Read Aramaic Peshita Ezekiel 39 Bible Online

Ezekiel 39 - Aramaic Peshita bible

Ezekiel 39

¹ܘܐܲܢ̄ܬ̇ ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܓܘܿܓ̣ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ ܓܘܿܓ̣: ܡܕܲܒ̇ܪܵܢܵܐ ܘܪܹܫܵܐ ܕܡܵܫܵܟ ܘܲܕ̇ܬ̣ܘܼܒܹܝܠ.

²ܘܐܹܫܲܝܢܵܟ ܘܐܹܟܲܢܫܵܟ: ܘܐܲܣܩܵܟ ܡ̣ܢ ܫܦܘܿܠܲܝ̈ ܓܲܪܒ̇ܝܵܐ: ܘܐܲܝܬܹ̇ܝܟ ܠܛܘܼܪܹ̈ܐ ܕܝܼܣܪܵܝܹܠ.

³ܘܐܲܦܸܕܼ ܩܸܫܬܵܟ ܡ̣ܢ ܣܸܡܵܠܵܟ: ܘܓܹܐܪ̈ܲܝܟ ܡ̣ܢ ܝܲܡܝܼܢܵܟ.

⁴ܘܲܒ̣ܛܘܼܪܹ̈ܐ ܕܝܼܣܪܵܝܹܠ ܬܸܦܸܠ: ܐܲܢ̄ܬ̇ ܘܟ̣ܠܹܗ ܚܲܝܠܵܟ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ: ܠܦܵܪܲܚܬ̣ܵܐ ܕܲܫܡܲܝܵܐ ܘܲܠܚܲܝ̄ܘܼܬ̣ܵܐ ܕܐܲܪܥܵܐ: ܝܲܗ̄ܒܲܬܵܟ ܠܡܹܐܟ̣ܘܼܠܬܵܐ.

⁵ܘܥܲܠ ܐܲܦܲܝ̈ ܕܲܒ̣ܪܵܐ ܬܸܦܸܠ: ܡܸܛܠ ܕܐܸܢܵܐ ܡܲܠܠܹ̇ܬ̣ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁶ܘܐܹܫܲܕܲܪ ܢܘܼܪܵܐ ܥܲܠ ܡܵܓ̣ܘܿܓ̣: ܘܥܲܠ ܝܵܬ̣ܒܲܝ̈ ܓܵܙܪ̈ܵܬ̣ܵܐ ܕܲܒ̣ܫܸܠܝܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

⁷ܘܲܫܡܵܐ ܕܩܘܼܕܼܫܝ ܐܵܘܕܲܥ ܒܓ̣ܵܘ ܥܲܡܝ ܝܑܼܣܪܵܝܹܠ: ܘܬ̣ܘܼܒ̣ ܠܵܐ ܐܹܛܵܘܸܫ ܫܡܵܐ ܕܩܘܼܕܼܫܝ: ܘܢܸܕ̇ܥܘܼܢ ܥܲܡܡܹ̈ܐ ܕܐܸܢܵܐ ܐ̄ܢܵܐ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ.

⁸ܗܵܐ ܡܛ̣ܵܐ ܠܡܹܐܬ̣ܵܐ ܝܵܘܡܵܐ ܕܐܸܡ̇ܪܹܬ̣: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

⁹ܘܢܸܦܩܘܼܢ ܥܵܡܘܿܪܹ̈ܐ ܕܩܘܼܪ̈ܝܵܐ ܕܝܼܣܪܵܝܹܠ: ܘܢܸܫܒ̇ܩܘܼܢ ܢܘܼܪܵܐ ܒܙܲܝܢܵܐ ܘܲܒ̣ܣܲܟ̇ܪܹ̈ܐ ܘܲܒ̣ܢܲܝ̈ܙܟܹܐ: ܘܲܒ̣ܩܸܫ̈ܬܵܬ̣ܵܐ ܘܲܒ̣ܓܹܐܪܹ̈ܐ: ܘܲܒ̣ܚܘܼܛܪܹ̈ܐ ܕܐܝܼ̈ܕܲܝܵܐ: ܘܲܒ̣ܪ̈ܘܼܡܚܹܐ: ܘܢܵܘܩ̄ܕܼܘܼܢ ܡܸܢܗܘܿܢ ܒܢܘܼܪܵܐ: ܫܒܲܥ ܫܢ̈ܝܼܢ.

