Read Aramaic Peshita Ezekiel 44 Bible Online

Ezekiel 44 - Aramaic Peshita bible

Ezekiel 44

¹ܘܐܲܗܦ̣ܟܲܢܝ ܠܐܘܼܪܚܵܐ ܕܬܲܪܥܵܐ ܒܲܪܵܝܵܐ ܕܡܲܩܕ̇ܫܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬܹܗ ܕܐܲܚܝܼܕܼ.

²ܘܐܸܡܲܪ ܠܝܼ ܡܵܪܝܵܐ: ܬܲܪܥܵܐ ܗܵܢܵܐ ܢܸܗܘܹܐ ܐܲܚܝܼܕܼ: ܘܠܵܐ ܢܸܬ̣ܦܬܲܚ: ܘܐ̄ܢܵܫ ܠܵܐ ܢܸܥܘܿܠ ܒܹܗ: ܡܸܛܠ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܥܵܐܹ̇ܠ ܒܹܗ: ܢܸܗܘܹܐ ܐܲܚܝܼܕܼ.

³ܡܕܲܒ̇ܪܵܢܵܐ ܢܸܬܸ̇ܒ̣ ܒܹܗ: ܘܢܹܐܟ̣ܘܿܠ ܠܲܚܡܵܐ ܩܕܼܵܡ ܡܵܪܝܵܐ: ܡ̣ܢ ܐܘܼܪܚܵܐ ܕܐܸܣܟ̇ܘܼܦܬ̣ܵܐ ܕܬܲܪܥܵܐ ܢܸܥܘܿܠ ܘܡܸܢܵܗ̇ ܢܸܦܘܿܩ.

⁴ܘܐܲܥܠܲܢܝ ܠܐܘܼܪܚܵܐ ܕܬܲܪܥܵܐ ܓܲܪܒ̇ܝܵܝܵܐ ܕܲܩܕܼܵܡ ܒܲܝܬܵܐ: ܘܲܚܙܹ̇ܝܬ̣ ܕܐܸܬ̣ܡ̱ܠܝܼ ܒܲܝܬܵܐ ܫܘܼܒ̣ܚܹܗ ܕܡܵܪܝܵܐ: ܘܢܸܦܠܹ̇ܬ̣ ܥܲܠ ܐܲܦܝ̈.

⁵ܘܐܸܡܲܪ ܠܝܼ ܡܵܪܝܵܐ: ܒܲܪܢܵܫܵܐ: ܣܝܼܡ ܒܠܸܒܵܟ ܘܲܚܙܝܼ ܒܥܲܝܢܲܝ̈ܟ: ܘܲܫܡܲܥ ܒܐܸܕܼܢܲܝ̈ܟ ܟܠ ܡܸܕܸ̇ܡ ܕܲܡܡܲܠܸܠ ܐ̄ܢܵܐ ܥܲܡܵܟ: ܘܟ̣ܠܗܘܿܢ ܢܵܡܘܿܣܵܘ̈ܗܝ ܕܒܲܝܬܵܐ: ܘܟ̣ܠܗܹܝܢ ܨܘܼܪ̈ܵܬܹܗ: ܘܣܝܼܡ ܠܒ̣ܵܠܵܟ ܡܲܥܠܵܢܵܘ̈ܗܝ ܕܒܲܝܬܵܐ: ܘܡܲܦܩܵܢܵܘ̈ܗܝ ܕܡܲܩܕ̇ܫܵܐ.

⁶ܘܐܸܡܲܪ ܠܒܲܝܬܵܐ ܕܝܼܣܪܵܝܹܠ ܡܡܲܪܡܪܵܢܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܟܲܕ̇ܘܼ ܠܟ̣ܘܿܢ ܟܠܵܗ̇ ܛܲܢܦܘܼܬ̣ܟ̣ܘܿܢ ܕܒܹܝܬ̣ ܝܑܼܣܪܵܝܹܠ.

