Read Aramaic Peshita Daniel 5 Bible Online

Daniel 5 - Aramaic Peshita bible

Daniel 5

¹ܒܹܠܛܫܵܨܲܪ ܡܲܠܟܵܐ: ܥ̣ܒܲܕܼ ܠܲܚܡܵܐ ܪܲܒܵܐ ܠܐܵܠܹܦ ܪܵܘܪ̈ܒ̣ܵܢܵܘܗܝ: ܘܠܘܩܒܲܠ ܐܲܠܦܵܐ ܚܲܡܪܵܐ ܫܵܬܹ̇ܐ ܗ̄ܘܼܵܐ.

²ܘܐܸܡܲܪ ܒܠܹܛܫܵܨܲܪ ܒܲܛܥܸܡ ܚܲܡܪܹܗ ܠܡܲܝܬܵܝܘܼ ܡܵܐܢܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܕܐܲܦܸܩ̣ ܢܒ̣ܘܼܟܲܕܼܢܵܨܲܪ ܐܲܒ̣ܘܼܗܝ ܡ̣ܢ ܗܲܝܟܠܵܐ ܕܒ̣ܐܘܼܪܸܫܠܸܡ: ܕܢܸܫܬ̇ܘܿܢ ܒܗܘܿܢ ܡܲܠܟܵܐ ܘܪܵܪ̈ܒ̣ܵܢܵܘܗܝ: ܘܢܸܫܵܘ̈ܗܝ ܘܲܕܼܪ̈ܘܼܟ̣ܵܬܹܗ.

³ܗܵܝܕܹ̇ܝܢ ܐܲܝܬ̇ܝܘܼ ܡܵܐܢܹ̈ܐ ܕܕܲܗܒ̣ܵܐ ܕܐܲܦܸܩ ܡ̣ܢ ܗܲܝܟ̇ܠܵܐ ܕܐܲܠܵܗܵܐ ܕܒ̣ܐܘܼܪܸܫܠܸܡ: ܘܐܸܫ̣ܬ̇ܝܘܼ ܒܗܘܿܢ ܡܲܠܟܵܐ ܘܪܵܘܪ̈ܒ̣ܵܢܵܘܗܝ: ܘܢܸܫܵܘ̈ܗܝ ܘܲܕܼܪ̈ܘܼܟ̣ܵܬܹܗ.

⁴ܐܸܫ̣ܬ̇ܝܘܼ ܚܲܡܪܵܐ: ܘܫܲܒܲܚ̣ܘ ܠܐܲܠܵܗܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܘܕܲܢܚܵܫܵܐ ܘܲܕܼܦܲܪܙܠܵܐ: ܘܲܕܼܩܲܝܣܵܐ ܘܲܕܼܟܹܐܦܵܐ.

⁵ܘܒ̣ܵܗ̇ ܒܫܵܥܬ̣ܵܐ: ܢܦܲܩ̣ ܨܸܒ̣̈ܥܵܬ̣ܵܐ ܕܐܝܼܕܼܵܐ ܕܐ̄ܢܵܫܵܐ: ܘܟ̣ܵܬ̣̈ܒܵܢ ܠܘܼܩܒܲܠ ܫܪܵܓ̣ܵܐ: ܥܲܠ ܟܸܠܫܵܐ ܕܐܸܣܬ̣ܵܐ ܕܲܒ̣ܗܲܝܟ̇ܠܵܐ ܕܡܲܠܟܵܐ: ܘܡܲܠܟܵܐ ܚܙ̣ܵܐ ܦܲܣܬ̣ܵܐ ܕܐܝܼܕܼܵܐ ܕܟ̣ܵܬ̣ܒܵܐ.

