Read Aramaic Peshita Ezekiel 42 Bible Online

Ezekiel 42 - Aramaic Peshita bible

Ezekiel 42

¹ܘܐܲܦ̣ܩܲܢܝ ܠܕܼܵܪܬܵܐ ܒܲܪܵܝܬܵܐ ܠܐܘܼܪܚܵܐ ܕܓܲܪܒ̇ܝܵܐ: ܘܐܲܥܠܲܢܝ ܠܐܲܟ̣ܣܸܕܼܪܵܐ ܕܠܘܼܩܒܲܠ ܓܙܝܼܪܬܵܐ ܘܠܘܼܩܒܲܠ ܒܸܢܝܵܢܵܐ ܓܲܪܒ̇ܝܵܝܵܐ.

²ܠܘܼܩܒܲܠ ܐܘܼܪܟܵܐ ܕܐܲܡܹ̈ܐ ܕܬܲܪܥܵܐ ܓܲܪܒ̇ܝܵܝܵܐ: ܘܲܦܬ̣ܵܝܵܐ ܚܲܡܫܝܼܢ ܐܲܡ̈ܝܼܢ.

³ܠܘܼܩܒܲܠ ܬܲܪܥܵܐ ܕܕܼܵܪܬܵܐ ܓܵܘܵܝܬܵܐ: ܘܠܘܼܩܒܲܠ ܕܲܪ̈ܓܹܐ ܕܕܼܵܪܬܵܐ ܒܲܪܵܝܬܵܐ: ܕܲܒ̣ܢܹܝܢ ܚܲܕܼ ܥܲܠ ܚܼܲܕܼ ܥܲܠ ܬܠܵܬ̣ܵܐ ܣܸܕܼܪ̈ܝܼܢ.

⁴ܘܲܩܕܼܵܡ ܐܲܟ̣ܣܸܕܼܪܹ̈ܐ ܒܹܝܬ̣ ܗܠܲܟ̣ܬ̣ܵܐ: ܥܣܲܪ ܐܲܡ̈ܝܼܢ ܦܬ̣ܵܝܵܐ: ܘܐܘܼܪܟܵܐ ܡܵܐܐ ܐܲܡܝܼ̈ܢ: ܘܬܲܪܥܵܐ ܕܒܹܝܬ̣ ܗܲܠܲܟ̣ܬ̣ܵܐ ܠܓܲܪܒ̇ܝܵܐ.

⁵ܘܐܲܟ̣ܣܸܕܼܪܹ̈ܐ ܥܸܠܵܝܵـ̈ـܬ̣ܵܐ ܙܥܘܿܪ̈ܝܵܢ ܗ̄ܘܲܝ̈: ܡܸܛܠ ܕܥܵܐ̇ܠܝܼܢ ܗ̄ܘܼܵܘ ܒܗܹܝܢ ܕܲܪ̈ܓܹܐ.

⁶ܡܬܲܠ̈ܬ̣ܵܢ ܗ̄ܘܲܝ̈ ܓܹܝܪ: ܘܠܲܝܬ̇ ܗ̄ܘܼܵܘ ܠܗܹܝܢ ܥܲܡܘܼ̈ܕܹܐ ܐܲܝܟ ܥܲܡܘܼ̈ܕܹܐ ܕܕܲܪܬܵܐ: ܡܸܛܠ ܗܵܢܵܐ ܙܥܘܿܪ̈ܝܵܢ ܗ̄ܘܲܝ̈ ܡ̣ܢ ܬܲܚ̈ܬܵܝܬܵܐ ܘܡ̣ܢ ܡܸܨ̈ܥܵܝܵܬ̣ܵܐ.

⁷ܘܒܸܐܣܬ̣ܵܐ ܕܲܠܒܲܪ ܕܠܘܼܩܒܲܠ ܐܲܟ̣ܣܸܕܼܪܹ̈ܐ: ܐܘܼܪܟܵܐ ܚܲܡܫܝܼܢ ܐܲܡܝܼ̤̈ܢ.

