Read Aramaic Peshita Ezekiel 37 Bible Online

Ezekiel 37 - Aramaic Peshita bible

Ezekiel 37

¹ܘܲܗܘ̤ܵܬ̣ ܥܠܲܝ ܐܝܼܕܹܗ ܕܡܵܪܝܵܐ: ܘܐܲܦܩܲܢܝ ܒܪܘܼܚܹܗ ܡܵܪܝܵܐ: ܘܐܲܫ̱ܪܝܲܢܝ ܒܲܦܩܲܥܬ̣ܵܐ: ܘܡܲܠܝܵܐ ܗ̄ܘܼܵܬ̣ ܓܲܪ̈ܡܹܐ.

²ܘܐܲܥ̣ܒܲܪܲܢܝ ܥܠܲܝܗܘܿܢ ܚܕܼܵܪܲܝܗܘܿܢ: ܘܲܚܙܹ̇ܝܬ̣ ܕܣܲܓ̇ܝܼܐܝܼܢ ܛܵܒ̣ ܒܲܦܩܲܥܬ̣ܵܐ: ܘܛܵܒ̣ ܝܲܒ̇ܝܼܫܝܼܢ.

³ܘܐܸܡܲܪ ܠܝܼ: ܒܲܪܢܵܫܵܐ: ܚܵܐܹ̇ܝܢ ܓܲܪ̈ܡܹܐ ܗܵܠܹܝܢ: ܘܐܸܡ̇ܪܹܬ̣ ܐ̄ܢ̇ܬܘܼ ܝܵܕܲܥ ܡܵܪܹܐ ܡܵܪ̈ܵܘܵܬ̣ܵܐ.

⁴ܘܐܸܡܲܪ ܠܝܼ ܐܸܬ̣ܢܲܒܵܐ ܥܲܠ ܓܲܪ̈ܡܹܐ ܗܵܠܹܝܢ ܘܐܸܡܲܪ ܠܗܘܿܢ ܓܲܪ̈ܡܹܐ ܝܲܒ̇ܝܼܫܹ̈ܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ.

⁵ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܓܲܪ̈ܡܹܐ ܗܵܠܹܝܢ: ܗܵܐ ܐܸܢܵܐ ܡܲܥܸܠ ܐ̄ܢܵܐ ܒܟ̣ܘܿܢ ܪܘܼܚܵܐ ܘܬܸܚܘܿܢ.

⁶ܘܐܸܬܸ̇ܠ ܥܠܲܝܟ̇ܘܿܢ ܓܝܵܕܹ̈ܐ: ܘܐܲܣܸܩ ܥܠܲܝܟ̇ܘܿܢ ܒܸܣܪܵܐ: ܘܐܹܩܪܘܿܡ ܥܠܲܝܟ̇ܘܿܢ ܡܸܫܟܵܐ: ܘܐܸܬܸ̇ܠ ܒܟ̣ܘܿܢ ܪܘܼܚܵܐ ܘܬܸܚܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

⁷ܘܐܸܬ̣ܢܲܒ̇ܝܼܬ̣ ܐܲܝܟ ܕܦܲܩ̣ܕܲܢܝ: ܘܟܲܕܼ ܐܸܬ̣ܢܲܒ̇ܝܼܬ̣: ܗܘ̤ܵܐ ܩܵܠܵܐ ܘܙܵܘܥܵܐ: ܘܲܩ̣ܪܸܒ̣ܘ ܓܲܪ̈ܡܹܐ ܓܲܪܡܵܐ ܠܘܵܬ̣ ܫܪܝܼܬܹܗ.

⁸ܘܲܚܙܹ̇ܝܬ̣ ܕܲܣܠܸܩ̣ ܥܠܲܝܗܘܿܢ ܓܝܵܕܹ̈ܐ ܘܒܸܣܪܵܐ: ܘܐܸܬ̣ܩܪܸܡ ܥܠܲܝܗܘܿܢ ܡܸܫܟܵܐ ܡ̣ܢ ܠܥܸܠ: ܘܪܘܼܚܵܐ ܠܲܝܬ̇ ܗ̄ܘܼܵܬ̣ ܒܗܘܿܢ.