⁶ܗܵܝܕܹ̇ܝܢ ܡܲܠܟܵܐ ܙܝܼܘܹܗ ܫܢ̣ܵܐ: ܘܪܸܥܝܵܢܹܗ ܐܸܬ̇ܕܲܠܲܚ: ܘܩܸܛܪ̈ܲܝ ܚܲܨܹܗ ܐܸܫܬ̇ܪܝܼܘ: ܘܒ̣ܘܼܪ̈ܟܵܘܗܝ ܚܕܼܵܐ ܠܲܚܕܼܵܐ ܢ̣ܩܲܫ.

⁷ܘܲܩܪܵܐ ܡܲܠܟܵܐ ܒܚܹܝܠ: ܠܡܲܥܵܠܘܼ ܠܐܵܫܘܿܦܹ̈ܐ: ܘܲܠܟܲܠܕܵܝܹ̈ܐ: ܘܠܲܡܓ̣ܘܼܫܹ̈ܐ: ܘܲܠܚܲܟ̇ܝܼܡܹ̈ܐ: ܥܢ̣ܵܐ ܡܲܠܟܵܐ ܘܐܸܡܲܪ ܠܚܲܟ̇ܝܼܡܹ̈ܐ ܕܒ̣ܵܒܹܠ: ܟܠ ܐ̄ܢܵܫ ܕܢܸܩܪܸܐ ܟܬ̣ܵܒ̣ܵܐ ܗܵܢܵܐ ܘܲܦܫܵܪܹܗ ܢܚܵܘܹܝܢܝ: ܐܲܪ̈ܓ̇ܘܵܢܹܐ ܢܸܠܒܲܫ: ܘܗܲܝܡܢܝܼܟ̣ܵܐ ܕܕܲܗܒ̣ܵܐ ܒܨܵܘܪܹܗ: ܘܬ̣ܘܼܠܬ̣ܵܐ ܒܡܲܠܟ̇ܘܼܬ̣ܵܐ ܢܸܫܠܲܛ.

⁸ܗܵܝܕܹ̇ܝܢ ܥܵܐ̇ܠܝܼܢ ܗ̄ܘܼܵܘ ܚܲܟ̇ܝܼܡܹ̈ܐ ܕܡܲܠܟܵܐ: ܘܠܵܐ ܡܸܫܟ̇ܚܝܼܢ ܗ̄ܘܼܵܘ ܟܬ̣ܵܒ̣ܵܐ ܠܡܸܩܪܵܐ: ܘܲܦܫܵܪܹܗ ܠܡܵܘܕܵܥܘܼ ܠܡܲܠܟܵܐ.

⁹ܗܵܝܕܹ̇ܝܢ ܡܲܠܟܵܐ ܒܠܹܛܫܵܨܲܪ ܣܲܓ̇ܝܼ ܐܬ̇ܕܲܠܲܚ: ܘܙܝܼܘܹܗ ܐܸܫܬܲܢܝܼ: ܘܪܵܘܪ̈ܒ̣ܵܢܵܘܗܝ ܡܸܬ̣ܒܲܠܗܹܝܢ ܗ̄ܘܼܵܘ.

¹⁰ܘܡܲܠܟ̇ܬ̣ܵܐ ܡܸܛܠ ܡܸܠܲܝ̈ ܡܲܠܟܵܐ ܘܪܵܘܪ̈ܒ̣ܵܢܵܘܗܝ: ܠܒܹܝܬ̣ ܡܲܫܬ̇ܝܵܐ ܥܸܠܲܬ̤: ܥܢܵܬ̣ ܘܐܵܡ̇ܪܵܐ ܠܡܲܠܟܵܐ: ܡܲܠܟܵܐ ܠܥܵܠܲܡ ܚܝܝܼ: ܪܸ̈ܥܝܵܢܲܝܟ ܠܵܐ ܢܕܲܠܚܘܼܢܵܟ: ܘܙܝܼܘܲܝ̈ܟ ܠܵܐ ܢܸܫܬܲܢܘܿܢ.

