Read Aramaic Peshita Daniel 4 Bible Online

Daniel 4 - Aramaic Peshita bible

Daniel 4

¹ܢܒ̣ܘܼܟܲܕܼܢܵܨܲܪ ܡܲܠܟܵܐ: ܟܬܲܒ̣ ܠܟ̣ܠ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ ܕܥܵܡ̇ܪܝܼܢ ܒܟ̣ܠܵܗ̇ ܐܲܪܥܵܐ: ܫܲܝܢܵܐ ܢܸܣܓܸ̇ܐ ܠܟ̣ܘܿܢ.

²ܐܵܬ̣̈ܘܵܬ̣ܵܐ ܘܬܸܕܼܡܪ̈ܵܬ̣ܵܐ: ܕܲܥܒܲܕܼ ܐܲܠܵܗܵܐ ܡܪܲܝܡܵܐ ܫܦܲܪ ܩܕܼܵܡܲܝ ܠܲܡܚܵܘܿܝܘܼ.

³ܐܲܬ̣̈ܘܵܬܹܗ ܟܡܵܐ ܪܵܘܪ̈ܒ̣ܵܢ: ܘܬܸܕܼܡܪ̈ܵܬܹܗ ܟܡܵܐ ܥܲܫ̈ܝܼܢܲܢ: ܡܲܠܟ̇ܘܼܬܹܗ ܡܲܠܟ̇ܘܼܬ̣ ܥܵܠܲܡ: ܘܫܘܼܠܛܵܢܹܗ ܠܕܼܵܪܕܵܪ̈ܝܼܢ.

⁴ܐܸܢܵܐ ܢܒ̣ܘܼܟܲܕܼܢܵܨܲܪ ܫܠܸܐ ܗ̄ܘܹ̇ܝܬ̣ ܒܒܲܝܬ̇ܝ: ܘܢܝܼܚ ܒܗܲܝܟܲܠܝ.

⁵ܘܚܸܠܡܵܐ ܚܙܹ̇ܝܬ̣: ܘܐܸܬ̇ܕܲܠܚܹ̇ܬ̣: ܘܚܸܙܘܹ̈ܐ ܕܪܹܫܝ ܕܲܠ̣ܚܘܼܢܝ.

⁶ܘܐܸܢܵܐ ܦܸܩ̇ܕܹ̇ܬ̣ ܠܡܲܥܵܠܘܼ ܩܕܼܵܡܲܝ ܠܟ̣ܠܗܘܿܢ ܚܲܟ̇ܝܼܡܹ̈ܐ ܕܒ̣ܵܒܹܠ: ܕܲܦܫܵܪܵܐ ܕܚܸܠܡܵܐ ܢܚܵܘܿܢܵܢܝ.

⁷ܘܥܲܠ̣ܘ ܩܕܼܵܡܲܝ ܚܲܪ̈ܵܫܹܐ: ܘܐܵܫܘܿܦܹ̈ܐ: ܘܲܡܓ̣ܘܼܫܹ̈ܐ: ܘܟܲܠܕܵܝܹ̈ܐ: ܘܐܸܡܲܪܬܹ̇ܗ ܠܚܸܠܡܵܐ ܩܕܼܵܡܲܝܗܘܿܢ: ܘܲܦܫܵܪܹܗ ܠܵܐ ܐܵܘܕ̇ܥܘܼܢܝ.

⁸ܥܕܲܡܵܐ ܕܥܲܠ ܩܕܼܵܡܲܝ ܕܵܢܝܼܐܹܝܠ ܗܵܢܵܐ ܕܲܫܡܹܗ ܒܹܠܛܫܵܨܲܪ ܥܲܠ ܫܸܡ ܐܲܠܵܗܝ: ܕܪܘܼܚ ܐܲܠܵܗܝܼ̈ܢ ܩܲܕ̇ܝܼܫܝܼܢ ܐܝܼܬ̣ ܒܹܗ: ܘܚܸܠܡܵܐ ܩܕܼܵܡܵܘܗܝ ܐܸܡ̇ܪܹܬ̣.

