Read Aramaic Peshita Daniel 8 Bible Online

Daniel 8 - Aramaic Peshita bible

Daniel 8

¹ܒܲܫܢܲܬ̣ ܬܠܵܬ̣ ܕܡܲܠܟ̇ܘܼܬܹܗ ܕܒܹܠܛܫܵܨܲܪ ܡܲܠܟܵܐ: ܚܸܙܘܵܐ ܐܸܬ̣ܚ̄ܙܝܼ ܠܝܼ ܐܸܢܵܐ ܕܵܢܝܼܐܹܝܠ: ܡ̣ܢ ܒܵܬܲܪ ܚܸܙܘܵܐ ܩܲܕܼܡܵܝܵܐ ܕܐܸܬ̣ܚ̄ܙܝܼ ܠܝܼ.

²ܚܙܹ̇ܝܬ̣ ܒܚܸܠܡܝ: ܕܲܒ̣ܫܘܿܫܲܢ ܗ̄ܘܹ̇ܝܬ̣ ܒܝܼܪܬܵܐ ܕܲܒ̣ܥܝܼܠܲܡ ܡܕܼܝܼܢ̄ܬܵܐ: ܘܲܚܙܹ̇ܝܬ̣ ܒܚܸܠܡܝ: ܕܩܵܐܹ̇ܡ ܐ̄ܢܵܐ ܥܲܠ ܐܵܒ̣ܘܿܠ ܐܘܿܠܲܝ.

³ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܕܸܟ̣ܪܵܐ ܚܲܕܼ ܩܵܐܹ̇ܡ ܐܵܒ̣ܘܿܠ: ܘܐܝܼܬ̣ ܠܹܗ ܩܲܪ̈ܢܵܬ̣ܵܐ: ܘܩܲܪ̈ܢܵܬܹܗ ܪ̈ܵܡܵܢ: ܘܲܚܕܼܵܐ ܪܵܡܵܐ ܡ̣ܢ ܚܒܲܪܬ̣ܵܗ̇: ܘܗܵܝ̇ ܪܵܡܬ̣ܵܐ ܐ̄ܚܪܵܝܑܬ̣ ܝܼܥܵܬ̤.

⁴ܚܙܹ̇ܝܬ̣ ܕܸܟ̣ܪܵܐ ܡܕܲܩܲܪ ܠܡܲܥܡ̱ܪܒ̣ܵܐ: ܘܲܠܓܲܪܒ̇ܝܵܐ: ܘܲܠܬܲܝܡܢܵܐ: ܘܟ̣ܠܗܹܝܢ ܚܲܝ̈ܘܵܬ̣ܵܐ ܠܵܐ ܩܵܝ̈ܡܵܢ ܩܕܼܵܡܵܘܗܝ: ܘܠܲܝܬ̇ ܕܡܸܫܬܵܘܙܲܒ̣ ܡ̣ܢ ܐܝܼܕܼܵܘ̈ܗܝ: ܘܲܥ̣ܒܲܕܼ ܐܲܝܟ ܕܲܨܒ̣ܵܐ ܘܐܸܬ̇ܬ̇ܪܝܼܡ.

⁵ܘܐܸܢܵܐ ܡܸܬ̣ܒܲܝܲܢ ܗ̄ܘܹ̇ܝܬ̣: ܘܨܸܦܪܵܝܵܐ ܕܥܸܙܹ̈ܐ ܐܸܬ̣ܵܐ ܡ̣ܢ ܡܲܥ̱ܪܒ̣ܵܐ ܥܲܠ ܐܲܦܲܝ̈ ܟܠܵܗ̇ ܐܲܪܥܵܐ: ܘܠܵܐ ܢܵܟܹ̇ܐ ܗ̄ܘܼܵܐ ܒܐܲܪܥܵܐ: ܘܨܸܦܪܵܝܵܐ ܩ̣ܪܢܵܐ ܡܸܬ̣ܚܲܙܝܵܐ ܒܹܝܬ̣ ܥܲܝܢܵܘ̈ܗܝ.

⁶ܘܐܸܬ̣ܵܐ ܘܲܡܛ̣ܵܐ ܥܕܲܡܵܐ ܠܕܸܟ̣ܪܵܐ ܗܵܘܿ ܕܐܝܼܬ̣ ܠܹܗ ܩܲܪ̈ܢܵܬ̣ܵܐ: ܕܲܚ̇ܙܹܝܬ̣ ܕܩܵܐܹ̇ܡ ܩܕܼܵܡ ܐܵܒ̣ܘܿܠ: ܘܲܪܗܸܛ̣ ܥܠܵܘܗܝ ܒܚܹܐܦܹܗ.