¹¹ܐܝܼܬ̣ ܓܲܒ̣ܪܵܐ ܒܡܲܠܟ̇ܘܼܬ̣ܵܟ: ܕܪܘܼܚ ܐܲܠܵܗ̇ܝܼܢ ܩܲܕ̇ܝܼܫܝܼܢ ܐܝܼܬ̣ ܒܹܗ: ܘܲܒ̣ܝܵܘ̈ܡܲܝ ܐܲܒ̣ܘܼܟ: ܢܲܗܝܼܪܘܼܬ̣ܵܐ ܘܣܘܼܟܵܠܵܐ ܘܚܸܟ̣ܡ̱ܬ̣ܵܐ ܣܲܓ̇ܝܼܐܬ̣ܵܐ: ܐܲܝܟ ܚܸܟ̣ܡܲܬ̣ ܐܲܠܵܗ̈ܝܼܢ ܐܸܫܬܲܟ̣ܚܲܬ̤ ܒܹܗ: ܘܡܲܠܟܵܐ ܢܒ̣ܘܼܟܲܕܼܢܵܨܲܪ ܐܲܒ̣ܘܼܟ: ܪܲܒ̇ ܚܲܪ̈ܵܫܹܐ ܘܐܵܫܘܿܦܹ̈ܐ ܘܲܡܓ̣ܘܼܫܹ̈ܐ ܘܟܲܠܕܼܵܝܹ̈ܐ ܐܲܩܝܼܡܹܗ.

¹²ܡܸܛܠ ܕܪܘܼܚܵܐ ܘܡܲܕ̇ܥܵܐ ܘܣܘܼܟܵܠܵܐ ܝܲܬ̇ܝܼܪܵܐ ܐܸܫܬ̇ܟܲܚ ܒܹܗ: ܦܵܫܲܪ ܚܸܠܡܝܼ̈ܢ: ܘܐܵܚܹ̇ܕܼ ܐܘܼܚ̈ܕܵܢ: ܘܫܵܪܹܐ ܩܸܛܪ̈ܝܼܢ: ܕܵܢܝܼܐܹܝܠ ܕܡܲܠܟܵܐ ܫܲܡܝܼ ܫܡܹܗ ܒܹܠܛܫܵܨܲܪ: ܡܸܟܹ̇ܝܠ ܕܵܢܝܼܐܹܝܠ ܢܸܬ̣ܩܪܸܐ: ܘܲܦܫܵܪܵܐ ܢܚܵܘܸܐ.

¹³ܗܵܝܕܹ̇ܝܢ ܕܵܢܝܼܐܹܝܠ ܥܲܠ̣ ܩܕܼܵܡ ܡܲܠܟܵܐ: ܥܢ̣ܵܐ ܡܲܠܟܵܐ ܘܐܸܡ̣ܲܪ ܠܕܵܢܝܼܐܹܝܠ: ܐܲܢ̄ܬ̇ ܗ̄ܘܼ ܕܵܢܝܼܐܹܝܠ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼ: ܕܐܲܢ̄ܬ̇ܝܼ ܐܵܒ̣ܝ ܡܲܠܟܵܐ ܡ̣ܢ ܝܑܼܗܘܼܕܼ.

¹⁴ܫܸܡܥܹ̇ܬ̣ ܥܠܲܝܟ ܕܪܘܼܚ ܐܲܠܵܗ̈ܝܼܢ ܩܲܕ̇ܝܼܫܝܼܢ ܐܝܼܬ̣ ܒܵܟ: ܘܢܲܗܝܼܪܘܼܬ̣ܵܐ ܘܣܘܼܟܵܠܵܐ: ܘܚܸܟ̣ܡ̱ܬ̣ܵܐ ܝܲܬ̇ܝܼܪܬܵܐ ܐܸܫܬܲܟ̣ܚܲܬ̤ ܒܵܟ.

