Read Aramaic Peshita Daniel 10 Bible Online

Daniel 10 - Aramaic Peshita bible

Daniel 10

¹ܒܲܫܢܲܬ̣ ܬܠܵܬ̣ ܕܟ̣ܘܼܪܹܫ ܡܲܠܟܵܐ ܕܦܵܪܹܣ: ܦܸܬ̣ܓ̣ܵܡܵܐ ܐܸܬ̣ܓ̇ܠܝܼ ܠܕܼܵܢܝܼܐܹܝܠ ܕܐܸܬ̣ܩܪܝܼ ܫܡܹܗ ܒܹܠܛܫܵܨܲܪ: ܘܫܲܪܝܼܪ ܦܸܬ̣ܓ̣ܵܡܵܐ: ܘܲܒ̣ܚܲܝܠܵܐ ܪܲܒܵܐ ܡܸܬ̣ܒܲܝܲܢ ܦܸܬ̣ܓ̣ܵܡܵܐ: ܘܐܸܣܬܲܟܲܠ ܒܹܗ ܒܚܸܙܘܵܐ.

²ܒܝܵܘ̈ܡܵܬ̣ܵܐ ܗܵܢܘܿܢ: ܐܸܢܵܐ ܕܵܢܝܼܐܹܝܠ ܗܘܹ̇ܝܬ̣ ܝܵܬܹ̇ܒ̣ ܒܐܸܒ̣ܠܵܐ: ܬܠܵܬ̣ܵܐ ܫܵܒ̣ܘܿܥܝܼ̈ܢ ܕܝܵܘܡܝܼ̈ܢ.

³ܠܲܚܡܵܐ ܕܪܸܓ̇ܬ̣ܵܐ ܠܵܐ ܐܸܟ̣ܠܹ̇ܬ̣: ܘܚܲܡܪܵܐ ܘܒܸܣܪܵܐ ܠܵܐ ܥܲܠ ܠܦܘܼܡܝ: ܘܡܸܫܚܵܐ ܠܵܐ ܡܸܫܚܹ̇ܬ̣: ܥܕܲܡܵܐ ܕܲܫܠܸܡ̣ܘ ܬܠܵܬ̣ܵܐ ܫܵܒ̣ܘܿܥܝܼ̈ܢ ܕܝܵܘܡܝܼ̈ܢ.

⁴ܒܝܘܿܡ ܐܲܪܒ̇ܥܵܐ ܘܥܸܣܪܝܼܢ ܒܝܲܪܚܵܐ ܩܲܕܼܡܵܝܵܐ: ܐܸܢܵܐ ܗܘܹ̇ܝܬ̣ ܥܲܠ ܝܲܕܼ ܢܲܗܪܵܐ ܪܲܒܵܐ ܦܪܵܬ̣.

⁵ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܓܲܒ̣ܪܵܐ ܚܲܕܼ ܕܲܠܒ̣ܝܼܫ ܠܒ̣ܘܼܫܝܼ̈ܢ ܕܐܝܼܩܵܪ: ܘܚܲܨܵܘ̈ܗܝ ܚܙܝܼܩܝܼܢ ܒܐܝܼܩܵܪ ܬܸܫܒ̇ܘܿܚܬܵܐ.

⁶ܘܚܸܙܘܵܐ ܡܫܲܓ̣ܢܲܝ ܘܠܲܝܬ̇ ܠܹܗ ܕܡܘܼ: ܘܐܲܦܵܘ̈ܗܝ ܐܲܝܟ ܚܸܙܘܵܐ ܕܒܲܪܩܵܐ: ܘܥܲܝ̈ܢܵܘܗܝ ܐܲܝܟ ܠܲܡܦܹܝܼ̈ܕܹܐ ܕܢܘܼܪܵܐ: ܘܲܕܼܪ̈ܵܥܵܘܗܝ ܘܟܲܬ̣ܦܵܬܹ̈ܗ ܐܝܟ ܥܲܝܢܹ̈ܐ ܕܲܢܚܵܫܵܐ ܕܡܲܒ̣ܪܸܩ: ܘܩܵܠܵܐ ܕܦܸܬ̣ܓ̣ܵܡܵܘ̈ܗܝ ܐܲܝܟ ܩܵܠ ܚܲܝܠܝܼ̈ܢ ܣܲܓ̇ܝܼܐܝܼܢ.

⁷ܘܲܚܙܹ̇ܝܬ̣ ܐܸܢܵܐ ܕܵܢܝܼܐܹܝܠ ܒܲܠܚܘܿܕܲܝ ܚܸܙܘܵܐ ܗܵܢܵܐ: ܘܓܲܒ̣ܪܹ̈ܐ ܕܲܗܘ̤ܵܘ ܥܲܡܝ ܠܵܐ ܚ̣ܙܵܘ: ܐܸܠܵܐ ܕܸܚ̱ܠܬ̣ܵܐ ܪܲܒ̇ܬ̣ܵܐ ܢܸܦܠܲܬ̤ ܥܠܲܝܗܘܿܢ: ܘܲܥܪܲܩ̣ܘ ܡ̣ܢ ܕܸܚ̱ܠܬ̣ܵܐ.

