Read Aramaic Peshita Ezekiel 45 Bible Online

Ezekiel 45 - Aramaic Peshita bible

Ezekiel 45

¹ܘܡܵܐ ܕܲܡܦܲܠܓ̣ܝܼܢ ܐ̄ܢܬ̇ܘܿܢ ܐܲܪܥܵܐ: ܦܪܘܿܫܘ ܦܘܼܪܫܵܢܵܐ ܠܡܵܪܝܵܐ: ܘܩܲܪܸܒ̣ܘ ܡ̣ܢ ܐܲܪܥܵܐ: ܘܢܸܗܘܹܐ ܐܘܼܪܟܵܗ̇ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܗ̇ ܥܸܣܪܵܐ ܐܲܠܦܝܼ̈ܢ: ܘܢܸܗܘܘܿܢ ܩܲܕ̇ܝܼܫܝܼ̈ܢ ܟܠܗܘܿܢ ܬܚܘܼܡܹ̈ܝܗ̇ ܟܲܕܼ ܚܵܕܼܪܝܼܢ ܠܵܗ̇.

²ܘܬܸܗܘܹܐ ܠܡܲܩܕ̇ܫܵܐ ܚܲܡܸܫܡܵܐܐ ܒܚܲܡܸܫܡܵܐܐ: ܘܬܸܗܘܹܐ ܡܪܲܒ̇ܥܵܐ ܟܲܕܼ ܚܵܕܼܪܵܐ: ܘܚܲܡܫܝܼܢ ܐܲܡ̈ܝܼܢ ܫܸܛܚܵܗ̇.

³ܘܡ̣ܢ ܗܵܕܹܐ ܡܫܘܼܚܬ̣ܵܐ: ܐܘܼܪܟܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܐ ܥܸܣܪܵܐ ܐܲܠܦ̈ܝܼܢ: ܘܒ̣ܵܗ̇ ܢܸܗܘܹܐ ܩܕܼܘܿܫ ܩܘܼܕܼܫܹ̈ܐ.

⁴ܘܩܘܼܕܼܫܵܐ ܕܐܲܪܥܵܐ: ܢܸܗܘܹܐ ܠܟ̣ܵܗ̈ܢܹܐ ܕܲܡܫܲܡܫܝܼܢ ܡܲܩܕ̇ܫܹܗ ܕܡܵܪܝܵܐ: ܘܡܸܬ̣ܩܲܪܒ̣ܝܼܢ ܠܲܡܫܲܡܵܫܘܼܬܹܗ ܠܡܵܪܝܵܐ: ܘܢܸܗܘܹܐ ܠܗܘܿܢ ܐܲܬ̣ܪܵܐ ܠܒ̣ܵـ̈ـܬܹ̇ܐ: ܘܡܲܩܕ̇ܫܵܐ ܠܡܲܩܕ̇ܫܹ̈ܐ.

⁵ܘܢܸܗܘܹܐ ܥܸܣܪܝܼܢ ܘܚܲܡܫܵܐ ܐܲܠܦܝܼ̈ܢ ܐܘܼܪܟܵܐ: ܘܥܸܣܪܝܼܢ ܐܲܠܦ̈ܝܼܢ ܦܬ̣ܵܝܵܐ: ܘܢܸܗܘܹܐ ܝܘܼܪܬܵܢܵܐ ܠܠܹܘܵܝܹ̈ܐ ܕܲܡܫܲܡܫܝܼܢ ܒܒܲܝܬܵܐ: ܥܸܣܪܝܼܢ ܒܵܬܝ̈ܢ.

⁶ܝܘܼܪܬܵܢܵܐ ܕܲܡܕܼܝܼܢ̄ܬܵܐ ܚܲܡܫܵܐ ܐܲܠܦ̈ܝܼܢ ܦܬ̣ܵܝܵܐ: ܘܐܘܼܪܟܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܠܘܼܩܒܲܠ ܦܘܼܪܫܵܢܵܐ ܕܡܲܩܕ̇ܫܵܐ: ܢܸܗܘܹܐ ܠܟ̣ܠܗܘܿܢ ܕܒܹܝܬ̣ ܝܑܼܣܪܵܝܹܠ.

