Read Aramaic Peshita Daniel 2 Bible Online

Daniel 2 - Aramaic Peshita bible

Daniel 2

¹ܒܲܫܢܲܬ̣ ܬܲܪܬܹ̇ܝܢ ܕܡܲܠܟ̇ܘܼܬܹܗ ܕܲܢܒ̣ܘܼܟܲܕܼܢܵܨܲܪ: ܚ̣ܠܲܡ ܢܒ̣ܘܼܟܲܕܼܢܵܨܲܪ ܚܸܠܡܵܐ: ܘܐܸܫܬܲܢܝܲܬ̤ ܪܘܼܚܹܗ: ܘܫܸܢܬܹܗ ܗܘ̤ܵܬ̣ ܥܠܵܘܗܝ

²ܘܐܸܡܲܪ ܡܲܠܟܵܐ ܠܡܸܩܪܵܐ ܠܚܲܪ̈ܫܹܐ: ܘܠܵܐܫܘܿܦܹ̈ܐ: ܘܠܲܡܓ̣ܘܼܫܹ̈ܐ: ܘܲܠܟܲܠܕܵܝܹ̈ܐ: ܠܲܡܚܵܘܵܝܘܼ ܠܡܲܠܟܵܐ ܚܸܠܡܹܗ: ܘܐܸܬ̣ܵܘ ܘܩܵܡ̣ܘ ܩܕܼܵܡ ܡܲܠܟܵܐ.

³ܘܐܸܡܲܪ ܠܗܘܿܢ ܡܲܠܟܵܐ: ܚܸܠܡܵܐ ܚܙܹ̇ܝܬ̣: ܘܐܸܫܬܲܢܝܲܬ̤ ܪܘܼܚܝ ܠܡܸܕ̇ܥܹܗ ܠܚܸܠܡܵܐ.

⁴ܘܡܲܠܸܠ̣ܘ ܟܲܠܕܵܝܹ̈ܐ ܩܕܼܵܡ ܡܲܠܟܵܐ ܐܲܪܡܵܐܝܼܬ̣: ܘܐܵܡ̇ܪܝܼܢ: ܡܲܠܟܵܐ ܠܥܵܠܲܡ ܚܝܝܼ: ܐܸܡܲܪ ܚܸܠܡܵܐ ܠܥܲܒ̣ܕܲܝ̈ܟ: ܘܦܫܵܪܹܗ ܚܢܲܢ ܚܵܝܘܸܐ.

⁵ܥܢ̣ܵܐ ܡܲܠܟܵܐ ܘܐܸܡܲܪ ܠܟܲܠܕܵܝܹ̈ܐ: ܫܲܪܝܼܪܵܐ ܗ̄ܝܼ ܡܸܠܬ̣ܵܐ ܕܐܸܡ̇ܪܹܬ̣: ܕܐܸܢ ܠܵܐ ܬܚܵܘܘܿܢܵܢܝ ܚܸܠܡܵܐ ܘܲܦܫܵܪܹܗ: ܗܲܕܵܡ ܬܸܬ̣ܦܲܣܩܘܼܢ: ܘܒ̣ܵܬܲܝ̈ܟ̇ܘܿܢ ܢܸܬ̣ܒܲܙܙܘܿܢ.

⁶ܐܸܢ ܕܹܝܢ ܚܸܠܡܵܐ ܘܲܦܫܵܪܹܗ ܬܚܵܘܘܿܢܵܢܝ: ܡܵܘ̈ܗܒ̣ܵܬ̣ܵܐ ܘܥܘܼܬ̣ܪܵܐ ܘܐܝܼܩܵܪܵܐ ܣܲܓ̇ܝܼܵܐܐ ܬܩܲܒܠܘܼܢ ܡܹܢܝ: ܒܲܠܚܘܿܕܼ ܚܸܠܡܵܐ ܘܲܦܫܵܪܹܗ ܚܵܘܵܐܘܼܢܝ.

⁷ܥ̣ܢܵܘ ܬܘܼܒ̣ ܘܐܵܡ̇ܪܝܼܢ ܠܹܗ: ܡܲܠܟܵܐ ܚܸܠܡܵܐ ܢܹܐܡܲܪ ܠܥܲܒ̣ܕܵܘ̈ܗܝ: ܘܲܦܫܵܪܹܗ ܚܢܲܢ ܢܚܵܘܸܐ.

