Read Aramaic Peshita Daniel 12 Bible Online

Daniel 12 - Aramaic Peshita bible

Daniel 12

¹ܒܹܗ ܒܙܲܒ̣ܢܵܐ ܗܵܘܿ: ܢܩܘܼܡ ܡܝܼܟ̣ܵܐܹܝܠ ܡܲܠܲܟ̣ܵܐ ܪܲܒܵܐ ܕܲܦܩܝܼܕܼ ܥܲܠ ܒܢܲܝ̈ ܥܲܡܵܟ: ܘܢܸܗܘܹܐ ܙܲܒ̣ܢܵܐ ܕܐܘܼܠܨܵܢܵܐ: ܕܠܵܐ ܗܘ̤ܵܐ ܐܲܟ̣ܘܵܬܹܗ ܡ̣ܢ ܝܵܘ̈ܡܵܬ̣ ܥܵܠܡܵܐ: ܘܒܹܗ ܒܙܲܒ̣ܢܵܐ ܗܵܘܿ: ܢܸܫܬܵܘܙܲܒ̣ ܡ̣ܢ ܒܢܲܝ̈ ܥܲܡܵܟ: ܟܠ ܕܢܸܫܬ̇ܟܲܚ ܕܲܟ̣ܬ̣ܝܼܒ̣ ܒܣܸܦܪܵܐ.

²ܘܣܲܓ̇ܝܼ̈ܐܹܐ ܐܲܝܠܹܝܢ ܕܕܲܡܟ̇ܝܼܢ ܒܥܲܦܪܵܐ ܢܸܬ̇ܬ̇ܥܝܼܪܘܼܢ: ܗܵܠܹܝܢ ܠܚܲܝܲܝ̈ ܥܵܠܡܹ̈ܐ: ܘܗܵܠܹܝܢ ܠܐܲܒ̣ܘܼܕܵܢܵܐ ܘܲܠܚܸܣܕܵܐ ܕܚܲܒ̣ܪ̈ܲܝܗܘܿܢ ܠܥܵܠܲܡ.

³ܘܥܵܒ̣̈ܕܲܝ ܛܵܒ̣ܵـ̈ـܬ̣ܵܐ ܘܣܲܟ̇ܘܼܠܬ̣ܵܢܹ̈ܐ: ܢܸܢ̱ܗܪܘܼܢ ܐܲܝܟ ܢܘܼܗܪܹܗ ܕܲܪܩܝܼܥܵܐ: ܘܐܲܝܠܹܝܢ ܕܲܡܙܲܟܹ̇ܝܢ ܠܣܲܓ̇ܝܼ̈ܐܹܐ: ܢܸܗܘܘܿܢ ܡܲܙܗ̱ܪܝܼܢ ܘܩܵܝ̇ܡܝܼܢ ܐܲܝܟ ܟܵܘܟ̇ܒܹ̈ܐ: ܠܥܵܠܲܡ ܘܲܠܥܵܠܲܡ ܥܵܠܡܝܼܢ.

⁴ܘܐܲܢ̄ܬ̇ ܕܹܝܢ ܕܵܢܝܼܐܹܝܠ: ܚܬ̣ܘܿܡ ܦܸܬ̣ܓ̣ܵܡܹ̈ܐ ܗܵܠܹܝܢ ܘܲܫܬ̣ܘܿܩ: ܘܲܚܬ̣ܘܿܡ ܣܸܦܪܵܐ ܗܵܢܵܐ ܥܲܕܼ ܥܸܕܵܢ ܩܸܨܵܐ: ܘܢܸܒ̣ܥܘܿܢ ܣܲܓ̇ܝܼ̈ܐܹܐ ܘܬܸܣܓܹ̇ܐ ܝܑܼܕܲܥܬ̣ܵܐ.

⁵ܘܲܚܙܹ̇ܝܬ̣ ܐܸܢܵܐ ܕܵܢܝܼܐܹܝܠ: ܘܗܵܐ ܬܪܹܝܢ ܐ̄ܚܪ̈ܵܢܝܼܢ ܩܵܝ̇ܡܝܼܢ ܚܲܕܼ ܒܗܵܕܹܐ ܣܸܦܬܹܗ ܕܢܲܗܪܵܐ ܘܚܲܕܼ ܒܗܵܝ̇.

⁶ܘܐܸܡ̣ܲܪܘ ܠܓܲܒ̣ܪܵܐ ܕܲܠܒ̣ܝܼܫ ܠܒ̣ܘܼܫ̈ܝܼܢ ܕܐܝܼܩܵܪ: ܘܩܵܐܹ̇ܡ ܠܥܸܠ ܡ̣ܢ ܡܲـ̈ـܝܵܐ ܕܢܲܗܪܵܐ: ܥܕܲܡܵܐ ܠܐܸܡܲܬ̣ܝ ܩܸܨܵܐ ܗܵܢܵܐ.

