Read Aramaic Peshita Daniel 7 Bible Online

Daniel 7 - Aramaic Peshita bible

Daniel 7

¹ܒܲܫܢܲܬ̣ ܚܕܼܵܐ ܠܒܹܠܛܫܵܨܲܪ ܡܲܠܟܵܐ ܕܒ̣ܵܒܹܠ: ܕܵܢܝܼܐܹܝܠ ܚܸܠܡܵܐ ܚܙ̣ܵܐ: ܘܚܸܙ̈ܘܲܝ ܪܹܫܹܗ ܥܲܠ ܡܲܫܟ̇ܒܹܗ: ܗܵܝܕܹ̇ܝܢ ܚܸܠܡܵܐ ܟ̣ܬܲܒ̣ ܘܪܹܫ ܡܸܠܵܘ̈ܗܝ ܐܸܡܲܪ.

²ܥܢ̣ܵܐ ܕܵܢܝܼܐܹܝܠ ܘܐܸܡܲܪ: ܚܵܙܹ̇ܐ ܗ̄ܘܹ̇ܝܬ̣ ܒܚܸܙܘܵܐ ܕܠܸܠܝܵܐ: ܘܗܵܐ ܐܲܪܒܲܥ ܪ̈ܘܼܚܲܝ ܫܡܲܝܵܐ ܡܓ̣ܝܼ̈ܚܵܢ ܠܝܲܡܵܐ ܪܲܒܵܐ.

³ܘܐܲܪܒܲܥ ܚܲܝ̈ܘܵܢ ܪܵܘܪ̈ܒ̣ܵܢ ܣܵܠ̈ܩܵܢ ܡ̣ܢ ܝܲܡܵܐ: ܘܲܡܫܲܓ̣ܢ̱̈ܝܵܢ ܚܕܼܵܐ ܡ̣ܢ ܚܕܼܵܐ.

⁴ܩܲܕܼܡܵܝܬܵܐ ܐܲܝܟ ܐܲܪܝܵܐ: ܘܓܸܦܹ̈ܐ ܕܢܸܫܪܵܐ ܐܝܼܬ̣ ܠܵܗ̇: ܚܵܙܹ̇ܐ ܗ̄ܘܹ̇ܝܬ̣ ܕܐܸܬ̣ܡܲܪܲܛܘ ܓܸܦܹܝ̈ܗ̇: ܘܐܸܬ̇ܬ̇ܪܝܼܡܲܬ̤ ܡ̣ܢ ܐܲܪܥܵܐ: ܘܥܲܠ ܪܸ̈ܓ̣ܠܹܝܗ̇ ܐܲܝܟ ܐ̄ܢܵܫܵܐ ܩܵܡܲܬ̤: ܘܠܸܒܵܐ ܕܐ̄ܢܵܫܵܐ ܐܸܬ̣̱ܝܼܗܸܒ̣ ܠܵܗ̇.

⁵ܘܚܲܝ̄ܘܬ̣ܵܐ ܕܬܲܪܬܹ̇ܝܢ ܕܵܡ̇ܝܵܐ ܠܕܸܒܵܐ: ܘܲܠܚܲܕܼܣܛܲܪ ܩܵܡܲܬ̤: ܘܲܬ̣ܠܵܬ̣ ܐܸܠܥܝܼ̈ܢ ܒܦܘܼܡܵܗ̇ ܒܹܝܬ̣ ܫܸܢܹܝ̈ܗ̇: ܘܗܵܟܲܢܵܐ ܐܵܡ̇ܪܝܼܢ ܠܵܗ̇: ܩܘܼܡܝ ܐܲܟ̣ܘܿܠܝ ܒܸܣܪܵܐ ܣܲܓ̇ܝܼܐܵܐ.

⁶ܒܵܬܲܪ ܗܵܠܹܝܢ ܚܵܙܹ̇ܐ ܗܘܹ̇ܝܬ̣ ܚܲܝ̄ܘܬ̣ܵܐ ܐ̄ܚܪܹܬ̣ܵܐ ܐܲܝܟ ܢܸܡܪܵܐ: ܘܐܝܼܬ̣ ܠܵܗ̇ ܓܸܦܹ̈ܐ ܐܲܪܒ̇ܥܵܐ ܕܦܵܪܲܚܬ̣ܵܐ ܥܲܠ ܓܲܒܹ̇ܝ̈ܗ̇: ܘܐܲܪܒ̇ܥܵܐ ܪܹ̈ܫܝܼܢ ܐܝܼܬ̣ ܠܵܗ̇ ܠܚܲܝ̄ܘܬ̣ܵܐ ܗܵܝ̇: ܘܫܘܼܠܛܵܢܵܐ ܐܸܬ̣̱ܝܼܗܸܒ̣ ܠܵܗ̇.