⁸ܥܢ̣ܵܐ ܡܲܠܟܵܐ ܘܐܸܡܲܪ: ܫܲܪܝܼܪܵܐܝܼܬ̣ ܝܵܕܲܥ̇ ܐ̄ܢܵܐ ܕܙܲܒ̣ܢܵܐ ܗ̄ܘܼ ܫܵܐ̇ܠܝܼܢ ܐ̄ܢܬ̇ܘܿܢ: ܡܸܛܠ ܕܲܚ̣ܙܲܝܬ̇ܘܿܢ ܕܫܲܪܝܼܪܵܐ ܗ̄ܝܼ ܡܸܠܲܬܝ.

⁹ܕܐܸܢ ܚܸܠܡܵܐ ܠܵܐ ܬܚܵܘܘܿܢܵܢܝ: ܚܕܼܵܐ ܗ̄ܝܼ ܕܵܬ̣ܟ̣ܘܿܢ: ܘܡܸܠܬ̣ܵܐ ܟܲܕܵܒ̣ܬ̣ܵܐ ܘܲܣܪܝܼܩܬܵܐ ܐܸܬ̣ܪܲܥܝܼܬ̇ܘܿܢ ܠܡܹܐܡܲܪ ܩܕܼܵܡܲܝ: ܥܲܕܼ ܙܲܒ̣ܢܵܐ ܢܸܥܒܲܪ. ܐܸܠܵܐ ܚܸܠܡܵܐ ܐܸܡܲܪܘ ܠܝܼ: ܕܐܸܕܲܥ ܕܐܵܦ ܦܫܵܪܹܗ ܡܚܵܘܹܝܢ ܐ̄ܢܬ̇ܘܿܢ ܠܝܼ.

¹⁰ܥܢ̣ܵܘ ܟܲܠܕܵܝܹ̈ܐ ܘܐܵܡ̇ܪܝܼܢ ܩܕܼܵܡ ܡܲܠܟܵܐ: ܠܲܝܬ̇ ܐ̄ܢܵܫ ܥܲܠ ܐܲܪܥܵܐ ܕܡܸܠܲܬ̣ ܡܲܠܟܵܐ ܡܸܫܟܲܚ ܠܲܡܚܵܘܵܝܘܼ: ܐܵܦܠܵܐ ܡ̣ܢ ܡܬ̣ܘܿܡ ܡܠܸܟ ܪܲܒ̇ ܘܫܲܠܝܼܛ ܡܸܠܬ̣ܵܐ ܐܲܝܟ ܗܵܕܹܐ ܫܲܐܸܠ: ܠܟ̣ܠ ܚܲܪܵܫ ܘܐܵܫܘܿܦ ܘܟܲܠܕܼܵܝ.

¹¹ܘܡܸܠܬ̣ܵܐ ܕܡܲܠܟܵܐ ܫܲܐܸܠ ܝܲܩܝܼܪܵܐ ܗ̄ܝܼ: ܘܐ̄ܢܵܫ ܠܲܝܬ̇ ܕܲܢܚܵܘܹܝܗ̇ ܩܕܼܵܡ ܡܲܠܟܵܐ: ܐܸܠܵܐ ܐܸܢ ܐܲܠܵܗ̈ܝܼܢ ܕܠܲܝܬ̇ ܡܲܥܡܲܪܗܘܿܢ ܥܲܡ ܒܢܲܝ̈ ܒܸܣܪܵܐ.

¹²ܗܵܝܕܹ̇ܝܢ ܡܲܠܟܵܐ ܐܸܬ̣ܚܲܡܲܬ̣ ܪܵܘܪܒ̣ܵܐܝܼܬ̣: ܘܲܒ̣ܪܘܼܓ̣ܙܵܐ ܣܲܓ̇ܝܼܵܐܐ ܐܸܡܲܪ: ܠܡܵܘܒܵܕܼܘܼ ܠܟ̣ܠܗܘܿܢ ܚܲܟ̇ܝܼܡܹ̈ܐ ܕܒ̣ܵܒܹܠ.