¹⁰ܘܠܵܐ ܢܸܣܬܲܢܩܘܼܢ ܥܲܠ ܩܲܝ̈ܣܹܐ ܕܚܲܩܠܵܐ ܘܲܕܼܥܵܒ̣ܵܐ: ܐܸܠܵܐ ܡ̣ܢ ܙܲܝܢܗܘܿܢ ܢܵܘܩ̄ܕܼܘܼܢ ܒܢܘܼܪܵܐ ܘܢܸܫܒ̇ܘܿܢ ܠܐܲܝܠܹܝܢ ܕܲܫܒ̣ܵܘ ܐܸܢܘܿܢ: ܘܢܸܒ̇ܙܘܼܢ ܠܐܲܝܠܹܝܢ ܕܒܲܙܘ ܐܸܢܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹¹ܒܹܗ ܒܝܵܘܡܵܐ ܗܵܘܿ: ܐܸܬܸ̇ܠ ܬܲܡܵܢ ܕܘܼܟ̇ܬ̣ܵܐ ܠܓ̣ܘܿܓ̣ ܠܩܲܒ̣ܪܵܐ ܒܝܼܣܪܵܝܹܠ: ܢܲܚܠܵܐ ܪܲܒܵܐ ܕܲܒ̣ܡܲܕܼܢ̱ܚܵܝܹܗ ܕܝܲܡܵܐ: ܘܢܸܣܟ̇ܪܘܼܢܹܗ ܠܢܲܚܠܵܐ: ܘܢܸܩܒ̇ܪܘܼܢܹܗ ܬܲܡܵܢ ܠܓ̣ܘܿܓ̣: ܘܲܠܟܠܹܗ ܚܲܝܠܹܗ: ܘܢܸܬ̣ܩܪܸܐ ܢܲܚܠܵܐ ܕܣܵܘܦܵܢܹܗ ܕܓ̣ܘܿܓ̣.

¹²ܘܲܠܫܲܒ̣ܥܵܐ ܝܲܪ̈ܚܝܼܢ: ܢܸܩܒ̇ܪܘܼܢ ܐܸܢܘܿܢ ܕܒܹܝܬ̣ ܝܑܼܣܪܵܝܹܠ: ܘܬܸܬ̇ܕܲܟ̣ܵܐ ܐܲܪܥܵܐ.

¹³ܘܢܸܩܒ̇ܪܘܼܢ ܐܸܢܘܿܢ ܟܠܹܗ ܥܲܡܵܐ ܕܐܲܪܥܵܐ: ܘܢܸܗܘܸܐ ܠܗܘܿܢ ܫܡܵܐ ܒܝܵܘܡܵܐ ܕܡܸܫܬܲܒܲܚ ܐ̄ܢܵܐ ܐܵܡܲܪ ܡܵܪܝܵܐ.

¹⁴ܘܡ̣ܢ ܒܵܬܲܪ ܫܲܒ̣ܥܵܐ ܝܲܪ̈ܚܝܼܢ: ܢܸܗܘܘܿܢ ܓܲܒ̣ܪܹ̈ܐ ܡܗܲܠܟ̣ܝܼܢ ܐܲܡܝܼܢܵܐܝܼܬ̣ ܒܐܲܪܥܵܐ: ܘܩܵܒ̣ܪܝܼܢ ܠܐܲܝܠܹܝܢ ܕܐܸܫܬ̇ܚܲܪܘ ܒܐܲܪܥܵܐ: ܕܬܸܬ̇ܕܲܟܸ̇ܐ.

¹⁵ܘܟ̣ܠ ܕܥܵܒܲܪ ܒܐܲܪܥܵܐ: ܘܚܵܙܹ̇ܐ ܓܲܪܡܵܐ ܕܒܲܪܢܵܫܵܐ: ܢܲܨܘܸܐ ܥܲܠ ܓܲܒܹܗ ܨܘܵܝܵܐ: ܥܕܲܡܵܐ ܕܐܵܬܹ̇ܝܢ ܫܵܩ̇ܠܝܼܢ ܠܹܗ ܗܵܢܘܿܢ ܕܩܵܒ̣ܪܝܼܢ ܒܢܲܚܠܵܐ ܕܓ̣ܘܿܓ̣.

