Read Aramaic Peshita Hosea 1 Bible Online

Hosea 1 - Aramaic Peshita bible

Hosea 1

¹ܦܸܬ̣ܓ̣ܵܡܹܗ ܕܡܵܪܝܵܐ ܕܲܗܘ̤ܵܐ ܥܲܠ ܗܘܿܫܲܥ ܒܲܪ ܒܹܪܝ: ܒܝܵܘ̈ܡܵܘܗܝ ܕܥܘܿܙܝܼܵܐ: ܘܲܕܼܝܘܿܬ̣ܵܡ: ܘܕܼܵܐܚܵܙ: ܘܲܕܼܚܹܙܲܩܝܵܐ: ܡܲܠ̈ܟܹ̇ܐ ܕܲܝܗܘܼܕܼܵܐ: ܘܲܒ̣ܝܵܘ̈ܡܵܘܗܝ ܕܝܘܿܪܲܒ̣ܥܲܡ ܒܲܪ ܝܘܿܐܵܫ ܡܲܠܟܵܐ ܕܝܼܣܪܵܝܹܠ.

²ܪܹܫ ܦܸܬ̣ܓ̣ܵܡܹܗ ܕܡܵܪܝܵܐ ܕܲܗܘ̤ܵܐ ܥܲܠ ܗܘܿܫܵܥ: ܐܸܡ̣ܲܪ ܡܵܪܝܵܐ ܠܗܘܿܫܵܥ: ܙܸܠ ܣܲܒ̣ ܠܵܟ ܐܲܢ̄ܬ̇ܬ̣ܵܐ ܕܲܡܙܲܢܝܵܐ: ܘܲܒ̣̈ܢܲܝܵܐ ܕܲܡܙܲܢܹܝܢ: ܡܸܛܠ ܕܲܡܙܲܢܵܝܘܼ ܬܙܲܢܹܐ ܐܲܪܥܵܐ ܡ̣ܢ ܒܵܬ̣ܪܹܗ ܕܡܵܪܝܵܐ.

³ܘܐܸܙܲܠ̣ ܘܲܢܣܲܒ̣ ܠܹܗ ܠܓ̣ܵܡܵܪ ܒܲܪܬ̣ ܕܒܸܠܝܵܡ: ܘܒܸܛܢܲܬ̤ ܘܝܸܠܕܲܬ̤ ܠܹܗ ܒܪܵܐ.

⁴ܘܐܸܡܲܪ ܠܹܗ ܡܵܪܝܵܐ: ܩܪܝܼ ܫܡܹܗ ܐܝܼܙܲܪܥܹܝܠ: ܡܸܛܠ ܕܥܲܕܼ ܩܲܠܝܼܠ ܬܵܒܲܥ ܐ̄ܢܵܐ ܕܡܹܗ ܕܐܝܼܙܲܪܥܹܝܠ ܥܲܠ ܒܲܝܬܵܐ ܕܝܵܗܘܿ: ܘܐܹܒܲܛܸܠ ܡܲܠܟ̇ܘܼܬ̣ܵܐ ܕܒܹܝܬ̣ ܝܑܼܣܪܵܝܹܠ.

⁵ܒܹܗ ܒܝܵܘܡܵܐ ܗܵܘܿ: ܐܸܬ̣ܒܪܝܼܗ̇ ܠܩܸܫܬܵܐ ܕܝܼܣܪܵܝܹܠ ܒܥܘܼܡܩܵܐ ܕܐܝܼܙܲܪܥܹܝܠ.