¹³ܘܦܘܼܩܕܵܢܵܐ ܢܦܲܩ̣ ܘܚܲܟ̇ܝܼܡܹ̈ܐ ܡܸܬ̣ܩܲܛܠܝܼܢ: ܘܲܒ̣ܥܵܘ ܕܢܸܩܛܠܘܼܢ ܠܕܵܐܢܝܼܐܹܝܠ ܘܲܠܚܲܒ̣ܪ̈ܵܘܗܝ.

¹⁴ܗܵܝܕܹ̇ܝܢ ܕܵܢܝܼܐܹܝܠ ܐܸܬ̣ܪܲܥܝܼ ܘܐܸܬܡܲܠܲܡ: ܘܐܸܡܲܪ ܠܐܵܪܝܼܘܿܟ ܪܲܒ̇ ܕܲܚܫܹ̈ܐ ܕܡܲܠܟܵܐ: ܗܵܘܿ ܕܲܢܦܲܩ̣ ܠܲܡܩܲܛܵܠܘܼ ܠܚܲܟ̇ܝܼܡܹ̈ܐ ܕܒ̣ܵܒܹܠ.

¹⁵ܥܲܠ ܡܵܢܵܐ ܗܵܢܵܐ ܦܘܼܩܕܵܢܵܐ ܡܲܚܨܲܦ ܡ̣ܢ ܩܕܼܵܡ ܡܲܠܟܵܐ: ܘܲܓ̣ܠܵܗ̇ ܡܸܠܬ̣ܵܐ ܐܵܪܝܼܘܿܟ ܠܕܼܵܐܢܝܼܐܹܝܠ.

¹⁶ܘܕܵܢܝܼܐܹܝܠ ܒܥ̣ܵܐ ܡ̣ܢ ܡܲܠܟܵܐ ܕܙܲܒ̣ܢܵܐ ܢܸܬܸ̇ܠ ܠܹܗ: ܘܦܫܵܪܵܐ ܠܡܲܠܟܵܐ ܢܚܵܘܸܐ.

¹⁷ܗܵܝܕܹ̇ܝܢ ܕܵܢܝܼܐܹܝܠ ܠܒܲܝܬܹ̇ܗ ܐܸܙܲܠ: ܘܲܠܚܲܢܲܢܝܵܐ: ܘܲܠܡܝܼܫܵܐܝܹܠ: ܘܲܠܥܲܙܲܪܝܵܐ ܚܲܒ̣ܪ̈ܵܘܗܝ: ܡܸܠܬ̣ܵܐ ܗܵܕܹܐ ܓܠ̣ܵܐ.

¹⁸ܕܢܸܒ̣ܥܘܿܢ ܪ̈ܲܚܡܹܐ ܡ̣ܢ ܩܕܼܵܡ ܐܲܠܵܗܵܐ ܕܲܫܡܲܝܵܐ ܥܲܠ ܐ̄ܪܵܙܵܐ ܗܵܢܵܐ: ܕܠܵܐ ܢܹܐܒ̣ܕ̇ܘܼܢ ܕܵܢܝܼܐܹܝܠ ܘܚܲܒ̣ܪ̈ܵܘܗܝ ܥܲܡ ܫܲܪܟܵܐ ܕܚܲܟ̇ܝܼܡܹ̈ܐ ܕܒ̣ܵܒܹܠ.

¹⁹ܗܵܝܕܹ̇ܝܢ ܠܕܼܵܢܝܼܐܹܝܠ ܒܚܸܙܘܵܐ ܕܠܸܠܝܵܐ ܐ̄ܪܵܙܵܐ ܐܸܬ̣ܓ̇ܠܝܼ: ܘܕܼܵܢܝܼܐܹܝܠ ܒܲܪܸܟ ܠܐܲܠܵܗܵܐ ܕܲܫܡܲܝܵܐ.

²⁰ܥܢ̣ܵܐ ܕܵܢܝܼܐܹܝܠ ܘܐܸܡܲܪ: ܢܸܗܘܹܐ ܫܡܹܗ ܕܡܵܪܝܵܐ ܡܒܲܪܲܟ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ: ܕܚܸܟ̣ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ ܕܝܼܠܹܗ ܗ̄ܝܼ.