¹⁶ܘܢܸܫܬܲܡܲܗ ܫܡܵܗ̇ ܕܲܡܕܼܝܼܢ̄ܬܵܐ ܥܲܫܝܼܢܬܵܐ: ܘܲܢܕܲܟ̇ܘܿܢܵܗ̇ ܠܐܲܪܥܵܐ.

¹⁷ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ ܠܟ̣ܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ: ܘܲܠܟ̣ܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܬ̣ܟܲܢܲܫܘ ܘܬ̣ܵܘ ܡ̣ܢ ܟܠ ܕܘܼܟܵܐ: ܠܕܸܒ̣ܚ̱ܬ̣ܵܐ ܪܲܒ̇ܬ̣ܵܐ ܕܕܼܵܒܲܚ̇ ܐ̄ܢܵܐ ܠܟ̣ܘܿܢ ܒܛܘܼܪܹ̈ܐ ܕܝܼܣܪܵܝܹܠ: ܘܬܹܐܟ̣ܠܘܼܢ ܒܸܣܪܵܐ ܘܬܸܫܬ̇ܘܿܢ ܕܡܵܐ.

¹⁸ܒܸܣܪܵܐ ܕܓܲܢ̄ܒܵܪܹ̈ܐ ܬܹܐܟ̣ܠܘܼܢ: ܘܲܕܼܡܵܐ ܕܪܵܘܪ̈ܒ̣ܵܢܹܐ ܕܐܲܪܥܵܐ ܬܸܫܬ̇ܘܿܢ: ܕܕܸܟ̣ܪܹ̈ܐ ܘܕܲܡܦܲܛܡܹ̈ܐ. ܘܲܕ̇ܬܲܝܫܹ̈ܐ ܘܲܕ̇ܬ̣ܵܘܪܹ̈ܐ: ܘܕܲܐܪ̈ܘܵܢܹܐ ܕܒܲܝܫܵܢ ܟܠܗܘܿܢ.

¹⁹ܘܬܹܐܟ̣ܠܘܿܢ ܒܸܣܪܵܐ ܘܬܸܣܒ̇ܥܘܿܢ: ܘܬܸܫܬ̇ܘܿܢ ܕܡܵܐ ܘܬܸܪܘܘܿܢ: ܡ̣ܢ ܕܸܒ̣ܚ̱ܬ̣ܵܐ ܪܲܒ̇ܬ̣ܵܐ ܕܕܼܵܒܲܚ ܐ̄ܢܵܐ ܠܟ̣ܘܿܢ.

²⁰ܘܬܸܣܒ̇ܥܘܼܢ ܡ̣ܢ ܦܵܬ̣ܘܿܪܝ: ܒܸܣܪܵܐ ܕܪ̈ܲܟ̣ܫܵܐ ܘܲܕܼܪ̈ܵܟ̣ܒܲܝܗܘܿܢ: ܘܲܕܼܓܲܢ̄ܒܵܪܹ̈ܐ: ܘܲܕܼܟ̣ܠܗܘܿܢ ܓܲܒ̣ܪܹ̈ܐ ܩܪܲܒ̣ܬ̣ܸܵܢܹܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

²¹ܘܐܸܥܒܸ̇ܕܼ ܫܘܼܒ̣ܚܝ ܒܥܲܡܡܹ̈ܐ: ܘܢܸܚܙܘܿܢ ܟܠܗܘܿܢ ܥܲܡܡܹ̈ܐ ܕܝܼܢܵܐ ܕܥܸܒ̣ܕܹ̇ܬ̣: ܘܐܝܼܕܼܝ ܕܣܵܡܹ̇ܬ̣ ܒܗܘܿܢ.

²²ܘܢܸܕ̇ܥܘܼܢ ܕܒܹܝܬ̣ ܝܑܼܣܪܵܝܹܠ: ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ: ܡ̣ܢ ܝܵܘܡܵܐ ܗܵܘܿ ܘܲܠܗܲܠ.

