Read Aramaic Peshita Ezekiel 4 Bible Online

Ezekiel 4 - Aramaic Peshita bible

Ezekiel 4

¹ܐܲܢ̄ܬ̇ ܕܹܝܢ ܒܲܪܢܵܫܵܐ: ܣܲܒ̣ ܠܵܟ ܠܒܸܬܵܐ ܘܣܝܼܡܹܝܗ̇ ܩܕܼܵܡܲܝܟ: ܘܲܪܫܘܿܡ ܥܠܹܝܗ̇ ܡܕܼܝܼܢ̄ܬܵܐ ܐܘܿܪܸܫܠܸܡ.

²ܘܲܥܒܸܕܼ ܥܠܹܝܗ̇ ܐܘܼܠܨܵܢܵܐ: ܘܲܒ̣ܢܝܼ ܥܠܹܝܗ̇ ܩܲܠܩܘܼܡܹ̈ܐ: ܘܐܲܟ̣ܡܸܢ ܥܠܹܝܗ̇ ܟܡܹܐܢܹ̈ܐ: ܘܐܲܫܪܵܐ ܥܠܹܝܗ̇ ܡܲܫ̱ܪ̈ܝܵܬ̣ܵܐ: ܘܲܥܒܸܕܼ ܠܵܗ̇ ܙܘܹܝܕܢܹ̈ܐ ܟܲܕܼ ܚܵܕܼܪܵܐ.

³ܘܐܲܢ̄ܬ̇ ܣܲܒ̣ ܠܵܟ ܛܸܓܢܵܐ ܕܦܲܪܙܠܵܐ: ܘܲܥܒܸܕܲܝܗܝ ܐܸܣܬ̣ܵܐ ܕܦܲܪܙܠܵܐ ܒܲܝܢܲܝܟ ܠܲܡܕܼܝܼܢ̄ܬܵܐ: ܘܛܲܝܸܒ̣ ܐܲܦܲܝ̈ܟ ܥܠܹܝܗ̇: ܘܬܸܗܘܹܐ ܒܲܚܒ̣ܘܼܫܝܵܐ ܘܬܹܐܠܨܝܼܗ̇: ܗܵܕܹܐ ܐܵܬܹܐ ܗ̄ܝܼ ܠܲܕܼܒܹܝܬ̣ ܝܑܼܣܪܵܝܹܠ.

⁴ܘܐܲܢ̄ܬ̇ ܕܡܲܟ ܥܲܠ ܣܸܛܪܵܐ ܕܣܸܡܵܠܵܐ: ܘܣܝܼܡ ܥܵܘܼܠܵܐ ܕܒܹܝܬ̣ ܝܑܼܣܪܵܝܹܠ ܥܠܘܗܝ: ܡܸܢܝܵܢ ܝܵܘ̈ܡܵܬ̣ܵܐ ܕܕܼܵܡܹ̇ܟ ܐܲܢ̄ܬ̇ ܥܠܵܘܗܝ ܬܸܫܩܘܿܠ ܥܵܘܼܠܗܘܿܢ.

⁵ܘܐܸܢܵܐ ܝܸܗ̄ܒܹ̇ܬ̣ ܠܵܟ ܬܪܹܝܢ ܥܵܘ̈ܠܝܼܢ ܠܡܸܢܝܵܢܵܐ ܕܝܵܘ̈ܡܵܬ̣ܵܐ: ܬܠܵܬ̣ܡܵܐܐ ܘܬܸܫܥܝܼܢ ܝܵܘ̈ܡܝܼܢ: ܘܬܸܫܩܘܿܠ ܥܵܘܼܠܵܐ ܕܒܹܝܬ̣ ܝܑܼܣܪܵܝܹܠ.

⁶ܘܲܬ̣ܫܲܡܠܹܐ ܗܵܠܹܝܢ: ܘܬܸܕܼܡܲܟ ܥܲܠ ܣܸܛܪܵܟ ܕܝܲܡܝܼܢܵܐ: ܘܬܸܫܩܘܿܠ ܥܵܘܼܠܵܐ ܕܒܹܝܬ̣ ܝܑܼܗܘܼܕܼܵܐ ܐܲܪܒ̇ܥܝܼܢ ܝܵܘ̈ܡܝܼܢ: ܝܵܘܡܵܐ ܠܫܲܢ̄ܬܵܐ ܝܸܗ̄ܒܹ̇ܬ̣ ܠܵܟ.

⁷ܘܥܲܠ ܐܘܼܠܨܵܢܵܗ̇ ܕܐܘܿܪܸܫܠܸܡ ܬܛܲܝܸܒ̣ ܐܲܦܲܝ̈ܟ: ܘܲܕܼܪܵܥܵܟ ܬܲܥܫܸܢ: ܘܬܸܬ̣ܢܲܒܹ̇ܐ ܥܠܹܝܗ̇.

⁸ܗܵܐ ܐܲܪܡܝܼܬ̣ ܥܠܲܝܟ ܫܸܫ̈ܠܵܬ̣ܵܐ: ܘܠܵܐ ܬܸܬ̣ܗ̱ܦܲܟ ܡ̣ܢ ܣܸܛܪܵܟ ܠܣܸܛܪܵܟ: ܥܕܲܡܵܐ ܕܢܸܫ̱ܠܡܘܼܢ ܝܵܘ̈ܡܵܬ̣ܵܐ ܕܲܚܒ̣ܘܼܫܝܵܟ.