⁷ܘܠܲܡܕܲܒ̇ܪܵܢܵܐ ܕܥܲܡܵܐ: ܠܦܘܼܪܫܵܢܵܐ ܕܩܘܼܕܼܫܵܐ: ܘܠܝܘܼܪܬܵܢܵܐ ܕܲܡܕܼܝܼܢ̄ܬܵܐ: ܡ̣ܢ ܡܲܕܼܢ̱ܚܵܐ ܘܡ̣ܢ ܡܲܥ̱ܪܒ̣ܵܐ: ܘܐܘܼܪܟܵܐ ܢܸܗܘܹܐ ܠܘܼܩܒܲܠ ܦܵܠܓܘܼܬ̣ܵܐ: ܡ̣ܢ ܡܲܕܼܢ̱ܚܵܐ ܠܡܲܥ̱ܪܒ̣ܵܐ.

⁸ܢܸܗܘܹܐ ܝܘܼܪܬܵܢܵܐ ܠܲܒ̣ܢܲܝ̈ ܝܑܼܣܪܵܝܹܠ: ܘܬ̣ܘܼܒ̣ ܠܵܐ ܢܲܗܪܘܿܢ ܐܸܢܘܿܢ ܡܕܲܒ̇ܪ̈ܵܢܹܐ ܕܥܲܡܝ: ܘܐܲܪܥܵܐ ܢܸܬ̇ܠܘܼܢ ܠܲܒ̣ܢܲܝ̈ ܝܑܼܣܪܵܝܹܠ ܠܫܲܪ̈ܒ̣ܵܬ̣ܗܘܿܢ.

⁹ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܲܕ̇ܘܼ ܠܟ̣ܘܿܢ ܪܵܘܪ̈ܒ̣ܵܢܹܐ ܕܝܼܣܪܵܝܹܠ: ܐܲܥܒܲܪܘ ܡܸܢܟ̣ܘܿܢ ܚܛܘܼܦܝܵܐ ܘܒܸܙܬ̣ܵܐ: ܘܲܥܒܸܕܼܘ ܕܝܼܢܵܐ ܘܙܲܕ̇ܝܼܩܘܼܬܵܐ: ܘܐܲܦܪܸܩܘ ܫܘܼܥܒܵܕܼܟ̣ܘܿܢ ܡ̣ܢ ܥܲܡܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁰ܡܲܣܲܐܬ̣ܵܐ ܕܩܘܼܫܬܵܐ: ܘܲܟ̣ܝܵܠܬܵܐ ܕܩܘܼܫܬܵܐ ܘܡܲܬ̣ܩܵܠܹ̈ܐ ܕܩܘܼܫܬܵܐ: ܢܸܗܘܘܿܢ ܠܟ̣ܘܿܢ.

¹¹ܟܝܵܠܬܵܐ ܘܡܲܬ̣ܩܵܠܵܐ ܬܲܩܸܢܘ: ܕܬܸܗܘܘܿܢ ܫܵܩܠܝܼܢ ܡܲܥܣܵܪܹ̈ܐ ܚܲܕܼ ܡ̣ܢ ܥܸܣܪܵܐ ܫܲܘܝܵܐܝܼܬ̣.

¹²ܘܡܲܬ̣ܩܵܠܹ̈ܐ ܢܸܗܘܘܿܢ ܥܸܣܪܝܼܢ: ܡܲܬ̣ܩܵܠܵܐ ܡܸܢܗܘܿܢ ܥܸܣܪܝܼܢ ܘܚܲܡܸܫ ܡܵܥ̈ܝܵܢ: ܘܡܲܬ̣ܩܵܠܵܐ ܕܚܲܡܸܫܬܲܥܣܲܪ ܢܸܗܘܹܐ ܠܟ̣ܘܿܢ ܡܲܢܝܵܐ.

