Read Aramaic Peshita Daniel 3 Bible Online

Daniel 3 - Aramaic Peshita bible

Daniel 3

¹ܢܒ̣ܘܼܟܲܕܼܢܵܨܲܪ ܡܲܠܟܵܐ: ܥ̣ܒܲܕܼ ܨܲܠܡܵܐ ܚܲܕܼ ܕܕܲܗܒ̣ܵܐ: ܪܵܘܡܹܗ ܐܲܡ̈ܝܼܢ ܫܬ̇ܝܼܢ: ܘܲܦܬ̣ܵܝܹܗ ܐܵܡ̈ܝܼܢ ܫܸܬ̣: ܘܐܲܩܝܼܡܹܗ ܒܦܲܩܥܲܬ̣ ܕܘܿܪܵܐ ܒܐܲܪܥܵܐ ܕܒ̣ܵܒܹܠ.

²ܘܲܢܒ̣ܘܼܟܲܕܼܢܵܨܲܪ ܡܲܠܟܵܐ: ܫܲܕܲܪ ܠܲܡܟܲܢܵܫܘܼ ܠܪ̈ܲܒܲܝ ܚܲܝ̈ܠܹܐ: ܘܲܠܡܵܪ̈ܵܘܵܬ̣ܵܐ: ܘܲܠܫܲܠܝܼܛܵܢܹ̈ܐ: ܘܠܲܐܪ̈ܓ̇ܕܼܵܝܹܐ: ܘܲܠܓܲܪ̈ܒ̇ܕܼܵܝܹܐ: ܘܲܠܬܲܪ̈ܒ̇ܕܼܵܝܹܐ: ܘܲܠܬܸܒ̣ܬܵܝܹ̈ܐ: ܘܲܠܟ̣ܠ ܫܘܼܠܛܵܢ ܡܕܼܝܼ̈ܢܵܬ̣ܵܐ: ܠܡܹܐܬ̣ܵܐ ܠܥܹܐܕܼܵܐ ܕܨܲܠܡܵܐ ܚܲܕܼܬ̣ܵܐ. ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.

³ܗܵܝܕܹ̇ܝܢ ܐܸܬ̣ܟܲܢܲܫܘ ܟܠܗܘܿܢ ܪ̈ܲܒܲܝ ܚܲܝ̈ܠܹܐ ܘܡܵܪ̈ܵܘܵܬ̣ܵܐ ܘܫܲܠܝܼܛܵܢܹ̈ܐ: ܘܐܲܪ̈ܓ̇ܕܼܵܝܹܐ: ܘܓܲܪ̈ܒ̇ܕܼܵܝܹܐ: ܘܬܲܪ̈ܒ̇ܕܼܵܝܹܐ: ܘܬܸܒ̣ܬܵܝܹ̈ܐ: ܘܟ̣ܠ ܫܘܼܠܛܵܢ ܡܕܼܝܼ̈ܢܵܬ̣ܵܐ: ܘܐܸܬ̣ܵܘ ܠܥܹܐܕܼܵܐ ܕܨܲܠܡܵܐ ܚܲܕܼܬ̣ܵܐ ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܩܵܝ̇ܡܝܼܢ ܗ̄ܘܼܵܘ ܠܘܼܩܒܲܠ ܨܲܠܡܵܐ ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.

⁴ܘܟ̣ܵܪܘܿܙܵܐ ܩ̣ܪܵܐ ܒܚܹܝܠ: ܘܐܸܡ̣ܲܪ: ܠܟ̣ܘܿܢ ܐܵܡ̇ܪܝܼܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ.

⁵ܒܫܵܥܬ̣ܵܐ ܕܫܵܡ̇ܥܝܼܢ ܐܢ̄ܬ̇ܘܿܢ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܬܸܦܠܘܼܢ ܘܬܸܣܓ̇ܕܼܘܼܢ ܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.

⁶ܘܡܲܢ ܕܠܵܐ ܢܸܦܸܠ ܢܸܣܓ̇ܘܿܕܼ: ܒܵܗ̇ ܒܫܵܥܬ̣ܵܐ ܢܸܫܬ̇ܕܹܐ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.

⁷ܘܲܒ̣ܫܵܥܬ̣ܵܐ ܕܫܵܡ̇ܥܝܼܢ ܗ̄ܘܼܵܘ ܥܲܡܡܹ̈ܐ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ: ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܢܵܦ̇ܠܝܼܢ ܗ̄ܘܼܵܘ ܟܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ:ܘܣܵܓ̇ܕ̇ܝܼܢ ܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡ ܢܒ̣ܘܼܟܲܕ̇ܢܵܨܲܪ ܡܲܠܟܵܐ.

⁸ܘܒ̣ܵܗ̇ ܒܫܵܥܬ̣ܵܐ ܩ̣ܪܸܒ̣ܘ ܓܲܒ̣ܪܹ̈ܐ ܟܲܠܕܼܵܝܹ̈ܐ: ܘܐܸܟܲܠ̣ܘ ܩܲܪ̈ܨܲܝܗܘܿܢ ܕܲܝܗܘܼ̈ܕܼܵܝܹܐ.

⁹ܘܐܵܡ̇ܪܝܼܢ ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ: ܡܲܠܟܵܐ ܠܥܵܠܲܡ ܚܝܝܼ.

¹⁰ܐܲܢ̄ܬ̇ ܡܲܠܟܵܐ ܦ̣ܩܲܕ̇ܬ̇: ܕܟ̣ܠ ܐ̄ܢܵܫ ܕܢܸܫܡܲܥ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ: ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܢܸܦܸܠ ܘܢܸܣܓ̇ܘܿܕܼ ܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܸܬ̇.

