Read Aramaic Peshita Daniel 6 Bible Online

Daniel 6 - Aramaic Peshita bible

Daniel 6

¹ܘܲܫ̣ܦܲܪ ܩܕܼܵܡ ܕܲܪܝܵܘܵܫ: ܘܐܲܩܝܼܡ ܒܡܲܠܟ̇ܘܼܬܹܗ ܪ̈ܲܒܲܝ ܚܲܝ̈ܠܹܐ ܡܵܐܐ ܘܥܸܣܪܝܼܢ: ܕܢܸܗܘܘܿܢ ܒܟ̣ܠܵܗ̇ ܡܲܠܟ̇ܘܼܬܹܗ.

²ܘܲܠܥܸܠ ܡܸܢܗܘܿܢ ܫܠܝܼܛܝܼܢ ܬܠܵܬ̣ܵܐ: ܘܕܼܵܢܝܼܐܹܝܠ ܚܲܕܼ ܡܸܢܗܘܿܢ: ܕܢܸܗܘܘܿܢ ܪ̈ܲܒܲܝ ܚܲܝ̈ܠܹܐ. ܗܵܠܹܝܢ ܝܵܗ̄ܒ̇ܝܼܢ ܠܗܘܿܢ ܚܘܼܫܒܵܢܵܐ: ܘܲܠܡܲܠܟܵܐ ܠܵܐ ܢܸܗܘܘܿܢ ܡܲܗܪܝܼܢ.

³ܗܵܝܕܹ̇ܝܢ ܕܵܢܝܼܐܹܝܠ ܡܝܲܬܲܪ ܗ̄ܘܼܵܐ ܡ̣ܢ ܟܠܗܘܿܢ: ܡܸܛܠ ܕܪܘܼܚܵܐ ܝܲܬ̇ܝܼܪܬܵܐ ܐܝܼܬ̣ ܗ̄ܘܼܵܬ̣ ܒܹܗ: ܘܡܲܠܟܵܐ ܐܸܬ̣ܚܲܫܲܒ̣ ܠܲܡܩܵܡܘܼܬܹܗ ܥܲܠ ܟܠܵܗ̇ ܡܲܠܟ̇ܘܼܬܹܗ.

⁴ܗܵܝܕܹ̇ܝܢ ܫܲܠܝܼܛܵܢܹ̈ܐ ܘܪ̈ܲܒܲܝ ܚܲܝ̈ܠܹܐ: ܒܵܥܹ̇ܝܢ ܗ̄ܘܼܵܘ ܥܸܠܬ̣ܵܐ ܕܢܸܫܟ̇ܚܘܼܢ ܥܲܠ ܕܵܢܝܼܐܹܝܠ ܡ̣ܢ ܨܒ̣ܘܼܬ̣ ܡܲܠܟ̇ܘܼܬ̣ܵܐ: ܘܟ̣ܠ ܣܲܟ̣ܠܘܼ ܘܥܸܠܵܐ ܠܵܐ ܐܸܫ̣ܟܲܚܘ ܒܵܬ̣ܪܹܗ: ܡܸܛܠ ܕܲܡܗܲܝܡܸܢ ܗ̄ܘܼܵܐ ܒܐܲܠܵܗܹܗ: ܘܣܘܼܪܚܵܢܵܐ ܘܣܲܟ̣ܠܘܼܬ̣ܵܐ ܠܵܐ ܐܸܫ̣ܟܲܚܘ ܥܠܵܘܗܝ.

⁵ܘܐܵܡ̇ܪܝܼܢ ܓܲܒ̣ܪܹ̈ܐ ܗܵܢ̇ܘܿܢ: ܠܵܐ ܡܸܫܟ̇ܚܝܼܢܲܢ ܥܲܠ ܕܵܢܝܼܐܹܝܠ ܗܵܢܵܐ ܥܸܠܬ̣ܵܐ: ܐܸܠܵܐ ܐܸܢ ܐܸܫ̣ܟܲܚܢ ܥܠܵܘܗܝ ܒܕܼܝܼܢܵܐ ܕܐܲܠܵܗܹܗ.

⁶ܗܵܝܕܹ̇ܝܢ ܩܸܪܸܒ̣ܘ ܫܲܠܝܼܛܵܢܹ̈ܐ ܘܪ̈ܲܒܲܝ ܚܲܝ̈ܠܹܐ ܠܘܵܬ̣ ܡܲܠܟܵܐ: ܘܐܵܡ̇ܪܝܼܢ ܠܹܗ: ܕܲܪܝܵܘܵܫ ܡܲܠܟܵܐ ܠܥܵܠܲܡ ܚܝܝܼ.