⁷ܐܸܠܵܐ ܐܵܦ ܡܲܝܬܹ̇ܝܢ ܐܲܢ̄ܬ̇ܘܿܢ ܡ̣ܢ ܒܢܲܝ̈ ܢܘܼܟ̣ܪ̈ܵܝܹܐ ܕܥܘܼܪܠܝܼܢ ܒܠܸܒ̇ܗܘܿܢ: ܘܥܘܼܪܠܝܼܢ ܒܒܸܣ̱ܪܗܘܿܢ: ܘܗܵܘܹ̇ܝܢ ܒܡܲܩܕܲܫܝ: ܘܲܡܛܲܢܦܝܼܢ ܒܲܝܬ̇ܝ: ܘܲܡܩܲܪܒ̣ܝܼܢ ܐ̄ܢܬ̇ܘܿܢ ܥܲܠ ܠܲܚܡܝ ܬܲܪܒܵܐ ܘܲܕܼܡܵܐ: ܘܲܡܒܲܛܠܝܼܢ ܐ̄ܢܬ̇ܘܿܢ ܩܝܵܡܝ ܒܟ̣ܠܵܗ̇ ܛܲܢܦܘܼܬ̣ܟ̣ܘܿܢ.

⁸ܘܠܵܐ ܢܵܛ̇ܪܝܼܢ ܐ̄ܢܬ̇ܘܿܢ ܢܛܘܼܪ̈ܵܬ̣ܵܐ ܕܡܲܩܕܲܫܝ: ܐܸܠܵܐ ܥܒܲܕ̇ܬ̇ܘܿܢ ܢܵܛܪ̈ܲܝ ܡܲܛܲܪܬܵܐ ܕܡܲܩܕܲܫܝ ܢܵܛܘܿܪ̈ܲܝܟ̇ܘܿܢ ܕܝܼܠܟ̣ܘܿܢ.

⁹ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܠ ܒܲܪ ܢܘܼܟ̣ܪ̈ܵܝܹܐ ܕܲܥܪܘܿܠ ܒܠܸܒܹ̇ܗ ܘܥܘܼܪܠܵܐ ܒܒܸܣܪܹܗ: ܠܵܐ ܢܸܥܘܿܠ ܠܡܲܩܕܲܫܝ: ܘܠܵܐ ܒܲܪ ܢܘܼܟ̣ܪ̈ܵܝܹܐ ܕܐܝܼܬ̣ ܒܲܝܢܵܬ̣ ܒܢܲܝ̈ ܝܑܼܣܪܵܝܹܠ.

¹⁰ܐܵܦܠܵܐ ܠܹܘܵܝܹ̈ܐ ܕܲܦܪܲܩ̣ܘ ܡܹܢܝ: ܟܲܕܼ ܛܥܵܘ ܒܢܲܝ̈ ܝܑܼܣܪܵܝܹܠ ܡܹܢܝ ܒܵܬܲܪ ܦܬܲܟ̣ܪ̈ܲܝܗܘܿܢ: ܘܩܲܒܸ̇ܠܘ ܥܵܘܼܠܗܘܿܢ.

¹¹ܘܲܗܘ̤ܵܘ ܒܡܲܩܕܲܫܝ: ܘܲܡܫܲܡܫܝܼܢ ܗ̄ܘܼܵܘ ܒܬܲܪܥܵܐ ܕܒܲܝܬܵܐ: ܗܸܢܘܿܢ ܢܸܟ̇ܣܘܼܢ ܝܲܩ̈ܕܹ̇ܐ ܫܲܠܡܹ̈ܐ ܘܕܸܒ̣ܚܹ̈ܐ ܕܥܲܡܵܐ: ܘܗܸܢܘܿܢ ܢܩܘܼܡܘܿܢ ܩܕܼܵܡܲܝܗܘܿܢ ܘܲܢܫܲܡܫܘܼܢ ܐܸܢܘܿܢ.

¹²ܥܲܠ ܕܫܲܡܸܫ̣ܘ ܐܸܢܘܿܢ ܩܕܼܵܡ ܦܬܲܟ̣ܪ̈ܲܝܗܘܿܢ: ܘܲܗܘ̤ܵܘ ܠܬ̣ܘܼܩ̱ܠܵܬ̣ܵܐ ܕܥܵܘܼܠܵܐ ܠܲܒ̣ܢܲܝ̈ ܝܑܼܣܪܵܝܹܠ: ܡܸܛܠܗܵܢܵܐ ܐܲܪܝܼܡܹ̇ܬ̣ ܐܝܼܕܼܝ ܥܠܲܝܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܩܲܒܸ̇ܠܘ ܥܵܘܼܠܗܘܿܢ.