¹¹ܘܡܲܢ ܕܠܵܐ ܢܸܦܸܠ ܘܢܸܣܓ̇ܘܿܕܼ: ܒܵܗ̇ ܒܫܵܥܬ̣ܵܐ ܢܸܫܬ̇ܕܸܐ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.

¹²ܐܝܼܬ̣ ܬܢܵܢ ܓܲܒ̣ܪܹ̈ܐ ܝܗ̄ܘܼ̈ܕܼܵܝܹܐ ܕܐܲܩܝܼܡܸܬ̇ ܐܸܢܘܿܢ ܥܲܠ ܨܸܒ̣̈ܘܵܬ̣ܵܐ ܕܲܡܕܼܝܼܢܲܬ̣ ܒܵܒܹܠ: ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܓܲܒ̣ܪܹ̈ܐ ܗܵܢܘܿܢ ܠܵܐ ܚܲܫܒ̇ܘܿܟ ܡܲܠܟܵܐ: ܘܠܲܐܠܵܗܵܟ ܠܵܐ ܦܵܠܚ̇ܝܼܢ: ܘܲܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܸܬ̇ ܠܵܐ ܣܵܓ̇ܕ̇ܝܼܢ.

¹³ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܒܪܘܼܓ̣ܙܵܐ ܘܲܒ̣ܚܸܡܬ̣ܵܐ ܐܸܡܲܪ: ܠܡܲܝܬܵܝܘܼ ܠܫܸܕܼܪܵܟ ܡܝܼܫܵܟ ܘܲܥ̣ܒܸܕܼܢܵܓ̣ܘܿ: ܘܐܲܝܬ̇ܝܼܘ ܐܸܢܘܿܢ ܩܕܼܵܡ ܡܲܠܟܵܐ.

¹⁴ܥܢ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܘܐܸܡ̣ܲܪ ܠܗܘܿܢ: ܒܩܘܼܫܬܵܐ ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܠܐܲܠܵܗܝ ܠܵܐ ܦܵܠܚܝܼܢ ܐ̄ܢܬ̇ܘܿܢ: ܘܲܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܹ̇ܬ̣ ܠܵܐ ܣܵܓܕ̇ܝܼܢ ܐ̄ܢܬ̇ܘܿܢ.

¹⁵ܗܵܫܵܐ ܐܸܢ ܥܬ̣ܝܼܕܼܝܼܢ ܐ̄ܢܬ̇ܘܿܢ: ܕܲܒ̣ܫܵܥܬ̣ܵܐ ܕܬܸܫ̱ܡܥܘܼܢ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ: ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܬܸܦܠܘܼܢ ܘܬܸܣܓ̇ܕܼܘܼܢ ܠܨܲܠܡܵܐ ܕܥܸܒ̣ܕܹ̇ܬ̣: ܘܐܸܢ ܠܵܐ ܬܸܣܓ̇ܕܼܘܼܢ: ܒܵܗ̇ ܒܫܵܥܬ̣ܵܐ ܬܸܫܬ̇ܕܼܘܿܢ ܠܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ: ܘܡܲܢ̣ܘܼ ܐܲܠܵܗܟ̣ܘܿܢ ܕܲܢܦܲܨܝܼܟ̣ܘܿܢ ܡ̣ܢ ܐܝܼܕܲܝ̈.

¹⁶ܥܢ̣ܵܘ ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܘܐܵܡ̇ܪܝܼܢ ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ: ܠܵܐ ܚܵܫ̇ܚܝܼܢܲܢ ܥܲܠ ܗܵܕܹܐ ܡܸܠܬ̣ܵܐ: ܦܸܬ̣ܓ̣ܵܡܵܐ ܠܲܡܬ̣ܵܒ̣ܘܼܬ̣ܵܟ.

¹⁷ܡܸܛܠ ܕܐܝܼܬ̣ܵܘܗܝ ܐܲܠܵܗܲܢ ܕܲܚܢܲܢ ܦܵܠܚ̇ܝܼܢ ܠܹܗ: ܕܗ̤ܘ ܡܨܸܐ ܒܚܲܝܠܵܐ ܠܲܡܦܲܨܵܝܘܼܬܲܢ ܡ̣ܢ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ: ܘܡ̣ܢ ܐܝܼܕܲܝ̈ܟ ܡܲܠܟܵܐ ܢܫܵܘܙܒܲܢ.

¹⁸ܬܸܗܘܹܐ ܕܹܝܢ ܝܵܕܲܥ̇ ܡܲܠܟܵܐ: ܕܠܲܐܠܵܗܵܟ ܠܵܐ ܦܵܠܚ̇ܝܼܢܲܢ: ܘܲܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܸܬ̇ ܠܵܐ ܣܵܓ̣ܕ̇ܝܼܢ ܚ̄ܢܲܢ.

¹⁹ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ ܐܸܬ̣ܡ̱ܠܝܼ ܚܸܡܬ̣ܵܐ: ܘܙܝܼܘܵܐ ܕܐܲܦܵܘ̈ܗܝ ܐܸܫܬܲܢܝܼ: ܥܲܠ ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܘܐܸܡ̣ܲܪ ܠܡܸܫܓܲܪ ܐܲܬ̇ܘܿܢܵܐ: ܚܲܕܼ ܒܫܲܒ̣ܥܵܐ ܥܲܠ ܡܵܐ ܕܡܸܫܬ̇ܓܲܪ ܗ̄ܘܼܵܐ.

²⁰ܘܲܠܓܲܒ̣ܪܹ̈ܐ ܕܥܲܫܝܼܢܝܼܢ ܒܚܲܝܠܵܐ: ܐܸܡ̣ܲܪ ܕܲܢܦܲܟ̇ܪܘܼܢ ܐܸܢܘܿܢ: ܠܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܘܲܠܡܲܪܡܵܝܘܼ ܐܸܢܘܿܢ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.