⁷ܐܸܬ̣ܚܲܫܲܒ̣ܘ ܟܠܗܘܿܢ ܫܲܠܝܼܛܲܝ̈ ܡܲܠܟ̇ܘܼܬ̣ܵܐ: ܘܪܵܘܪ̈ܒ̣ܵܢܹܐ ܘܪ̈ܲܒܲܝ ܚܲܝ̈ܠܹܐ ܘܡܵܪ̈ܵܘܵܬ̣ܵܐ: ܠܲܡܩܵܡܘܼ ܩܝܵܡܵܐ ܠܡܲܠܟܵܐ: ܘܲܠܡܲܫܵܪܘܼ ܐܲܣܵܪܵܐ: ܕܟ̣ܠ ܐ̄ܢܵܫ ܕܢܸܒ̣ܥܸܐ ܒܵܥܘܼ ܡ̣ܢ ܟܠ ܐܵܠܵܗ ܘܐ̄ܢܵܫ: ܥܕܲܡܵܐ ܠܝܵܘܡܝܼ̈ܢ ܬܠܵܬ̣ܝܼܢ: ܐܸܠܵܐ ܐܸܢ ܡܸܢܵܟ ܡܲܠܟܵܐ: ܢܸܫܬ̇ܕܸܐ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ.

⁸ܡܸܟܹ̇ܝܠ ܡܲܠܟܵܐ: ܬܸܦܩܘܿܕܼ ܦܘܼܩܕܵܢܵܐ ܗܵܢܵܐ: ܘܬܸܟ̣ܬ̇ܘܿܒ̣ ܟܬ̣ܵܒ̣ܵܐ: ܕܠܵܐ ܢܫܲܢܸܐ ܒܢܵܡܘܿܣ ܡܵܕܲܝ ܘܦܵܪܹܣ: ܘܠܵܐ ܢܸܬ̣ܚܲܠܲܦ.

⁹ܗܵܝܕܹ̇ܝܢ ܕܲܪܝܵܘܵܫ ܡܲܠܟܵܐ: ܪܫܲܡ ܟܬ̣ܵܒ̣ܵܐ: ܘܲܦܩܲܕܼ ܦܘܼܩܕܵܢܵܐ.

¹⁰ܘܟܲܕܼ ܝܑܼܕܲܥ̣ ܕܵܢܝܼܐܹܝܠ ܕܐܸܬ̣ܪ̱ܫܸܡ ܟܬ̣ܵܒ̣ܵܐ: ܥܲܠ̣ ܠܹܗ ܠܒܲܝܬܹ̇ܗ: ܘܟ̣ܵܘܹ̈ܐ ܦܬ̣ܝܼ̈ܚܵܝܵܢ ܗ̄ܘܲܝ̈ ܠܥܸܠܝܼܬܹܗ ܠܘܼܩܒܲܠ ܐܘܿܪܸܫܠܸܡ: ܘܲܬ̣ܠܵܬ̣ ܙܲܒ̣ܢܝܼ̈ܢ ܒܝܵܘܡܵܐ ܒܵܪܸܟ ܗ̄ܘܼܵܐ ܥܲܠ ܒܘܼܪ̈ܟܵܘܗܝ: ܘܲܡܨܲܠܸܐ ܘܡܵܘܕܸ̇ܐ ܩܕܼܵܡ ܐܲܠܵܗܹܗ: ܐܲܝܟܲܢܵܐ ܕܥܵܒܹ̇ܕܼ ܗ̄ܘܼܵܐ ܡ̣ܢ ܩܕܼܝܼܡ.

¹¹ܗܵܝܕܹ̇ܝܢ ܓܲܒ̣ܪܹ̈ܐ ܗܵܢ̇ܘܿܢ: ܢܛܲܪܘ ܘܐܸܫ̣ܟ̇ܚܘܼܗܝ ܠܕܼܵܢܝܼܐܹܝܠ: ܟܲܕܼ ܒܵܥܹ̇ܐ ܘܡܸܬ̣ܚܲܢܲܢ ܩܕܼܵܡ ܐܲܠܵܗܹܗ.