⁷ܒܵܬܲܪ ܗܵܠܹܝܢ: ܚܵܙܹ̇ܐ ܗ̄ܘܹ̇ܝܬ̣ ܒܚܸܙܘܵܐ ܕܠܸܠܝܵܐ: ܚܲܝ̄ܘܼܬ̣ܵܐ ܪܒ̣ܝܼܥܬܵܐ: ܕܚܝܼܠܵܐ ܘܥܲܫܝܼܢܵܐ: ܘܬܲܩܝܼܦܵܐ ܝܲܬ̇ܝܼܪܵܐܝܼܬ̣ ܘܫܸܢܹ̈ܐ ܪܵܘܪ̈ܒ̣ܵܬ̣ܵܐ ܕܦܲܪܙܠܵܐ ܐܝܼܬ̣ ܠܵܗ̇: ܐܵܟ̣ܠܵܐ ܘܡܲܕ̇ܩܵܐ: ܘܡܸܕܹ̇ܡ ܕܡܵܘܬ̇ܪܵܐ ܒܪܸ̈ܓ̣ܠܹܝܗ̇ ܕܵܝ̇ܫܵܐ: ܘܗ̤ܝ ܡܫܲܓܢ̱ܝܵܐ ܡ̣ܢ ܟܠܗܹܝܢ ܚܲܝ̈ܘܵܬ̣ܵܐ ܕܲܩܕܼܵܡܹܝܗ̇: ܘܩܲܪ̈ܢܵܬ̣ܵܐ ܥܣܲܪܐܝܼܬ̣ ܠܵܗ̇.

⁸ܘܡܸܣܬܲܟܲܠ ܗ̄ܘܹ̇ܝܬ̣ ܒܩܲܪ̈ܢܵܬ̣ܵܗ̇: ܘܩܲܪܢܵܐ ܚܕܼܵܐ ܙܥܘܿܪܬܵܐ ܣܸܠܩܲܬ̤ ܡ̣ܢ ܒܲܝܢܵܬ̣ܗܹܝܢ: ܘܲܬ̣ܠܵܬ̣ ܡ̣ܢ ܩܲܪ̈ܢܵܬ̣ܵܐ ܩܲܕܼ̈ܡܵܝܵܬ̣ܵܐ ܐܸܬ̣ܥ̱ܩܲܪ ܡ̣ܢ ܩܕܼܵܡܹܝܗ̇: ܘܥܲܝܢܹ̈ܐ ܐܲܝܟ ܥܲܝܢܲܝ̈ ܒܲܪܢܵܫܵܐ ܒܩܲܪܢܵܐ ܗܵܝ̇: ܘܦܘܼܡܵܗ̇ ܡܡܲܠܸܠ ܪܵܘܪ̈ܒ̣ܵܬ̣ܵܐ.

⁹ܚܵܙܹ̇ܐ ܗ̄ܘܹ̇ܝܬ̣ ܟܘܼܪ̈ܣܵܘܵܬ̣ܵܐ ܐܸܬ̇ܬ̇ܣܝܼܡܘ: ܘܥܲܬ̇ܝܼܩ ܝܵܘ̈ܡܵܬ̣ܵܐ ܝܑܼܬܸܒ̣: ܠܒ̣ܘܼܫܹܗ ܐܲܝܟ ܬܲܠܓܵܐ ܚܸܘܵܪܵܐ: ܘܣܲܥܪܵܐ ܕܪܹܫܹܗ ܐܲܝܟ ܥܲܡܪܵܐ ܕܲܟ̣ܝܵܐ: ܟܘܼܪܣܝܹܗ ܫܲܠܗܹܒ̣ܝܼܬ̣ܵܐ ܕܢܘܼܪܵܐ: ܘܓ̣ܝܼܓ̣ܠܵܘ̈ܗܝ ܕܢܘܼܪܵܐ ܝܵܩܹܕ̇ܬܵܐ.