²¹ܗܵܝܕܹ̇ܝܢ ܓܲܒ̣ܪܹ̈ܐ ܗܵܢܘܿܢ: ܦܲܟܲܪܘ ܐܸܢܘܿܢ ܒܫܪ̈ܒܵܠܲܝܗܘܿܢ: ܘܲܒ̣ܦܸܛܫܲܝ̈ܗܘܿܢ: ܘܲܒ̣ܢܲܚܬܲܝ̈ܗܘܿܢ: ܘܲܒ̣ܩܘܼܒ̣ܥܲܝ̈ܗܘܿܢ: ܘܐܲܪܡܝܼܘ ܐܸܢܘܿܢ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.

²²ܡܸܛܠ ܕܡܸܠܲܬ̣ ܡܲܠܟܵܐ ܣܲܪܗܒܲܬ̤: ܘܐܲܬ̇ܘܿܢܵܐ ܫܓ̣ܝܼܪ ܗ̄ܘܼܵܐ ܝܲܬ̇ܝܼܪܵܐܝܼܬ̣: ܘܲܠܓܲܒ̣ܪܹ̈ܐ ܗܵܢ̇ܘܿܢ ܕܐܸܟܲܠ̣ܘ ܩܲܪ̈ܨܲܝܗܘܿܢ ܕܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܩܲܛܠܲܬ̤ ܐܸܢܘܿܢ ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܝܵܩܹܕ̇ܬܵܐ.

²³ܘܓܲܒ̣ܪܹ̈ܐ ܗܵܢ̇ܘܿܢ ܬܠܵܬܲܝ̈ܗܘܿܢ: ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܢܦܲܠ̣ܘ ܡܸܨܥܲܬ̣ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ ܟܲܕܼ ܦܟ̣ܝܼܪܝܼܢ.

²⁴ܘܩܵܡ̣ܘ ܗ̄ܘܼܵܘ ܘܲܡܗܲܠܟ̣ܝܼܢ ܒܲܦܟ̣ܵܪ̈ܲܝܗܘܿܢ ܡܸܨܥܲܬ̣ ܫܲܠܗܹܒ̣ܝܼܬ̣ܵܐ ܕܢܘܼܪܵܐ. ܘܲܡܫܲܒ̇ܚܝܼܢ ܗ̄ܘܼܵܘ ܠܐܲܠܵܗܵܐ ܘܲܡܒܲܪܟ̣ܝܼܢ ܗ̄ܘܼܵܘ ܠܡܵܪܝܵܐ.ܨܠܘܬܐ ܕܚܢܢܝܐ ܘܕܚܒܪ̈ܘܗܝ

²⁵ܘܩܵܝ̣ܡ ܥܲܙܲܪܝܵܐ ܘܲܦ̣ܬܲܚ ܦܘܼܡܹܗ ܠܲܡܒܲܪܵܟ̣ܘܼ ܡܸܨܥܲܬ̣ ܢܘܼܪܵܐ. ܘܲܦ̣ܬܲܚ ܦܘܼܡܹܗ: ܘܨܲܠܝܼ ܘܐܸܡ̣ܲܪ ܗܵܟܲܢܵܐ.

²⁶ܡܒܲܪܲܟ ܐܲܢ̄ܬ̇ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܘܲܡܪܲܡܪܲܡ ܘܲܡܫܲܒܲܚ ܫܡܵܟ ܠܥܵܠܲܡ.

²⁷ܡܸܛܠ ܕܙܲܕ̇ܝܼܩ ܐܲܢ̄ܬ̇ ܒܟ̣ܠ ܡܵܐ ܕܲܥ̣ܒܲܕ̇ܬ̇ ܠܲܢ. ܘܟ̣ܠܗܘܿܢ ܥܒ̣ܵܕܲܝ̈ܟ ܒܩܘܼܫܬܵܐ ܘܲܬ̣ܪ̈ܝܼܨܵܢ ܐܘܼܪ̈ܚܵܬ̣ܵܟ. ܘܟ̣ܠܗܘܿܢ ܕܝܼܢܲܝ̈ܟ ܡܗܲܝܡܢܝܼܢ.

²⁸ܡܸܛܠ ܕܲܒ̣ܕܼܝܼܢܵܐ ܗ̄ܘܼ ܕܩܘܼܫܬܵܐ ܥ̣ܒܲܕ̇ܬ̇ ܠܲܢ ܒܟ̣ܠܡܵܐ ܕܐܲܝܬ̇ܝܼܬ̇ ܥܠܲܝܢ: ܘܥܲܠ ܡܕܼܝܼܢ̄ܬܵܐ ܩܲܕ̇ܝܼܫܬܵܐ ܕܐܲܒ̣ܵܗܲܝ̈ܢ ܥܲܠ ܐܘܿܪܸܫܠܸܡ. ܡܸܛܠ ܕܲܒ̣ܟܹܐܢܘܼܬ̣ܵܐ ܐܲܝ̣ܬ̇ܝܼܬ̇ ܥܠܲܝܢ ܟܠܗܹܝܢ ܗܵܠܹܝܢ.

²⁹ܡܸܛܠ ܚܵܘ̈ܒܲܝܢ ܕܲܚ̣ܛܲܝܢ ܘܐܲܪܫܲܥ̣ܢ ܩܕܼܵܡܲܝܟ. ܘܐܲܪܚܸܩ̣ܢ ܡܸܢܵܟ: ܘܲܥ̣ܒܲܪܢ ܥܲܠ ܡܹܐܡܪܵܟ. ܘܲܚ̣ܛܲܝܢ ܠܵܟ ܒܟ̣ܠ.