⁷ܘܲܡ̣ܛܵܝܗܝ ܠܕܸܟ̣ܪܵܐ ܘܐܸܬ̣ܡܪܡܲܪ ܥܠܵܘܗܝ: ܘܲܡܚܵܝܗܝ ܠܕܸܟ̣ܪܵܐ ܘܬܲܒܲܪ ܠܬܲܪ̈ܬܲܝܗܹܝܢ ܩܲܪ̈ܢܵܬܹܗ: ܘܠܵܐ ܗܘ̤ܵܐ ܒܹܗ ܚܲܝܠܵܐ ܒܕܸܟ̣ܪܵܐ ܠܲܡܩܵܡ ܩܕܼܵܡܵܘܗܝ: ܘܐܲܪܡܝܹܗ ܥܲܠ ܐܲܪܥܵܐ ܘܕܼܵܫܹܗ: ܘܠܵܐ ܗܘ̤ܵܐ ܕܲܡܦܲܨܸܐ ܠܹܗ ܠܕܸܟ̣ܪܵܐ ܡ̣ܢ ܐܝܼܕܵܘ̈ܗܝ ܕܨܸܦܪܵܝܵܐ ܕܥܸܙܹ̈ܐ.

⁸ܘܨܸܦܪܵܝܵܐ ܕܥܸܙܹ̈ܐ ܪܒ̣ܵܐ ܣܲܓ̇ܝܼ: ܘܟܲܕܼ ܥ̣ܫܸܢ ܐܸܬ̇ܬ̇ܒ̣ܪܲܬ̤ ܩܲܪܢܹܗ ܪܲܒ̇ܬ̣ܵܐ: ܘܲܣܠܸܩ ܕܡܸܬ̣ܚܲܙ̈ܝܵܢ ܐܲܪܒܲܥ ܡ̣ܢ ܬܚܘܿܬܹܝܗ̇: ܠܐܲܪܒܲܥ ܪ̈ܘܼܚܲܝ ܫܡܲܝܵܐ.

⁹ܘܡ̣ܢ ܚܕܼܵܐ ܡܸܢܗܹܝܢ ܢܸܦܩܲܬ̤ ܩܲܪܢܵܐ ܚܕܼܵܐ ܙܥܘܿܪܬܵܐ: ܘܲܪܒ̣ܵܬ̤ ܝܲܬ̇ܝܼܪܵܐܝܼܬ̣ ܠܬܲܝܡܢܵܐ: ܘܲܠܡܲܕܼܢ̱ܚܵܐ.

¹⁰ܘܲܪܒ̣ܵܬ̤ ܥܕܲܡܵܐ ܠܚܲܝ̈ܠܹܐ ܕܲܫܡܲܝܵܐ: ܘܐܲܦܠܲܬ̤ ܐܲܪܥܵܐ: ܘܡ̣ܢ ܚܲܝ̈ܠܹܐ: ܘܡ̣ܢ ܟܵܘ̈ܟ̇ܒܹ̈ܐ: ܘܕܼܵܫܲܬ̤ ܐܸܢܘܿܢ.

¹¹ܘܲܥܕܲܡܵܐ ܠܪ̈ܲܒܲܝ ܚܲܝ̈ܠܹܐ ܡܛܵܬ̤: ܘܡܸܢܹܗ ܐܲܪܝܼܡ ܐܲܡܝܼܢܘܼܬ̣ܵܐ: ܘܲܫ̣ܪܵܐ ܡܲܬ̣ܩܲܢ ܡܲܩܕ̇ܫܹܗ.

¹²ܘܚܲܝܠܵܐ ܐܸܬ̣̱ܝܼܗܸܒ̣ ܥܲܠ ܐܲܡܝܼܢܘܼܬ̣ܵܐ ܒܚܵܘ̈ܒܹ̇ܐ: ܘܐܸܫܬ̇ܕܼܝܼ ܩܘܼܕܼܫܵܐ ܥܲܠ ܐܲܪܥܵܐ ܘܲܥ̣ܒܲܪ ܘܐܲܨܠܲܚ.

