Read Aramaic Peshita Ezekiel 46 Bible Online

Ezekiel 46 - Aramaic Peshita bible

Ezekiel 46

¹ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܲܪܥܵܐ ܕܕܼܵܪܬܵܐ ܓܵܘܵܝܬܵܐ ܕܚܵܐܲܪ ܠܡܲܕܼܢ̱ܚܵܐ: ܢܸܗܘܹܐ ܐܲܚܝܼܕܼ ܫܬܵܐ ܝܵܘ̈ܡܝܼܢ ܕܡܸܬ̣ܥ̱ܒܸܕܼ ܒܗܘܿܢ ܥܒ̣ܵܕܼܵܐ: ܘܲܒ̣ܝܵܘܡܵܐ ܕܫܲܒ̇ܬܵܐ ܢܸܬ̣ܦܬܲܚ: ܘܲܒ̣ܝܵܘܡܵܐ ܕܪܹܫ ܝܲܪܚܵܐ ܢܸܬ̣ܦܬܲܚ.

²ܘܢܸܥܘܿܠ ܡܕܲܒ̇ܪܵܢܵܐ ܒܡܲܥܠܵܢܵܐ ܕܐܸܣܟ̇ܘܼܦܬ̣ܵܐ ܕܬܲܪܥܵܐ ܡ̣ܢ ܠܒܲܪ: ܘܲܢܩܘܼܡ ܥܲܠ ܐܸܣܟ̇ܘܼܦܬܹܗ ܕܬܲܪܥܵܐ: ܘܲܢܩܲܪܒ̣ܘܼܢ ܟܵܗܢܹ̈ܐ ܝܲܩܕܵܘ̈ܗܝ ܫܲܠܡܹ̈ܐ ܘܩܘܼܪ̈ܒܵܢܵܘܗܝ: ܘܢܸܣܓ̇ܘܿܕܼ ܒܐܸܣܟ̇ܘܼܦܬ̣ܵܐ ܕܬܲܪܥܵܐ ܘܢܸܦܘܿܩ: ܘܬܲܪܥܵܐ ܠܵܐ ܢܸܬ̇ܬ̇ܚܸܕܼ ܥܕܲܡܵܐ ܠܪܲܡܫܵܐ.

³ܘܢܸܣܓ̇ܕܼܘܼܢ ܥܲܡܵܐ ܕܐܲܪܥܵܐ ܒܡܲܥܠܵܢܹܗ ܕܬܲܪܥܵܐ ܗܵܘܿ: ܒܫܲـ̈ـܒܹ̇ܐ ܘܲܒ̣ܪܹܫ ܝܲܪ̈ܚܹܐ ܩܕܼܵܡ ܡܵܪܝܵܐ.

⁴ܘܝܲܩ̈ܕܹ̇ܐ ܫܲܠܡܹ̈ܐ ܕܲܡܩܲܪܸܒ̣ ܡܕܲܒ̇ܪܵܢܵܐ ܩܕܼܵܡ ܡܵܪܝܵܐ ܒܝܵܘܡܵܐ ܕܫܲܒ̇ܬ̣ܵܐ: ܫܬܵܐ ܐܸܡܪ̈ܝܼܢ ܕܠܲܝܬ̇ ܒܗܘܿܢ ܡܘܼܡܵܐ: ܘܕܸܟ̣ܪܵܐ ܕܠܲܝܬ̇ ܒܹܗ ܡܘܼܡܵܐ.

⁵ܘܲܣܡܝܼܕܼܵܐ ܢܸܥܒܸ̇ܕܼ: ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܠܐܸܡܪܵܐ ܐܲܝܟ ܕܡܵܛܹܐ ܒܐܝܼܕܼܵܘ̈ܗܝ: ܡܸܫܚܵܐ ܕܹܝܢ ܗܹܡܝܼܢܵܐ ܠܣܲܐܬ̣ܵܐ.

