ̈ܢܲܝ ܟܠ ܕܥܵܒܲܪ.

³⁵ܘܢܹܐܡܪܘܼܢ ܐܲܪܥܵܐ ܗܵܝ ܚܲܪܒ̇ܬ̣ܵܐ: ܗܘ̤ܵܬ̣ ܐܲܝܟ ܦܲܪܕܲܝܣܵܐ ܕܲܥܕܸܢ: ܘܲܡܕܼܝܼ̈ܢܵܬ̣ܵܐ ܕܚܲܪ̈ܒܵܢ ܗ̄ܘܲܝ̈ ܘܲܡܣܲܚ̈ܦܵܢ: ܗ̤ܘܲܝ̈ ܟܲܪ̈ܟܹܐ ܥܲܫܝܼ̈ܢܹܐ.

³⁶ܘܢܸܕ̇ܥܘܿܢ ܥܲܡܡܹ̈ܐ ܕܡܸܫܬܲܚܪܝܼܢ ܚܕܼܵܪܲܝܟ̇ܘܿܢ: ܕܐܸܢܵܐ ܡܵܪܝܵܐ ܒܵܢܹ̇ܐ ܐ̄ܢܵܐ ܡܣܲܚ̈ܦܵܬ̣ܵܐ: ܘܢܵܨܹ̇ܒ̣ ܐ̄ܢܵܐ ܚܲܪ̈ܒ̣ܵܬ̣ܵܐ: ܐܸܢܵܐ ܡܵܪܝܵܐ ܐܸܡ̇ܪܹܬ̣ ܘܥܵܒܹ̇ܕܼ ܐ̄ܢܵܐ.

³⁷ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܘܼܒ̣ ܒܗܵܕܹܐ ܬܵܒܲܥ ܐ̄ܢܵܐ ܠܲܕܼܒܹܝܬ̣ ܝܑܼܣܪܵܝܹܠ: ܕܐܸܥܒܸ̇ܕܼ ܠܗܘܿܢ ܘܐܲܣܓܹ̇ܐ ܐܸܢܘܿܢ: ܐܲܝܟ ܥܵـ̈ـܢܵܐ ܕܲܒ̣ܢܲܝ̈ܢܵܫܵܐ.

³⁸ܐܲܝܟ ܥܵـ̈ـܢܵܐ ܩܲܕ̇ܝܼ̈ܫܵܬ̣ܵܐ: ܘܐܲܝܟ ܥܵـ̈ـܢܵܐ ܕܐܘܿܪܸܫܠܸܡ ܒܙܲܒ̣ܢܵܐ ܕܥܲܕܼܥܹ̈ܕܹܝܗ̇: ܗܵܟܲܢܵܐ ܢܸܗܘ̈ܝܵܢ ܡܕܼܝܼ̈ܢܵܬ̣ܵܐ ܕܚܲܪ̈ܒܵܢ ܗ̄ܘܲܝ̈: ܘܢܸܬ̣ܡܲܠ̈ܝܵܢ ܥܵـ̈ـܢܵܐ ܕܲܒ̣ܢܲܝ̈ܢܵܫܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.