¹⁵ܘܥܲܠ̣ܘ ܩܕܼܵܡܲܝ ܚܲܘܫܹܐ ܘܐܵܫ̈ܘܿܦܹܐ: ܕܲܟ̣ܬ̣ܵܒ̣ܵܐ ܗܵܢܵܐ ܢܸܩܪܘܿܢ ܘܲܦܫܵܪܹܗ ܢܚܵܘܘܿܢܵܢܝ: ܘܠܵܐ ܐܸܫ̣ܟܲܚܘ ܦܫܵܪܵܐ ܕܡܸܠܬ̣ܵܐ ܠܡܵܘܕܵܥܘܼܬܲܢܝ.

¹⁶ܘܐܸܢܵܐ ܫܸܡ̇ܥܹܬ̣ ܥܠܲܝܟ: ܕܡܸܫܟܲܚ ܐܲܢ̄ܬ̇ ܦܫܵܪ̈ܝܼܢ ܠܡܸܦܫܲܪ: ܘܩܸܛܪ̈ܝܼܢ ܠܡܸܫܪܵܐ: ܐܸܢ ܬܸܫܟܲܚ ܟܬ̣ܵܒ̣ܵܐ ܗܵܢܵܐ ܠܡܸܩܪܵܐ ܘܲܦܫܵܪܹܗ ܠܡܵܘܕܵܥܘܼܬܲܢܝ: ܐܲܪ̈ܓ̇ܘܵܢܹܐ ܬܸܠܒܲܫ: ܘܗܲܡܢܝܼܟ̣ܵܐ ܕܕܲܗܒ̣ܵܐ ܒܨܵܘܪܵܟ: ܘܬ̣ܘܼܠܬ̣ܵܐ ܒܡܲܠܟ̇ܘܼܬ̣ܵܐ ܬܸܫܠܲܛ.

¹⁷ܗܵܝܕܹ̇ܝܢ ܥܢ̣ܵܐ ܕܵܢܝܼܐܹܝܠ ܘܐܸܡܲܪ ܠܡܲܠܟܵܐ: ܡܵܘ̈ܗܒ̣ܵܬ̣ܵܟ ܠܵܟ ܢܸܗܘ̈ܝܵܢ: ܘܐܝܼܩܵܪ ܒܲܝܬܵܟ ܠܐܲܚܪ̈ܵܢܝܼܢ ܗܲܒ̣: ܒܪܲܡ ܟܬ̣ܵܒ̣ܵܐ ܐܸܢܵܐ ܐܸܩܪܸܐ ܠܡܲܠܟܵܐ: ܘܲܦܫܵܪܹܗ ܐܸܚܵܘܹܝܘܗܝ.

¹⁸ܐܲܢ̄ܬ̇ ܡܲܠܟܵܐ: ܐܲܠܵܗܵܐ ܡܪܲܝܡܵܐ: ܡܲܠܟ̇ܘܼܬ̣ܵܐ ܘܪܲܒ̇ܘܼܬ̣ܵܐ ܘܐܝܼܩܵܪܵܐ ܘܫܘܼܒ̣ܚܵܐ: ܝܲܗ̄ܒ̣ ܠܲܢܒ̣ܘܼܟܲܕܼܢܵܨܲܪ ܐܲܒ̣ܘܼܟ.

¹⁹ܘܡ̣ܢ ܪܲܒ̇ܘܼܬ̣ܵܐ ܕܝܲܗ̄ܒ̣ ܠܹܗ: ܟܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ: ܙܵܝ̇ܥܝܼܢ ܗ̄ܘܼܵܘ ܘܕܼܵܚ̇ܠܝܼܢ ܡ̣ܢ ܩܕܼܵܡܵܘܗܝ: ܐܲܝܠܹܝܢ ܕܨܵܒܹ̇ܐ ܗ̄ܘܼܵܐ ܩܵܛܹ̇ܠ: ܘܐܲܝܠܹܝܢ ܕܨܵܒܹ̇ܐ ܗ̄ܘܼܵܐ ܡܲܚܸܐ: ܘܲܕܼܨܵܒܹ̇ܐ ܡܪܝܼܡ: ܘܲܕܼܨܵܒܹ̇ܐ ܡܡܲܟܸ̇ܟ.