¹²ܗܵܝܕܹ̇ܝܢ ܩ̣ܪܸܒ̣ܘ ܘܐܵܡ̇ܪܝܼܢ ܩܕܼܵܡ ܡܲܠܟܵܐ: ܠܥܵܠܲܡ ܚܝܝܼ: ܠܵܐ ܦܣܵܩܵܐ ܦ̣ܣܲܩܬ̇ ܡܲܠܟܵܐ ܘܲܪܫܲܡ̣ܬ̇: ܕܟ̣ܠ ܐ̄ܢܵܫ ܕܢܸܒ̣ܥܸܐ ܒܥܵܘܼ ܡ̣ܢ ܟܠ ܐܵܠܵܗ ܘܐ̄ܢܵܫ: ܥܕܲܡܵܐ ܠܲܬ̣ܠܵܬ̣ܝܼܢ ܝܵܘܡܝܼ̈ܢ: ܐܸܠܵܐ ܐܸܢ ܡܸܢܵܟ ܡܲܠܟܵܐ: ܢܸܫܬ̇ܕܸܐ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ: ܥܢ̣ܵܐ ܡܲܠܟܵܐ ܘܐܸܡ̣ܲܪ: ܒܩܘܼܫܬܵܐ ܗ̄ܝܼ ܡܸܠܬ̣ܵܐ: ܐܲܝܟ ܢܵܡܘܿܣ ܡܵܕܲܝ ܘܦܵܪܹܣ ܕܠܵܐ ܥܵܒܲܪ.

¹³ܗܵܝܕܹܝܢ ܥܢ̣ܵܘ ܘܐܵܡܪܝܼܢ ܩܕܼܵܡ ܡܲܠܟܵܐ: ܕܵܢܝܼܐܹܝܠ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼ: ܠܵܐ ܐܲܩܝܼܡ ܥܠܲܝܟ ܘܥܲܠ ܦܣܵܩܵܐ ܕܲܦܣܲܩ̣ܬ̇: ܘܙܲܒ̣ܢܝܼ̈ܢ ܬܠܵܬ̣ ܒܵܥܹ̇ܐ ܒܵܥܘܼܬܹܗ.

¹⁴ܗܵܝܕܹ̇ܝܢ ܡܲܠܟܵܐ ܟܲܕܼ ܡܸܠܬ̣ܵܐ ܗܵܕܹܐ ܫ̣ܡܲܥ: ܣܲܓ̇ܝܼ ܟܸܪܝܲܬ̤ ܠܹܗ: ܘܣܵܡ̣ ܒܪܸܥܝܵܢܹܗ ܕܲܢܦܲܨܹܝܘܗܝ ܠܕܼܵܢܝܼܐܹܝܠ: ܘܲܥܕܲܡܵܐ ܠܡܲܥܪ̈ܵܒܲܝ ܫܸܡܫܵܐ ܡܸܬ̣ܟܲܬܲܫ ܗ̄ܘܼܵܐ ܕܲܢܦܲܨܝܘܗܝ.

¹⁵ܗܵܝܕܹ̇ܝܢ ܓܲܒ̣ܪܹ̈ܐ ܗܵܢ̇ܘܿܢ: ܐܲܪܝܼܒ̣ܘ ܥܲܠ ܡܲܠܟܵܐ: ܘܐܵܡ̇ܪܝܼܢ ܠܹܗ: ܕܲܥ ܡܲܠܟܵܐ: ܕܢܵܡܘܿܣܵܐ ܐܝܼܬ̣ ܠܡܵܕܲܥ ܘܲܠܦܵܪܸܣ: ܕܟ̣ܠ ܦܣܵܩ ܘܲܩܝܵܡ ܕܲܢܩܝܼܡ ܡܲܠܟܵܐ ܠܵܐ ܢܫܲܢܸܐ.

¹⁶ܗܵܝܕܹ̇ܝܢ ܐܸܡܲܪ ܡܲܠܟܵܐ: ܘܐܲܝܬ̇ܝܘܼܗܝ ܠܕܼܵܢܝܼܐܹܝܠ ܘܐܲܪܡܝܘܼܗܝ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ: ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܐܲܠܵܗܵܟ ܕܐܲܢ̄ܬ̇ ܦܵܠܲܚ ܐܲܢ̄ܬ̇ ܠܹܗ ܐܲܡܝܼܢܵܐܝܼܬ̣ ܗ̤ܘ ܢܫܵܘܙܒ̣ܵܟ.