²¹ܘܗ̤ܘ ܡܚܲܠܸܦ ܙܲܒ̣ܢܹ̈ܐ ܘܥܸܕܵܢܹ̈ܐ: ܡܲܥܒܲܪ ܡܲܠܟ̇ܝܼ̈ܢ ܘܲܡܩܝܼܡ ܡܲܠܟ̇ܝܼ̈ܢ: ܝܵܗܹ̇ܒ̣ ܚܸܟ̣ܡ̱ܬ̣ܵܐ ܠܚܲܟ̇ܝܼܡܹ̈ܐ: ܘܡܲܕ̇ܥܵܐ ܠܝܵܕܼܥܲܝ̈ ܣܘܼܟܵܠܵܐ.

²²ܘܗ̤ܘ ܓܵܠܹ̇ܐ ܥܲܡܝܼ̈ܩܵܬ̣ܵܐ ܘܟܲܣ̈ܝܵܬ̣ܵܐ: ܘܝܵܕܲܥ̇ ܡܵܐ ܕܲܒ̣ܚܸܫܘܿܟ̣ܵܐ: ܘܢܲܗܝܼܪܵܐ ܥܲܡܹܗ ܗ̄ܘܼ.

²³ܠܵܟ ܐܲܠܵܗܵܐ ܕܐܲܒ̣ܵܗܲܝ̈ ܡܵܘܕܹ̇ܐ ܐ̄ܢܵܐ ܘܲܡܫܲܒܲܚ ܐ̄ܢܵܐ: ܕܚܸܟ̣ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ ܝܲܗ̄ܒ̣ܬ̇ ܠܝܼ: ܘܗܵܫܵܐ ܐܵܘܕܼܥ̣ܬܵܢܝ ܕܲܒ̣ܥܲܝܢ ܡܸܢܵܟ: ܘܡܸܠܲܬ̣ ܡܲܠܟܵܐ ܐܵܘܕܲܥ̣ܬܵܢܝ.

²⁴ܘܒ̣ܵܗ̇ ܒܫܵܥܬ̣ܵܐ ܥܲܠ ܕܵܢܝܼܐܹܝܠ ܠܘܵܬ̣ ܐܵܪܝܼܘܿܟ: ܗܵܘܿ ܕܲܦܩܲܕܼ ܠܹܗ ܡܲܠܟܵܐ ܠܲܡܩܲܛܵܠܘܼ ܠܚܲܟ̇ܝܼܡܹ̈ܐ ܕܒ̣ܵܒܹܠ: ܘܐܸܙܲܠ ܘܗܵܟܲܢܵܐ ܐܸܡܲܪ ܠܹܗ: ܠܚܲܟ̇ܝܼܡܹ̈ܐ ܕܒ̣ܵܒܹܠ ܠܵܐ ܬܵܘܒܸ̇ܕܼ: ܐܸܠܵܐ ܐܲܥܸܠܲܝܢܝ ܩܕܼܵܡ ܡܲܠܟܵܐ: ܘܲܦܫܵܪܵܐ ܠܡܲܠܟܵܐ ܐܹܚܵܘܸܐ.

²⁵ܗܵܝܕܹ̇ܝܢ ܐܵܪܝܼܘܿܟ ܚܦܝܼܛܵܐܝܼܬ̣ ܐܲܥ̣ܠܹܗ ܠܕܼܵܢܝܼܐܹܝܠ ܩܕܼܵܡ ܡܲܠܟܵܐ: ܘܐܸܡܲܪ ܠܹܗ: ܐܸܫܟ̇ܚܹ̇ܬ̣ ܓܲܒ̣ܪܵܐ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼܵܐ: ܕܲܦܫܵܪܵܐ ܠܡܲܠܟܵܐ ܢܘܕܲܥ.

²⁶ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ ܕܲܫܡܹܗ ܒܹܠܛܫܵܨܲܪ: ܡܸܫܟܲܚ ܐܲܢ̄ܬ̇ ܠܲܡܚܵܘܵܝܘܼܬܲܢܝ: ܚܸܠܡܵܐ ܕܲܚܙܹ̇ܝܬ̣ ܘܲܦܫܵܪܹܗ.