²³ܘܢܸܕ̇ܥܘܼܢ ܥܲܡܡܹ̈ܐ: ܕܡܸܛܠ ܥܵܘܼܠܗܘܿܢ ܐܸܫܬ̇ܒ̣ܝܼܘ ܒܢܲܝ̈ ܝܑܼܣܪܵܝܹܠ: ܕܐܲܥ̣ܥܝܼܘ ܒܝܼ: ܘܐܲܗܦܟܹ̇ܬ̣ ܐܲܦܲܝ̈ ܡܸܢܗܘܿܢ: ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܼܵܐ ܕܣܵܢܐܲܝ̈ܗܘܿܢ: ܘܲܢܦܲܠ̣ܘ ܟܠܗܘܿܢ ܒܚܲܪܒܵܐ.

²⁴ܘܐܲܝܟ ܛܲܢܦܘܼܬ̣ܗܘܿܢ ܘܐܲܝܟ ܥܵܘܼܠܗܘܿܢ ܦܸܪܥܹ̇ܬ̣ ܐܸܢܘܿܢ: ܘܐܲܗܦܟܹ̇ܬ̣ ܐܲܦܲܝ̈ ܡܸܢܗܘܿܢ.

²⁵ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܸܟܹ̇ܝܠ ܡܲܦܢܹܐ ܐ̄ܢܵܐ ܫܒ̣ܝܼܬܹܗ ܕܝܲܥܩܘܿܒ̣: ܘܲܡܪܲܚܸܡ ܐ̄ܢܵܐ ܥܲܠ ܟܠܹܗ ܒܹܝܬ̣ ܝܑܼܣܪܵܝܹܠ: ܘܛܵܐܹ̇ܢ ܐ̄ܢܵܐ ܡܸܛܠ ܫܡܵܐ ܕܩܘܼܕܼܫܝ.

²⁶ܘܲܢܩܲܒ̇ܠܘܼܢ ܟܠܵܗ̇ ܒܸܗܬܲܬ̣ܗܘܿܢ ܘܥܵܘܼܠܗܘܿܢ ܕܐܲܥܠܝܼܘ ܒܝܼ: ܡܵܐ ܕܝܼܬܸܒ̣ܘ ܒܐܲܪ̱ܥܗܘܿܢ ܒܫܸܠܝܵܐ: ܘܠܲܝܬ̇ ܠܗܘܿܢ ܡܲܗܪܵܢܵܐ.

²⁷ܡܵܐ ܕܟܲܢܫܹ̇ܬ̣ ܐܸܢܘܿܢ ܡ̣ܢ ܥܲܡܡܹ̈ܐ: ܘܩܲܪܒܹ̇ܬ̣ ܐܸܢܘܿܢ ܡ̣ܢ ܡܕܼܝܼ̈ܢܵܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ: ܘܐܸܬ̣ܩܲܕ̇ܫܹ̇ܬ̣ ܒܗܘܿܢ ܠܥܹܝܢ ܥܲܡܡܹ̈ܐ ܣܲܓ̇ܝܼ̈ܐܹܐ.

²⁸ܘܢܸܕ̇ܥܘܼܢ ܕܐܸܢܵܐ ܡܵܪܝܵܐ ܐܲܠܵܗܗܘܿܢ: ܐܫܒ̇ܝܼܬ̣ ܐܸܢܘܿܢ ܠܒܹܝܬ̣ ܥܲܡܡܹ̈ܐ: ܘܐܸܢܵܐ ܐܹܟܲܢܸܫ ܐܸܢܘܿܢ ܠܐܲܪ̱ܥܘܿܢ: ܘܠܵܐ ܐܵܘܬܲܪ ܡܸܢܗܘܿܢ ܬܲܡܵܢ.

²⁹ܘܠܵܐ ܐܲܗܦܸܟ ܐܲܦܲܝ̈ ܡܸܢܗܘܿܢ: ܐܸܠܵܐ ܐܹܫܘܿܕܼ ܪܘܼܚܝ ܥܲܠ ܟܠܹܗ ܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.