¹⁷ܘܐܲܝܬ̇ܝܼܘ ܟܹܐܦܵܐ ܚܕܼܵܐ: ܘܣܵܡ̣ܘ ܥܲܠ ܦܘܼܡܹܗ ܕܓ̣ܘܼܒܵܐ: ܘܚܲܬ̣ܡܹܗ ܡܲܠܟܵܐ ܒܥܸܙܲܩܬܹܗ ܘܲܒ̣ܥܸܙܩܲܬ̣ ܪܵܘܪ̈ܒ̣ܵܢܵܘܗܝ: ܕܠܵܐ ܬܫܲܢܸܐ ܨܒ̣ܘܼ ܒܕܼܵܢܝܼܐܹܝܠ.

¹⁸ܗܵܝܕܹ̇ܝܢ ܐܸܙܲܠ̣ ܡܲܠܟܵܐ ܠܒܲܝܬܹ̇ܗ ܘܒ̣ܵܬ̣ ܛܘܵܬ̣: ܘܡܹܐܟ̣ܘܼܠܬܵܐ ܠܵܐ ܐܲܥܸܠ̣ܘ ܩܕܼܵܡܵܘܗܝ: ܘܫܸܢܬܸܗ ܦܸܪܕܲܬ̣ ܡܸܢܹܗ.

¹⁹ܗܵܝܕܹ̇ܝܢ ܡܲܠܟܵܐ ܒܨܲܦܪܵܐ ܩܵܡ̣ ܡܣܲܪܗܒ̣ܵܐܝܼܬ̣: ܘܒܲܥܓܲܠ ܠܓ̣ܘܼܒܵܐ ܕܐܲܪ̈ܝܵܘܵܬ̣ܵܐ ܐܸܙܲܠ̣.

²⁰ܘܟܲܕܼ ܩ̣ܪܸܒ̣ ܠܓ̣ܘܼܒܵܐ: ܠܕܼܵܢܝܼܐܹܝܠ ܒܩܵܠܵܐ ܪܵܡܵܐ ܩ̣ܪܵܐ: ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܕܵܢܝܼܐܹܝܠ ܥܲܒ̣ܕܹ̇ܗ ܕܐܲܠܵܗܵܐ ܚܲܝܵܐ: ܐܲܠܵܗܵܟ ܕܐܲܢ̄ܬ̇ ܦܵܠܲܚ ܠܹܗ ܐܲܡܝܼܢܵܐܝܼܬ̣: ܐܸܫ̣ܟܲܚ ܦܲܨܝܵܟ ܡ̣ܢ ܐܲܪ̈ܝܵܘܵܬ̣ܵܐ.

²¹ܗܵܝܕܹ̇ܝܢ ܕܵܢܝܼܐܹܝܠ ܥܲܡ ܡܲܠܟܵܐ ܡܲܠܸܓ̣: ܘܐܸܡܲܪ: ܡܲܠܟܵܐ ܠܥܵܠܲܡ ܚܝܝܼ.

²²ܐܲܠܵܗܝ ܫܲܕܲܪ ܡܲܠܲܐܟܹܗ: ܘܣܲܟܲܪ ܦܘܼܡܗܘܿܢ ܕܐܲܪ̈ܝܵܘܵܬ̣ܵܐ ܘܠܵܐ ܚܲܒ̇ܠ̣ܘܼܢܝ: ܡܸܛܠ ܕܙܵܟ̣ܘܼܬ̣ܵܐ ܩܕܼܵܡܵܘܗܝ ܐܸܫܬ̇ܟ̣ܚܲܬ̤ ܠܝܼ: ܘܐܵܦ ܩܕܼܵܡܲܝܟ ܡܲܠܟܵܐ ܣܲܟ̣ܠܘܼ ܠܵܐ ܥܸܒ̣ܕܹ̇ܬ̣.

²³ܗܵܝܕܹ̇ܝܢ ܥܲܠ ܡܲܠܟܵܐ ܣܲܓ̇ܝܼ ܫܦܲܪ ܥܠܵܘܗܝ: ܘܐܸܡܲܪ ܠܡܲܣܵܩܘܼܬܹܗ ܠܕܼܵܢܝܼܐܹܝܠ ܡ̣ܢ ܓܘܼܒܵܐ: ܘܐܲܣܩ̣ܘܼܗܝ ܠܕܼܵܢܝܼܐܹܝܠ ܡ̣ܢ ܓܘܼܒܵܐ: ܘܡܸܕܸ̇ܡ ܚܒ̣ܵܠܵܐ ܠܵܐ ܐܸܫܬ̇ܟܲܚ ܒܹܗ: ܡܸܛܠ ܕܲܡܗܲܝܡܸܢ ܗ̄ܘܼܵܐ ܒܐܲܠܵܗܹܗ.