⁹ܒܹܠܛܫܵܨܲܪ ܪܲܒ̇ ܚܲܟ̇ܝܼܡܹ̈ܐ ܕܐܸܢܵܐ ܝܵܕܲܥ̇ ܐ̄ܢܵܐ ܕܪܘܼܚܝ ܐܲܠܵܗܝܼ̈ܢ ܩܲܕ̇ܝܼܫܝܼܢ ܐܝܼܬ̣ ܒܵܟ ܘܟ̣ܠ ܐ̄ܪܵܙ ܠܵܐ ܐܸܬ̣ܟܲܣܝܼ ܡܸܢܵܟ: ܒܚܸܙܘܵܐ ܕܚܸܠܡܝ: ܚܵܙܹ̇ܐ ܐ̄ܢܵܐ ܚܸܙܘܵܐ ܕܪܹܫܝ: ܘܲܦܫܵܪܹܗ ܐܲܢ̄ܬ̇ ܐܸܡܲܪ ܠܝܼ.

¹⁰ܚܵܙܹ̇ܐ ܗ̄ܘܹ̇ܝܬ̣ ܒܡܲܫܟܲܒ̣ܝ: ܐܝܼܠܵܢܵܐ ܡܸܨܥܲܬ̣ ܐܲܪܥܵܐ: ܪܵܘܡܹܗ ܣܲܓ̇ܝܼ.

¹¹ܘܐܸܬ̇ܬ̇ܪܝܼܡ ܐܝܼܠܵܢܵܐ ܘܲܥ̣ܫܸܢ: ܘܪܵܘܡܹܗ ܡ̇ܛ̣ܵܐ ܥܕܲܡܵܐ ܠܲܫܡܲܝܵܐ: ܘܚܸܙܘܹܗ ܠܟ̣ܠ ܣܵܘܦܹ̈ܝܗ̇ ܕܐܲܪܥܵܐ.

¹²ܛܲܪ̈ܦܵܘܗܝ ܫܲܦܝܼܪܝܼܢ: ܘܐܸܒܹ̇ܗ ܣܲܓ̇ܝܼ: ܘܡܹܐܟ̣ܘܼܠܬܵܐ ܠܟ̣ܠ ܒܣܲܪ ܐܝܼܬ̣ ܒܹܗ: ܬܚܘܿܬ̣ܵܘܗܝ ܥܵܡ̇ܪ̈ܵܢ ܟܠܗܹܝܢ ܚܲܝ̈ܘܵܬ̣ܵܐ ܕܒܲܪܵܐ: ܘܲܒ̣ܣܵܘܟܵܘ̈ܗܝ ܫܲܟ̇ܝܼܢ ܟܠܹܗ ܥܵܘܦܵܐ ܕܲܫܡܲܝܵܐ: ܘܡܸܢܹܗ ܡܸܬ̣ܬܲܪܣܸܐ ܗ̄ܘܼܵܐ ܟܠ ܒܣܲܪ.

¹³ܚܵܙܹ̇ܐ ܗ̄ܘܹ̇ܝܬ̣ ܒܚܸܙܘܵܐ ܕܪܹܫܝ ܕܥܲܠ ܡܲܫܟܲܒ̣ܝ: ܥܝܼܪܵܐ ܘܩܲܕ̇ܝܼܫܵܐ ܕܲܢ̣ܚܸܬ̣ ܡ̣ܢ ܫܡܲܝܵܐ.