⁶ܘܲܒ̣ܝܵܘܡܵܐ ܕܪܹܫ ܝܲܪܚܵܐ: ܬܵܘܪܵܐ ܕܠܲܝܬ̇ ܒܹܗ ܡܘܼܡܵܐ: ܘܸܫܬܵܐ ܐܸܡܪ̈ܝܼܢ ܕܠܲܝܬ̇ ܒܗܘܿܢ ܡܘܼܡܵܐ: ܘܕܸܟ̣ܪܵܐ ܕܠܲܝܬ̇ ܒܹܗ ܡܘܼܡܵܐ.

⁷ܘܲܣܡܝܼܕܼܵܐ ܢܸܥܒܸ̇ܕܼ: ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܠܐܸܡܪܵܐ ܐܲܝܟ ܕܡܵܛܹ̇ܐ ܒܐܝܼܕܼܵܘ̈ܗܝ: ܡܸܫܚܵܐ ܕܹܝܢ ܗܹܡܝܼܢܵܐ ܠܣܲܐܬ̣ܵܐ.

⁸ܘܡܵܐ ܕܥܵܐܹ̇ܠ ܡܕܲܒ̇ܪܵܢܵܐ: ܒܐܸܣܟ̇ܘܼܦܬܹܗ ܕܬܲܪܥܵܐ ܢܸܥܘܿܠ ܘܒ̣ܵܗ̇ ܢܸܦܘܿܩ.

⁹ܘܡܵܐ ܕܥܵܐܠܝܼܢ ܥܲܡܵܐ ܕܐܲܪܥܵܐ ܩܕܼܵܡ ܡܵܪܝܵܐ ܒܙܲܒ̣ܢܵܐ ܕܥܲܕܼܥܹܕܼܵܐ: ܡܲܢ ܕܥܵܐܹ̇ܠ ܒܬܲܪܥܵܐ ܓܲܪܒ̇ܝܵܝܵܐ ܠܡܸܣܓ̇ܕܼ: ܢܸܦܘܿܩ ܠܹܗ ܒܬܲܪܥܵܐ ܬܲܝܡܢܵܝܵܐ: ܘܡ̣ܢ ܕܥܵܐܹ̇ܠ ܒܬܲܪܥܵܐ ܬܲܝܡܢܵܝܵܐ: ܢܸܦܘܿܩ ܠܹܗ ܒܬܲܪܥܵܐ ܓܲܪܒ̇ܝܵܝܵܐ: ܘܠܵܐ ܢܸܗܦܘܿܟ ܒܬܲܪܥܵܐ ܕܥܵܐܹ̇ܠ: ܐܸܠܵܐ ܠܩܘܼܒ̣ܠܹܗ ܢܸܦܘܿܩ.

¹⁰ܡܕܲܒ̇ܪܵܢܵܐ ܕܹܝܢ ܕܒܲܝܢܵܬ̣ܟ̣ܘܿܢ: ܒܬܲܪܥܵܐ ܕܥܵܐܹ̇ܠ ܒܹܗ ܢܸܦܘܿܩ.

¹¹ܘܲܒ̣ܙܲܒ̣ܢܵܐ ܕܥܲܕܼܥܹܕܼܵܐ: ܢܸܗܘܹܐ ܣܡܝܼܕܼܵܐ ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܠܐܸܡܪܵܐ ܐ̄ܢܵܫ ܐܲܝܟ ܕܡܵܛܹ̇ܐ ܒܐܝܼܕܼܵܘ̈ܗܝ: ܡܸܫܚܵܐ ܕܹܝܢ ܗܹܡܝܼܢܵܐ ܠܣܲܐܬ̣ܵܐ.

¹²ܘܡܵܐ ܕܲܡܩܲܪܸܒ̣ ܡܕܲܒ̇ܪܵܢܵܐ ܝܲܩ̈ܕܹ̇ܐ ܫܲܠܡܹ̈ܐ: ܐܵܘ ܩܘܼܪ̈ܒܵܢܹܐ ܦܘܼܪܫܵܢܵܐ ܠܡܵܪܝܵܐ: ܢܸܬ̣ܦܬܲܚ ܠܹܗ ܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ ܕܐܲܚܝܼܕܼ: ܘܲܢܩܲܪܸܒ̣ ܝܲܩܕܵܘ̈ܗܝ ܫܲܠܡܹ̈ܐ ܘܩܘܼܪ̈ܒܵܢܵܘܗܝ: ܘܢܹܐܚܕ̇ܝܼܘܗܝ ܠܬܲܪܥܵܐ ܘܗܵܝܕܹ̇ܝܢ ܢܸܦܘܿܩ: ܐܲܝܟ ܕܥܵܒܹ̇ܕܼ ܒܝܵܘܡܵܐ ܕܫܲܒ̇ܬܵܐ.