³⁰ܘܲܠܦܘܼܩܕܵܢܲܝ̈ܟ ܠܵܐ ܫ̣ܡܲܥܢ. ܘܠܵܐ ܢ̣ܛܲܪܢ ܘܠܵܐ ܥ̣ܒܲܕܼܢ ܐܲܝܟ ܡܸܕܸ̇ܡ ܕܦܲܩܸܕ̇ܬܵܢ ܕܢܸܛܐܲܒ̣ ܠܲܢ.

³¹ܘܟ̣ܠ ܡܸܕܸ̇ܡ ܕܐܲܝܬ̇ܝܼܬ̇ ܥܠܲܝܢ ܘܟ̣ܠܡܸܕܸ̇ܡ ܕܲܥ̣ܒܲܕ̇ܬ̇ ܠܲܢ. ܒܕܼܝܼܢܵܐ ܗ̄ܘܼ ܟܹܐܢܵܐ ܥ̣ܒܲܕ̇ܬ̇ ܠܲܢ.

³²ܘܐܲܫܠܸܡ̣ܬܵܢ ܒܐܝܼܕܼܵܐ ܕܲܒ̣ܥܸܠܕ̇ܒ̣ܵܒܲܝ̈ܢ ܥܵܘܿܠܹ̈ܐ ܕܪܲܚܝܼܩܝܼܢ ܡܸܢܵܟ. ܘܲܠܡܵܪܘܼܬ̣ܵܐ ܕܡܲܠܟ̇ܘܼܬ̣ܵܐ ܪܲܫܝܼܥܬܵܐ. ܕܒ̣ܝܼܫܵܐ ܡ̣ܢ ܟܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ.

³³ܘܗܵܫܵܐ ܡܵܪܝܵܐ ܠܲܝܬ̇ ܠܲܢ ܡܲܦ̮ܬܲܚ ܦܘܼܡܵܐ ܩܕܼܵܡܲܝܟ. ܡܸܛܠ ܒܸܗܬ̇ܬ̣ܵܐ ܘܚܸܣܕܵܐ ܕܲܗܘ̤ܵܐ ܠܥܲܒ̣ܕܲܝ̈ܟ ܘܲܠܕܼܵܚܠܲܝ̈ܟ.

³⁴ܠܵܐ ܬܲܫ̱ܠܡܲܢ ܥܕܲܡܵܐ ܠܚܲܪܬ̣ܵܐ ܡܸܛܠ ܫܡܵܟ. ܘܠܵܐ ܬܒܲܛܸܠ ܕܝܵܬܸܩܹܐ ܕܝܼܠܵܟ.

³⁵ܘܠܵܐ ܬܲܪܚܸܩ ܪ̈ܲܚܡܲܝܟ ܘܛܲܝܒ̇ܘܼܬ̣ܵܟ ܡܸܢܲܢ: ܡܸܛܠ ܐܲܒ̣ܪܵܗܵܡ ܪܵܚ̇ܡܵܟ: ܘܡܸܛܠ ܐܝܼܣܚܵܩ ܥܲܒ̣ܕܵܟ: ܘܡܸܛܠ ܝܑܼܣܪܵܝܹܠ ܩܲܕ̇ܝܼܫܵܟ.

³⁶ܕܲܡܠܲܟ̣ܬ̇ ܠܗܘܿܢ ܕܬܲܣܓܹ̇ܐ ܙܲܪ̱ܥܗܘܿܢ ܐܲܝܟ ܟܵܘܟ̇ܒܹ̈ܐ ܕܲܫܡܲܝܵܐ. ܘܐܲܝܟ ܚܵܠܵܐ ܕܥܲܠ ܣܸܦܬܹܗ ܕܝܲܡܵܐ.

³⁷ܡܸܛܠ ܕܗܵܫܵܐ ܡܵܪܝܵܐ: ܐܸܬ̣ܡܲܟܟ̣ܢ ܡ̣ܢ ܟܠܗܘܿܢ ܥܲܡܡܹ̈ܐ. ܘܲܚܢܲܢ ܡܒܲܕ̇ܪܝܼܢܲܢ ܝܵܘܡܵܢܵܐ ܒܟ̣ܠܵܗ̇ ܐܲܪܥܵܐ. ܡܸܛܠ ܚܵܘ̈ܒܲܝܢ ܘܲܚܛܵܗܲܝ̈ܢ.

³⁸ܘܠܵܐ ܐܝܼܬ̣ ܒܙܲܒ̣ܢܵܐ ܗܵܢܵܐ ܠܵܐ ܪܹܫܵܐ ܘܠܵܐ ܫܲܠܝܼܛܵܐ. ܘܠܵܐ ܢܒ̣ܝܼܵܐ ܘܠܵܐ ܡܕܲܒ̇ܪܵܢܵܐ. ܘܠܵܐ ܡܲܕܼܒ̇ܚܵܐ ܘܠܵܐ ܕܸܒ̣ܚܹ̈ܐ ܘܠܵܐ ܩܘܼܪ̈ܒܵܢܹܐ.ܘܠܵܐ ܕܘܼܟ̇ܬ̣ܵܐ ܕܢܲܣܸܩ ܒܸܣܡܹ̈ܐ ܐܵܘ ܕܸܒ̣ܚ̱ܬ̣ܵܐ. ܘܢܸܫܟܲܚ ܚܢܵܢܵܐ ܘܪ̈ܲܚܡܹܐ.

