Read Aramaic Peshita Daniel 1 Bible Online

Daniel 1 - Aramaic Peshita bible

Daniel 1

¹ܒܲܫܢܲܬ̣ ܬܠܵܬ̣ ܕܡܲܠܟ̇ܘܼܬܹܗ ܕܝܘܿܝܵܩܝܼܡ ܡܲܠܟܵܐ ܕܲܝܗܘܼܕܼܵܐ: ܐܸܬ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܲܠ ܠܐܘܿܪܸܫܠܸܡ ܘܚܲܕܼܪܵܗ̇.

²ܘܐܲܫ̱ܠ̣ܡܵܗ̇ ܡܵܪܝܵܐ ܒܐܝܼܕܹܗ: ܘܠܝܘܿܝܵܩܝܼܡ ܡܲܠܟܵܐ ܕܲܝܗܘܼܕܼܵܐ: ܘܡ̣ܢ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ: ܐܵܘܒܸ̇ܠ ܐܸܢܘܿܢ ܠܐܲܪܥܵܐ ܕܣܸܢܥܵܪ ܠܒܹܝܬ̣ ܦܬܲܟ̣ܪܹܗ: ܘܡܵܐܢܹ̈ܐ ܐܲܥܸܠ̣ ܠܒܹܝܬ̣ ܓܲܙܵܐ ܕܲܦܬܲܟ̣ܪܹܗ.

³ܘܐܸܡ̣ܲܪ ܡܲܠܟܵܐ ܠܐܸܫܦܵܙ ܪܲܒ̇ ܡܗܲܝܡܢܹ̈ܐ: ܕܢܲܝܬܸ̇ܐ ܡ̣ܢ ܒܢܲܝ̈ ܝܑܼܣܪܵܝܹܠ: ܡ̣ܢ ܙܪܲܥ ܡܲܠ̈ܟ̇ܘܼܬ̣ܵܐ: ܘܡ̣ܢ ܦܲܪ̈ܬ̇ܘܵܝܹܐ.

⁴ܛܠܵܝܹ̈ܐ ܕܡܘܼܡܵܐ ܠܲܝܬ̇ ܒܗܘܿܢ: ܐܲܝܠܹܝܢ ܕܫܲܦܝܼܪܝܼܢ ܒܚܸܙ̱ܘܗܘܿܢ: ܘܣܲܟ̇ܘܼܠܬ̣ܵܢܝܼܢ ܒܚܸܟ̣ܡ̱ܬ̣ܵܐ: ܘܝܵܕܲܥܬ̣ܵܐ: ܘܡܸܬ̣ܒܲܝܢܲܝ̈ ܒܡܲܕ̇ܥܵܐ: ܐܲܝܠܹܝܢ ܕܲܡܨܹܝܢ ܒܚܲܝܠܵܐ ܠܲܡܩܵܡ ܒܗܲܝܟ̇ܠܵܐ ܕܡܲܠܟܵܐ ܠܲܡܫܲܡܵܫܘܼܬܹܗ: ܘܲܠܡܲܠܵܦܘܼ ܐܸܢܘܿܢ ܣܸܦܪܵܐ: ܘܠܸܫܵܢܵܐ ܕܟܲܠܕܼܵܝܹ̈ܐ.

⁵ܘܐܲܩܝܼܡ ܠܗܘܿܢ ܡܲܠܟܵܐ ܩܝܵܡܬܵܐ ܕܝܵܘܡܵܐ. ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ: ܘܡ̣ܢ ܚܲܡܪܵܐ ܕܫܵܬܹ̇ܐ: ܘܠܲܡܪܲܒܵܝܘܼ ܐܸܢܘܿܢ ܫܢܝܼ̈ܢ ܬܠܵܬ̣: ܘܗܵܝܕܹ̇ܝܢ ܢܩܘܼܡܘܿܢ ܩܕܼܵܡ ܡܲܠܟܵܐ.

⁶ܘܲܗܘ̤ܵܘ ܒܗܘܿܢ ܡ̣ܢ ܒܢܲܝ̈ ܝܑܼܗܘܼܕܼܵܐ: ܕܵܢܝܼܐܹܝܠ: ܘܚܲܢܲܢܝܵܐ: ܘܡܝܼܫܵܐܹܝܠ: ܘܥܲܙܲܪܝܵܐ.