⁸ܡܸܛܠ ܕܐܘܼܪܟܵܐ ܕܐܲܟ̣ܣܕܼܪܵܐ ܕܕܼܵܪܬܵܐ ܒܲܪܵܝܬܵܐ ܚܲܡܫܝܼܢ ܐܲܡܝܼ̈ܢ: ܘܠܘܼܩܒܲܠ ܗܲܝܟ̇ܠܵܐ ܡܵܐܐ ܐܲܡ̈ܝܼܢ.

⁹ܘܬܲܪܥܵܐ ܕܐܲܟ̣ܣܸܕܼܪܵܐ ܕܡܲܥܠܵܢܵܐ ܡܲܕܼܢ̱ܚܵܝܵܐ: ܕܥܵܐܹ̇ܠ ܠܕܼܵܪܬܵܐ ܒܲܪܵܝܬܵܐ.

¹⁰ܒܲܦܬ̣ܵܝܵܗ̇ ܕܐܸܣܬ̣ܵܐ ܕܕܼܵܪܬܵܐ: ܒܡܲܥܠܵܢܵܐ ܡܲܕܼܢ̱ܚܵܝܵܐ ܩܕܼܵܡ ܓܙܝܼܪܬܵܐ: ܘܲܩܕܼܵܡ ܒܸܢܝܵܢܵܐ ܕܐܲܟ̣ܣܸܕܼܪܹ̈ܐ.

¹¹ܘܐܘܼܪܚܵܐ ܩܕܼܵܡܲܝܗܹܝܢ: ܘܚܸܙܘܵܐ ܕܐܲܟ̣ܣܸܕܼܪܹ̈ܐ ܕܒ̣ܐܘܼܪܚܵܐ ܕܓܲܪܒ̇ܝܵܐ: ܐܘܼܪܟ̇ܗܹܝܢ ܐܲܝܟ ܦܬ̣ܵܝܗܹܝܢ: ܘܟ̣ܠܗܘܿܢ ܡܲܦܩܵܢܲܝ̈ܗܹܝܢ: ܘܡܲܥܠܵܢܲܝ̈ܗܹܝܢ: ܘܚܸܙ̱ܘܗܹܝܢ: ܘܬܲܪ̈ܥܲܝܗܹܝܢ.

¹²ܐܲܝܟ ܬܲܪ̈ܥܹܐ ܕܐܲܟ̣ܣܸܕܼܪܹ̈ܐ ܕܒ̣ܐܘܼܪܚܵܐ ܕܬܲܝܡܢܵܐ: ܬܲܪܥܵܐ ܒܪܸܫ ܐܘܼܪܚܵܐ: ܐܘܼܪܚܵܐ ܒܐܲܦܲܝ̈ ܐܸܣܬ̣ܵܐ: ܕܒ̣ܐܘܼܪܚܵܐ ܕܢܲܚܠܵܐ ܡܲܕܼܢ̱ܚܵܝܵܐ ܐܲܝܟ ܕܐܵܬܹ̇ܐ.

¹³ܘܐܸܡܲܪ ܠܝܼ: ܐܲܟ̣ܣܸܕܼܪܹ̈ܐ ܕܓܲܪܒ̇ܝܵܐ: ܘܐܟ̣ܣܸܕܼܪܹ̈ܐ ܕܬܲܝܡܢܵܐ ܕܲܩܕܼܵܡ ܓܙܝܼܪܬܵܐ: ܗܵܠܹܝܢ ܐܸܢܹܝܢ ܐܲܟ̣ܣܸܕܼܪܹ̈ܐ ܐܲܬܲܪ ܕܐܵܟ̣ܠܝܼܢ ܟܵܗ̈ܢܹܐ ܕܲܡܩܲܪܒ̣ܝܼܢ ܠܡܵܪܝܵܐ ܩܕܼܘܿܫ ܩܘܼܕܼܫܹ̈ܐ: ܬܲܡܵܢ ܣܵܝܡܝܼܢ ܩܕܼܘܿܫ ܩܘܼܕܼܫܹ̈ܐ: ܘܲܣܡܝܼܕܼܵܐ ܘܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܡܸܛܠ ܕܐܲܬ̣ܪܵܐ ܗ̄ܘܼ ܩܲܕ̇ܝܼܫܵܐ.