²⁷ܥܢ̣ܵܐ ܕܵܢܝܼܐܹܝܠ ܘܐܸܡܲܪ ܩܕܼܵܡ ܡܲܠܟܵܐ: ܐ̄ܪܵܙܵܐ ܕܡܲܠܟܵܐ ܫܵܐܹ̇ܠ: ܠܵܐ ܚܲܟ̇ܝܼܡܹ̈ܐ: ܘܠܵܐ ܡܓ̣ܘܼܫܹ̈ܐ: ܘܠܵܐ ܚܲܪ̈ܵܫܹܐ: ܘܠܵܐ ܐ̄ܫܘܿܦܹ̈ܐ: ܡܸܫܟ̇ܚܝܼܢ ܠܲܡܚܵܘܵܝܘܼ ܠܡܲܠܟܵܐ.

²⁸ܐܸܠܵܐ ܐܝܼܬ̣ ܐܲܠܵܗܵܐ ܕܲܫܡܲܝܵܐ ܓܵܠܹ̇ܐ ܐ̄ܪ̈ܵܙܹܐ: ܕܢܵܘܕܲܥ ܠܡܲܠܟܵܐ ܢܒ̣ܘܼܟܲܕܼܢܲܨܲܪ ܡܵܐ ܕܢܸܗܘܹܐ ܒܝܵܘ̈ܡܵܬ̣ܵܐ ܐ̄ܚܪ̈ܵܝܹܐ: ܚܸܠܡܵܟ ܘܚܸܙܘܵܐ ܕܪܹܫܵܟ ܕܥܲܠ ܡܲܫܟ̇ܒ̣ܵܟ ܗܵܢܵܘ.

²⁹ܐܲܢ̄ܬ̇ ܡܲܠܟܵܐ ܡܲܚܫ̈ܒ̣ܵܬ̣ܵܟ ܥܲܠ ܠܸܒܵܟ ܣܠܸܩ̣: ܥܲܠ ܡܵܐ ܕܢܸܗܘܹܐ ܒܲܐ̄ܚܪܵܝܬܵܐ: ܘܓܹܠܹ̇ܐ ܐ̄ܪ̈ܵܙܹܐ ܐܵܘܕ̇ܥܵܟ ܡܵܐ ܕܢܸܗܘܹܐ.

³⁰ܘܐܸܢܵܐ ܠܵܐ ܗ̄ܘܼܵܐ ܡܸܛܠ ܕܐܝܼܬ̣ ܒܝܼ ܚܸܟ̣ܡ̱ܬ̣ܵܐ ܝܲܬ̇ܝܼܪ ܡ̣ܢ ܟܠܗܘܿܢ ܚܲܝܹ̈ܐ ܐܸܬ̣ܓ̇ܠܝܼ ܠܝܼ ܐ̄ܪܵܙܵܐ ܗܵܢܵܐ: ܐܸܠܵܐ ܡܸܛܠ ܕܲܦܫܵܪܵܐ ܢܸܬ̣̱ܝܼܕܲܥ ܠܡܲܠܟܵܐ: ܘܡܸܕܸ̇ܡ ܕܐܸܬ̣ܚܲܫܲܒ̣ܬ̇ ܒܠܸܒܵܟ ܬܸܕܲܥ.

³¹ܐܲܢ̄ܬ̇ ܡܲܠܟܵܐ ܚܵܙܹ̇ܐ ܗ̄ܘܲܝܬ̇: ܘܗܵܐ ܨܲܠܡܵܐ ܚܲܕܼ ܪܲܒܵܐ: ܕܛܵܒ̣ ܙܝܼܘܹܗ ܝܲܬܝܼܪ ܘܩܵܐܹ̇ܡ ܠܩܘܼܒ̣ܠܵܟ: ܚܸܙܘܹܗ ܕܚܝܼܠ.

³²ܪܹܫܹܗ ܕܕܲܗܒ̣ܵܐ ܛܵܒ̣ܵܐ: ܚܲܕܼܝܹܗ ܘܲܕܼܪ̈ܵܥܵܘܗܝ ܕܣܹܐܡܵܐ: ܟܲܪܣܹܗ ܘܥܲܛܡܵܬܹ̈ܗ ܕܲܢܚܵܫܵܐ.