¹³ܘܫܸܡ̇ܥܹܬ̣ ܚܲܕܼ ܩܲܕ̇ܝܼܫܵܐ ܕܲܡܡܲܠܸܠ: ܘܐܸܡ̣ܲܪ ܚܲܕܼ ܩܲܕ̇ܝܼܫܵܐ ܠܲܦܠܘܿܡܢܝܼ ܕܲܡܡܲܠܸܠ: ܥܕܲܡܵܐ ܠܐܸܡܲܬ̣ܝ ܚܸܙܘܵܐ ܕܐܲܡܝܼܢܘܼܬ̣ܵܐ: ܘܥܵܘܼܠܵܐ ܘܲܚܒ̣ܵܠܵܐ ܢܸܫܬܲܠܲܡ: ܘܩܘܼܕܼܫܵܐ ܘܚܲܝܠܵܐ ܢܸܬ̇ܬ̇ܕ̇ܝܼܫ.

¹⁴ܘܐܸܡܲܪ ܠܹܗ: ܥܲܕܼ ܪܡܸܫ ܨܦܲܪ: ܬܪܹܝܢ ܐܲܠܦ̈ܝܼܢ ܘܲܬ̣ܠܵܬ̣ܡܵܐܐ ܘܢܸܙܟܹ̇ܐ ܙܸܕܼܩܵܐ.

¹⁵ܘܟܲܕܼ ܚܙܹܝ̇ܬ̣ ܐܸܢܵܐ ܕܵܢܝܼܐܹܝܠ ܚܸܙܘܵܐ: ܒܥܹ̇ܝܬ̣ ܠܡܸܣܬܲܟܵܠܘܼ: ܘܗܵܐ ܩܵܐܹ̇ܡ ܠܘܼܩܒܲܠܝ ܐܲܝܟ ܚܸܙܘܵܐ ܕܓܲܒ̣ܪܵܐ.

¹⁶ܘܫܹܡܥܹ̇ܬ̣ ܩܵܠܵܐ ܕܐ̄ܢܵܫܵܐ ܡ̣ܢ ܒܲܝܢܵܬ̣ ܐܘܿܠܲܝ: ܕܲܩܪܵܐ ܘܐܸܡ̣ܲܪ ܓܲܒ̣ܪܝܹܠ: ܣܲܟܸ̇ܠ ܠܗܵܢܵܐ ܚܸܙܘܵܐ ܗܵܢܵܐ.

¹⁷ܘܐܸܬ̣ܵܐ ܠܘܵܬ̣ܝ ܐܲܬܲܪ ܕܩܵܐܹ̇ܡ ܐ̄ܢܵܐ: ܘܟܲܕܼ ܐܸܬ̣ܵܐ ܕܸܚܠܹܬ̣ ܘܢܸܦܠܹ̇ܬ̣ ܥܲܠ ܐܲܦܲܝ̈: ܘܐܸܡ̣ܲܪ ܠܝܼ: ܐܸܣܬܲܟܲܠ ܒܲܪܢܵܫܵܐ: ܡܸܛܠ ܕܲܠܥܸܕܵܢ ܣܵܘܦܵܐ ܚܸܙܘܵܐ ܗܵܢܵܐ.

¹⁸ܘܟܲܕܼ ܡܡܲܠܸܠ ܥܲܡܝ: ܐܸܬ̣ܓܲܪܓ̇ܚܹ̇ܬ̣ ܥܲܠ ܐܲܦܲܝ̈ ܥܲܠ ܐܲܪܥܵܐ: ܘܲܩ̣ܪܸܒ̣ ܠܝܼ ܘܐܲܩܝܼܡܲܢܝ ܥܲܠ ܩܝܵܡܝ.

¹⁹ܘܐܸܡ̣ܲܪ ܠܝܼ: ܗܵܐ ܐܸܢܵܐ ܡܚܵܘܸܐ ܐ̄ܢܵܐ ܠܵܟ: ܡܵܐ ܕܢܸܗܘܹܐ ܒܣܘܿܦ ܪܘܼܓ̣ܙܵܐ ܒܲܙܒܲܢ ܣܵܘܦܵܐ.

²⁰ܕܸܟ̣ܪܵܐ ܕܲܚ̣ܙܲܝܬ̇ ܕܐܝܼܬ̣ ܠܹܗ ܩܲܪ̈ܢܵܬ̣ܵܐ: ܡܠܸܟ ܡܵܕܲܝ ܘܦܵܪܹܣ.

