Read Aramaic Peshita Ezekiel 9 Bible Online

Ezekiel 9 - Aramaic Peshita bible

Ezekiel 9

¹ܘܲܩ̣ܪܵܐ ܒܐܸܕܼܢܲܝ̈ ܒܩܵܠܵܐ ܪܵܡܵܐ ܘܐܸܡܲܪ. ܩܪܘܿܒ̣ܘ ܦܵܪ̈ܘܿܥܹܝܗ̇ ܕܲܡܕܼܝܼܢ̄ܬܵܐ: ܘܐ̄ܢܵܫ ܡܵܐܢܹ̈ܐ ܕܦܘܼܪܥܵܢܹܗ ܒܐܝܼܕܹܗ.

²ܘܲܚܙܹ̇ܝܬ̣ ܫܬܵܐ ܓܲܒ̣ܪ̈ܝܼܢ ܐܵܬܹ̇ܝܢ ܡ̣ܢ ܐܘܼܪܚܵܐ ܕܬܲܪܥܵܐ ܥܸܠܝܵܐ ܕܚܵܐܲܪ ܠܓܲܪܒ̇ܝܵܐ: ܘܐ̄ܢܵܫ ܡܵܐܢܲܝ̈ ܦܘܼܪܥܵܢܹܗ ܒܐܝܼܕܹܗ: ܘܓܲܒ̣ܪܵܐ ܚܲܕܼ ܒܲܝܢܵܬ̣ܗܘܿܢ ܘܲܠܒ̣ܝܼܫ ܒܘܼܨܵܐ: ܘܐܲܣܵܪ ܚܲܨܹ̈ܐ ܕܣܲܦܝܼܠܵܐ ܒܚܲܨܵܘ̈ܗܝ: ܘܐܸܬ̣ܵܘ ܘܩܵܡ̣ܘ ܥܲܠ ܓܸܢ̄ܒ̣ ܡܲܕܼܒ̇ܚܵܐ ܕܲܢܚܵܫܵܐ.

³ܘܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܣܠܸܩ̣ ܡ̣ܢ ܟܪܘܿܒ̣ܵܐ ܕܩܵܐܹ̇ܡ ܗ̄ܘܼܵܐ ܥܲܠ ܙܵܘܝܼܬ̣ܵܐ ܕܒܲܝܬܵܐ: ܘܲܩ̣ܪܵܐ ܠܓܲܒ̣ܪܵܐ ܕܲܠܒ̣ܝܼܫ ܒܘܼܨܵܐ: ܘܐܲܣܵܪ ܚܲܨܹ̈ܐ ܕܣܲܦܝܼܠܵܐ ܒܚܲܨܵܘ̈ܗܝ.

⁴ܘܐܸܡܲܪ ܠܹܗ ܡܵܪܝܵܐ: ܥܒܲܪ ܒܓ̣ܵܘ ܡܕܼܝܼܢ̄ܬܵܐ ܒܓ̣ܵܘ ܐܘܿܪܸܫܠܸܡ: ܘܲܪܫܘܿܡ ܪܘܼܫܡܵܐ ܥܲܠ ܒܹܝܬ̣ ܥܲܝ̈ܢܲܝܗܘܿܢ ܕܓܲܒ̣ܪܹ̈ܐ ܕܡܸܬ̇ܬܲܢܚܝܼܢ ܘܡܸܬ̇ܕܲܢܩܝܼܢ: ܥܲܠ ܟܠܗܹܝܢ ܛܲܢܦ̈ܘܵܬ̣ܵܐ ܘܒ̣ܝܼ̈ܫܵܬ̣ܵܐ ܕܡܸܬ̣ܥܲܒ̣̈ܕܵܢ ܒܓ̣ܵܘܵܗ̇.

⁵ܘܲܠܗܵܢܘܿܢ ܕܥܲܡܹܗ ܐܸܢܘܿܢ: ܐܸܡܲܪ ܠܗܘܿܢ ܠܥܹܢܲܝ: ܥܒܪܘ ܒܓ̣ܵܘ ܡܕܼܝܼܢ̄ܬܵܐ ܒܵܬܲܪܝ: ܘܲܚܪܘܿܒ̣ܘ. ܘܠܵܐ ܢܚܘܼ̈ܣܵܢ ܥܲܝܢܲܝ̈ܟ̇ܘܿܢ ܘܠܵܐ ܬܪܲܚܡܘܼܢ.