⁸ܘܐܸܢܵܐ ܒܲܠܚܘܿܕܵܝ ܐܸܫܬܲܚ̇ܪܹܬ̣ ܘܲܚܙܹ̇ܝܬ̣ ܚܸܙܘܵܐ ܗܵܢܵܐ ܪܲܒܵܐ: ܘܠܵܐ ܐܸܫܬ̇ܚܲܪ ܒܝܼ ܚܲܝܠܵܐ: ܘܓ̣ܵܘܝ ܐܸܬ̣ܗ̱ܦܸܟ ܠܡܸܬ̣ܚܲܒܵܠܘܼ: ܘܠܵܐ ܗܘ̤ܵܐ ܒܝܼ ܚܹܝܠ.

⁹ܘܟܲܕܼ ܫܸܡܥܹ̇ܬ̣ ܩܵܠܵܐ ܕܡܸܠܵܘ̈ܗܝ: ܢܸܦܠܹ̇ܬ̣ ܥܲܠ ܐܲܦܲܝ̈ ܥܲܠ ܐܲܪܥܵܐ.

¹⁰ܘܗܵܐ ܐܝܼܕܼܵܐ ܩܸܪܒܲܬ̤ ܠܝܼ ܘܐܲܩܝܼܡܬܲܢܝ ܥܲܠ ܒܘܼܪ̈ܟܲܝ: ܘܥܲܠ ܦܲܣܲܬ̣ ܐܝܼ̈ܕܲܝ.

¹¹ܘܐܸܡܲܪ ܠܝܼ: ܩܘܼܡ ܕܵܢܝܼܐܹܝܠ ܓܲܒ̣ܪܵܐ ܕܪܸܓ̇ܬ̣ܵܐ: ܘܐܸܣܬܲܟܲܠ ܒܦܸܬ̣ܓ̣ܵܡܵܐ ܕܲܡܡܲܠܸܠ ܐ̄ܢܵܐ ܥܲܡܵܟ: ܘܩܘܼܡ ܥܲܠ ܩܝܵܡܵܟ: ܡܸܛܠ ܕܗܵܫܵܐ ܐܸܫܬܲܕ̇ܪܹܬ̣ ܥܠܲܝܟ: ܘܟܲܕܼ ܡܡܲܠܸܠ ܥܲܡܝܼ ܡܸܠܬ̣ܵܐ ܗܵܕܹܐ: ܩܵܐܹ̇ܡ ܗ̄ܘܹ̇ܝܬ̣ ܘܪܵܐܹ̇ܬ̣.

¹²ܘܐܸܡ̣ܲܪ ܠܝܼ: ܠܵܐ ܬܸܕܼܚܲܠ ܕܵܢܝܼܐܹܝܠ: ܡܸܛܠ ܕܡ̣ܢ ܝܵܘܡܵܐ ܩܲܕܼܡܵܝܵܐ ܕܝܲܗ̄ܒ̣ܬ̇ ܠܸܒܵܟ ܠܝܼܕܲܥܬ̣ܵܐ: ܠܲܡܩܵܡ ܩܕܼܵܡ ܐܲܠܵܗܵܟ: ܐܸܫܬ̇ܡܲܥ ܡܸܠܲܝ̈ܟ: ܘܐܸܢܵܐ ܐܸܬܹܝ̇ܬ̣ ܒܡܸܠܲܝ̈ܟ.

¹³ܘܫܲܠܝܼܛܵܐ ܕܡܲܠܟ̇ܘܼܬ̣ܵܐ ܕܦܵܪܹܣ: ܩܵܡ̣ ܠܘܼܩܒܲܠܝ ܥܸܣܪܝܼܢ ܘܚܲܕܼ ܝܘܿܡ: ܘܗܵܐ ܡܝܼܟ̣ܵܐܹܝܠ ܚܲܕܼ ܡ̣ܢ ܪܵܘܪ̈ܒ̣ܵܢܹܐ ܩܲܕܼܡܵܝܹ̈ܐ: ܐܸܬ̣ܵܐ ܠܲܡܥܲܕܵܪܘܼܬܲܢܝ: ܘܐܸܫܬܵܘܚ̇ܪܹܬ̣ ܬܲܡܵܢ ܠܘܼܩܒܲܠ ܫܲܠܝܼܛܵܐ ܕܦܵܪܹܣ.