³³ܫܵܩܵܘ̈ܗܝ ܕܦܲܪܙܠܵܐ: ܪܸ̈ܓ̣ܠܵܘܗܝ ܡܸܢܗܹܝܢ ܕܦܲܪܙܠܵܐ ܘܡܸܢܗܹܝܢ ܕܚܸܨܦܵܐ.

³⁴ܘܲܚ̣ܙܲܝܬ̇ ܕܐܸܬ̣ܓܲܙܪܲܬ̤ ܟܹܐܦܵܐ ܕܠܵܐ ܒܐܝܼ̈ܕܝܼܢ: ܘܲܡܚܵܬܹܗ ܠܨܲܠܡܵܐ ܥܲܠ ܪܸ̈ܓ̣ܠܵܘܗܝ ܕܦܲܪܙܠܵܐ ܘܲܕܼܚܸܨܦܵܐ: ܘܕܲܩܩܲܬ̤ ܐܸܢܹܝܢ ܛܵܒ̣.

³⁵ܘܐܸܬ̣ܕ̇ܩܸܩܘ ܐܲܟ̣ܚ̄ܕܼܵܐ ܕܦܲܪܙܠܵܐ: ܘܲܢܚܵܫܵܐ: ܘܚܸܨܦܵܐ: ܘܣܹܐܡܵܐ: ܘܕܲܗܒ̣ܵܐ: ܘܲܗܘ̤ܵܘ ܐܲܝܟ ܥܘܼܪܵܐ ܕܡ̣ܢ ܐܸܟ̇ܪܵܐ ܕܩܲܝܛܵܐ: ܘܢܸܣܒܲܬ̤ ܐܸܢܘܿܢ ܪܘܼܚܵܐ ܬܲܩܝܼܦܬܵܐ: ܘܐܲܬܲܪ ܠܵܐ ܐܸܫܬ̇ܟܲܚ ܠܗܘܿܢ: ܘܟܹܐܦܵܐ ܕܲܡܚܵܬܹܗ ܠܨܲܠܡܵܐ: ܗܘ̤ܵܬ̣ ܠܛܘܼܪܵܐ ܪܲܒܵܐ: ܘܲܡܠܵܬ̤ ܡܸܢܵܗ̇ ܟܠܵܗ̇ ܐܲܪܥܵܐ.

³⁶ܗܵܢܵܘ ܚܸܠܡܵܐ: ܘܲܦܫܵܪܹܗ ܐܹܡܲܪ ܩܕܼܵܡ ܡܲܠܟܵܐ.

³⁷ܐܲܢ̄ܬ̇ ܡܲܠܟܵܐ ܡܠܸܟ ܟܲܠ̈ܟܹ̇ܐ: ܐܲܠܵܗܵܐ ܡܪܲܝܡܵܐ: ܡܲܠܟ̇ܘܼܬ̣ܵܐ ܚܲܣܝܼܢܬܵܐ ܘܐܝܼܩܵܪܵܐ ܝܲܗ̄ܒ̣ ܠܵܟ.

³⁸ܘܟ̣ܠ ܐܲܬܲܪ ܕܥܵܡܘܿܪܝܼܢ ܒܹܗ ܒܢܲܝ̈ܢܵܫܵܐ: ܘܦܵܪܲܚܬ̣ܵܐ ܕܲܫܡܲܝܵܐ ܘܚܲܝ̄ܘܬ̣ܵܐ ܕܕܲܒ̣ܪܵܐ ܝܲܗ̄ܒ̣ ܒܐܝܼܕܲܝ̈ܟ: ܘܐܲܫ̱ܠܛܵܟ ܥܲܠ ܟܠܗܘܿܢ: ܐܲܢ̄ܬ̇ܘܼ ܪܹܫܵܐ ܕܕܲܗܒ̣ܵܐ.

³⁹ܘܒ̣ܵܬ̣ܪܵܟ ܬܩܘܼܡ ܡܲܠܟ̇ܘܼܬ̣ܵܐ ܐ̄ܚܪܹܬ̣ܵܐ ܕܡܲܟ̇ܝܼܟ̣ܵܐ ܡܸܢܵܟ: ܘܡܲܠܟ̇ܘܼܬ̣ܵܐ ܐ̄ܚܪܹܬܵܐ ܕܲܬ̣ܠܵܬ̣ ܕܐܝܼܬܹܝܗ̇ ܢܚܵܫܵܐ: ܬܸܫܠܲܛ ܒܟ̣ܠܵܗ̇ ܐܲܪܥܵܐ.