⁷ܘܫܲܡܝܼ ܠܗܘܿܢ ܪܲܒ̇ ܡܗܲܝܡܢܹ̈ܐ ܫܡܵܗܹ̈ܐ: ܩ̣ܪܵܐ ܠܕܵܢܝܼܐܹܝܠ ܒܹܠܛܫܵܨܲܪ: ܘܲܠܚܲܢܲܢܝܵܐ ܫܸܕܼܪܵܟ: ܘܲܠܡܝܼܫܵܐܹܝܠ ܡܝܼܫܵܟ: ܘܲܠܥܲܙܲܪܝܵܐ ܥܒܸܕܼܢܵܓ̣ܘܿ.

⁸ܘܣܵܡ̣ ܕܵܢܝܼܐܹܝܠ ܒܪܸܥܝܵܢܹܗ: ܕܠܵܐ ܢܹܐܟ̣ܘܿܠ ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ: ܘܠܵܐ ܢܸܫܬܹ̇ܐ ܡ̣ܢ ܚܲܡܪܵܐ ܕܫܵܬܹ̇ܐ: ܘܲܒ̣ܥ̣ܵܐ ܡ̣ܢ ܪܲܒ̇ ܡܗܲܝܡܢܹ̈ܐ ܕܠܵܐ ܢܵܘܟ̇ܠܝܼܘܗܝ.

⁹ܘܝܲܗ̄ܒ̣ ܐܲܠܵܗܵܐ ܛܲܝܒ̇ܘܼܬ̣ܵܐ ܘܪ̈ܲܚܡܹܐ ܠܕܼܵܐܢܝܼܐܹܝܠ ܩܕܼܵܡ ܪܲܒ̇ ܡܗܲܝܡ̈ܢܹܐ.

¹⁰ܘܐܸܡܲܪ ܪܲܒ̇ ܡܗܲܝܡܢܹ̈ܐ ܠܕܼܵܢܝܼܐܹܝܠ: ܕܵܚܹ̇ܠ ܐ̄ܢܵܐ ܡ̣ܢ ܡܵܪܝ ܡܲܠܟܵܐ: ܕܦܲܩܸܕܼ ܥܲܠ ܡܹܐܟ̣ܘܼܠܬ̇ܟ̣ܘܿܢ ܘܥܲܠ ܡܲܫܬܲܝܟ̇ܘܿܢ: ܕܲܠܡܵܐ ܢܸܚܙܹܐ ܐܲܦܲܝ̈ܟ̇ܘܿܢ ܡܟܲܐܪ̈ܵܢ ܡ̣ܢ ܕܲܛܠܵܝܹ̈ܐ ܒܢܲܝ̈ ܫܸܢܟ̣ܘܿܢ: ܘܢܸܦܣܘܿܩ ܪܹܫܝ ܡܲܠܟܵܐ.

¹¹ܝܐ:ܘܐܸܡܲܪ ܕܵܢܝܼܐܹܝܠ ܠܲܡܢܸܨܲܪ: ܕܐܲܫ̱ܠܛܹܗ ܪܲܒ̇ ܡܗܲܝܡܢܹ̈ܐ ܥܲܠ ܕܵܢܝܼܐܹܝܠ: ܘܥܲܠ ܚܲܢܲܢܝܵܐ: ܘܥܲܠ ܡܝܼܫܵܐܝܼܠ: ܘܥܲܠ ܥܲܙܲܪܝܵܐ.

¹²ܢܲܣܵܐ ܐܸܢܘܿܢ ܠܥܲܒ̣ܕܲܝ̈ܟ ܝܵܘܡܝܼ̈ܢ ܥܸܣܪܵܐ: ܘܢܸܬ̇ܠܘܼܢ ܠܲܢ ܙܲܪ̈ܥܘܿܢܹܐ ܠܡܹܐܟܲܠ: ܘܡܲـ̈ـܝܵܐ ܠܡܸܫܬܵܐ.

¹³ܘܬܸܚܙܹܐ ܫܝܼܘܼܬܲܢ ܘܫܝܼܘܼܬ̣ܵܐ ܕܲܛܠܵܝܹ̈ܐ ܕܐܵܟ̣ܠܝܼܢ ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ: ܘܐܲܝܟ ܕܚܵܙܹ̇ܐ ܐܲܢ̄ܬ̇ ܗܵܟܲܢܵܐ ܥܒܸܕܼ ܥܲܡ ܥܲܒ̣ܕܲܝ̈ܟ.

