Read Aramaic Peshita Ezekiel 38 Bible Online

Ezekiel 38 - Aramaic Peshita bible

Ezekiel 38

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܣܝܼܡ ܐܲܦܲܝ̈ܟ ܥܲܠ ܓܘܿܓ̣: ܘܥܲܠ ܐܲܪܥܵܐ ܕܡܵܓ̣ܘܿܓ̣: ܡܕܲܒ̇ܪܵܢܵܐ ܘܪܹܫܵܐ ܕܡܵܫܵܟ ܘܲܕ̇ܬ̣ܘܼܒܹܝܠ: ܘܐܸܬ̣ܢܲܒܵܐ ܥܠܵܘܗܝ ܘܐܸܡܲܪ.

³ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܢܵܐ ܥܠܲܝܟ ܓܘܿܓ̣: ܡܕܲܒ̇ܪܵܢܵܐ ܘܪܹܫܵܐ ܕܡܵܫܵܟ ܘܲܕ̇ܬ̣ܘܼܒܹܝܠ.

⁴ܘܐܹܟܲܢܫܵܟ ܘܐܲܪܡܸܐ ܒܠܵܡܵܐ ܒܦܲܟܲܝ̈ܟ: ܘܐܲܦܩܵܟ ܡ̣ܢ ܐܲܬ̣ܪܵܟ ܠܵܟ ܘܲܠܟ̣ܠܹܗ ܚܲܝܠܵܟ: ܘܪ̈ܲܟ̣ܫܵܐ ܘܦܲܪ̈ܵܫܹܐ ܕܲܠܒ̣ܝܼܫܝܼܢ ܙܲܝܢܵܐ: ܟܠܗܘܿܢ ܟܸܢܫܵܐ ܪܲܒܵܐ: ܒܢܲܝ̈ܙܟܹܐ ܘܲܒ̣ܣܲܟ̇ܪܹ̈ܐ ܘܐܲܚܝܼܕܲܝ̈ ܣܲܝ̈ܦܹܐ.

⁵ܟܠܗܘܿܢ ܦܵܪ̈ܣܵܝܹܐ: ܘܟ̣ܘܼ̈ܫܵܝܹܐ: ܘܦܘܿܛܵܝܹ̈ܐ: ܥܲܡܗܘܿܢ ܒܣܲܟ̇ܪܹ̈ܐ: ܘܲܒ̣ܣܲܢ̱ܘܼܪ̈ܵܬ̣ܵܐ.

⁶ܓܵܡܵܪ ܘܟ̣ܠܹܗ ܚܲܝܠܵܗ̇: ܘܒܹܝܬ̣ ܬܘܿܓܸܪܡܵܐ: ܘܲܫܦܘܿܠܲܝ̈ ܓܲܪܒ̇ܝܵܐ ܘܟ̣ܠܹܗ ܚܲܝܠܗܘܿܢ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ.

⁷ܐܸܬ̇ܛܲܝܲܒ̣ ܐܲܢ̄ܬ̇ ܘܟ̣ܠܹܗ ܟܸܢܫܵܟ ܕܲܟ̣ܢܝܼܫ ܥܲܡܵܟ: ܘܲܗܘ̤ܝܼ ܠܗܘܿܢ ܡܲܛܲܪܬܵܐ.

⁸ܡ̣ܢ ܝܵܘ̈ܡܵܬ̣ܵܐ ܩܲܕܼܡܵܝܹ̈ܐ ܐܸܬ̣ܦܩܸܕ̇ܬ̇: ܘܲܒ̣ܚܲܪܬ̣ܵܐ ܕܲܫܢܲـ̈ـܝܵܐ ܬܹܐܬܹܐ ܥܲܠ ܛܘܼܪܹ̈ܐ ܕܝܼܣܪܵܝܹܠ: ܘܥܲܠ ܐܲܪܥܵܐ ܕܐܸܫܬܲܝܢܲܬ̤ ܡ̣ܢ ܚܲܪܒܵܐ: ܘܐܸܬ̣ܟܲܢܫܲܬ̤ ܡ̣ܢ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܝܼܬܸܒ̣ܘ ܒܵܗ̇ ܟܠܗܘܿܢ ܒܫܸܠܝܵܐ.

⁹ܘܬܸܣܲܩ ܐܲܝܟ ܕܠܘܼܚܝܵܐ: ܘܐܲܝܟ ܥܢܵܢܵܐ ܕܲܡܟܲܣܝܵܐ ܠܐܲܪܥܵܐ: ܐܲܢ̄ܬ̇ ܘܟ̣ܠܹܗ ܚܲܝܠܵܟ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ.