¹⁰ܢܲܗܪܵܐ ܕܢܘܼܪܵܐ ܪܵܕܹܐ ܘܢܵܦܹ̇ܩ ܡ̣ܢ ܩܕܼܵܡܵܘܗܝ: ܐܵܠܹܦ ܐܲܠܦܝܼ̈ܢ ܡܫܲܡܫܝܼܢ ܠܹܗ: ܘܪܸܒ̇ܘܿ ܪܸ̈ܒ̇ܘܵܢ ܩܵܝ̇ܡܝܼܢ ܩܕܼܵܡܵܘܗܝ: ܕܲܝܵܢܵܐ ܝܑܼܬܸܒ̣: ܘܣܸܦܪܹ̈ܐ ܐܸܬ̣ܦܬܲܚܘ.

¹¹ܚܵܙܹ̇ܐ ܗ̄ܘܹ̇ܝܬ̣ ܕܐܸܬ̣ܩܲܠܠܹܬ̤ ܚܲܝ̄ܘܬ̣ܵܐ ܗܵܝ̇: ܘܐܸܒܲܕ ܓܘܼܫܡܵܗ̇: ܘܐܸܬ̣ܝܲܗ̄ܒܲܬ̤ ܠܝܲܩܕܵܢܵܐ ܕܢܘܼܪܵܐ.

¹²ܘܫܲܪܟ̇ܗܹܝܢ ܕܚܲܝ̈ܘܵܬ̣ܵܐ ܐܸܫܬ̇ܩܸܠ ܡ̣ܢ ܫܘܼܠܛܵܢܗܹܝܢ: ܘܢܘܼܓ̣ܪܵܐ ܘܚܲܝܹ̈ܐ ܐܸܬ̣ܝܼܗܸܒ̣ ܠܗܹܝܢ ܥܲܕܼ ܙܒܲܢ ܘܥܸܕܵܢ.

¹³ܚܵܙܹ̇ܐ ܗ̄ܘܹ̇ܝܬ̣ ܥܲܠ ܥܢܵܢܲܝ̈ ܫܡܲܝܵܐ ܐܲܝܟ ܒܲܪ ܐ̄ܢܵܫ̈ܝܼܢ ܐܸܬ̣ܵܐ: ܘܲܡ̣ܛܵܐ ܥܕܲܡܵܐ ܠܥܬ̇ܝܼܩ ܝܵܘ̈ܡܵܬ̣ܵܐ: ܘܲܩܕܼܵܡܵܘܗܝ ܩܲܪܒ̣ܘܼܗܝ.

¹⁴ܘܠܹܗ ܝܲܗ̄ܒ̣ ܫܘܼܠܛܵܢܵܐ: ܘܐܝܼܩܵܪܵܐ ܘܡܲܠܟ̇ܘܼܬ̣ܵܐ: ܕܟ̣ܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ ܠܹܗ ܢܸܦ̱ܠܚܘܼܢ: ܫܘܼܠܛܵܢܹܗ ܫܘܼܠܛܵܢ ܥܵܠܲܡ ܘܠܵܐ ܥܵܒܲܪ: ܘܡܲܠܟ̇ܘܼܬܹܗ ܠܵܐ ܡܸܬ̣ܚܲܒ̇ܠܵܐ.

¹⁵ܐܸܬ̣ܟܲܪܝܲܬ̤ ܪܘܼܚܝ ܐܸܢܵܐ ܕܵܢܝܼܐܹܝܠ ܒܓܼܵܘ ܡܲܫܟܲܒ̣ܝ: ܘܚܸܙ̈ܘܲܝ ܪܹܫܝ ܕܲܠܚܘܼܢܝ.

¹⁶ܘܩܸܪܒܹ̇ܬ̣ ܠܘܵܬ̣ ܚܲܕܼ ܡ̣ܢ ܡܫܲܡܫܵܢܹ̈ܐ: ܘܥܲܠ ܫܪܵܪܵܐ ܥܲܩܸܒ̣ܬܹ̇ܗ ܥܲܠ ܗܵܠܹܝܢ ܟܠܗܹܝܢ: ܘܐܸܡܲܪ ܠܝܼ ܒܲܫܪܵܪܵܐ: ܘܲܦܫܵܪ ܡܸܠܲܝ̈ ܐܵܘܕ̇ܥܲܢܝ.

¹⁷ܘܐܸܡܲܪ ܠܝܼ: ܗܵܠܹܝܢ ܚܲܝ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܐܲܪܒܲܥ ܕܲܚ̣ܙܲܝܬ̇: ܐܲܪܒ̇ܥܵܐ ܡܲܠܟ̇ܝܼ̈ܢ ܢܩܘܼܡܘܿܢ ܡ̣ܢ ܐܲܪܥܵܐ.