¹⁴ܘܲܩ̣ܪܵܐ ܒܚܹܝܠ ܘܗܵܟܲܢܵܐ ܐܸܡܲܪ: ܦܣܘܿܩܘ ܐܝܼܠܵܢܵܐ ܘܦܲܫܲܚܘ ܣܵܘܟܵܘ̈ܗܝ: ܘܐܲܬܲܪܘ ܛܲܪ̈ܦܵܘܗܝ: ܘܒܲܕܲܪܘ ܐܸܒܹ̇ܗ: ܢܸܦ̱ܪ̈ܩܵܢ ܚܲܝ̈ܘܵܬ̣ܵܐ ܡ̣ܢ ܬܚܘܿܬ̣ܵܘܗܝ: ܘܥܵܘܦܵܐ ܕܲܫܡܲܝܵܐ ܡ̣ܢ ܣܵܘܟܵܘ̈ܗܝ.

¹⁵ܥܸܩܵܪ ܫܸܪ̈ܫܵܘܗܝ ܕܹܝܢ ܒܐܲܪܥܵܐ ܫܒ̣ܘܿܩܘ: ܒܐܲܣܵܪ ܦܲܪܙܠܵܐ ܘܲܢܚܵܫܵܐ ܒܬܸܕܼܐܵܐ ܕܒܲܪܵܐ: ܘܡ̣ܢ ܛܲܠܵܐ ܕܲܫܡܲܝܵܐ ܢܸܨܛܲܒܲܥ: ܘܥܲܡ ܚܲܝܘܿܬ̣ ܒܲܪܵܐ ܡܲܥܡ̄ܪܹܗ ܒܥܸܣܒܵܐ ܕܐܲܪܥܵܐ.

¹⁶ܘܠܸܒܹ̇ܗ ܡ̣ܢ ܒܢܲܝ̈ܢܵܫܵܐ ܢܫܲܢܹܐ: ܘܠܸܒܵܐ ܕܚܲܝ̄ܘܬ̣ܵܐ ܢܸܬ̣̱ܝܼܗܸܒ̣ ܠܹܗ: ܘܫܲܒ̣ܥܵܐ ܥܸܕܵܢܝܼ̈ܢ ܢܸܬ̣ܚܲܠܦܘܼܢ ܥܠܵܘܗܝ.

¹⁷ܒܦܘܼܩܕܵܢ ܥܝܼܪܵܐ ܦܸܬ̣ܓ̣ܵܡܵܐ: ܘܲܒ̣ܡܹܐܡܲܪ ܩܲܕ̇ܝܼܫܵܐ ܫܸܐ̱ܠܬ̣ܵܐ: ܕܢܸܕ̇ܥܘܼܢ ܚܲܝܹ̈ܐ ܕܫܲܠܝܼܛ ܗ̄ܘܼ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇: ܘܠܲܫܦܲܠ ܐ̄ܢܵܫܝܼ̈ܢ ܢܩܝܼܡ ܥܠܹܝܗ̇.

¹⁸ܗܵܢܵܐ ܚܸܠܡܵܐ ܚܙܹ̇ܝܬ̣ ܐܸܢܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܐܲܢ̄ܬ̇ ܒܹܠܛܫܵܨܲܪ ܦܫܵܪܹܗ ܐܸܡܲܪ ܠܝܼ: ܡܸܛܠ ܕܟ̣ܠܗܘܿܢ ܚܲܟ̇ܝܼܡܹ̈ܐ ܕܡܲܠܟ̇ܘܼܬ̣ܝ: ܠܵܐ ܡܸܫܟ̇ܚܝܼܢ ܠܡܵܘܕܵܥܘܼܬܲܢܝ: ܘܐܲܢ̄ܬ̇ ܕܵܢܝܼܐܹܝܠ ܡܸܫܟܲܚ ܐܲܢ̄ܬ̇: ܡܸܛܠ ܕܪܘܼܚ ܐܲܠܵܗ̈ܝܼܢ ܩܲܕ̇ܝܼܫܝܼܢ ܐܝܼܬ̣ ܒܵܟ.