⁹ܘܐܸܡܲܪ ܠܝܼ: ܐܸܬ̣ܢܲܒܵܐ ܥܲܠ ܪܘܼܚܵܐ: ܐܸܬ̣ܢܲܒܵܐ ܒܲܪܢܵܫܵܐ: ܘܐܸܡܲܪ ܠܪܘܼܚܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܵܝ ܪܘܼܚܵܐ ܡ̣ܢ ܐܲܪܒܲܥ ܪ̈ܘܼܚܹܐ: ܘܦܘܿܚܝ ܒܗܵܠܹܝܢ ܩܛܝܼ̈ܠܹܐ ܘܢܸܚܘܿܢ.

¹⁰ܘܐܸܬ̣ܢܲܒ̇ܝܼܬ̣ ܐܲܝܟ ܕܦܲܩ̣ܕܲܢܝ: ܘܥܸܠܲܬ̤ ܒܗܘܿܢ ܪܘܼܚܵܐ ܘܲܚܝܵܘ: ܘܩܵܡ̣ܘ ܥܲܠ ܪܸ̈ܓ̣ܠܲܝܗܘܿܢ: ܚܲܝܠܵܐ ܕܛܵܒ̣ ܣܲܓ̇ܝܼ.

¹¹ܘܐܸܡܲܪ ܠܝܼ: ܒܲܪܢܵܫܵܐ: ܗܵܠܹܝܢ ܓܲܪ̈ܡܹܐ ܟܠܗܘܿܢ ܕܲܒ̣ܢܲܝ̈ ܝܑܼܣܪܵܝܹܠ ܐܸܢܘܿܢ: ܕܐܵܡ̇ܪܝܼܢ ܗ̄ܘܼܵܘ ܝܑܼܒܸܫ̣ܘ ܓܲܪ̈ܡܲܝܢ: ܘܐܸܒܲܕܼ ܣܲܒ̣ܪܵܢ: ܘܲܒ̣ܛܸܠܢ ܠܲܢ.

¹²ܡܸܛܠ ܗܵܢܵܐ ܐܸܬ̣ܢܲܒܵܐ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܦܬܲܚ ܐ̄ܢܵܐ ܩܲܒ̣ܪ̈ܲܝܟ̇ܘܿܢ: ܘܡܲܝܬܸ̇ܐ ܐ̄ܢܵܐ ܠܟܘܿܢ ܠܐܲܪܥܵܐ ܕܝܼܣܪܵܝܹܠ.

¹³ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܦܸܬ̣ܚܹ̇ܬ̣ ܩܲܒ̣ܪ̈ܲܝܟ̇ܘܿܢ: ܘܡܵܐ ܕܐܲܣܸܩܬ̇ܟ̣ܘܿܢ ܡ̣ܢ ܩܲܒ̣ܪ̈ܲܝܟ̇ܘܿܢ.

¹⁴ܐܸܬܸ̇ܠ ܪܘܼܚܝ ܒܟ̣ܘܿܢ ܘܬܸܚܘܿܢ: ܘܐܸܫܒ̇ܘܿܩܟ̣ܘܿܢ ܒܐܲܪ̱ܥܟ̣ܘܿܢ: ܘܬܸܕ̇ܥܘܿܢ ܕܐܸܢܵܐ ܐ̄ܢܵܐ ܡܵܪܝܵܐ: ܐܸܡ̇ܪܹܬ̣ ܘܥܵܒܹ̇ܕܼ ܐ̄ܢܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.ܥܠ ܕܣܠܩܝܢ ܘܗܘܝܢ ܚܕ ܥܡܐ ܘܚܕܐ ܡܠܟܘܬܐ

¹⁵ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

¹⁶ܐܲܢ̄ܬ̇ ܕܹܝܢ ܒܲܪܢܵܫܵܐ: ܣܲܒ̣ ܠܵܟ ܩܲܝܣܵܐ ܚܲܕܼ: ܘܲܟ̣ܬ̇ܘܼܒ̣ ܥܠܵܘܗܝ ܝܑܼܗܘܼܕܼܵܐ ܘܲܒ̣ܢܲܝ̈ ܝܑܼܣܪܵܝܹܠ ܚܲܒ̣ܪ̈ܵܘܗܝ: ܘܣܲܒ̣ ܩܲܝܣܵܐ ܐ̄ܚܪܹܢܵܐ: ܘܲܟ̣ܬ̣ܘܿܒ̣ ܥܠܵܘܗܝ ܝܵܘܣܸܦ ܒܩܲܝܣܵܐ ܕܐܲܦܪܹܝܡ: ܘܟ̣ܠܗܘܿܢ ܒܢܲܝ̈ ܝܼܣܪܵܝܹܠ ܚܲܒ̣ܪ̈ܵܘܗܝ.