⁴⁰ܘܡܲܠܟ̇ܘܼܬ̣ܵܐ ܪܒ̣ܝܼܥܵܝܬܵܐ ܬܸܗܘܹܐ ܚܲܣܝܼܢܵܐ ܐܲܝܟ ܦܲܪܙܠܵܐ: ܘܐܲܝܟ ܕܦܲܪܙܠܵܐ ܐܵܪܹܫ ܘܲܡܕܲܩܸܩ ܟܠ: ܗܵܟܲܢܵܐ ܐܵܦ ܗ̤ܝ ܬܸܫܚܘܿܩ ܬܸܟ̣ܒ̇ܘܿܫ ܟܠ.

⁴¹ܘܕܲܚ̣ܙܲܝܬ̇ ܪܸ̈ܓ̣ܠܹܐ ܘܨܸܒ̣̈ܥܵܬ̣ܵܐ: ܕܡܸܢܗܹܝܢ ܕܚܸܨܦܵܐ ܕܦܲܚܵܪܵܐ: ܘܡܸܢܗܹܝܢ ܕܦܲܪܙܠܵܐ: ܡܲܠܟ̇ܘܼܬ̣ܵܐ ܬܸܗܘܹܐ ܦܠܝܼܓ̣ܵܐ: ܘܡ̣ܢ ܥܸܩܵܪܵܐ ܕܦܲܪܙܠܵܐ ܢܸܗܘܹܐ ܒܵܗ̇: ܐܲܝܟܲܢܵܐ ܕܲܚܙܲܝܬ̇ ܦܲܪܙܠܵܐ ܕܲܡܚܲܠܲܛ ܒܚܸܨܦܵܐ ܕܛܝܼܢܵܐ.

⁴²ܘܨܸܒ̣̈ܥܵܬ̣ܵܐ ܕܪܸ̈ܓ̣ܠܹܐ ܕܲܚܙܲܝܬ̇: ܕܡܸܢܗܘܿܢ ܕܦܲܪܙܠܵܐ ܘܡܸܢܗܹܝܢ ܕܚܸܨܦܵܐ: ܡܸܢܵܗ̇ ܡ̣ܢ ܡܲܠܟ̇ܘܼܬ̣ܵܐ ܬܸܗܘܹܐ ܥܲܫܝܼܢܵܐ: ܘܡܸܢܵܗ̇ ܬܸܗܘܹܐ ܬܒ̣ܝܼܪܵܐ.

⁴³ܘܕܲܚܙ̣ܲܝܬ̇ ܦܲܪܙܠܵܐ ܕܲܡܚܲܠܲܛ ܒܚܸܨܦܵܐ ܕܛܝܼܢܵܐ: ܗܵܟܲܢܵܐ ܢܸܬ̣ܚܲܠܛܘܼܢ ܒܲܙܪܲܥ ܐ̄ܢܵܫܵܐ: ܘܠܵܐ ܢܸܗܘܘܿܢ ܕܵܒ̣ܩ̇ܝܼܢ ܚܲܕܼ ܠܚܲܕܼ: ܐܲܝܟ ܦܲܪܙܠܵܐ ܕܠܵܐ ܡܸܬ̣ܚܲܠܲܛ ܥܲܡ ܛܝܼܢܵܐ.

⁴⁴ܘܲܒ̣ܝܵܘ̈ܡܵܬ̣ܗܘܿܢ ܕܡܲܠ̈ܟܹ̇ܐ ܗܵܢܘܿܢ: ܢܩܝܼܡ ܐܲܠܵܗ ܫܡܲܝܵܐ: ܡܲܠܟ̇ܘܼܬ̣ܵܐ ܕܲܠܥܵܠܡܝܼܢ: ܠܵܐ ܬܸܬ̣ܚܲܒܲܠ: ܘܡܲܠܟ̇ܘܼܬ̣ܵܐ ܠܥܲܡܵܐ ܐ̄ܚܪܹܢܵܐ ܠܵܐ ܬܸܫܒ̇ܘܿܩ: ܐܸܠܵܐ ܬܕܲܩܸܩ ܘܲܬ̣ܣܝܼܦ ܟܠܗܹܝܢ ܡܲܠܟ̇ܘܵܬ̣ܵܐ ܗܵܠܹܝܢ: ܘܗ̤ܝ ܬܩܘܼܡ ܠܥܵܠܡܝܼܢ.