¹⁹ܗܵܝܕܹ̇ܝܢ ܕܵܢܝܼܐܹܝܠ ܕܲܫܡܹܗ ܒܹܠܛܫܵܨܲܪ: ܬܡܲܗ̣ ܐܲܝܟ ܫܵܥܵܐ ܚܕܼܵܐ: ܘܡܲܚܫ̈ܒ̣ܵܬܹܗ ܕܲܠܚܵܝ̈ܗܝ: ܥܢ̣ܵܐ ܡܲܠܟܵܐ ܘܐܸܡܲܪ: ܒܹܠܫܵܨܲܪ: ܚܸܠܡܵܐ ܘܲܦܫܵܪܹܗ ܠܵܐ ܢܕܲܠܚܘܼܢܵܟ: ܥܢ̣ܵܐ ܕܵܢܝܼܐܹܝܠ ܘܐܸܡ̣ܲܪ: ܡܵܪܝ: ܚܸܠܡܵܐ ܠܣܵܢ̈ܐܲܝܟ: ܘܲܦܫܵܪܹܗ ܠܲܒ̣ܥܸܠܕ̇ܒ̣ܵܒܲܝ̈ܟ.

²⁰ܐܝܼܠܵܢܵܐ ܕܲܚ̣ܙܲܝܬ̇ ܕܲܪܒ̣ܵܐ ܘܲܥ̣ܫܸܢ: ܘܪܵܘܡܹܗ ܡ̣ܛܵܐ ܥܕܲܡܵܐ ܠܲܫܡܲܝܵܐ: ܘܚܸܙܘܹܗ ܠܟ̣ܠ ܣܵܘܦܹܝ̈ܗ̇ ܕܐܲܪܥܵܐ.

²¹ܛܲܪ̈ܦܵܘܗܝ ܫܲܦܝܼܪܝܼܢ: ܘܐܸܒܹ̇ܗ ܣܲܓ̇ܝܼ: ܘܡܹܐܟ̣ܘܼܠܬܵܐ ܠܟ̣ܠ ܒܣܲܪ ܐܝܼܬ̣ ܒܹܗ: ܘܲܬ̣ܚܘܿܬ̣ܵܘܗܝ ܥܵܡ̇ܪ̈ܵܢ ܟܠܗܹܝܢ ܚܲܝ̈ܘܵܬ̣ܵܐ ܕܕܲܒ̣ܪܵܐ: ܘܲܒ̣ܣܵܘ̈ܟܵܘܗܝ ܫܲܟ̇ܝܼܢ ܟܠܹܗ ܥܵܘܦܵܐ ܕܲܫܡܲܝܵܐ: ܘܡܸܢܹܗ ܡܸܬ̇ܬܲܪܣܸܐ ܗ̄ܘܼܵܐ ܟܠ ܒܣܲܪ.

²²ܐܲܢ̄ܬ̇ܘܼ ܡܲܠܟܵܐ ܕܲܥܫܸܢ̣ܬ̇ ܘܝܼܪܸܒ̣ܬ̇: ܪܒܲܝ̣ܬ̇ ܘܲܡܛܲܝ̣ܬ̇ ܠܲܫܡܲܝܵܐ: ܘܫܘܼܠܛܵܢܵܟ ܠܟ̣ܠ ܣܵܘܦܹܝ̈ܗ̇ ܕܐܲܪܥܵܐ.