³⁹ܐܸܠܵܐ ܒܠܸܒܵܐ ܫܚܝܼܩܵܐ ܘܲܒ̣ܪܘܼܚܵܐ ܡܲܟ̇ܝܼܟ̣ܬܵܐ ܗܵܐ ܐܸܬ̣ܩܲܪܲܒ̣ܢ ܠܝܲܩܕܵܢܵܐ ܕܢܘܼܪܵܐ.

⁴⁰ܟܲܕܼ ܒܵܥܹ̇ܝܢܲܢ ܕܝܲܬܝܼܪ ܡ̣ܢ ܬܵܘܪܹ̈ܐ ܘܕܸܟ̣ܪܹ̈ܐ: ܘܐܸܡܪܹ̈ܐ ܫܲܡܝܼܢܹ̈ܐ ܣܲܓ̇ܝܼ̈ܐܹܐ: ܗܵܟܲܢܵܐ ܢܸܗܘܹܐ ܩܘܼܪܒܵܢܵܐ ܕܢܲܦ̮ܫܵܢ ܝܵܘܡܵܢܵܐ. ܘܠܵܐ ܢܸܒ̣ܗ̱ܬ̣ܘܼܢ ܥܲܒ̣ܕܲܝ̈ܟ. ܡܸܛܠ ܕܠܵܐ ܒܵܗ̇ܬ̇ܝܼܢ ܐܲܝܠܹܝܢ ܕܲܬ̣ܟ̣ܝܼܠܝܼܢ ܥܠܲܝܟ.

⁴¹ܐܵܦ ܗܵܫܵܐ ܚܢܲܢ ܐܸܬܲܝܢ ܒܵܬ̣ܪܵܟ ܒܠܸܒܵܐ ܫܲܠܡܵܐ. ܘܲܕܼܚܸܠ̣ܢ ܡܸܢܵܟ ܘܐܲܦܲܝ̈ܟ ܒܵܥܹ̇ܝܢܲܢ.

⁴²ܡܵܪܝܵܐ ܠܵܐ ܬܲܒ̣ܗ̄ܬܲܢ. ܐܸܠܵܐ ܥܒܸܕܼ ܥܲܡܲܢ ܐܲܝܟ ܣܘܿܓ̣ܵܐܐ ܕܛܲܝ̈ܒܘܼܬ̣ܵܟ ܘܲܕܼܪ̈ܲܚܡܲܝܟ ܣܲܓ̇ܝܼ̈ܐܹܐ.

⁴³ܘܲܦܪܘܿܩܲܝܢ ܐܲܝܟ ܣܘܿܓ̣ܵܐܐ ܕܬܸܕܼܡܪ̈ܵܬܲܟ. ܘܗܲܒ̣ ܬܸܫܒ̇ܘܿܚܬܵܐ ܠܲܫܡܵܟ ܡܵܪܝܵܐ ܡܸܛܠ ܫܡܵܟ ܪܲܒܵܐ.

⁴⁴ܘܢܸܒ̣ܗ̱ܬ̣ܘܼܢ ܟܠܗܘܿܢ ܐܲܝܠܹܝܢ ܕܐܵܡ̇ܪܝܼܢ ܒܝܼ̈ܫܵܬ̣ܵܐ ܥܲܠ ܥܲܒ̣̈ܕܲܝܟ. ܘܢܸܒ̣ܗ̱ܬ̣ܘܼܢ ܒܟ̣ܠܵܗ̇ ܓܲܢ̄ܒܵܪܘܼܬ̣ܗܘܿܢ. ܘܚܲܝܠܗܘܿܢ ܢܸܫܬ̇ܒܸܩ.

⁴⁵ܘܢܸܕ̇ܥܘܼܢ ܕܐܲܢ̄ܬ̇ ܗ̄ܘܼ ܚܲܕܼ ܐܲܠܵܗܵܐ ܒܲܠܚܘܿܕܲܝܟ ܘܲܡܫܲܒܲܚ ܐܲܢ̄ܬ̇ ܒܟ̣ܠܗܘܿܢ ܥܒ̣ܵܕܲܝ̈ܟ.

⁴⁶ܘܠܵܐ ܫܵܠܹ̇ܝܢ ܗ̄ܘܼܵܘ ܗܵܢ̇ܘܿܢ ܕܡܵܘܩ̄ܕܼܝܼܢ ܗ̄ܘܼܵܘ ܐܲܬ̇ܘܿܢܵܐ ܕܢܘܼܪܵܐ. ܘܫܵܕܼܝܼܢ ܗ̄ܘܼܵܘ ܒܹܗ ܢܸܦ̮ܛܵܐ. ܘܙܸܦ̮ܬܵܐ ܘܟܸܒ̣ܪܝܼܬ̣ܵܐ. ܘܲܩܢܲـ̈ـܝܵܐ. ܘܲܫܒܸܫ̈ܬܹ̇ܐ.

⁴⁷ܘܝܸܗ̄ܒܲܬ̤ ܩܵܠܵܐ ܫܲܠܗܹܒ̣ܝܼܬ̣ܵܐ ܕܢܘܼܪܵܐ. ܘܣܸܠܩܲܬ̤ ܠܥܸܠ ܡ̣ܢ ܐܲܬ̇ܘܿܢܵܐ ܐܲܪܒ̇ܥܝܼܢ ܘܲܬ̣ܫܲܥ ܐܲܡ̈ܝܼܢ.

⁴⁸ܘܲܗܘ̤ܵܬ̣ ܡܵܪܩ̄ܕܼܵܐ ܘܡܵܘܒ̇ܕܼܵܐ ܢܘܼܪܵܐ. ܠܟ̣ܠܡܲܢ ܕܡܸܫܟ̇ܚܵܐ ܚܕܼܵܪܵܘܗܝ ܕܐܲܬ̇ܘܿܢܵܐ. ܡ̣ܢ ܟܲܠܕܼܵܝܹ̈ܐ ܘܐܵܟ̣ܠܲܝ̈ ܩܲܪ̈ܨܹܐ.