¹⁷ܘܩܲܪܸܒ̣ܘ ܐܸܢܘܿܢ ܚܲܕܼ ܠܘܵܬ̣ ܚܲܕܼ: ܘܢܸܗܘܘܿܢ ܚܲܕܼ ܩܹܝܣ ܒܐܝܼܕܼܵܟ.

¹⁸ܘܐܸܢ ܐܸܡܲܪܘ ܠܵܟ ܒܢܲܝ̈ ܥܲܡܵܟ ܚܵܘܵܢ ܡܵܢܵܐ ܐܸܢܹܝܢ ܗܵܠܹܝܢ.

¹⁹ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܢܵܣܹ̇ܒ̣ ܐ̄ܢܵܐ ܩܲܝܣܵܐ ܕܝܵܘܣܸܦ ܕܒ̣ܐܝܼܕܹܗ ܕܐܲܦܪܹܝܡ: ܘܫܲܒ̣̈ܛܹܐ ܕܝܼܣܪܵܝܹܠ ܚܲܒ̣ܪ̈ܵܘܗܝ: ܘܐܸܬܸ̇ܠ ܐܸܢܘܿܢ ܥܲܡ ܩܲܝܣܵܐ ܕܲܝܗܘܼܕܼܵܐ: ܘܐܸܥܒܸ̇ܕܼ ܐܸܢܘܿܢ ܚܲܕܼ ܩܹܝܣ: ܘܢܸܗܘܘܿܢ ܚܲܕܼ ܒܐܝܼܕܼܝ.

²⁰ܘܩܲܝܣܹ̈ܐ ܕܟ̣ܵܬܹ̇ܒ̣ ܐܲܢ̄ܬ̇ ܥܠܲܝܗܘܿܢ: ܐܲܚܘܿܕܼ ܐܸܢܘܿܢ ܒܐܝܼܕܼܵܟ ܠܥܹܢܲܝܗܘܿܢ.

²¹ܘܐܸܡܲܪ ܠܗܘܿܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܢܵܣܹ̇ܒ̣ ܐ̄ܢܵܐ ܠܲܒ̣ܢܲܝ̈ ܝܑܼܣܪܵܝܹܠ: ܡ̣ܢ ܒܲܝܢܵܬ̣ ܥܲܡܡܹ̈ܐ ܕܐܸܙܲܠ̣ܘ ܠܘܵܬ̣ܗܘܿܢ: ܘܐܹܟܲܢܸܫ ܐܸܢܘܿܢ ܘܐܲܝܬܹ̇ܐ ܐܸܢܘܿܢ ܠܐܲܪ̱ܥܗܘܿܢ.

²²ܘܐܸܥܒܸ̇ܕܼ ܐܸܢܘܿܢ ܥܲܡܵܐ ܚܲܕܼ ܒܐܲܪܥܵܐ ܒܛܘܼܪܹ̈ܐ ܕܝܼܣܪܵܝܹܠ: ܘܚܲܕܼ ܡܲܠܟܵܐ ܢܸܗܘܹܐ ܠܟ̣ܠܗܘܿܢ: ܘܬ̣ܘܼܒ̣ ܠܵܐ ܢܸܗܘܘܿܢ ܬܪܹܝܢ ܥܲܡܡ̈ܝܼܢ: ܘܬ̣ܘܼܒ̣ ܠܵܐ ܢܸܬ̣ܦܲܠܓܘܼܢ ܠܬܲܪܬܹ̇ܝܢ ܡܲܠ̈ܟ̇ܘܿܢ.