²³ܘܕܲܚ̣ܙܵܐ ܡܲܠܟܵܐ ܠܥܝܼܪܵܐ ܘܩܲܕ̇ܝܼܫܵܐ: ܕܲܢܚܸܬ̣ ܡ̣ܢ ܫܡܲܝܵܐ: ܘܲܩ̣ܪܵܐ ܒܚܹܝܠ: ܘܐܸܡܲܪ: ܦܣܘܿܩܘ ܐܝܼܠܵܢܵܐ ܘܚܲܒ̇ܠܘܼܗܝ: ܥܸܩܵܪ ܫܸܪ̈ܫܵܘܗܝ ܕܹܝܢ ܒܐܲܪܥܵܐ ܫܒ̣ܘܿܩܘ: ܒܐܲܣܵܪ ܦܲܪܙܠܵܐ ܘܲܢܚܵܫܵܐ: ܒܬܸܕܼܐܵܐ ܕܒܲܪܵܐ: ܘܡ̣ܢ ܛܲܠܵܐ ܕܲܫܡܲܝܵܐ ܢܸܨܛܲܒܲܥ: ܘܥܲܡ ܚܲܝܘܲܬ̣ ܒܲܪܵܐ ܡܲܥܡ̄ܪܹܗ ܒܥܸܣܒܵܐ ܕܐܲܪܥܵܐ: ܘܠܸܒܹ̇ܗ ܡ̣ܢ ܒܢܲܝ̈ܢܵܫܵܐ ܢܫܲܢܸܐ: ܘܠܸܒܵܐ ܕܚܲܝܘ̄ܬ̣ܵܐ ܢܸܬ̣̱ܝܼܗܸܒ̣ ܠܹܗ: ܥܕܲܡܵܐ ܕܫܲܒ̣ܥܵܐ ܥܸܕܵܢ̈ܝܼܢ ܢܸܬ̣ܚܲܠܦܘܼܢ ܥܠܵܘܗܝ.

²⁴ܗܵܢܵܘ ܦܫܵܪܵܐ ܡܲܠܟܵܐ: ܓܙܝܼܪܲܬ̣ ܡܪܲܝܡܵܐ ܡܛܵܬ̤ ܥܲܠ ܡܵܪܝ ܡܲܠܟܵܐ.

²⁵ܘܡ̣ܢ ܐ̄ܢܵܫܵܐ ܪܵܕܼܦ̇ܝܼܢ ܠܵܟ: ܘܥܲܡ ܚܲܝܘܲܬ̣ ܒܲܪܵܐ ܢܸܗܘܹܐ ܡܲܥܡ̄ܪܵܟ: ܘܥܸܣܒܵܐ ܐܲܝܟ ܬܵܘܪܵܐ ܢܵܘܟ̇ܠܘܼܢܵܟ: ܘܡ̣ܢ ܛܲܠܵܐ ܕܲܫܡܲܝܵܐ ܬܸܨܛܲܒܲܥ: ܘܫܲܒ̣ܥܵܐ ܥܸܕܵܢ̈ܝܼܢ ܢܸܬ̣ܚܲܠܦܘܼܢ ܥܠܲܝܟ: ܥܕܲܡܵܐ ܕܬܸܕܲܥ ܕܫܲܠܝܼܛ ܗ̄ܘܼ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇.

²⁶ܘܕܸܐ̣ܡܲܪ ܠܡܸܫܒܲܩ ܥܸܩܵܪ ܫܸܪ̈ܫܵܘܗܝ ܕܐܝܼܠܵܢܵܐ: ܡܲܠܟ̇ܘܼܬ̣ܵܟ ܠܵܟ ܩܲܝܵܡܵܐ: ܡܵܐ ܕܝܼܕܲܥܬ̇ ܕܫܘܼܠܛܵܢܵܐ ܡ̣ܢ ܫܡܲܝܵܐ ܗ̄ܘܼ.

²⁷ܡܸܛܠ ܗܵܢܵܐ ܡܸܠܟ̇ܝ ܢܸܫܦܲܪ ܥܠܲܝܟ: ܘܲܚܛܵܗܲܝ̈ܟ ܒܙܸܕ̈ܩܵܬ̣ܵܐ ܦܪܘܿܩ: ܘܥܵܘܿܠܘܼܬ̣ܵܟ ܒܲܡܪܲܚܡܵܢܘܼܬ̣ܵܐ ܕܲܡܚ̈ܝܼܠܹܐ: ܥܕܲܡܵܐ ܕܢܲܪܚܸܩ ܡܸܢܵܟ ܣܲܟ̣̈ܠ̱ܘܵܬ̣ܵܟ.