¹³ܘܐܸܡܪܵܐ ܒܲܪ ܫܲܢ̄ܬܵܐ ܕܠܲܝܬ̇ ܒܗ ܡܘܼܡܵܐ: ܢܸܗܘܹܐ ܡܩܲܪܸܒ̣ ܒܝܵܘܡܵܐ: ܝܲܩܕܵܐ ܫܲܠܡܵܐ ܠܡܵܪܝܵܐ: ܡ̣ܢ ܨܦܲܪ ܠܲܨܦܲܪ.

¹⁴ܘܲܣܡܝܼܕܼܵܐ ܢܩܲܪܸܒ̣ ܥܠܵܘܗܝ ܡ̣ܢ ܨܦܲܪ ܠܲܨܦܲܪ: ܚܲܕܼ ܡ̣ܢ ܫܬܵܐ ܠܣܲܐܬ̣ܵܐ: ܘܡܸܫܚܵܐ ܚܕܼܵܐ ܡ̣ܢ ܬܠܵܬ̣ ܡܢܵܘܵܬܹ̈ܗ ܕܗܹܡܝܼܢܵܐ: ܠܲܡܦܵܠܹܗ ܠܲܣܡܝܼܕܼܵܐ ܠܡܵܪܝܵܐ: ܢܵܡܘܿܣܵܐ ܠܥܵܠܲܡ ܐܲܡܝܼܢܵܐܝܼܬ̣.

¹⁵ܘܲܢܩܲܪܒ̣ܘܼܢ ܐܸܡܪܹ̈ܐ ܘܲܣܡܝܼܕܼܵܐ ܘܡܸܫܚܵܐ ܡ̣ܢ ܠܲܨܦܲܪ: ܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣.

¹⁶ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܕܲܒ̇ܪܵܢܵܐ ܟܲܕܼ ܢܸܬܸ̇ܠ ܡܵܘܗܲܒ̣ܬ̣ܵܐ ܠܚܲܕܼ ܡ̣ܢ ܒܢܵܘ̈ܗܝ: ܝܵܪܬ̇ܘܼܬܹܗ ܠܲܒ̣ܢܵܘ̈ܗܝ ܬܸܗܘܹܐ.

¹⁷ܘܟܲܕܼ ܢܸܬܸ̇ܠ ܡܵܘܗܲܒ̣ܬ̣ܵܐ ܡܲܢ ܝܵܪܬ̇ܘܼܬܹܗ ܠܚܲܕܼ ܡ̣ܢ ܥܲܒ̣ܕܵܘ̈ܗܝ: ܬܸܗܘܹܐ ܠܹܗ ܥܕܲܡܵܐ ܠܫܲܢ̄ܬܵܐ ܕܡܸܬ̣ܚܲܪܲܪ: ܘܬܸܗܘܹܐ ܠܹܗ ܠܲܡܕܲܒ̇ܪܵܢܵܐ: ܝܵܪܬ̇ܘܼܬ̣ܵܐ ܕܹܝܢ ܕܲܒ̣ܢܵܘ̈ܗܝ ܠܗܘܿܢ ܬܸܗܘܹܐ.