⁴⁹ܡܲܠܲܐܟ̣ܵܐ ܕܹܝܢ ܕܛܲܠܵܐ ܢ̣ܚܸܬ̣ ܥܲܡ ܚܲܢܲܢܝܵܐ ܘܥܲܙܲܪܝܵܐ ܘܡܝܼܫܵܐܹܝܠ ܠܓ̣ܵܘ ܐܲܬ̇ܘܿܢܵܐ ܕܢܘܼܪܵܐ. ܘܕܲܚ̣ܩܵܗ̇ ܠܫܲܠܗܹܒ̣ܝܼܬ̣ܵܐ ܕܢܘܼܪܵܐ ܡ̣ܢ ܐܲܬ̇ܘܿܢܵܐ.

⁵⁰ܘܲܥ̣ܒܲܕܼ ܒܲܡܨܲܥܬܹܗ ܕܐܲܬ̇ܘܿܢܵܐ ܐܲܝܟ ܪܘܼܚܵܐ ܕܛܲܠܵܐ. ܘܠܵܐ ܩܸܪܒܲܬ̤ ܠܗܘܿܢ ܢܘܼܪܵܐ ܐܵܦܠܵܐ ܩܠܝܼܠ. ܘܠܵܐ ܐܲܟ̣ܪ̱ܝܲܬ̤ ܠܗܘܿܢ. ܘܠܵܐ ܐܲܠܨܲܬ̤ ܐܸܢܘܿܢ.

⁵¹ܗܵܝܕܹ̇ܝܢ ܬܠܵܬ̣ܲܝ̈ܗܘܿܢ ܡ̣ܢ ܚܲܕܼ ܦܘܼܡܵܐ ܡܫܲܒ̇ܚܝܼܢ ܗ̄ܘܼܵܘ ܘܲܡܒܲܪܟ̣ܝܼܢ ܠܐܲܠܵܗܵܐ ܡ̣ܢ ܓܵܘ ܐܲܢ̄ܬ̇ܘܿܢܵܐ ܕܢܘܼܪܵܐ ܘܐܵܡ̇ܪܝܼܢ.

⁵²ܡܒܲܪܲܟ ܐܲܢ̄ܬ̇ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ. ܡܒܲܪܲܟ ܫܡܵܐ ܕܬܸܫܒ̇ܘܿܚܬܵܟ ܩܲܕ̇ܝܼܫܵܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ

⁵³ܡܒܲܪܸܟ ܐܲܢ̄ܬ̇ ܒܗܲܝܟ̇ܠܵܐ ܕܩܘܼܕܼܫܵܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.

⁵⁴ܡܒܲܪܲܟ ܐܲܢ̄ܬ̇ ܕܚܵܙܹ̇ܐ ܐܲܢ̄ܬ̇ ܬܗܘܿܡܹ̈ܐ. ܘܝܵܬܹ̇ܒ̣ ܐܲܢ̄ܬ̇ ܥܲܠ ܟܪ̈ܘܿܒܹܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.

⁵⁵ܡܒܲܪܲܟ ܬܲܢ̄ܬ̇ ܥܲܠ ܟܘܼܪܣܲܝ ܡܲܠܟ̇ܘܼܬ̣ܵܟ ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.

⁵⁶ܡܒܲܪܲܟ ܐܲܢ̄ܬ̇ ܒܲܪܩܝܼܥܵܐ ܕܲܫܡܲܝܵܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.

⁵⁷ܒܲܪܸܟ̣ܘ ܟܠܗܘܿܢ ܥܒ̣ܵܕܼܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁵⁸ܒܲܪܸܟ̣ܘ ܫܡܲܝܵܐ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁵⁹ܒܲܪܸܟ̣ܘ ܟܠܗܘܿܢ ܡܲܠܲܐܟ̣ܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶⁰ܒܲܪܸܟ̣ܘ ܟܠܗܘܿܢ ܚܲܝ̈ܠܵܘܵܬܹܗ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶¹ܒܲܪܸܟ̣ܘ ܡܲـ̈ـܝܵܐ ܕܲܠܥܸܠ ܡ̣ܢ ܫܡܲܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶²ܒܲܪܸܟ̣ܘ ܫܸܡܫܵܐ ܘܣܲܗܕܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶³ܒܲܪܸܟ̣ܘ ܟܵܘܟ̇ܒܹ̈ܐ ܕܒܲܫܡܲܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶⁴ܒܲܪܸܟ̣ܘ ܡܸܛܪܵܐ ܘܛܲܠܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶⁵ܒܲܪܸܟ̣ܘ ܡܲـ̈ـܝܵܐ ܘܪ̈ܘܼܚܹܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶⁶ܒܲܪܸ̈ܟܸܝܢ ܟܠ ܢܸܫ̈ܡܵܬ̣ܵܐ ܕܙܲܕ̇ܝܼܩܹܐ ܠܡܵܪܝܵܐ: ܫܲܒ̇ܚܵܝ̈ܘܗܝ ܘܪܲܡ̱ܪܡܵܝܗܝ ܠܥܵܠܲܡ.