¹³ܘܠܵܐ ܢܸܩ̱ܪܒ̣ܘܼܢ ܩܕܼܵܡܲܝ ܠܲܡܫܲܡܵܫܘܼܬܲܢܝ: ܘܠܵܐ ܢܸܬ̣ܩܲܪܒ̣ܘܼܢ ܠܟ̣ܠܗܘܿܢ ܩܘܼܕܼܫܲܝ̈ ܒܹܝܬ̣ ܩܕܼܘܼܫ ܩܘܼܕܼܫܹ̈ܐ: ܘܲܢܩܲܒ̇ܠܘܼܢ ܟܠܵܗ̇ ܒܸܗܬܲܬ̣ܗܘܿܢ ܘܟ̣ܠܵܗ̇ ܛܲܢܦܘܼܬ̣ܗܘܿܢ ܕܲܥܒܲܕܼܘ.

¹⁴ܘܐܸܥܒܸ̇ܕܼ ܐܸܢܘܿܢ ܢܵܛܪ̈ܲܝ ܡܲܛܲܪܬܵܐ ܕܒܲܝܬܵܐ: ܘܥܵܒ̣ܕܲܝ̈ ܥܒ̣ܵܕܼܵܐ ܕܟ̣ܠܡܸܕܸ̇ܡ ܕܗܵܘܹ̇ܐ ܒܹܗ.

¹⁵ܘܟ̣ܵܗܢܹ̈ܐ ܘܠܹܘܿܝܹ̈ܐ ܒܢܲܝ̈ ܨܵܕܼܘܿܩ: ܕܲܢܛܲܪܘ ܡܲܛܲܪܬܵܐ ܕܡܲܩܕܲܫܝ: ܟܲܕܼ ܛܥܵܘ ܒܢܲܝ̈ ܝܑܼܣܪܵܝܹܠ ܡܹܢܝ: ܗܸܢܘܿܢ ܢܸܩ̱ܪܒ̣ܘܼܢ ܠܘܵܬ̣ܝ ܠܲܡܫܲܡܵܫܘܼܬܲܢܝ: ܘܗܸܢܘܿܢ ܢܩܘܼܡܘܼܢ ܩܕܼܵܡܲܝ: ܘܲܢܩܲܪܒ̣ܘܼܢ ܠܝܼ ܬܲܪܒܵܐ ܘܲܕܼܡܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁶ܗܸܢܘܿܢ ܢܸܥܠܘܼܢ ܠܡܲܩܕܲܫܝ: ܘܗܸܢܘܿܢ ܢܸܩ̱ܪܒ̣ܘܼܢ ܠܦܵܬ̣ܘܿܪܝ: ܕܲܡܫܲܡܫܘܼܢܵܢܝ: ܘܢܸܛܪܘܼܢ ܢܛܘܼܪ̈ܵܬ̣ܝ.

¹⁷ܘܡܵܐ ܕܥܵܐܠܝܼܢ ܒܬܲܪܥܵܐ ܕܕܼܵܪܬܵܐ ܓܵܘܵܝܬܵܐ: ܡܵܐܢܹ̈ܐ ܕܟܸܬܵܢܵܐ ܢܸܠܒܫܘܼܢ: ܘܲܕܼܥܲܡܪܵܐ ܠܵܐ ܢܸܠܒ̇ܫܘܼܢ: ܘܡܵܐ ܕܲܡܫܲܡܫܝܼܢ ܒܬܲܪܥܵܐ ܕܕܼܵܪܬܵܐ ܓܵܘܵܝܬܵܐ.