¹⁸ܘܲܢܩܲܒ̇ܠܘܼܢ ܡܲܠܟ̇ܘܼܬ̣ܵܐ ܩܲܕ̇ܝܼܫܹ̈ܐ ܕܲܡܪܲܝܡܵܐ: ܘܢܹܐܪܬ̇ܘܼܢܵܗ̇ ܠܡܲܠܟ̇ܘܼܬ̣ܵܐ ܠܥܵܠܲܡ ܘܲܠܥܵܠܲܡ ܥܵܠܡܝܼܢ.

¹⁹ܗܵܝܕܹ̇ܝܢ ܨܒܹ̇ܝܬ̣ ܠܲܡܥܲܩܵܒ̣ܘܼ ܥܲܠ ܚܲܝ̄ܘܬ̣ܵܐ ܪܒ̣ܝܼܥܵܝܬܵܐ: ܕܲܡܫܲܓܢ̱ܝܵܐ ܗ̄ܘܼܵܬ̣ ܡ̣ܢ ܟܠܗܹܝܢ: ܘܲܕܼܚܝܼܠܵܐ ܪܵܘܪܒ̣ܵܐܝܼܬ̣: ܫܸܢܹ̈ܝܗ̇ ܕܦܲܪܙܠܵܐ: ܘܛܸܦܪܹ̈ܝܗ̇ ܕܲܢܚܵܫܵܐ: ܐܵܟ̣ܠܵܐ ܘܡܲܕ̇ܩܵܐ: ܘܡܸܕܸ̇ܡ ܕܡܵܘܬ̇ܪܵܐ ܒܪܸ̈ܓ̣ܠܹܝܗ̇ ܕܵܝ̇ܫܵܐ.

²⁰ܘܥܲܠ ܩܲܪ̈ܢܵܬ̣ܵܐ ܥܣܲܪ ܕܲܒ̣ܪܹܫܵܗ̇: ܘܥܲܠ ܐ̄ܚܪܹܬ̣ܵܐ ܕܣܸܠܩܲܬ̤ ܡ̣ܢ ܒܲܝܢܵܬ̣ܗܹܝܢ:ܘܲܢܦܲܠ ܡ̣ܢ ܩܕܼܵܡܹܝܗ̇ ܬܠܵܬ̣: ܘܩܲܪܢܵܐ ܗܵܝ̇ ܥܲܝܢܹ̈ܐ ܐܝܼܬ̣ ܠܵܗ̇: ܘܦܘܼܡܵܗ̇ ܡܡܲܠܸܠ ܪܵܘܪ̈ܒ̣ܵܢ: ܘܚܸܙܘܵܗ̇ ܪܲܒ̇ ܡ̣ܢ ܕܚܲܒ̣ܪ̈ܵܬ̣ܵܗ̇.

²¹ܚܵܙܹ̇ܐ ܗ̄ܘܹ̇ܝܬ̣ ܩܲܪܢܵܐ ܗܝ̇ ܥܵܒ̣ܕܵܐ ܩܪܵܒ̣ܵܐ ܥܲܡ ܩܲܕ̇ܝܼܫܹ̈ܐ: ܘܡܲܨܝܵܐ ܚܲܝܠܗܘܿܢ.

²²ܥܕܲܡܵܐ ܕܐܸܬ̣ܵܐ ܥܲܬ̇ܝܼܩ ܝܵܘ̈ܡܵܬ̣ܵܐ: ܘܕܼܝܼܢܵܐ ܝܲܗ̄ܒ̣ ܠܩܲܕ̇ܝܼܫܹ̈ܐ ܕܲܡܪܲܝܡܵܐ: ܘܙܲܒ̣ܢܵܐ ܡ̣ܛܵܐ: ܘܡܲܠܟ̇ܘܼܬ̣ܵܐ ܝܑܼܪܸܬ̣ܘ ܩܲܕ̇ܝܼܫܹ̈ܐ.