¹⁴ܘܐܸܫܬ̇ܡܲܥ ܡܸܠܲܬ̣ܗܘܿܢ ܗܵܕܹ݂ܐ: ܘܢܲܣܝܼ ܐܸܢܘܿܢ ܝܵܘܡܝܼ̈ܢ ܥܸܣܪܵܐ.

¹⁵ܘܡ̣ܢ ܒܵܬܲܪ ܥܸܣܪܵܐ ܝܵܘܡܝܼ̈ܢ: ܚܙ̣ܵܐ ܐܲܦܲܝ̈ܗܘܿܢ ܫܲܦܝܼܪ̈ܵܢ ܘܫܲܡܝܼܢ ܒܸܣ̱ܪܗܘܿܢ: ܛܵܒ̣ ܡ̣ܢ ܕܲܛܠܵܝܹ̈ܐ ܟܠܗܘܿܢ ܕܐܵܟ̣ܠܝܼܢ ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ.

¹⁶ܘܲܡܢܸܨܲܪ ܢܵܣܹ̇ܒ̣ ܗ̄ܘܼܵܐ ܠܹܗ ܫܩܵܠܗܘܿܢ: ܘܚܲܡܪܵܐ ܕܡܲܫܬܲܝܗܘܿܢ: ܘܝܵܗܹ̇ܒ̣ ܗ̄ܘܼܵܐ ܠܗܘܿܢ ܙܲܪ̈ܥܘܿܢܹܐ ܠܡܹܐܟܲܠ: ܘܡܲـ̈ـܝܵܐ ܠܡܸܫܬܵܐ.

¹⁷ܘܠܲܛܠܵܝܹ̈ܐ ܗܵܠܹܝܢ ܐܲܪ̈ܒ̇ܥܵܬܲܝܗܘܿܢ: ܝܲܗ̄ܒ̣ ܠܗܘܿܢ ܐܲܠܵܗܵܐ ܝܑܼܕܲܥܬ̣ܵܐ ܘܣܘܼܟܵܠܵܐ ܒܟ̣ܠ ܣܦܲܪ ܘܚܸܟ̣ܡܵܐ: ܘܕܼܵܢܝܼܐܹܝܠ ܡܸܬ̣ܒܲܝܲܢ ܗ̄ܘܼܵܐ ܒܟ̣ܠ ܚܸܙܘܝܼ̈ܢ ܘܚܸܠܡܝܼ̈ܢ.

¹⁸ܘܡ̣ܢ ܒܵܬܲܪ ܕܲܫܠܸܡ̣ܘ ܝܵܘ̈ܡܵܬ̣ܵܐ ܕܲܦ̣ܩܲܕܼ ܡܲܠܟܵܐ: ܐܲܝܬ̇ܝ ܐܸܢܘܿܢ ܪܲܒ̇ ܡܗܲܝܡܢܹ̈ܐ ܩܕܼܵܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.

¹⁹ܘܡܲܠܸܠ̣ ܥܲܡܗܘܿܢ ܡܲܠܟܵܐ: ܘܠܵܐ ܐܸܫ̣ܟܲܚ ܒܟ̣ܠܗܘܿܢ ܐܲܝܟ ܕܵܢܝܼܐܹܝܠ: ܘܚܲܢܲܢܝܵܐ: ܘܡܝܼܫܵܐܝܹܠ: ܘܥܲܙ̇ܪܝܵܐ: ܘܩܵܡ̣ܘ ܩܕܼܵܡ ܡܲܠܟܵܐ.

²⁰ܘܟ̣ܠ ܡܸܠܵܐ ܕܚܸܟ̣ܡ̱ܬ̣ܵܐ ܘܲܕܼܣܘܼܟܵܠܵܐ ܫܲܐܸܠ̣ ܐܸܢܘܿܢ ܡܲܠܟܵܐ: ܐܸܫܟܲܚ ܐܸܢܘܿܢ ܝܲܬ̇ܝܼܪܝܼܢ ܥܣܲܪ ܡ̈ܢܵܘܵܢ: ܥܲܠ ܟܠ ܚܲܪ̈ܵܫܹܐ ܘܐܵܫܘܿܦܹ̈ܐ ܕܐܝܼܬ̣ ܒܡܲܠܟ̇ܘܼܬܹܗ.

²¹ܘܲܗܘ̤ܵܐ ܕܵܢܝܼܐܹܝܠ ܥܕܲܡܵܐ ܠܲܫܢܲܬ̣ ܚܕܼܵܐ ܕܟ̣ܘܿܪܹܫ ܡܲܠܟܵܐ.