Read Aramaic Peshita Ezekiel 6 Bible Online

Ezekiel 6 - Aramaic Peshita bible

Ezekiel 6

¹ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

²ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܛܘܼܪܹ̈ܐ ܕܝܼܣܪܵܝܹܠ: ܘܐܸܬ̣ܢܲܒܵܐ ܥܠܲܝܗܘܿܢ.

³ܘܐܸܡܲܪ: ܛܘܼܪܹ̈ܐ ܕܝܼܣܪܵܝܹܠ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܛܘܼܪܹ̈ܐ ܘܲܠܪ̈ܵܡܵܬ̣ܵܐ: ܘܲܠܢܲܚ̈ܠܹܐ ܘܠܲܦܨܝܼ̈ܕܹܐ: ܗܵܐ ܡܲܝܬܹ̇ܐ ܐ̄ܢܵܐ ܥܠܲܝܟ̇ܘܿܢ ܚܲܪܒܵܐ: ܘܐܵܘܒܸ̇ܕܼ ܦܪ̈ܲܟܲܝܟ̇ܘܿܢ.

⁴ܘܢܸܨܕ̇ܘܿܢ ܡܲܕܼܒ̇ܚܲܝ̈ܟ̇ܘܿܢ: ܘܢܸܬ̇ܬܲܒ̇ܪܘܼܢ ܦܬܲܟ̣ܪ̈ܲܝܟ̇ܘܿܢ: ܘܐܲܪܡܐ ܚܪ̈ܝܼܒܲܝܟ̇ܘܿܢ ܩܕܼܵܡ ܕܸܚ̈ܠܵܬ̣ܟ̣ܘܿܢ.

⁵ܘܐܲܪܡܸܐ ܫ̈ܠܲܕܹܐ ܕܒܹܝܬ̣ ܝܑܼܣܪܵܝܹܠ ܩܕܼܵܡ ܦܬܲܟ̣ܪ̈ܲܝܗܘܿܢ: ܘܐܸܕܼܪܸܐ ܓܲܪ̈ܡܲܝܟ̇ܘܿܢ ܚܕܼܵܪ ܡܲܕܼܒ̇ܚܲܝ̈ܟ̇ܘܿܢ.

⁶ܘܲܡܕܼܝܼ̈ܢܵܬ̣ܵܐ ܕܟܠܹܗ ܝܲܬ̣ܒ̇ܟ̣ܘܿܢ ܢܸܚ̱ܪ̈ܒ̣ܵܢ: ܘܲܦܪ̈ܲܟܹ̇ܐ ܢܸܨ̈ܕ̇ܝܵܢ: ܡܸܛܠ ܕܢܸܚ̱ܪܒ̣ܘܼܢ ܘܢܸܨܕ̇ܘܼܢ ܡܲܕܼܒ̇ܚܲܝ̈ܟ̇ܘܿܢ: ܘܢܸܬ̇ܬܲܒ̇ܪܘܼܢ ܘܢܸܬ̣ܒܲܛܠܘܼܢ ܦܬܲܟ̣ܪ̈ܲܝܟ̇ܘܿܢ: ܘܢܸܬ̣ܓܲܕ̇ܡܘܼܢ ܓܠܝܼܦܲܝ̈ܟ̇ܘܿܢ: ܘܢܸܬ̣ܥ̱ܛܘܿܢ ܥܒ̣ܵܕܲܝ̈ܟ̇ܘܿܢ.

⁷ܘܢܸܦܠܘܿܢ ܚܪ̈ܝܼܒܹܐ ܒܲܝܢܵܬ̣ܟ̣ܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

⁸ܐܵܘܬܲܪ ܡܸܢܟ̣ܘܿܢ ܒܹܝܬ̣ ܥܲܡܡܹ̈ܐ: ܐܲܝܠܹܝܢ ܕܐܸܬ̣ܦܲܨܝܼܘ ܡ̣ܢ ܚܲܪܒܵܐ: ܘܐܸܬ̣ܒܲܕܲܪܘ ܒܲܡܕܼܝܼ̈ܢܵܬ̣ܵܐ.