²³ܘܗܵܟܲܢܵܐ ܐܸܡܲܪ ܠܝܼ: ܚܲܝ̄ܘܬ̣ܵܐ ܪܒ̣ܝܼܥܵܝܬܵܐ: ܡܲܠܟ̇ܘܼܬ̣ܵܐ ܪܒ̣ܝܼܥܵܝܬܵܐ ܬܸܗܘܹܐ ܒܐܲܪܥܵܐ: ܘܬܸܬ̣ܝܲܬܲܪ ܥܲܠ ܟܠܗܹܝܢ ܡܲܠܟ̈ܘܵܬ̣ܵܐ: ܘܬܹܐܟ̣ܘܿܠ ܐܲܪܥܵܐ ܟܠܵܗ̇ ܘܲܬ̇ܕܼܘܼܫܝܼܗ̇ ܘܬܲܕ̇ܩܝܼܗ̇.

²⁴ܘܩܲܪ̈ܢܵܬ̣ܵܐ ܥܣܲܪ: ܡ̣ܢ ܡܲܠܟ̇ܘܼܬ̣ܵܐ ܥܸܣܪܵܐ ܡܲܠܟ̇ܝܼ̈ܢ ܢܩܘܼܡܘܼܢ: ܘܐܲܚܪܹܢܵܐ ܢܩܘܼܡ ܒܵܬܲܪܗܘܿܢ: ܘܗ̤ܘ ܢܸܬ̣ܝܲܬܲܪ ܡ̣ܢ ܩܲܕܼܡܵܝܹ̈ܐ: ܘܲܬ̣ܠܵܬ̣ܵܐ ܡܲܠܟ̇ܝܼ̈ܢ ܢܡܲܟܸ̇ܟ.

²⁵ܘܡܸܠܹ̈ܐ ܥܲܠ ܡܪܲܝܡܵܐ ܢܡܲܠܸܠ: ܘܥܲܠ ܩܲܕ̇ܝܼܫܹ̈ܐ ܕܲܡܪܲܝܡܵܐ ܢܸܟ̣ܠܵܐ: ܘܢܸܣܒܲܪ ܠܲܡܚܲܠܵܦܘܼ ܙܲܒ̣ܢܹ̈ܐ ܘܢܵܡܘܿܣܹ̈ܐ: ܘܢܸܬ̣ܝܲܗ̄ܒ̇ܘܼܢ ܒܐܝܼܕܹܗ: ܥܲܕܼ ܥܸܕܵܢ ܥܸܕܵܢܝܼ̈ܢ: ܘܦܸܠܓ̇ܘܼܬ̣ ܥܸܕܵܢ.

²⁶ܘܕܲܝܵܢܵܐ ܝܑܼܬܸܒ̣ ܘܫܘܼܠܛܵܢܹܗ ܫܩܲܠ̣ܘ ܡܸܢܹܗ: ܕܲܢܚܲܒ̇ܠܘܼܢܹܗ ܘܢܵܘܒ̇ܕܼܘܼܢܹܗ ܥܕܲܡܵܐ ܠܣܵܘܦܵܐ ܕܡܲܠܟ̇ܘܼܬ̣ܵܐ.

²⁷ܘܫܘܼܠܛܵܢܵܐ ܘܪܲܒ̇ܘܼܬ̣ܵܐ ܘܡܲܠܟ̇ܘܼܬ̣ܵܐ ܕܲܬ̣ܚܹܝܬ̣ ܫܡܲܝܵܐ: ܐܸܬ̣ܝܲܗ̄ܒܲܬ̤ ܠܥܲܡܵܐ ܩܲܕ̇ܝܼܫܵܐ ܕܲܡܪܲܝܡܵܐ: ܡܲܠܟ̇ܘܼܬܹܗ ܡܲܠܟ̇ܘܼܬ̣ ܥܵܠܲܡ: ܘܟ̣ܠ ܫܘܼܠܛܵܢܝܼ̈ܢ ܠܹܗ ܢܸܦ̱ܠܚܘܼܢ ܘܢܸܫܬܲܡܥܘܼܢ.

²⁸ܥܕܲܡܵܐ ܠܗܵܪܟܵܐ ܣܵܘܦܵܗ̇ ܕܡܸܠܬ̣ܵܐ: ܐܸܢܵܐ ܕܵܢܝܼܐܹܝܠ ܣܲܓ̇ܝܼ ܪܸ̈ܥܝܵܢܲܝ ܕܲܠܚ̣ܘܼܢܝ: ܘܙܝܼܘܲܝ̈ ܐܸܫܬܲܢܝܼܘ ܥܠܲܝ: ܘܡܸܠܬ̣ܵܐ ܒܠܹܒ̇ܝ ܢܸܛ̇ܪܹܬ̣.