²³ܘܬ̣ܘܼܒ̣ ܠܵܐ ܢܸܬ̇ܛܲܢܦܘܿܢ ܒܲܦܬܲܟ̣ܪ̈ܲܝܗܘܿܢ: ܘܲܒ̣ܛܲܢ̈ܦܘܵܬ̣ܗܘܿܢ ܘܲܒ̣ܟ̣ܠܹܗ ܥܵܘܼܠܗܘܿܢ: ܘܐܸܦܪܘܿܩ ܐܸܢܘܿܢ ܡ̣ܢ ܟܠܹܗ ܒܹܝܬ̣ ܡܲܥܡܲܪܗܘܿܢ ܕܲܚܛܵܘ ܒܹܗ: ܘܐܸܕܲܟܸ̇ܐ ܐܸܢܘܿܢ ܘܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܗܘܿܢ ܐܲܠܵܗܵܐ.

²⁴ܘܥܲܒ̣ܕ̇ܝ ܕܵܘܝܼܕܼ ܢܲܡܠܸܟ ܥܠܲܝܗܘܿܢ: ܘܪܵܥܝܵܐ ܚܲܕܼ ܢܸܗܘܹܐ ܠܟ̣ܠܗܘܿܢ: ܘܲܒ̣ܕܼܝܼ̈ܢܲܝ ܢܗܲܠܟ̣ܘܼܢ: ܘܦܘܼܩܕܵܢܲܝ̈ ܢܸܛܪܘܿܢ ܘܢܸܥܒ̇ܕܼܘܼܢ ܐܸܢܘܿܢ.

²⁵ܘܢܸܬ̇ܒ̣ܘܼܢ ܒܐܲܪܥܵܐ ܕܝܸܗ̄ܒܹ̇ܬ̣ ܠܥܲܒ̣ܕ̇ܝ ܝܲܥܩܘܿܒ̣: ܕܝܼܬܸܒ̣ܘ ܒܵܗ̇ ܐܲܒ̣ܵܗܲܝ̈ܗܘܿܢ: ܘܢܸܬܸ̇ܒ̣ܘܼܢ ܒܵܗ̇ ܗܸܢܘܿܢ ܘܲܒ̣ܢܲܝ̈ܗܘܿܢ: ܘܲܒ̣ܢܲܝ̈ ܒܢܲܝ̈ܗܘܿܢ ܠܥܵܠܲܡ: ܘܕܼܵܘܝܼܕܼ ܥܲܒ̣ܕ̇ܝ ܢܸܗܘܹܐ ܠܗܘܿܢ ܡܕܲܒ̇ܪܵܢܵܐ ܠܥܵܠܲܡ.

²⁶ܘܐܲܩܝܼܡ ܠܗܘܿܢ ܩܝܵܡܵܐ ܕܲܫܠܵܡܵܐ ܘܲܩܝܵܡܵܐ ܕܥܵܠܲܡ ܢܸܗܘܹܐ ܥܲܡܗܘܿܢ: ܘܐܲܣܓܹ̇ܐ ܐܸܢܘܿܢ: ܘܐܸܬܸ̇ܠ ܡܲܩܕܲܫܝ ܒܲܝܢܵܬ̣ܗܘܿܢ ܠܥܵܠܲܡ.

²⁷ܘܢܸܗܘܹܐ ܒܹܝܬ̣ ܡܲܫܪܲܝ ܒܗܘܿܢ: ܘܐܸܗܘܹܐ ܠܗܘܿܢ ܐܲܠܵܗܵܐ: ܘܗܸܢܘܿܢ ܢܸܗܘܘܿܢ ܠܝܼ ܥܲܡܵܐ.

²⁸ܘܢܸܕ̇ܥܘܿܢ ܥܲܡܡܹ̈ܐ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸ̇ܫ ܐ̄ܢܵܐ ܠܝܼܣܪܵܝܹܠ: ܡܵܐ ܕܲܗܘ̤ܵܐ ܒܗܘܿܢ ܡܲܩܕܲܫܝ ܠܥܵܠܲܡ.ܥܲܠ ܕܒܝܬ ܓܘܓ ܘܡܓܘܓ ܕܣܠܩܝܢ ܥܠܝܗܘܢ ܡܐ ܕܣܠܩܘ ܡܢ ܒܒܠ.