²⁴ܘܐܸܡܲܪ ܡܲܠܟܵܐ: ܐܲܝܬܵܘ ܐܸܢܘܿܢ ܠܓܲܒ̣ܪܹ̈ܐ ܗܵܢ̇ܘܿܢ ܕܐܸܟܲܠܘ ܩܲܪ̈ܨܵܘܗܝ ܕܕܼܵܢܝܼܐܹܝܠ: ܘܐܲܪܡܵܘ ܐܸܢܘܿܢ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ: ܠܗܘܿܢ: ܘܲܠܢܸܫܲܝ̈ܗܘܿܢ: ܘܠܲܒ̣ܢܲܝ̈ܗܘܿܢ: ܘܐܲܪܡܝܼܘ ܐܸܢܘܿܢ ܒܓ̣ܘܼܒܵܐ: ܘܠܵܐ ܡ̣ܛܵܘ ܠܐܸܫܬܹ̇ܗ ܕܓ̣ܘܼܒܵܐ: ܘܲܫ̣ܠܲܛܘ ܒܗܘܿܢ ܐܲܪ̈ܝܵܘܵܬ̣ܵܐ ܘܟ̣ܠ ܓܲܪ̈ܡܲܝܗܘܿܢ ܕܲܩܸܩܘ.

²⁵ܗܵܝܕܹ̇ܝܢ ܕܲܪܝܵܘܵܫ ܡܲܠܟܵܐ: ܟ̣ܬܲܒ̣ ܠܟ̣ܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ ܕܥܵܡ̇ܪܝܼܢ ܒܟ̣ܠܵܗ̇ ܐܲܪܥܵܐ: ܫܠܵܡܵܐ ܢܸܣܓܸ̇ܐ ܠܟ̣ܘܿܢ.

²⁶ܡ̣ܢ ܩܕܼܵܡܲܝ ܐܸܬ̇ܬ̇ܣܝܼܡ ܢܵܡܘܿܣܵܐ: ܕܲܒ̣ܟ̣ܠ ܫܘܼܠܛܵܢ ܡܲܠܟ̇ܘܼܬ̣ܝ: ܢܸܗܘܘܿܢ ܙܵܝ̇ܥܝܼܢ ܘܕܼܵܚ̇ܠܝܼܢ ܡ̣ܢ ܩܕܼܵܡ ܐܲܠܵܗܹܗ ܕܕܼܵܢܝܼܐܹܝܠ: ܕܗ̤ܘܝܘܼ ܐܲܠܵܗܵܐ ܚܲܝܵܐ: ܘܩܲܝܵܡ ܠܥܵܠܡܝܼܢ: ܘܡܲܠܟ̇ܘܼܬܹܗ ܠܵܐ ܡܸܬ̣ܚܲܒ̇ܠܵܐ: ܘܫܘܼܠܛܵܢܹܗ ܥܕܲܡܵܐ ܠܣܵܘܦܵܐ.

²⁷ܦܵܪܹܩ ܘܲܡܫܵܘܙܸܒ̣ ܘܲܡܦܲܨܸܐ: ܘܥܵܒܹ̇ܕܼ ܐܲܬ̣̈ܘܵܬ̣ܵܐ ܘܬܸܕܼܡܪ̈ܵܬ̣ܵܐ ܒܲܫܡܲܝܵܐ ܘܒܲܐܪܥܵܐ: ܕܫܵܘܙܸܒ̣ ܠܕܼܵܢܝܼܐܹܝܠ ܡ̣ܢ ܐܲܪ̈ܝܵܘܵܬ̣ܵܐ.

²⁸ܘܕܼܵܢܝܼܐܹܝܠ ܝܑܼܪܸܒ̣ ܒܡܲܠܟ̇ܘܼܬܹܗ ܕܕܲܪܝܵܘܵܫ: ܘܲܒ̣ܡܲܠܟ̇ܘܼܬܹܗ ܕܟ̣ܘܼܪܸܫ ܦܵܪܣܵܝܵܐ.