⁴⁵ܐܲܝܟܲܢܵܐ ܕܲܚܙܲܝܬ̇ ܕܡ̣ܢ ܛܘܼܪܵܐ ܐܸܬ̣ܓܲܙܪܲܬ̤ ܟܹܐܦܵܐ ܕܠܵܐ ܒܐܝܼܕܼܝܼ̈ܢ: ܘܕܲܩܩܲܬ̤ ܦܲܪܙܠܵܐ: ܘܲܢܚܵܫܵܐ: ܘܚܸܨܦܵܐ: ܘܣܹܐܡܵܐ ܘܕܲܗܒ̣ܵܐ: ܐܲܠܵܗܵܐ ܪܲܒܵܐ ܐܵܘܕ̇ܥܵܟ ܡܵܐ ܕܢܸܗܘܹܐ ܒܝܵܘ̈ܡܵܬܵܐ ܐ̄ܚܪ̈ܵܝܹܐ: ܫܲܪܝܼܪ ܚܸܠܡܵܐ ܘܲܡܗܲܝܡܲܢ ܦܫܵܪܹܗ.

⁴⁶ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܢܦܲܠ̣ ܥܲܠ ܐܵܦܵܘ̈ܗܝ: ܠܕܼܵܐܢܝܼܐܹܝܠ ܝܓܸܕܼ: ܘܒܸܣܡ̈ܝܼܢ ܘܩܘܼܪ̈ܒܵܢܝܼܢ ܐܸܡܲܪ ܠܲܡܩܲܪܵܒ̣ܘܼ ܠܹܗ.

⁴⁷ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܒܩܘܼܫܬܵܐ ܐܲܠܵܗܟ̣ܘܿܢ ܗ̤ܘܝܘܼ ܐܲܠܵܗ ܐܲܠܵܗ̈ܝܼܢ: ܘܡܵܪܹܐ ܡܲܠܟ̇ܝܼ̈ܢ: ܘܓ̣ܵܠܹ̇ܐ ܐ̄ܪ̈ܵܙܝܼܢ: ܕܐܸܫ̣ܟܲܚܬ̇ ܠܡܸܓ̣ܠܵܐ ܐ̄ܪܵܙܵܐ ܗܵܢܵܐ.

⁴⁸ܗܵܝܕܹ̇ܝܢ ܡܲܠܟܵܐ ܐܵܘܪܸܒ̣ ܠܕܼܵܢܝܼܐܹܝܠ: ܘܡܵܘ̈ܗܒ̣ܵܬ̣ܵܐ ܣܲܓ̇ܝܼܵܐ̈ܬ̣ܵܐ ܝܲܗ̄ܒ̣ ܠܹܗ: ܘܐܲܫ̱ܠܛܹܗ ܥܲܠ ܟܠܵܗ̇ ܐܲܪܥܵܐ ܕܒ̣ܵܒܹܠ: ܘܐܲܩܝܼܡܹܗ ܪܹܫܵܐ ܥܲܠ ܟܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܥܲܠ ܟܠܗܘܿܢ ܚܲܟ̇ܝܼܡܹ̈ܐ ܕܒܵܒܹܠ.

⁴⁹ܘܕܼܵܢܝܼܐܹܝܠ ܒܥ̣ܵܐ ܡ̣ܢ ܡܲܠܟܵܐ: ܘܐܲܫܠܸܛ ܥܲܠ ܥܒ̣ܵܕܼܵܐ ܕܲܡܕܼܝܼܢܲܬ̣ ܒܵܒܹܠ: ܠܫܸܕܼܪܵܟ: ܘܡܝܼܫܵܟ: ܘܲܥܒܸܕܼܢܵܓ̣ܘܿ: ܘܕܼܵܢܝܼܐܹܝܠ ܗܘ̤ܵܐ ܒܬ̣ܵܪܥܵܐ ܕܡܲܠܟܵܐ.