²⁰ܘܟܲܕܼ ܐܸܬ̇ܬ̇ܪܝܼܡ ܠܸܒܹ̇ܗ: ܘܪܘܼܚܹܗ ܥܸܫܢܲܬ̤ ܠܡܲܥܠܵܝܘܼ: ܢ̣ܚܸܬ̣ ܡ̣ܢ ܟܘܼܪܣܝܵܐ ܕܡܲܠܟ̇ܘܼܬܹܗ: ܘܐܝܼܩܵܪܹܗ ܥ̣ܒܲܪ ܡܸܢܹܗ.

²¹ܘܡ̣ܢ ܒܢܲܝ̈ܢܵܫܵܐ ܐܸܬ̣ܪ̱ܕܸܦ: ܘܠܸܒܹ̇ܗ ܥܲܡ ܕܚܲܝ̈ܘܵܬ̣ܵܐ ܐܸܫܬ̇ܘܝܼ: ܘܥܲܡ ܥܪ̈ܵܕܹܐ ܡܲܥܡ̄ܪܹܗ: ܘܥܸܣܒܵܐ ܐܲܝܟ ܬܵܘܪܵܐ ܐܵܘܟ̇ܠ̣ܘܼܗܝ: ܘܡ̣ܢ ܛܲܠܵܐ ܕܲܫܡܲܝܵܐ ܓܘܼܫܡܹܗ ܐܸܨܛܲܒܲܥ: ܥܕܲܡܵܐ ܕܣܲܥܪܹܗ ܪܒ̣ܵܐ ܐܲܝܟ ܕܢܸܫܪܵܐ: ܘܛܸܦܪ̈ܵܘܗܝ ܐܲܝܟ ܕܥܵܘܦܵܐ: ܥܕܲܡܵܐ ܕܝܼܕܲܥ̣ ܕܫܲܠܝܼܛ ܗ̄ܘܼ ܐܲܠܵܗܵܐ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇: ܘܠܲܫܦܲܠ ܐ̄ܢܵܫ̈ܝܼܢ ܢܩܝܼܡ ܥܠܹܝܗ̇.

²²ܘܐܲܢ̄ܬ̇ ܒܪܹܗ ܒܹܠܛܫܵܨܲܪ: ܠܵܐ ܐܲܡܸܟ̣ܬ̇ ܠܸܒܵܟ ܟܲܕܼ ܗܵܠܹܝܢ ܟܠܗܹܝܢ ܝܑܼܕܲܥ̣ܬ̇.

²³ܘܥܲܠ ܡܵܪܹܐ ܫܡܲܝܵܐ ܐܸܬ̇ܬ̇ܪܝܼܡܬ̇: ܘܲܠܡܵܐܢܹ̈ܐ ܕܒܲܝܬܹ̇ܗ ܐܲܝܬ̇ܝܼܘ ܩܕܼܵܡܲܝܟ: ܘܐܲܢ̄ܬ̇ ܘܪܵܘܪ̈ܒ̣ܵܢܲܝܟ ܘܢܸܫܲܝ̈ܟ ܘܲܕܼܪ̈ܘܼܟ̣ܵܬ̣ܵܟ: ܚܲܡܪܵܐ ܐܸܫܬ̇ܝܼܬ̇ܘܿܢ ܒܗܘܿܢ: ܘܠܲܐܠܵܗܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܘܕܲܢܚܵܫܵܐ: ܘܲܕܼܦܲܪܙܠܵܐ: ܘܲܕܼܩܲܝܣܵܐ: ܘܲܕܼܟܹܐܦܵܐ: ܕܠܵܐ ܚܵܙܹ̇ܝܢ: ܘܠܵܐ ܫܵܡ̇ܥܝܼܢ: ܘܠܵܐ ܝܵܕܼܥ̇ܝܼܢ: ܫܲܒܲܚ̣ܬ̇: ܘܠܲܐܠܵܗܵܐ ܕܲܢܫܲܡܬ̣ܵܟ ܒܐܝܼܕܼܵܘ̈ܗܝ: ܘܟ̣ܠܗܹܝܢ ܐܘܼܪ̈ܚܵܬ̣ܵܟ: ܠܹܗ ܠܵܐ ܫܲܒܲܚ̣ܬ̇: ܘܠܵܐ ܝܲܩܲܪܬ̇.