⁶⁷ܒܲܪܸܟ̣ܘ ܢܘܼܪܵܐ ܘܚܘܼܡܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶⁸ܒܲܪܸܟ̣ܘ ܠܲܝ̈ܠܵܘܵܬ̣ܵܐ ܘܐܝܼܡܵܡܹ̈ܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁶⁹ܒܲܪܸܟ̣ܘ ܢܘܼܗܪܵܐ ܘܚܸܫܘܿܟ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁰ܒܲܪܸܟ̣ܘ ܩܘܼܪܫܵܐ ܘܚܘܼܡܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷¹ܒܲܪܸܟ̣ܘ ܩܲܝܛܵܐ ܘܣܲܬ̣ܘܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷²ܒܲܪܸܟ̣ܘ ܬܲܠܓܵܐ ܘܲܓ̣ܠܝܼܕܼܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷³ܒܲܪܸܟ̣ܘ ܒܲܪ̈ܩܹܐ ܘܲܥܢܵܢܹ̈ܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁴ܒܲܪܸܟ̣ܘ ܟܠܵܗ̇ ܐܲܪܥܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁵ܒܲܪܸܟ̣ܘ ܛܘܼܪܹ̈ܐ ܘܪ̈ܵܡܵܬ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁶ܒܲܪܸܟ̣ܘ ܟܠܗܘܿܢ ܥܘܼܦܝܵܢܹ̈ܐ ܕܐܲܥܪܵܐ ܠܡܵܪܝܵܐ: ܒܲܪܸܟ̣ܘ ܟܠ ܕܨܵܡܲܚ ܥܲܠ ܐܲܪܥܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁷ܒܲܪܸܟ̣ܘ ܝܲܡܡܹ̈ܐ ܘܢܲܗܪ̈ܵܘܵܬ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁸ܒܲܪܸܟ̣ܘ ܡܲܒ̇ܘܼ̈ܥܹܐ ܘܟ̣ܠܗܹܝܢ ܥܲܝ̈ܢܵܬ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁷⁹ܒܲܪܸܟ̣ܘ ܢܘܼܢܹ̈ܐ ܘܟ̣ܠ ܕܪܵܚܹ̇ܫ ܒܡܲـ̈ـܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸⁰ܒܲܪܸܟ̣ܘ ܟܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸¹ܒܲܪܸܟ̣ܘ ܟܠܵܗ̇ ܚܲܝ̄ܘܬ̣ܵܐ ܘܲܒ̣ܥܝܼܪܵܐ ܠܡܵܪܝܵܐ: ܒܲܪܸܟ̣ܘ ܟܠ ܕܪܵܚܹ̇ܫ ܥܲܠ ܐܲܪܥܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸²ܒܲܪܸܟ̣ܘ ܒܢܲܝ̈ܢܵܫܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸³ܒܲܪܸܟ̣ܘ ܕܒܹܝܬ̣ ܝܑܼܣܪܵܝܹܠ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸⁴ܒܲܪܸܟ̣ܘ ܟܵܗܢܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸⁵ܒܲܪܸܟ̣ܘ ܥܲܒ̣ܕܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸⁶ܒܲܪܸ̈ܟܹܝܢ ܟܠܗܹܝܢ ܪ̈ܘܼܚܵܬ̣ܵܐ ܘܢܲܦ̮ܫܵܬ̣ܵܐ ܕܙܲܕ̇ܝܼܩܹ̈ܐ ܠܡܵܪܝܵܐ: ܫܲܒ̇ܚܵܝ̈ܗܝ ܘܪܲܡ̱ܪ̈ܡܵܝܗܝ ܠܥܵܠܲܡ.

⁸⁷ܒܲܪܸܟ̣ܘ ܬܲܡܝܼܡܹ̈ܐ ܘܡܲܟ̇ܝܼ̈ܟܲܝ ܠܸܒܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁸⁸ܒܲܪܸܟ̣ܘ ܚܲܢܲܢܝܵܐ ܘܥܲܙܲܪܝܵܐ ܘܡܝܼܫܵܐܝܹܠ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ. ܡܸܛܠ ܕܫܵܘܙܒܲܢ ܡ̣ܢ ܡܵܘܬܵܐ. ܘܡ̣ܢ ܐܝܼ̈ܕܲܝ ܫܝܘܿܠ ܐܲܚܢܲܢ. ܘܦܲܨܝܲܢ ܡ̣ܢ ܫܲܠܗܹܒ̣ܝܼܬ̣ܵܐ ܕܝܵܩ̇ܕܵܐ. ܘܡ̣ܢ ܡܸܨܥܲܬ̣ ܢܘܼܪܵܐ ܐܲܦ̣ܩܲܢ.

⁸⁹ܐܵܘܕܵܘ ܠܡܵܪܝܵܐ ܕܒܲܣܝܼܡ ܗ̄ܘܼ ܘܲܠܥܵܠܲܡ ܛܲܝܒ̇ܘܼܬܹܗ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.

⁹⁰ܒܲܪܸܟ̣ܘ ܟܠܗܘܿܢ ܕܵܚܠܵܘ̈ܗܝ ܕܐܲܠܵܗܵܐ ܠܐܲܠܵܗܵܐ ܕܐܲܠܵܗܹ̈ܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ. ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘܼ ܘܲܠܥܵܠܲܡ ܛܲܝܒ̇ܘܼܬܹܗ.

⁹¹ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ ܬ̣ܘܲܗ ܘܩ̣ܵܡ ܒܕܸܚ̱ܠܬ̣ܵܐ ܪܲܒ̇ܬ̣ܵܐ: ܘܲܥܢ̣ܵܐ ܘܐܸܡ̣ܲܪ ܠܪܵܘܪ̈ܒ̣ܵܢܵܘܗܝ: ܠܵܐ ܓܲܒ̣ܪܹ̈ܐ ܬܠܵܬ̣ܵܐ ܐܲܪܡܝܼܢ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ ܟܲܕܼ ܦܟ̣ܝܼܪܝܼܢ: ܥܢ̣ܵܘ ܘܐܵܡ̇ܪܝܼܢ ܠܡܲܠܟܵܐ: ܐܹܝܢ ܒܩܘܼܫܬܵܐ ܡܲܠܟܵܐ.