¹³ܗܵܢܵܐ ܦܘܼܪܫܵܢܵܐ ܦܪܘܿܫܘ: ܚܕܼܵܐ ܡ̣ܢ ܫܸܬ̣ ܡܢܵܘܵܬܹ̈ܗ ܕܟ̣ܘܿܪܵܐ ܕܚܸܛܹ̈ܐ: ܘܲܚܕܼܵܐ ܡ̣ܢ ܫܸܬ̣ ܡܢܵܘܵܬܹ̈ܗ ܕܟ̣ܘܿܪܵܐ ܕܲܣܥܵܪܹ̈ܐ.

¹⁴ܘܡܸܫܚܵܐ ܡ̣ܢ ܥܣܲܪ ܟ̈ܝܵܠܵܢ ܕܗܵܘܹ̇ܐ ܟܘܿܪܵܐ: ܢܸܣܒ̣ܘܼܢ ܡܲܥܣܵܪܹ̈ܐ ܟܝܵܠܬܵܐ ܚܕܼܵܐ.

¹⁵ܘܲܚܕܼܵܐ ܢܸܩܝܵܐ ܡ̣ܢ ܡܵܐܬܹ̇ܝܢ ܥܵـ̈ـܢܵܐ ܕܝܼܣܪܵܝܹܠ: ܠܲܣܡܝܼܕܼܵܐ ܘܲܠܩܘܼܪܒܵܢܵܐ ܘܲܠܝܲܩܕܵܐ ܫܲܠܡܵܐ: ܕܲܢܕܲܟܸ̇ܐ ܐܸܢܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

¹⁶ܟܠܹܗ ܥܲܡܵܐ ܕܐܲܪܥܵܐ: ܢܸܦ̱ܪܫܘܼܢ ܦܘܼܪܫܵܢܵܐ ܗܵܢܵܐ ܠܲܡܕܲܒ̇ܪܵܢܵܐ ܕܝܼܣܪܵܝܹܠ.

¹⁷ܘܕܲܡܕܲܒ̇ܪܵܢܵܐ ܢܸܗܘܘܿܢ ܝܲܩ̈ܕܹ̇ܐ ܫܲܠܡܹ̈ܐ: ܘܲܣܡܝܼܕܼܵܐ ܘܢܘܼܩܝܵܐ ܒܪܹܫ ܝܲܪ̈ܚܹܐ ܘܲܒ̣ܫܲܒܹ̈ܐ: ܘܲܒ̣ܟ̣ܠܗܘܿܢ ܥܲܕܼܥܹ̈ܕܹܐ ܕܒܹܝܬ̣ ܝܑܼܣܪܵܝܹܠ ܗ̤ܘ ܢܩܲܪܸܒ̣ ܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܘܲܣܡܝܼܕܼܵܐ ܘܢܘܼܩܵܝܵܐ ܘܝܲܩܕܵܐ ܫܲܠܡܵܐ: ܩܘܼܪܒܵܢܵܐ ܕܲܡܕܲܟܸ̇ܐ ܠܲܒ̣ܢܲܝ̈ ܝܑܼܣܪܵܝܹܠ.

¹⁸ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܚܲܕܼ ܒܝܲܪܚܵܐ ܩܲܕܼܡܵܝܵܐ: ܣܲܒ̣ ܬܵܘܪܵܐ ܚܲܕܼ ܒܲܪ ܒܲܩܪܵܐ: ܕܠܲܝܬ̇ ܒܹܗ ܡܘܼܡܵܐ: ܘܕܼܵܟܵܝܗܝ ܠܡܲܩܕ̇ܫܵܐ.