⁷ܘܫܸܡ̇ܥܹܬ̣ ܠܓܲܒ̣ܪܵܐ ܕܲܠܒ̣ܝܼܫ ܠܒ̣ܘܼܫ̈ܝܼܢ ܕܐܝܼܩܵܪ: ܘܩܵܐܹ̇ܡ ܠܥܸܠ ܡ̣ܢ ܡܲـ̈ـܝܵܐ ܕܢܲܗܪܵܐ: ܕܐܲܪܝܼܡ ܝܲܡܝܼܢܹܗ ܘܣܸܡܵܠܹܗ ܠܘܵܬ̣ ܫܡܲܝܵܐ: ܘܝܼܡܵܐ ܒܚܲܝ ܥܵܠܡܹ̈ܐ: ܕܲܠܥܸܕܵܢ ܥܸܕܵܢܝܼ̈ܢ ܘܦܸܠܓܘܼܬ̣ ܥܸܕܵܢ: ܘܲܒ̣ܥܸܕܵܢ ܕܢܸܬ̣ܦܲܨ̈ܝܵܢ ܐܝܼ̈ܕܲܝܵܐ ܕܟ̣ܠ ܥܲܡܵܐ ܩܲܕ̇ܝܼܫܵܐ: ܢܸܫ̈ܠ̱ܡܵܢ ܗܵܠܹܝܢ ܟܠܗܹܝܢ.

⁸ܘܐܸܢܵܐ ܕܵܢܝܼܐܹܝܠ ܫܸܡܥܹ̇ܬ̣ ܘܠܵܐ ܐܸܫܬܵܘܕ̇ܥܹ̇ܬ̣: ܘܐܸܡ̇ܪܹܬ̣: ܡܵܪܝ ܡܵܢܵܐ ܒܵܬܲܪ ܗܵܠܹܝܢ.

⁹ܘܐܸܡ̣ܲܪ ܠܝܼ: ܙܸܠ ܕܵܢܝܼܐܹܝܠ: ܡܸܛܠ ܕܲܟ̣ܣܹܝܢ ܐܸܢܘܿܢ ܘܲܚܬ̣ܝܼܡܝܼܢ ܦܸܬ̣ܓ̣ܵܡܹ̈ܐ ܥܲܕܼ ܥܸܕܵܢ ܩܸܨܵܐ.

¹⁰ܢܸܬ̣ܓܵܒ̣ܘܿܢ: ܘܢܸܬ̣ܚܵܘܪܘܼܢ: ܘܢܸܬ̣ܒܲܚܪܘܼܢ ܣܲܓ̇ܝܼ̈ܐܹܐ: ܘܢܸܚܛܘܿܢ ܚܲܛܵܝܹ̈ܐ: ܘܠܵܐ ܢܸܣܬܲܟ̇ܠܘܼܢ ܟܠܗܘܿܢ ܚܲܛܵܝܹ̈ܐ: ܥܵܒ̣ܕܲܝ̈ ܛܵܒ̣ܵܬ̣ܵܐ ܕܹܝܢ ܢܸܣܬܲܟ̇ܠܘܼܢ.

¹¹ܘܡ̣ܢ ܙܲܒ̣ܢܵܐ ܕܢܸܥܒܲܪ ܩܘܼܪܒܵܢܵܐ: ܬܸܬ̣̱ܝܼܗܸܒ̣ ܛܲܢܦܘܼܬ̣ܵܐ ܠܲܚܒ̣ܵܠܵܐ ܝܵܘܡ̈ܝܼܢ ܐܵܠܹܦ ܘܡܲܐܬܹ̇ܝܢ ܘܬܸܫܥܝܼܢ.

¹²ܘܛܘܼܒ̣ܵܘܗܝ ܠܡܲܢ ܕܲܢܣܲܟܸ̇ܐ ܕܢܸܡܛܸܐ ܠܝܵܘܡ̈ܝܼܢ ܐܵܠܹܦ ܘܲܬ̣ܠܵܬ̣ܡܵܐܐ ܘܲܬ̣ܠܵܬ̣ܝܼܢ ܘܚܲܡܫܵܐ.

¹³ܘܐܲܢ̄ܬ̇ ܕܵܢܝܼܐܹܝܠ: ܙܸܠ ܠܩܸܨܵܐ ܢܘܼܚ: ܘܲܬ̣ܩܘܼܡ ܠܙܲܒ̣ܢܵܟ ܠܣܘܿܦ ܝܵܘ̈ܡܵܬ̣ܵܐ.ܟܬ̣ܵܒ̣ܵܐ ܕܫܘܿܫܲܢ ܛܘܼܒ̣ܵܢܝܼܬ̣ܵܐ