²¹ܘܨܸܦܪܵܝܵܐ ܕܥܸܙܹ̈ܐ ܡܲܠܟܵܐ ܕܝܵܘ̈ܢܵܝܹܐ: ܘܩܲܪܢܵܐ ܪܲܒ̇ܬ̣ܵܐ ܕܐܝܼܬ̣ ܒܹܝܬ̣ ܥܲܝܢܵܘ̈ܗܝ: ܗ̤ܘܝܘܼ ܡܲܠܟܵܐ ܩܲܕܼܡܵܝܵܐ.

²²ܘܕܸܐܬ̇ܬܲܒ̣ܪܲܬ̤ ܘܩܵܡ̣ ܐܲܪܒܲܥ ܡ̣ܢ ܬܚܘܿܬܹܝܗ̇: ܐܲܪܒ̇ܥܵܐ ܡܲܠܟ̇ܝܼ̈ܢ ܡ̣ܢ ܥܲܡܵܐ ܢܩܘܼܡܘܿܢ ܘܠܵܐ ܒܚܲܝܠܗܘܿܢ.

²³ܘܒ̣ܣܘܿܦ ܡܲܠܟ̇ܘܼܬ̣ܗܘܿܢ ܡܵܐ ܕܲܫܠܸܡ̣ܘ ܚܵܘ̈ܒܹ̇ܐ: ܢܩܘܼܡ ܡܲܠܟܵܐ ܬܲܩܝܼܦ ܐܲܦܹ̈ܐ: ܘܡܸܣܬܲܟܲܠ ܐܘܼܚܕܵܢ.

²⁴ܘܬܲܩܝܼܦ ܚܲܝܠܹܗ: ܘܠܵܐ ܒܚܲܝܠܵܐ ܕܢܲܦ̮ܫܹܗ: ܘܬܸܕܼܡܪ̈ܵܬ̣ܵܐ ܢܚܲܒܸ̇ܠ ܘܢܲܨܠܲܚ: ܘܢܸܥܒܲܪ ܘܲܢܚܲܒܸ̇ܠ ܥܲܫܝܼܢܹ̈ܐ: ܘܥܲܡܵܐ ܕܩܲܕ̇ܝܼܫܹ̈ܐ.

²⁵ܘܒ̣ܐܘܼܚܕܵܢܹܗ ܢܲܨܠܲܚ ܢܸܟ̣ܠܵܐ ܒܐܝܼܕܹܗ: ܘܠܸܒܹ̇ܗ ܢܸܬ̇ܬ̇ܪܝܼܡ: ܘܲܒ̣ܫܸܠܝܵܐ ܢܚܲܒܸ̇ܠ ܣܲܓ̇ܝܼ̈ܐܹܐ: ܘܥܲܠ ܫܲܠܝܼܛ ܫܲܠܝܼܛܵܢܹ̈ܐ ܢܩܘܼܡ: ܘܲܒ̣ܡܹܐܚܲܕܼ ܐܝܼܕܼܵܐ ܢܸܬ̇ܬ̇ܒܲܪ.

²⁶ܘܚܸܙܘܵܐ ܕܨܲܦܪܵܐ ܘܲܕܼܪܲܡܫܵܐ ܕܐܸܬ̣ܐ̱ܡܲܪ ܩܘܼܫܬܵܐ ܗ̄ܘܼ: ܘܐܲܢ̄ܬ̇ ܕܹܝܢ ܕܵܢܝܼܐܹܝܠ: ܟܣܝܼܘܗܝ ܠܚܸܙܘܵܐ ܗܵܢܵܐ: ܡܸܛܠ ܕܲܠܝܵܘ̈ܡܵܬ̣ܵܐ ܗ̄ܘܼ ܣܲܓ̇ܝܼ̈ܐܹܐ.

²⁷ܘܐܸܢܵܐ ܕܵܢܝܼܐܹܝܠ: ܙܵܥܹ̇ܬ̣ ܘܐܸܬ̣ܕܲܠܚܹ̇ܬ̣ ܝܵܘ̈ܡܵܬ̣ܵܐ: ܘܩܵܡܹ̇ܬ̣ ܘܣܸܥ̇ܪܹܬ̣ ܥܒ̣ܝܼ̈ܕܼܵܬ̣ܵܐ ܕܡܲܠܟܵܐ: ܘܐܸܬ̇ܕܲܡ̇ܪܹܬ̣ ܒܚܸܙܘܵܐ ܘܠܲܝܬ̇ ܕܡܸܬ̣ܒܲܝܲܢ.