¹⁹ܘܢܸܣܲܒ̣ ܟܵܗܢܵܐ ܡ̣ܢ ܕܡܵܐ ܕܬܲܕܼܟ̇ܝܼܬ̣ܵܐ: ܘܢܸܪܘܿܣ ܥܲܠ ܐܸܣ̈ܟ̇ܦܵܬܹܗ ܕܒܲܝܬܵܐ: ܘܥܲܠ ܐܲܪܒܲܥ ܙܵܘ̈ܝܵܬܹܗ ܕܡܲܕܼܒ̇ܚܵܐ: ܘܥܲܠ ܐܹܣܟ̇ܘܼܦܬܹܗ ܕܬܲܪܥܵܐ ܕܕܼܵܪܬܵܐ ܓܵܘܝܬܵܐ.

²⁰ܘܗܵܟܲܢܵܐ ܢܸܗܘܹܐ ܥܵܒܹܕܼ ܒܲܫܒܲܥܬ̣ܵܐ ܒܝܲܪܚܵܐ: ܓܲܒ̣ܪܵܐ ܕܫܵܛܹ̇ܐ: ܘܲܢܕܲܟ̇ܘܿܢܹܗ ܠܒܲܝܬܵܐ.

²¹ܘܒܲܐܪܒܲܥܸܣܪܵܐ ܒܝܲܪܚܵܐ: ܩܲܕܼܡܵܝܵܐ: ܢܸܗܘܹܐ ܠܟ̣ܘܿܢ ܦܸܨܚܵܐ ܘܥܲܕܼܥܹܕܼܵܐ: ܘܫܲܒ̣ܥܵܐ ܝܵܘܡ̈ܝܼܢ ܦܲܛܝܼܪܵܐ ܬܹܐܟ̣ܠܘܼܢ.

²²ܘܲܢܩܲܪܸܒ̣ ܡܕܲܒ̇ܪܵܢܵܐ ܒܹܐ ܒܝܵܘܡܵܐ ܗܵܘܿ: ܥܲܠ ܐܲܦܲܝ̈ ܢܲܦ̮ܫܹܗ: ܘܥܲܠ ܐܲܦܲܝ̈ ܟܠܹܗ ܥܲܡܵܐ ܕܐܲܪܥܵܐ: ܬܵܘܪܵܐ ܠܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ.

²³ܘܫܲܒ̣ܥܵܐ ܝܵܘܡܵܘ̈ܗܝ ܕܥܲܕܼܥܹܕܼܵܐ: ܢܩܲܪܸܒ̣ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ: ܫܲܒ̣ܥܵܐ ܬܵܘܪ̈ܝܼܢ: ܘܫܲܒ̣ܥܵܐ ܕܸܟ̣ܪ̈ܝܼܢ ܕܠܲܝܬ̇ ܒܗܘܿܢ ܡܘܼܡܵܐ: ܘܲܠܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܨܸܦܪܝܵܐ ܕܥܸܙܹ̈ܐ ܒܝܵܘܡܵܐ.

²⁴ܘܲܣܡܝܼܕܼܵܐ ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܡܸܫܚܵܐ ܗܹܡܝܼܢܵܐ ܠܣܲܐܬ̣ܵܐ.

²⁵ܘܲܒ̣ܚܲܡܫܲܥܸܣܪܵܐ ܒܝܲܪܚܵܐ ܕܫܲܒ̣ܥܵܐ: ܢܸܥܒܸ̇ܕܼ ܥܲܕܼܥܹܕܼܵܐ ܐܲܝܟ ܗܵܠܹܝܢ ܫܲܒ̣ܥܵܐ ܝܵܘ̈ܡܝܼܢ: ܐܲܝܟ ܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܘܐܲܝܟ ܝܲܩ̈ܕܹܐ ܫܲܠܡܹ̈ܐ: ܘܐܲܝܟ ܣܡܝܼܕܼܵܐ ܘܐܲܝܟ ܡܸܫܚܵܐ.