²⁸ܗܵܠܹܝܢ ܟܠܗܹܝܢ ܡܲܛܝܼ ܥܲܠ ܢܒ̣ܘܼܟܲܕܼܢܵܨܲܪ ܡܲܠܟܵܐ.

²⁹ܘܡ̣ܢ ܒܵܬܲܪ ܬܪܸܥܣܲܪ ܝܲܪ̈ܚܝܼܢ: ܥܲܠ ܗܲܝܟܲܠ ܡܲܠܟ̇ܘܼܬܹܗ ܕܲܒ̣ܒ̣ܵܒܹܠ ܡܗܲܠܸܟ ܗ̄ܘܼܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ.

³⁰ܘܲܥ̣ܢܵܐ ܘܐܸܡܲܪ: ܠܵܐ ܗܘ̤ܵܬ̣ ܗܵܕܹܐ ܒܵܒܹܠ ܪܲܒ̇ܬ̣ܵܐ ܕܐܸܢܵܐ ܒܢܹܝ̇ܬ̣ܵܗ̇ ܠܒܹܝܬ̣ ܡܲܠܟ̇ܘܼܬ̣ܝ: ܘܠܐܘܼܚܕܵܢܝ ܥܲܫܝܼܢܵܐ ܘܠܐܝܼܩܵܪܝ.

³¹ܘܥܲܕܼ ܡܸܠܬ̣ܵܐ ܒܦܘܼܡܹܗ ܕܡܲܠܟܵܐ: ܩܵܠܵܐ ܐܸܬ̣ܵܐ ܡ̣ܢ ܫܡܲܝܵܐ: ܠܵܟ ܐܵܡ̇ܪܝܼܢ ܒܒ̣ܘܼܟܲܕܼܢܵܨܲܪ ܡܲܠܟܵܐ: ܕܡܲܠܟ̇ܘܼܬ̣ܵܟ ܥܸܒ̣ܪܲܬ̣ ܡܸܢܵܟ.

³²ܘܡ̣ܢ ܐ̄ܢܵܫܵܐ ܪܵܕܼܦܝܼܢ ܠܵܟ: ܘܥܲܡ ܚܲܝܘܲܬ̣ ܒܲܪܵܐ ܢܸܗܘܹܐ ܡܲܥܡ̄ܪܵܟ: ܘܥܸܣܒܵܐ ܐܲܝܟ ܬܵܘܪܵܐ ܢܵܘܟ̇ܠܘܼܢܵܟ: ܘܡ̣ܢ ܛܲܠܵܐ ܕܲܫܡܲܝܵܐ ܬܸܨܛܲܒܲܥ: ܘܫܲܒ̣ܥܵܐ ܥܸܕܵܢܝܼ̈ܢ ܢܸܬ̣ܚܲܠܦܘܼܢ ܥܠܲܝܟ: ܥܕܲܡܵܐ ܕܬܸܕܲܥ ܕܫܲܠܝܼܛ ܗ̄ܘܼ ܐܲܠܵܗܵܐ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇: ܘܠܲܫܦܲܠ ܐ̄ܢܵܫ̈ܝܼܢ ܢܩܝܼܡ ܥܠܹܝܗ̇.

³³ܒܵܗ̇ ܒܫܵܥܬ̣ܵܐ ܡܸܠܬ̣ܵܐ ܫܸܠܡܲܬ̤ ܥܲܠ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܡ̣ܢ ܒܢܲܝ̈ܢܵܫܵܐ ܐܸܬ̣ܪ̱ܕܸܦ: ܘܥܸܣܒܵܐ ܐܲܝܟ ܬܵܘܪܵܐ ܐܹܟܲܠ̣: ܘܡ̣ܢ ܛܲܠܵܐ ܕܲܫܡܲܝܵܐ ܐܸܨܛܲܒܲܥ: ܥܕܲܡܵܐ ܕܣܲܥܪܹܗ ܪܒ̣ܵܐ ܐܲܝܟ ܕܢܸܫܪܵܐ: ܘܛܸܦܪ̈ܵܘܗܝ ܐܲܝܟ ܕܥܵܘܦܵܐ.