⁹ܘܣܲܒ̣ ܠܵܟ ܚܸܛܹ̈ܐ ܘܲܣܥܵܪܹ̈ܐ: ܘܓ̣ܘܼܡܹ̈ܐ ܘܲܛܠܵܦ̮̈ܚܹܐ: ܘܕܼܘܼܚܢܵܐ ܘܟ̣ܘܼ̈ܢܵܬ̣ܵܐ: ܘܐܲܪܡܵܐ ܐܸܢܘܿܢ ܒܡܵܐܢܵܐ ܚܲܕܼ: ܘܲܥܒܸܕܼ ܐܸܢܘܿܢ ܠܵܟ ܠܲܚܡܵܐ: ܠܡܸܢܝܵܢܵܐ ܕܝܵܘ̈ܡܵܬ̣ܵܐ ܕܕܼܵܡܹ̇ܟ ܐܲܢ̄ܬ̇ ܥܲܠ ܣܸܛܪܵܟ: ܬܠܵܬ̣ܡܵܐܐ ܘܬܸܫܥܝܼܢ ܝܵܘ̈ܡܝܼܢ ܬܹܐܟ̣ܠܝܼܘܗܝ.

¹⁰ܘܡܹܐܟ̣ܘܼܠܬܵܟ ܬܸܗܘܹܐ ܥܸܣܪܝܼܢ ܡܲܬ̣ܩܵܠܝܼ̈ܢ ܒܝܵܘܡܵܐ: ܡ̣ܢ ܥܸܕܵܢܵܐ ܠܥܸܕܵܢܵܐ.

¹¹ܘܡܲـ̈ـܝܵܐ ܒܲܟ̣ܝܵܠܬܵܐ ܬܸܫܬܸ̇ܐ. ܚܕܼܵܐ ܡ̣ܢ ܫܸܬ̣ ܡ̈ܢܵܘܵܬܹܗ ܕܗܸܡܝܼܢܵܐ: ܡ̣ܢ ܥܸܕܵܢܵܐ ܠܥܸܕܵܢܵܐ ܬܸܫܬܹ̇ܐ.

¹²ܘܪܲܥܦܵܐ ܕܲܣܥܵܪܹ̈ܐ ܬܹܐܟ̣ܘܿܠ: ܕܲܡܛܵܘܝ ܥܲܠ ܟܒܲـ̈ـܝܵܐ ܕܒܲܪܢܵܫܵܐ ܠܥܹܢܲܝܗܘܿܢ.

¹³ܐܵܡܲܪ ܡܵܪܝܵܐ: ܗܵܟܲܢܵܐ ܢܹܐܟ̣ܠܘܼܢ ܒܢܲܝ̈ ܝܑܼܣܪܵܝܹܠ ܠܲܚ̱ܡܗܘܿܢ ܒܛܲܢܦܘܼܬ̣ܵܐ: ܒܹܝܬ̣ ܥܲܡܡܹ̈ܐ ܕܐܸܕܼܚܘܿܩ ܐܸܢܘܿܢ ܠܬܲܡܵܢ.

¹⁴ܘܐܸܡ̇ܪܹܬ̣ ܐܲܠܵܗܵܐ ܡܵܪܹܐ ܡܵܪ̈ܵܘܵܬ̣ܵܐ: ܢܲܦ̮ܫܝ ܠܵܐ ܗܘ̤ܵܬ̣ ܡܛܲܢܦܵܐ: ܘܲܕܼܡܲܪܥܵܐ ܘܕܲܬ̣ܒ̣ܝܼܪܵܐ ܠܚܝ̄ܘܬ̣ܵܐ ܠܵܐ ܐܸܟ̣ܠܹ̇ܬ̣ ܡ̣ܢ ܛܲܠܝܘܼܬ̣ܝ ܘܲܥܕܲܡܵܐ ܠܝܵܘܡܵܐ: ܘܠܵܐ ܥܲܠ ܠܦܘܼܡܝ ܒܸܣܪܵܐ ܛܲܢܦܵܐ.

¹⁵ܘܐܸܡܲܪ ܠܝܼ: ܗܵܐ ܝܸܗ̄ܒܹ̇ܬ̣ ܠܵܟ ܟܒܲـ̈ـܝܵܐ ܕܬ̣ܵܘܪܹ̈ܐ ܚܠܵܦ ܟܒܲـ̈ـܝܵܐ ܕܲܒ̣ܢܲܝ̈ܢܵܫܵܐ: ܕܬܸܥܒܸ̇ܕܼ ܠܲܚܡܵܟ ܥܠܲܝܗܹܝܢ.

¹⁶ܘܐܸܡܲܪ ܠܝܼ ܒܲܪܢܵܫܵܐ: ܗܵܐ ܬܵܒܲܪ ܐ̄ܢܵܐ ܩܲܢܝܵܐ ܕܲܥܒ̣ܘܼܪܵܐ ܒܐܘܿܪܸܫܠܸܡ: ܘܢܹܐܟ̣ܠܘܼܢ ܠܲܚܡܵܐ ܒܡܲܬ̣ܩܵܠܵܐ: ܘܡܲـ̈ـܝܵܐ ܒܨܲܗ̈ܘܵܢܹܐ ܒܲܟ̣ܝܵܠܬ̣ܵܐ ܢܸܫܬ̇ܘܿܢ.

¹⁷ܘܢܸܗܘܘܿܢ ܨܪܝܼܟ̣ܝܼܢ ܠܠܲܚܡܵܐ ܘܲܠܡܲـ̈ـܝܵܐ: ܘܲܢܣܘܼܦܘܼܢ ܓܒܲܪ ܘܐܲܚܘܼܗܝ: ܘܢܸܬ̣ܡ̱ܣܘܿܢ ܒܥܵܘܼܠܗܘܿܢ.