¹⁸ܐܵܦ ܠܓ̣ܵܘ ܡܲܨܢ̈ܦܵܬ̣ܵܐ ܕܟܸܬܵܢܵܐ ܢܣܝܼܡܘܼܢ ܒܪܹ̈ܫܲܝܗܘܿܢ: ܘܲܦܪ̈ܵܙܘܿܡܹܐ ܕܟܸܬܵܢܵܐ ܢܹܐܣܪܘܼܢ ܒܚܲܨܲܝ̈ܗܘܿܢ.

¹⁹ܘܡܵܐ ܕܢܵܦܩܝܼܢ ܠܕܼܵܪܬܵܐ ܒܲܪܵܝܬܵܐ ܠܘܵܬ̣ ܥܲܡܵܐ: ܢܸܫ̱ܠܚܘܼܢ ܡܵܐܢܲܝ̈ܗܘܿܢ ܕܲܡܫܲܡܫܝܼܢ ܒܗܘܿܢ: ܘܢܸܫܒ̇ܩܘܼܢ ܐܸܢܘܿܢ ܒܐܲܟ̣ܣܸܕܼܪܹ̈ܐ ܕܩܘܼܕܼܫܵܐ: ܘܢܸܠܒ̇ܫܘܼܢ ܡܵܐܢܹ̈ܐ ܐ̄ܚܪ̈ܵܢܹܐ: ܕܠܵܐ ܢܩܲܕ̇ܫܘܼܢܹܗ ܠܥܲܡܵܐ ܒܡܵܐܢܲܝ̈ܗܘܿܢ.

²⁰ܪܹ̈ܫܲܝܗܘܿܢ ܠܵܐ ܢܸܓܪ̱ܥܘܼܢ: ܘܩܵܘ̈ܨܵܬ̣ܗܘܿܢ ܠܵܐ ܢܪܲܒ̇ܘܿܢ: ܐܸܠܵܐ ܡܣܲܦܵܪܘܼ ܢܣܲܦܪܘܿܢ ܪܹ̈ܫܲܝܗܘܿܢ.

²¹ܘܚܲܡܪܵܐ ܠܵܐ ܢܸܫܬ̇ܘܿܢ ܟܵܗܢܹ̈ܐ ܡܵܐ ܕܥܵܐܠܝܼܢ ܠܕܼܵܪܬܵܐ ܓܵܘܵܝܬܵܐ.

²²ܘܐܲܪܡܲܠܬܵܐ ܘܲܫܒ̣ܝܼܩܬܵܐ ܠܵܐ ܢܸܣܒ̣ܘܼܢ ܠܗܘܿܢ ܢܸܫܹ̈ܐ: ܐܸܠܵܐ ܐܸܢ ܒܬ̣ܘܼܠܬܵܐ ܡ̣ܢ ܙܲܪܥܵܐ ܕܝܼܣܪܵܝܹܠ: ܐܵܘ ܐܲܪܡܲܠܬܵܐ ܕܡܲܪܡ̄ܠܵܐ ܡ̣ܢ ܟܵܗܢܵܐ ܢܸܣܒ̣ܘܼܢ.

²³ܘܢܲܠܦܘܼܢ ܠܥܲܡܝ ܒܹܝܬ̣ ܩܘܼܕܼܫܵܐ ܠܚܘܼܠܵܐ: ܘܢܵܘܕ̇ܥܘܼܢܹܗ ܒܹܝܬ̣ ܡܣܲܝܒ̣ܵܐ ܠܕܲܟ̣ܝܵܐ.

²⁴ܘܥܲܠ ܕܝܼܢܹ̈ܐ ܗܸܢܘܿܢ ܢܩܘܼܡܘܼܢ ܠܲܡܕܼܵܢ: ܘܲܒ̣ܕܼܝܼ̈ܢܲܝ ܢܕܼܘܼܢܘܼܢ: ܘܢܵܡܘܿܣܲܝ̈ ܘܦܘܼܩ̈ܕܵܢܲܝ ܢܸܛܪܘܿܢ: ܒܟ̣ܠܗܘܿܢ ܙܲܒ̣ܢܹ̈ܐ ܕܡܵܘ̈ܥܕܲܝ: ܘܫܲܒܲܝ̈ ܢܩܲܕ̇ܫܘܼܢ.