³⁴ܘܟܲܕܼ ܫܠܸܡ̣ܘ ܝܵܘ̈ܡܵܬ̣ܵܐ: ܐܸܢܵܐ ܢܒ̣ܘܼܟܲܕܼܢܵܨܲܪ ܥܲܝܢܲܝ̈ ܠܲܫܡܲܝܵܐ ܫܸܩܠܹ̇ܬ̣: ܘܡܲܕܲܥܝ ܬܵܒ̣ ܥܠܲܝ: ܘܠܲܡܪܲܝܡܵܐ ܒܲܪܟܹ̇ܬ̣: ܘܲܠܚܲܝ ܥܵܠܡܹ̈ܐ ܫܲܒ̇ܚܹ̇ܬ̣: ܘܗܲܕ̇ܪܹܬ̣: ܕܫܘܼܠܛܵܢܹܗ ܫܘܼܠܛܵܢ ܥܵܠܲܡ ܘܡܲܠܟ̇ܘܼܬܹܗ ܠܕܼܵܪܕܵܪ̈ܝܼܢ.

³⁵ܘܟ̣ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܐܲܝܟ ܠܵܐ ܡܸܕܸ̇ܡ ܚܫܝܼܒ̣ܝܼܢ ܩܕܼܵܡܵܘܗܝ: ܘܟ̣ܠ ܡܵܐ ܕܨܵܒܹ̇ܐ ܥܵܒܹ̇ܕܼ: ܒܚܲܝ̈ܠܲܝ ܫܡܲܝܵܐ ܘܲܒ̣ܥܵܡܘܿܪܹ̈ܝܗ̇ ܕܐܲܪܥܵܐ: ܘܠܲܝܬ̇ ܕܢܸܪܫܸܐ ܒܐܝܼܕܹܗ ܘܢܹܐܡܲܪ ܠܹܗ ܡܵܢܵܐ ܥܵܒܹ̇ܕܼ ܐܲܢ̄ܬ̇.

³⁶ܒܹܗ ܒܙܲܝܢܵܐ ܡܲܕܲܥܝ ܦ̣ܢܵܐ ܥܠܲܝ: ܘܪܵܘܪ̈ܒ̣ܵܢܲܝ ܘܪ̈ܲܒܲܝ ܚܲܝ̈ܠܲܝ ܒܥ̣ܵܐܘܼܢܝ: ܘܥܲܠ ܡܲܠܟ̇ܘܼܬ̣ܝ ܬܸܩ̇ܢܹܬ̣: ܘܪܲܒ̇ܘܼܬ̣ܵܐ ܝܲܬ̇ܝܼܪܬܵܐ ܐܸܬ̇ܬܵܘܣܦܲܬ̤ ܠܝܼ.

³⁷ܡܸܟܹ̇ܝܠ ܐܸܢܵܐ ܢܒ̣ܘܼܟܲܕܼܢܵܨܲܪ: ܡܫ̣ܒܲܚ ܘܲܡܪܲܡܪܸܡ ܘܲܡܗܲܕܲܪ ܠܡܲܠܟܵܐ ܕܲܫܡܲܝܵܐ: ܕܟ̣ܠܗܘܿܢ ܥܒ̣ܵܕܼܵܘ̈ܗܝ ܒܩܘܼܫܬܵܐ: ܘܐܘܼܪ̈ܚܵܬܹܗ ܕܝܼܢܵܐ: ܘܠܲܐܝܠܹܝܢ ܕܲܡܗܲܠܟ̣ܝܼܢ ܒܓܲܐܝܘܼܬ̣ܵܐ ܡܸܫܟܲܚ ܕܲܢܡܲܟܸ̇ܟ.