¹⁴ܘܐܸܢܵܐ ܐܸܬܹܝ̇ܬ̣ ܠܲܡܚܵܘܵܝܘܼܬ̣ܵܟ: ܡܸܕܹ̇ܡ ܕܓ̣ܵܕܸܫ ܠܥܲܡܵܟ ܒܚܲܪܬ̣ܵܐ ܕܝܵܘ̈ܡܵܬ̣ܵܐ: ܡܸܛܠ ܕܬ̣ܘܼܒ̣ ܚܸܙܘܵܐ ܠܣܘܿܦ ܝܵܘ̈ܡܵܬ̣ܵܐ.

¹⁵ܘܟܲܕܼ ܡܡܲܠܸܠ ܥܲܡܝ ܡܸܠܹ̈ܐ ܗܵܠܹܝܢ: ܣܵܡܹ̇ܬ̣ ܐܲܦܲܝ̈ ܒܐܲܪܥܵܐ ܘܫܸܬ̣ܩܹ̇ܬ̣.

¹⁶ܘܗܵܐ ܐܲܝܟ ܕܡܘܼܬ̣ܵܐ ܕܐ̄ܢܵܫܵܐ ܩ̣ܪܸܒ̣ ܠܣܸܦ̈ܘܵܬ̣ܝ: ܘܲܦ̣ܬܲܚ ܦܘܼܡܝ ܘܡܲܠܠܹ̇ܬ̣ ܘܐܸܡ̇ܪܹܬ̣ ܠܗܵܘܿ ܕܩܵܐܹ̇ܡ ܠܘܼܩܒܲܠ: ܡܵܪܝ: ܒܚܸܙܘܵܐ ܐܸܬ̣ܗ̱ܦܸܟ ܓܵܘܝ ܥܠܲܝ: ܘܠܵܐ ܐܸܫܟ̇ܚܹ̇ܬ̣ ܠܲܡܩܵܡ.

¹⁷ܘܐܲܝܟܲܢܵܐ ܡܸܫܟܲܚ ܥܲܒ̣ܕܹ̇ܗ ܕܡܵܪܝܵܐ ܗܵܢܵܐ ܠܲܡܡܲܠܵܠܘܼ ܥܲܡ ܡܵܪܝ ܗܵܢܵܐ: ܕܗܵܐ ܠܲܝܬ̇ ܒܝܼ ܚܲܝܠܵܐ: ܘܲܢܫܲܡܬ̣ܵܐ ܠܵܐ ܐܸܫܬܲܚܪܲܬ̤ ܒܝܼ.

¹⁸ܘܐܵܘܣܸܦ ܩ̣ܪܸܒ̣ ܠܝܼ ܐܲܝܟ ܚܸܙܘܵܐ ܕܐ̄ܢܵܫܵܐ ܘܚܲܝܠܲܢܝ.

¹⁹ܘܐܸܡ̣ܲܪ ܠܝܼ: ܠܵܐ ܬܸܕܼܚܲܠ ܓܲܒ̣ܪܵܐ ܕܪܸܓ̇ܬ̣ܵܐ: ܫܠܵܡ ܠܵܟ: ܐܸܬ̣ܚܲܝܲܠ ܘܐܸܬ̣ܥܲܫܲܢ: ܘܟܲܕܼ ܡܡܲܠܸܠ ܥܲܡܝ ܐܸܬ̣ܚܲܝ̇ܠܹܬ̣: ܘܐܸܡ̇ܪܹܬ̣: ܢܡܲܠܸܠ ܡܵܪܝ: ܡܸܛܠ ܕܐܸܬ̣ܚܲܝ̇ܠܹܬ̣.

²⁰ܘܐܸܡ̣ܲܪ ܠܝܼ: ܝܵܕܲܥ ܐܲܢ̄ܬ̇ ܠܡܵܢܵܐ ܐܸܬܹܝ̇ܬ̣ ܠܘܵܬ̣ܵܟ: ܗܵܫܵܐ ܐܸܗܦܘܿܟ ܠܡܸܥܒܲܕܼ ܩܪܵܒ̣ܵܐ ܥܲܡ ܫܲܠܝܼܛܵܐ ܕܦܵܪܹܣ: ܘܐܸܢܵܐ ܢܸܦܩܹ̇ܬ̣: ܘܗܵܐ ܫܲܠܝܼܛܵܐ ܕܝܵܘܢܵܝܹ̈ܐ ܐܸܬ̣ܵܐ.

²¹ܒܪܲܡ ܐܹܚܵܘܹܝܟ ܡܸܕܹ̇ܡ ܕܲܪܫܝܼܡ ܒܲܟ̣ܬ̣ܵܒ̣ܵܐ ܒܩܘܼܫܬܵܐ: ܘܠܲܝܬ̇ ܕܲܡܥܲܕܲܪ ܗ̄ܘܼܵܐ ܠܝܼ ܒܗܵܠܹܝܢ ܟܠܗܹܝܢ: ܐܸܠܵܐ ܐܸܢ ܡܝܼܟ̣ܵܐܹܝܠ ܫܲܠܝܼܛܟ̣ܘܿܢ ܘܐܸܢܵܐ.