²⁵ܘܥܲܠ ܡܝܼܬ̣ܵܐ ܕܒܲܪܢܵܫܵܐ ܠܵܐ ܢܸܥܠܘܿܢ ܕܠܵܐ ܢܸܣܬܲܝܒ̣ܘܼܢ: ܐܸܠܵܐ ܐܸܢ ܒܐܲܒ̣ܘܼܗܝ ܐܵܘ ܒܐܸܡܹܗ: ܐܵܘ ܒܲܒ̣ܪܹܗ: ܐܵܘ ܒܒܲܪܬܹܗ: ܐܵܘ ܒܐܲܚܘܼܗܝ: ܐܵܘ ܒܚܵܬܹܗ ܒܬ̣ܘܼܠܬܵܐ ܕܠܵܐ ܗ̄ܘܼܵܬ̣ ܠܓܲܒ̣ܪܵܐ ܢܸܣܬܲܝܒ̣ܘܼܢ.

²⁶ܘܡ̣ܢ ܒܵܬܲܪ ܕܡܸܣܬܲܝܲܒ̣: ܢܸܡܢܸܐ ܠܹܗ ܫܲܒ̣ܥܵܐ ܝܵܘܡܝܼ̈ܢ: ܘܗܵܝܕܹ̇ܝܢ ܢܸܬ̇ܕܲܟܸ̇ܐ.

²⁷ܘܲܒ̣ܝܵܘܡܵܐ ܕܥܵܐܹ̇ܠ ܠܡܲܩܕ̇ܫܵܐ ܠܕܼܵܪܬܵܐ ܓܵܘܵܝܬܵܐ ܠܲܡܫܲܡܵܫܘܼ ܒܩܘܼܕܼܫܵܐ: ܢܩܲܪܸܒ̣ ܬܲܕܼܟ̇ܝܼܬܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

²⁸ܘܬܸܗܘܹܐ ܠܗܘܿܢ ܠܝܘܼܪܬܵܢܵܐ: ܐܸܢܵܐ ܐ̄ܢܵܐ ܝܘܼܪܬܵܢܗܘܿܢ: ܘܲܡܢܵܬ̣ܵܐ ܠܵܐ ܬܸܬ̇ܠܘܼܢ ܠܗܘܿܢ ܒܝܼܣܪܵܝܹܠ: ܐܸܢܵܐ ܐ̄ܢܵܐ ܡܢܵܬ̣ܗܘܿܢ.

²⁹ܣܡܝܼܕܼܵܐ ܘܬܲܪܼܟ̇ܝܼܬ̣ܵܐ ܕܲܚܛܵܗܹ̈ܐ ܗܸܢܘܿܢ ܢܹܐܟ̣ܠܘܼܢ: ܘܟ̣ܠ ܚܸܪܡܵܐ ܕܒ̣ܝܼܣܪܵܝܹܠ ܕܝܼܠܗܘܿܢ ܢܸܗܘܹܐ.

³⁰ܘܪܹܫ ܟܠ ܒܘܼܟ̣ܪܹ̈ܐ ܕܟ̣ܠܹܗ ܦܘܼܪܫܵܢܵܐ ܕܦܵܪܫܝܼܢ ܐ̄ܢܬ̇ܘܿܢ: ܕܟ̣ܵܗܢܹ̈ܐ ܢܸܗܘܹܐ. ܘܪܹܫ ܐܵܨܘܵܬ̣̈ܟ̣ܘܿܢ ܗܲܒ̣ܘ ܠܟ̣ܵܗܢܹ̈ܐ: ܕܬܸܗܘܹܐ ܒܘܼܪܟ̇ܬ̣ܵܐ ܒܒ̣ܵܬܲܝ̈ܟ̇ܘܿܢ.

³¹ܘܟ̣ܠ ܕܲܡܩܲܢܲܩ ܘܲܬ̣ܒ̣ܝܼܪ ܡ̣ܢ ܦܵܪܲܚܬܵܐ ܘܡ̣ܢ ܚܲܝ̄ܘܼܬ̣ܵܐ: ܠܵܐ ܢܹܐܟ̣ܠܘܼܢ ܟܵܗܢܹ̈ܐ.