⁶ܘܒܸܛܢܲܬ̤ ܬܘܼܒ̣ ܘܝܸܠܕܲܬ̤ ܒܲܪܬ̣ܵܐ: ܘܐܸܡܲܪ ܠܝܼ ܡܵܪܝܵܐ: ܩܪܝܼ ܫܡܵܗ̇ ܠܵܐ ܐܸܬ̣ܪܲܚܡܲܬ̤: ܡܸܛܠ ܕܠܵܐ ܡܵܘܣܸܦ ܐ̄ܢܵܐ ܬܘܼܒ̣ ܠܲܡܪܲܚܵܡܘܼ ܥܲܠ ܕܒܹܝܬ̣ ܝܑܼܣܪܵܝܹܠ: ܐܸܠܵܐ ܡܸܫܩܲܠ ܫܵܩܹ̇ܠ ܐ̄ܢܵܐ ܠܗܘܿܢ.

⁷ܥܲܠ ܒܲܝܬܵܐ ܕܹܝܢ ܕܲܝܗܘܼܕܼܵܐ ܐܹܪܲܚܸܡ: ܘܐܸܦܪܘܿܩ ܐܸܢܘܿܢ ܒܡܵܪܝܵܐ ܐܲܠܵܗܗܘܿܢ: ܠܵܐ ܒܩܸܫܬܵܐ ܐܸܦܪܘܿܩ ܐܸܢܘܿܢ: ܐܵܦܠܵܐ ܒܣܲܝܦܵܐ: ܐܵܦܠܵܐ ܒܲܩܪܵܒ̣ܵܐ: ܘܠܵܐ ܒܪ̈ܲܟ̣ܫܵܐ: ܐܵܦܠܵܐ ܒܦܲܪ̈ܵܫܹܐ.

⁸ܘܚܸܣܠܲܬ̤ ܠܲܕܼܠܵܐ ܐܸܬ̣ܚܡܲܬ̤: ܘܒܸܛܢܲܬ̤ ܬܘܼܒ̣ ܘܝܸܠܕܲܬ̤ ܒܪܵܐ.

⁹ܘܐܸܡܲܪ ܠܝܼ ܡܵܪܝܵܐ: ܩܪܝܼ ܫܡܹܗ ܠܵܐ ܥܲܡܝ: ܡܸܛܠ ܕܐܲܢ̄ܬ̇ܘܿܢ ܠܵܐ ܥܲܡܝ ܐܲܢ̄ܬ̇ܘܿܢ: ܘܐܸܢܵܐ ܠܵܐ ܐܸܗܘܹܐ ܠܟ̣ܘܿܢ.

¹⁰ܘܐܸܢ ܢܸܗܘܹܐ ܡܸܢܝܵܢܵܐ ܕܲܒ̣ܢܲܝ̈ ܝܑܼܣܪܵܝܹܠ ܐܲܝܟ ܚܵܠܵܐ ܕܝܲܡܵܐ: ܕܠܵܐ ܡܸܬ̇ܬ̇ܟ̣ܝܼܠ ܘܠܵܐ ܡܸܬ̣ܡ̱ܢܹܐ: ܘܢܸܗܘܹܐ ܒܐܲܬ̣ܪܵܐ ܕܐܸܬ̣̱ܐܡܲܪ ܠܗܘܿܢ ܠܵܐ ܥܲܡܝ ܐܲܢ̄ܬ̇ܘܿܢ: ܬܲܡܵܢ ܢܸܬ̣ܩܪܘܿܢ ܒ̈ܢܲܝܵܐ ܠܐܲܠܵܗܵܐ ܚܲܝܵܐ.

¹¹ܘܢܸܬ̣ܟܲܢܫܘܼܢ ܒܢܲܝ̈ ܝܑܼܗܘܼܕܼܵܐ: ܘܲܒ̣ܢܲܝ̈ ܝܑܼܣܪܵܝܹܠ ܐܲܟ̣ܚ̄ܕܼܵܐ: ܘܢܸܥܒ̇ܕܼܘܼܢ ܠܗܘܿܢ ܪܹܫܵܐ ܚܲܕܼ: ܘܢܸܣܩܘܼܢ ܡ̣ܢ ܐܲܪܥܵܐ: ܡܸܛܠ ܕܪܲܒ̇ ܗ̄ܘܼ ܝܵܘܡܵܐ ܕܐܝܼܙܲܪܥܹܝܠ.