²⁴ܗܵܝܕܹ̇ܝܢ ܡ̣ܢ ܩܕܼܵܡܵܘܗܝ ܐܸܫܬܲܠܚܲܬ̤ ܦܲܣܲܬ̣ ܐܝܼܕܼܵܐ: ܘܲܟ̣ܬ̣ܵܒ̣ܵܐ ܗܵܢܵܐ ܪܸܫܡܲܬ̤.

²⁵ܘܲܟ̣ܬ̣ܵܒ̣ܵܐ ܗܵܢܵܐ ܪܫܝܼܡ: ܡܢܸܐ: ܡܢܸܐ: ܬܩܲܠ ܘܦܲܪܣܝܼܢ.

²⁶ܗܵܢܵܘ ܦܫܵܪܵܗ̇ ܕܡܸܠܬ̣ܵܐ: ܡܢܸܐ: ܡ̣ܢܵܗ̇ ܐܲܠܵܗܵܐ ܠܡܲܠܟ̇ܘܼܬ̣ܵܟ ܘܐܲܫ̱ܠܡܵܗ̇.

²⁷ܬܩܲܠ: ܬܩܝܼܠ ܐܲܢ̄ܬ̇ ܒܡܲܣܲܐܬ̣ܵܐ: ܘܐܸܫܬ̇ܟܲܚܬ̇ ܚܲܣܝܼܪ.

²⁸ܦܪܲܣ̣: ܦܪܝܼܣܵܐ ܗ̄ܝܼ ܡܲܠܟ̇ܘܼܬ̣ܵܟ ܘܝܼܗܝܼܒ̣ܵܐ ܗ̄ܝܼ ܠܡܵܕܲܥ ܘܲܠܦܵܪܹܣ.

²⁹ܗܵܝܕܹ̇ܝܢ ܐܸܡܲܪ ܡܲܠܟܵܐ ܒܹܠܛܫܵܨܲܪ: ܘܐܲܠܒ̇ܫܘܼܗܝ ܠܕܼܵܢܝܼܐܹܝܠ ܐܲܪ̈ܓ̇ܘܵܢܹܐ: ܘܗܲܝܡܢܝܼܟ̣ܵܐ ܕܕܲܗܒ̣ܵܐ ܒܨܵܘܪܹܗ: ܘܐܲܟ̣ܪܸܙܘ ܥܠܵܘܗܝ ܕܢܸܗܘܹܐ ܫܲܠܝܼܛ ܬܘܼܠܬ̣ܵܐ ܒܡܲܠܟ̇ܘܼܬ̣ܵܐ.

³⁰ܒܹܗ ܒܠܸܠܝܵܐ ܩܛܝܼܠ ܒܹܠܛܫܵܨܲܪ ܡܲܠܟܵܐ ܟܲܠܕܼܵܝܵܐ.

³¹ܘܕܲܪܝܵܘܵܫ ܡܵܕܼܵܝܵܐ ܩܲܒܸ̇ܠ ܡܲܠܟ̇ܘܼܬ̣ܵܐ: ܐܲܝܟ ܫܢܝܼ̈ܢ ܫܬ̇ܝܼܢ ܘܬܲܪܬܹ̇ܝܢ.