¹⁴ܘܡܵܐ ܕܥܵܐܠܝܼܢ ܟܵܗܢܹ̈ܐ: ܠܵܐ ܢܵܦܩܝܼܢ ܡ̣ܢ ܩܘܼܕܼܫܵܐ ܠܕܼܵܪܬܵܐ ܒܲܪܵܝܬܵܐ: ܐܸܠܵܐ ܬܲܡܵܢ ܣܵܝ̇ܡܝܼܢ ܡܲܐܢܲܝ̈ܗܘܿܢ ܗܵܢܘܿܢ ܕܲܡܫܲܡܫܝܼܢ ܒܗܘܿܢ: ܡܸܛܠ ܕܩܘܼܕܼܫܵܐ ܐܸܢܘܿܢ: ܘܠܵܒ̣ܫܝܼܢ ܡܵܐܢܹ̈ܐ ܐ̄ܚܪ̈ܵܢܹܐ: ܘܲܡܩܲܪܒ̣ܝܼܢ ܩܘܼܪ̈ܒܵܢܹܐ ܚܠܵܦ ܥܲܡܵܐ.

¹⁵ܘܲܫܠܸܡ ܡܘܼܫ̈ܚܵܬܹܗ ܕܒܲܝܬܵܐ ܓܵܘܵܝܵܐ. ܘܐܲܦܩܲܢܝ ܠܐܘܼܪܚܵܐ ܕܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ: ܘܡܲܫܚܹܗ ܟܲܕܼ ܚܵܕܲܪ.

¹⁶ܘܲܡܫܲܚ ܠܪܘܼܚܵܐ ܕܡܲܕܼܢ̱ܚܵܐ: ܒܩܲܢܝܵܐ ܕܲܡܫܘܼܚܬ̣ܵܐ ܚܲܡܸܫܡܵܐܐ ܩܢ̈ܝܼܢ.

¹⁷ܘܲܡ̣ܫܲܚ ܠܪܘܼܚܵܐ ܕܓܲܪܒ̇ܝܵܐ: ܒܩܲܢܝܵܐ ܕܲܡܫܘܼܚܬ̣ܵܐ: ܚܲܡܸܫܡܵܐܐ ܩܢ̈ܝܼܢ ܟܲܕܼ ܚܵܕܲܪ.

¹⁸ܘܲܡ̣ܫܲܚ ܠܪܘܼܚܵܐ ܕܬܲܝܡܢܵܐ: ܚܲܡܸܫܡܵܐܐ ܩܢ̈ܝܼܢ: ܒܩܲܢܝܵܐ ܕܲܡܫܘܼܚܬ̣ܵܐ.

¹⁹ܘܲܡ̣ܫܲܚ ܠܪܘܼܚܵܐ ܕܡܲܥ̱ܪܒ̣ܵܐ: ܚܲܡܸܫܡܵܐܐ ܩܢ̈ܝܼܢ: ܒܩܲܢܝܵܐ ܕܲܡܫܘܼܚܬ̣ܵܐ.

²⁰ܠܐܲܪܒܲܥ ܪ̈ܘܼܚܵܘܗܝ ܡܲܫ̣ܚܹܗ: ܘܫܘܼܪܵܐ ܟܲܕܼ ܚܵܕܲܪ: ܐܘܼܪܟܹ̇ܗ ܚܲܡܸܫܡܵܐܐ ܘܲܦܬ̣ܵܝܹܗ ܚܲܡܸܫܡܵܐܐ: ܕܢܸܦܪܘܿܫ ܒܹܝܬ̣ ܩܘܼܕܼܫܵܐ ܠܚܘܼܠܵܐ.