¹⁰ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܹܗ ܒܝܵܘܡܵܐ ܗܵܘܿ: ܢܸܣ̈ܩܵܢ ܡܸܠܹ̈ܐ ܥܲܠ ܠܸܒܵܟ: ܘܬܸܬ̣ܚܲܫܲܒ̣ ܡܲܚܫܲܒ̣ܬ̣ܵܐ ܒܝܼܫܬܵܐ: ܘܬܹܐܡܲܪ.

¹¹ܐܸܣܲܩ ܥܲܠ ܐܲܪܥܵܐ ܟܲܗܝܼܢܬܵܐ: ܘܐܹܙܲܠ ܥܲܠ ܐܲܝܠܹܝܢ ܕܝܵܬ̣ܒ̇ܝܼܢ ܒܫܸܠܝܵܐ: ܕܠܵܐ ܫܘܼܪܹ̈ܐ: ܘܠܵܐ ܣܘܼܟ̇ܪܹ̈ܐ: ܘܠܵܐ ܬܲܪ̈ܥܹܐ ܐܝܼܬ̣ ܠܗܘܿܢ.

¹²ܕܬܸܫܒܸ̇ܐ ܫܒ̣ܝܼܬ̣ܵܐ: ܘܬܸܒ̇ܘܙ ܒܸܙܬ̣ܵܐ: ܘܬܲܗܦܸܟ ܐܝܼܕܼܵܟ ܥܲܠ ܚܲܪ̈ܒ̣ܵܬ̣ܵܐ ܕܐܸܬ̣ܝܲܬܲܒ̣: ܘܥܲܠ ܥܲܡܵܐ ܕܐܸܬ̣ܟܲܢܲܫ ܡ̣ܢ ܥܲܡܡܹ̈ܐ: ܕܲܩ̣ܢܵܘ ܒܥܝܼܪܵܐ ܘܩܸܢܝܵܢܵܐ: ܘܝܵܬ̣ܒ̇ܝܼܢ ܥܲܠ ܫܘܼܦܪܵܗ̇ ܕܐܲܪܥܵܐ.

¹³ܫܒ̣ܵܐ ܘܕܼܵܪܵܢ ܘܬܲܓܵܪܹ̈ܐ ܕܬܲܪܫܝܼܫ: ܘܟܠܗܹܝܢ ܩܘܼܪ̈ܝܵܐ ܢܹܐܡܪ̈ܵܢ ܠܵܟ: ܐܸܬܲܝܬ̇ ܠܡܸܫܒܵܐ ܫܒ̣ܝܼܬ̣ܵܐ: ܘܲܠܡܸܒܲܙ ܒܸܙܬ̣ܵܐ: ܘܟܲܢܸܫ̣ܬ̇ ܟܢܘܼܫܝܵܟ ܕܬܸܫܩܘܿܠ ܣܹܐܡܵܐ ܘܕܲܗܒ̣ܵܐ: ܘܬܸܣܲܒ̣ ܒܥܝܼܪܵܐ ܘܩܸܢܝܵܢܵܐ: ܘܬܸܕܼܒܲܪ ܕܒ̣ܵܪܬܵܐ ܪܲܒ̇ܬ̣ܵܐ.

¹⁴ܡܸܛܠ ܗܵܢܵܐ ܐܸܬ̣ܢܲܒܵܐ ܒܲܪܢܵܫܵܐ: ܘܐܸܡܲܪ ܠܓ̣ܘܿܓ̣: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܹܗ ܒܝܵܘܡܵܐ ܕܢܸܬܸ̇ܒ̣ ܥܲܡܝ ܝܑܼܣܪܵܝܹܠ ܒܫܸܠܝܵܐ: ܬܸܕܲܥ.

¹⁵ܘܬܹܐܬܹܐ ܡ̣ܢ ܐܲܬ̣ܪܵܟ ܡ̣ܢ ܫܦܘܿܠܲܝ̈ ܓܲܪܒ̇ܝܵܐ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ: ܟܠܗܘܿܢ ܪ̈ܵܟ̣ܒܲܝ ܪ̈ܲܟ̣ܫܵܐ: ܟܢܘܼܫܝܵܐ ܪܲܒܵܐ ܘܚܲܝܠܵܐ ܣܲܓ̇ܝܼܵܐܐ.