⁶ܘܲܠܣܵܒܹ̈ܐ ܘܲܠܓܲܕ̇ܘܼ̈ܕܹܐ ܘܠܲܒ̣ܬ̣ܘܼ̈ܠܵܬ̣ܵܐ: ܘܠܲܛܠܵܝܹ̈ܐ ܘܲܠܢܸܫܹ̈ܐ ܩܲܛܸܠܘ ܠܲܚܒ̣ܵܠܵܐ: ܘܲܠܟ̣ܠ ܐ̄ܢܵܫ ܕܐܝܼܬ̣ ܥܠܵܘܗܝ ܪܘܼܫܡܵܐ ܠܵܐ ܬܸܩ̱ܪܒ̣ܘܼܢ: ܘܡ̣ܢ ܡܲܩܕܲܫܝ ܫܲܪܵܘ. ܘܫܲܪܝܼܘ ܒܓܲܒ̣ܪܹ̈ܐ ܣܵܒܹ̈ܐ ܕܩܵܝ̇ܡܝܼܢ ܗ̄ܘܼܵܘ ܩܕܼܵܡ ܒܲܝܬܵܐ.

⁷ܘܐܸܡܲܪ ܠܗܘܿܢ ܛܲܡܐܘܼܗܝ ܠܒܲܝܬܵܐ: ܘܲܡܠܵܘ ܕܵܪܹ̈ܐ ܚܪ̈ܝܼܒܹܐ: ܦܘܿܩܘ ܩܲܛܸܠܘ ܒܲܡܕܼܝܼܢ̄ܬܵܐ.

⁸ܘܟܲܕܼ ܚܪܲܒ̣ܘ ܐܸܢܘܿܢ: ܐܸܫܬܲܚ̇ܪܹܬ̣ ܐܸܢܵܐ ܘܢܸܦ̇ܠܹܬ̣ ܥܲܠ ܐܲܦܲܝ̈: ܘܐܲܝܠܠܹܬ̣ ܒܩܵܠܵܐ ܪܵܡܵܐ ܘܐܸܡ̇ܪܹܬ̣: ܐܘܿܗ ܡܵܪܹܐ ܡܵܪ̈ܵܘܬ̣ܵܐ: ܡܚܲܒܸ̇ܠ ܐܲܢ̄ܬ̇ ܠܟ̣ܠ ܕܐܸܫܬܲܚܲܪ ܡ̣ܢ ܝܑܼܣܪܵܝܹܠ: ܘܐܵܫܹ̇ܕܼ ܐܲܢ̄ܬ̇ ܪܘܼܓ̣ܙܵܟ ܥܲܠ ܐܘܿܪܸܫܠܸܡ.

⁹ܘܐܸܡܲܪ ܠܝܼ: ܥܵܘܼܠܵܐ ܕܒܹܝܬ̣ ܝܑܼܣܪܵܝܹܠ ܘܕܲܝܗܘܼܕܼܵܐ ܣܓ̇ܝܼ ܛܵܒ̣: ܘܐܸܬ̣ܡܲܠܝܲܬ̤ ܐܲܪܥܵܐ ܕܡܵܐ: ܘܲܡܕܼܝܼܢ̄ܬܵܐ ܐܸܬ̣ܡܲܠܝܲܬ̤ ܢܸܟ̣ܠܵܐ: ܘܐܸܡܲܪܘ ܫܲܒ̣ܩܵܗ̇ ܡܵܪܝܵܐ ܠܐܲܪܥܵܐ: ܘܠܵܐ ܚܵܙܹ̇ܐ ܠܲܢ ܡܵܪܝܵܐ.

¹⁰ܘܐܸܢܵܐ ܠܵܐ ܐܹܚܘܼܣ ܥܠܲܝܗܘܿܢ ܘܠܵܐ ܐܹܪܲܚܸܡ: ܐܘܼܪ̈ܚܵܬ̣ܗܘܿܢ ܒܪܹܫܗܘܿܢ ܐܸܦܪܘܿܥ.

¹¹ܘܲܚܙܹ̇ܝܬ̣ ܠܓܲܒ̣ܪܵܐ ܕܲܠܒ̣ܝܼܫ ܒܘܼܨܵܐ ܕܲܥܢ̣ܵܐ ܘܐܸܡܲܪ: ܥܸܒ̣ܕܹ̇ܬ̣ ܐܲܝܟܲܢܵܐ ܕܦܲܩܸܕ̇ܬܵܢܝ.