¹⁸ܘܠܵܐ ܢܸܣܲܒ̣ ܡܕܲܒ̇ܪܵܢܵܐ ܡ̣ܢ ܝܵܪܬ̇ܘܼܬܹܗ ܕܥܲܡܵܐ: ܘܠܵܐ ܢܸܥܠܘܿܒ̣ ܐܸܢܘܿܢ ܡ̣ܢ ܝܘܼܪܬܵܢܗܘܿܢ: ܐܸܠܵܐ ܡ̣ܢ ܝܵܪܬ̇ܘܼܬܹܗ ܢܵܘܪܸܬ̣ ܠܲܒ̣ܢܵܘ̈ܗܝ: ܕܠܵܐ ܢܸܬ̣ܒܲܕ̇ܪܘܼܢ ܥܲܡܝ ܐ̄ܢܵܫ ܡ̣ܢ ܝܵܪܬ̇ܘܼܬܹܗ.

¹⁹ܘܐܲܥܠܲܢܝ ܒܡܲܥܠܵܢܵܐ ܕܥܲܠ ܓܸܢ̄ܒ̣ ܬܲܪܥܵܐ ܕܐܲܟ̣ܣܸܕܼܪܵܐ ܓܵܘܵܝܬܵܐ ܕܩܘܼܕܼܫܵܐ ܕܟ̣ܵܗܢܹ̈ܐ: ܕܚܵܝܪܵܐ ܠܓܲܪܒ̇ܝܵܐ: ܘܲܚܙܹ̇ܝܬ̣ ܕܐܝܼܬ̣ ܬܲܡܵܢ ܐܲܬ̣ܪܵܐ ܒܲܫܦܘܿܠܹܝ̈ܗ̇ ܡ̣ܢ ܡܲܥ̱ܪܒ̣ܵܐ.

²⁰ܘܐܸܡܲܪ ܠܝܼ: ܗܵܢܵܘ ܐܲܬ̣ܪܵܐ ܕܲܡܒܲܫܠܝܼܢ ܒܹܗ ܟܵܗ̈ܢܹܐ ܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܘܐܵܦܹ̇ܝܢ ܒܹܗ ܣܡܝܼܕܼܵܐ: ܕܠܵܐ ܢܸܦܩܘܼܢ ܠܕܼܵܪܬܵܐ ܒܲܪܵܝܬܵܐ ܘܲܢܩܲܕ̇ܫܘܼܢܹܗ ܠܥܲܡܵܐ.

²¹ܘܐܲܦ̣ܩܲܢܝ ܠܕܼܵܪܬܵܐ ܒܲܪܵܝܬܵܐ: ܘܐܲܥܒܲܪܲܢܝ ܥܲܠ ܐܲܪܒ̇ܥܵܐ ܣܸܛܪܹ̈ܝܗ̇ ܕܕܼܵܪܬܵܐ: ܘܲܚܙܹ̇ܝܬ̣ ܕܵܪܬܵܐ ܒܲܣܛܲܪ ܕܵܪܬܵܐ: ܘܕܼܵܪܬܵܐ ܐ̄ܚܪܹܬ̣ܵܐ ܒܣܸܛܪܵܐ ܐ̄ܚܪܹܢܵܐ ܕܕܼܵܪܬܵܐ.

²²ܒܐܲܪܒ̇ܥܵܐ ܣܸܛܪܹ̈ܝܗ̇ ܕܕܼܵܪܬܵܐ ܕܵܪܹ̈ܐ ܕܲܩ̈ܕܩܵܬ̣ܵܐ: ܐܲܪܒ̇ܥܝܼܢ ܐܲܡܝܼ̈ܢ ܐܘܼܪܟ̇ܗܹܝܢ: ܘܲܬ̣ܠܵܬ̣ܝܼܢ ܦܬ̣ܵܝܗܹܝܢ.

²³ܘܐܲܟ̣ܣܸܕܼܪܹ̈ܐ ܚܵܕܼܪ̈ܵܢ ܠܐܲܪ̈ܒ̇ܥܵܬܲܝܗܹܝܢ.

²⁴ܘܐܸܡܲܪ ܠܝܼ: ܗܵܢܵܘ ܒܹܝܬ̣ ܛܲܒܵܚܹ̈ܐ: ܕܲܡܒܲܫܠܝܼܢ ܒܹܗ ܕܸܒ̣ܚ̱ܬ̣ܵܐ ܕܥܲܡܵܐ ܡܫܲܡܫܵܢܵܘ̈ܗܝ ܕܒܲܝܬܵܐ.