⁹²ܥܢ̣ܵܐ ܡܲܠܟܵܐ ܘܐܸܡ̣ܲܪ ܗܵܐ ܚܵܙܹ̇ܐ ܐ̄ܢܵܐ ܓܲܒ̣ܪܹ̈ܐ ܟܲܕܼ ܫܪܹܝܢ: ܘܲܡܗܲܠܟ̣ܝܼܢ ܒܓ̣ܵܘ ܢܘܼܪܵܐ: ܘܲܚܒ̣ܵܠܵܐ ܠܲܝܬ̇ ܒܗܘܿܢ: ܘܚܸܙܘܹܗ ܕܲܪܒ̣ܝܼܥܵܝܵܐ ܕܵܡܹ̇ܐ ܠܒܲܪ ܐܲܠܵܗ̈ܝܼܢ.

⁹³ܗܵܝܕܹ̇ܝܢ ܩ̣ܪܸܒ̣ ܢܒ̣ܘܼܟܲܕܼܢܵܨܲܪ ܡܲܠܟܵܐ ܠܬܲܪܥܵܐ ܕܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ: ܘܲܥܢ̣ܵܐ ܘܐܸܡܲܪ: ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܥܲܒ̣ܕܵܘ̈ܗܝ ܕܐܲܠܵܗܵܐ ܡܪܲܝܡܵܐ ܦܘܿܩܘ ܬܵܘ. ܗܵܝܕܹ̇ܝܢ ܢܦܲܩ̣ܘ ܫܸܕܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ ܡ̣ܢ ܓܵܘ ܐܲܬ̇ܘܿܢܵܐ ܕܢܘܼܪܵܐ.

⁹⁴ܘܐܸܬ̣ܟܲܢܲܫܘ ܥܲܡܡܹ̈ܐ ܟܠܗܘܿܢ: ܘܪ̈ܲܒܲܝ ܚܲܝ̈ܠܹܐ ܘܫܲܠܝܼܛܵܢܹ̈ܐ ܘܡܵܪ̈ܵܘܵܬ̣ܵܐ ܘܪܵܘܪ̈ܒܵܢܹܐ ܕܡܲܠܟܵܐ: ܘܚܵܙܹ̇ܝܢ ܗ̄ܘܼܵܘ ܠܓܲܒ̣ܪܹ̈ܐ ܗܵܢܘܿܢ: ܕܠܵܐ ܐܸܫܬܲܠܛܲܬ̤ ܢܘܼܪܵܐ ܒܒܸܣ̱ܪܗܘܿܢ: ܘܣܲܥܪܵܐ ܕܪܹܫܗܘܿܢ ܠܵܐ ܐܸܬ̣ܚܲܪܲܟ: ܘܫܲܪ̈ܒܵܠܲܝܗܘܿܢ ܠܵܐ ܝܑܼܩܸܕܼܘ: ܘܪܹܝܚܵܐ ܕܢܘܼܪܵܐ ܠܵܐ ܥܕܼܵܐ ܒܗܘܿܢ.

⁹⁵ܥܢ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܘܐܸܡܲܪ: ܡܒܲܪܲܟ ܗ̄ܘܼ ܐܲܠܵܗܗܘܿܢ ܕܫܸܕܼܪܵܟ ܘܡܝܼܫܵܟ ܘܲܥܒܸܕܼܢܵܓ̣ܘܿ: ܕܫܲܕܲܪ ܡܲܠܲܐܟܹܗ ܘܦܲܨܝܼ ܠܥܲܒ̣ܕܵܘ̈ܗܝ ܕܐܸܬ̇ܬ̇ܟܸܠܘ ܥܠܵܘܗܝ: ܘܡܸܠܲܬ̣ ܡܲܠܟܵܐ ܐܲܣ̣ܓܝܼܘ: ܘܝܲܗ̄ܒ̣ܘ ܓܘܼܫ̱ܡܗܘܿܢ ܕܠܵܐ ܢܸܦܠ̱ܚܘܼܢ ܘܠܵܐ ܢܸܣܓ̇ܕܼܘܼܢ ܠܟ̣ܠ ܐܲܠܵܗ: ܐܸܠܵܐ ܐܸܢ ܠܐܲܠܵܗܗܘܿܢ.

⁹⁶ܘܗܵܟܲܢܵܐ ܦܵܩܹ̇ܕܼ ܐ̄ܢܵܐ: ܕܟ̣ܠ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ: ܕܲܢܓܲܕܸ̇ܦ ܥܲܠ ܐܲܠܵܗܗܘܿܢ ܕܫܸܕܼܪܵܟ ܘܡܝܼܫܵܟ ܘܲܥܒܸܕܢܵܓ̣ܘܿ: ܗܲܕܵܡ ܗܲܕܵܡ ܢܸܬ̣ܦܲܣܩܘܼܢ: ܘܒ̣ܵܬܲܝ̈ܗܘܿܢ ܢܸܬ̣ܒܲܙܙܘܼܢ: ܡܸܛܠ ܕܠܲܝܬ̇ ܐܲܠܵܗ ܐ̄ܚܪܹܝܢ ܕܡܸܫܟܲܚ ܠܲܡܫܵܘܙܵܒ̣ܘܼ ܗܵܟܲܢܵܐ.

⁹⁷ܗܵܝܕܹ̇ܝܢ ܐܵܘܪܸܒ̣ ܡܲܠܟܵܐ ܠܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ ܥܲܠ ܐܲܬ̣ܪܵܐ ܕܒ̣ܵܒܹܠ.