¹⁶ܘܬܸܣܲܩ ܥܲܠ ܥܲܡܝ ܝܑܼܣܪܵܝܹܠ: ܐܲܝܟ ܥܢܵܢܵܐ ܕܲܡܟܲܣܝܵܐ ܠܐܲܪܥܵܐ: ܠܚܲܪܬ̣ܵܐ ܕܝܵܘ̈ܡܵܬ̣ܵܐ ܬܹܐܬܹܐ: ܘܐܲܝܬܹ̇ܝܟ ܠܐܲܪܥܝ: ܘܢܸܕ̇ܥܘܼܢܵܢܝ ܥܲܡܡܹ̈ܐ ܡܵܐ ܕܐܸܬ̣ܩܲܕ̇ܫܹ̇ܬ̣ ܒܵܟ ܠܥܹܢܲܝܗܘܿܢ.

¹⁷ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܢ̄ܬ̇ܘܼ ܕܐܸܡ̇ܪܹܬ̣ ܥܠܲܝܟ ܒܝܵܘ̈ܡܵܬ̣ܵܐ ܩܲܕܼܡܵܝܹ̈ܐ: ܒܐܝܼܕܼܵܐ ܕܥܲܒ̣̈ܕܲܝ ܢܒ̣ܝܹ̈ܐ ܕܝܼܣܪܵܝܹܠ: ܕܡܸܬ̣ܢܲܒܹ̇ܝܢ ܗ̄ܘܼܵܘ ܒܝܵܘ̈ܡܵܬ̣ܵܐ ܗܵܢ̇ܘܿܢ: ܘܒܲܫܢܲـ̈ـܝܵܐ ܗܵܠܹܝܢ: ܕܐܲܝܬܹ̇ܝܟ ܥܠܲܝܗܘܿܢ.

¹⁸ܒܹܗ ܒܝܵܘܡܵܐ ܗܵܘܿ ܕܢܹܐܬܹܐ ܓܘܿܓ̣: ܥܲܠ ܐܲܪܥܵܐ ܕܝܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܹܐܩܲܕܼ ܪܘܼܓ̣ܙܝ ܒܚܸܡܬ̣ܝ ܘܒܲܛܢܵܢܝ.

¹⁹ܒܢܘܼܪܵܐ ܕܪܘܼܓ̣ܙܝ ܡܲܠܠܹ̇ܬ̣: ܕܒܹܗ ܒܝܵܘܡܵܐ ܗܵܘܿ: ܢܸܗܘܹܐ ܙܵܘܥܵܐ ܪܲܒܵܐ ܒܐܲܪܥܵܐ ܕܝܼܣܪܵܝܹܠ.

²⁰ܘܲܢܙܘܼܥܘܼܢ ܩܕܼܵܡܵܘܗܝ ܢܘܼܢܹ̈ܐ ܕܝܲܡܵܐ: ܘܦܵܪܲܚܬ̣ܵܐ ܕܲܫܡܲܝܵܐ: ܘܚܲܝ̄ܘܼܬ̣ܵܐ ܕܕܲܒ̣ܪܵܐ: ܘܟ̣ܠ ܪ̈ܲܚܫܵܐ ܕܪܵܚܹ̇ܫ ܒܐܲܪܥܵܐ: ܘܟ̣ܠܗܘܿܢ ܒܢܲܝ̈ܢܵܫܵܐ ܕܥܲܠ ܐܲܦܲܝ̈ ܐܲܪܥܵܐ: ܘܢܸܣܬܲܚܦܘܼܢ ܛܘܼܪܹ̈ܐ: ܘܢܸܦܠܘܿܢ ܡܲܓܕ̇ܠܹ̈ܐ.

²¹ܘܟ̣ܠܗܘܿܢ ܫܘܼܪܹ̈ܐ ܒܐܲܪܥܵܐ ܢܸܦܠܘܿܢ: ܘܐܸܩܪܹܐ ܥܠܵܘܗܝ ܚܲܪܒܵܐ ܒܟ̣ܠܗܘܿܢ ܛܘܼܪ̈ܲܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܝܦܹܗ ܕܓܲܒ̣ܪܵܐ ܒܐܲܚܘܼܗܝ ܢܸܗܘܹܐ.

²²ܘܐܹܕ̇ܢܝܼܘܗܝ ܒܡܵܘܬܵܐ ܘܒܲܕܼܡܵܐ: ܘܡܸܛܪܵܐ ܕܓ̣ܵܪܹܦ ܘܟܹܐܦܹ̈ܐ ܕܕܲܚܪܵܐ: ܘܢܘܼܪܵܐ ܘܟܸܒ̣ܪܝܼܬ̣ܵܐ ܐܲܚܸܬ̣ ܥܠܵܘܗܝ ܘܥܲܠ ܪܵܘܪ̈ܒ̣ܵܢܵܘܗܝ: ܘܥܲܠ ܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܹܗ.

²³ܘܐܹܪܲܒ̣ ܘܐܸܬ̣ܩܲܕܲܫ ܠܥܹܝܢ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.