⁹ܘܢܸܬ̇ܕܲܟ̣ܪܘܼܢܵܢܝ ܐܲܝܠܹܝܢ ܕܐܸܬ̣ܦܲܨܝܼܘ ܡܸܢܟ̣ܘܿܢ: ܒܹܝܬ̣ ܥܲܡܡܹ̈ܐ ܕܐܹܫܬ̇ܒ̣ܝܼܘ ܠܬܲܡܵܢ: ܡܵܐ ܕܬܸܒ̣ܟܹ̇ܬ̣ ܠܠܸܒ̇ܗܘܿܢ ܙܲܢܵܝܵܐ ܕܲܣܛܵܘ ܡܹܢܝ: ܘܥܲܝ̈ܢܲܝܗܘܿܢ ܕܲܛܥܲܝ̈ ܒܵܬܲܪ ܦܬܲܟ̣ܪ̈ܲܝܗܘܿܢ: ܘܢܸܬ̣ܩܲܡ̈ܛܵܢ ܐܲܦܲܝ̈ܗܘܿܢ ܒܒ̣ܝܼܫܬܵܐ ܕܲܥܒܲܕܼܘ: ܘܲܒ̣ܟ̣ܠܵܗ̇ ܛܲܢܦܘܼܬܗܘܿܢ.

¹⁰ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܘܠܵܐ ܗ̄ܘܼܵܐ ܣܪܝܼܩܵܐܝܼܬ̣ ܐܸܡ̇ܪܹܬ̣ ܕܐܸܥܒܸ̇ܕܼ ܠܗܘܿܢ ܒܝܼܫܬܵܐ ܗܵܕܹܐ.

¹¹ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܩܘܿܫ ܒܟܲܦܵܟ ܘܲܪܦܘܿܣ ܒܪܸܓ̣ܠܵܟ: ܘܐܹܡܲܪ ܐܲܚܵܢ. ܥܲܠ ܟܠܵܗ̇ ܛܲܢܦܘܼܬ̣ܵܐ ܘܒ̣ܝܼܫܬܵܐ ܕܒܹܝܬ̣ ܝܑܼܣܪܵܝܹܠ: ܕܲܒ̣ܚܲܪܒܵܐ ܘܲܒ̣ܟܲܦܢܵܐ ܘܲܒ̣ܡܵܘܬܵܢܵܐ ܢܸܦܠܘܼܢ.

¹²ܕܪܲܚܝܼܩ ܢܡܘܼܬ̣ ܒܡܵܘܬܵܢܵܐ: ܘܲܕܩܲܪܝܼܒ̣ ܒܚܲܪܒܵܐ ܢܸܦܸܠ: ܘܲܕܼܡܸܫܬܲܚܲܪ ܘܲܕܼܡܸܬ̣ܦܲܨܹܐ ܒܟܲܦܢܵܐ ܢܡܘܼܬ̣: ܘܐܹܫܲܡܠܸܐ ܪܘܼܓ̣ܙܝ ܒܗܘܿܢ.

¹³ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܲܗܘ̤ܵܘ ܩܛܝܼܠܲܝ̈ܗܘܿܢ ܒܲܝܢܵܬ̣ ܦܬܲܟ̣ܪ̈ܲܝܗܘܿܢ ܚܕܼܵܪ ܡܲܕܼܒ̇ܚܲܝ̈ܗܘܿܢ: ܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܬ̣ܚܹܝܬ̣ ܟܠ ܪܹ̈ܫܲܝ ܛܘܼܪܹ̈ܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܡܲܛܲܠ: ܘܲܬ̣ܚܹܝܬ̣ ܟܠ ܒܸܛܡ̱ܬ̣ܵܐ ܥܲܒ̇ܝܼܛܬܵܐ: ܒܐܲܬ̣ܪܵܐ ܕܣܵܡ̣ܘ ܬܲܡܵܢ ܒܸܣܡܹ̈ܐ ܠܟ̣ܠܗܘܿܢ ܦܬܲܟ̣ܪ̈ܲܝܗܘܿܢ.

¹⁴ܘܐܲܪܝܼܡ ܐܝܼܕܼܝ ܥܠܲܝܗܘܿܢ: ܘܐܸܥܒ̇ܕܼܝܼܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ ܡ̣ܢ ܡܲܕܼܒ̇ܪܵܐ ܕܕܸܒ̣ܠܲܬ̣: ܘܟ̣ܠܹܗ ܒܹܝܬ̣ ܡܲܥܡܲܪܗܘܿܢ: ܘܢܸܕ̇ܥܘܼܢ ܕܐܸܢܵܐܐ̄ܢܵܐ ܡܵܪܝܵܐ.