Read Aramaic Peshita Hosea 10 Bible Online

Hosea 10 - Aramaic Peshita bible

Hosea 10

¹ܓܦܸܬܵܐ ܕܫܲܒ̇ܘܼܩܹ̈ܐ ܝܑܼܣܪܵܝܹܠ ܕܥܸܒ̣ܕܲܬ̤ ܦܹܐܪܹ̈ܐ: ܐܲܝܟ ܣܘܿܓ̣ܵܐܐ ܕܦܹܐܪܹ̈ܝܗ̇ ܐܲܣܓ̇ܝܼܘ ܡܲܕܼܒ̇ܚ̈ܐ: ܘܐܲܝܟ ܛܘܼܒ̣ܵܐ ܕܐܲܪܥ̱ܗܘܿܢ ܒܢ̣ܵܘ ܥܠܵܘܵܬ̣ܵܐ.

²ܐܸܬ̣ܦܠܸܓ̣ ܠܸܒ̇ܗܘܿܢ ܘܡ̣ܢ ܗܵܫܵܐ ܢܸܬ̣ܚܲܝܒ̣ܘܼܢ: ܗ̤ܘ ܢܸܣܚܘܿܦ ܡܲܕܼܒ̇ܚܲܝ̈ܗܘܿܢ: ܘܢܸܒ̇ܘܿܙ ܥܠܵـ̈ـܘܵܬ̣ܗܘܿܢ.

³ܡܸܛܠ ܕܡܸܟܸ̇ܝܠ ܢܹܐܡܪܘܿܢ ܠܲܝܬ̇ ܠܲܢ ܡܲܠܟܵܐ: ܡ̣ܢ ܡܵܪܝܵܐ ܠܵܐ ܕܚܸܠ̣ܢ: ܡܲܠܟܵܐ ܡܵܢܵܐ ܢܸܥܒܸ̇ܕܼ ܠܲܢ.

⁴ܡܲܠܸܠܘ ܡܸܠܹ̈ܐ ܕܥܸܠ̈ܠܵܬ̣ܵܐ ܕܲܓܵܠܵـ̈ـܬ̣ܵܐ: ܦܣܲܩ̣ܘ ܕܝܵܬܹܩܵܐ ܘܲܦܪܲܥ̣ܘ ܕܝܼܢܵܐ: ܐܲܝܟ ܝܲܥܪܵܐ ܒܚܲܩܠܵܐ ܕܐܲܪܥܵܐ ܒܲܝܵܪܬܵܐ.

⁵ܠܥܸܓ̣ܠܵܐ ܕܒܹܝܬ̣ ܐܘܿܢ ܢܸܗܘܘܿܢ ܬܵܘܬܵܒܹ̈ܐ ܥܵܡܘܿܪܹ̈ܐ ܕܫܵܡܪܹܝܢ: ܡܸܛܠ ܕܝܼܬܸܒ̣ܘ ܥܠܵܘܗܝ ܒܐܸܒ̣ܠܵܐ ܥܲܡܹܗ: ܘܟ̣ܘܼܡܪ̈ܵܘܗܝ: ܘܲܥܠܵܘܗܝ ܢܸܚܕ̇ܘܿܢ: ܘܥܲܠ ܐܝܼܩܵܪܹܗ ܕܲܥܒܲܪ ܡܸܢܹܗ.

⁶ܘܐܵܦ ܠܹܗ ܠܐܵܬ̣ܘܿܪ ܢܵܘܒ̇ܠܘܼܢ ܩܘܼܪ̈ܒܵܢܹܐ ܠܡܲܠܟܵܐ ܕܝܵܪܵܒ̣: ܒܸܗܬ̇ܬ̣ܵܐ ܢܩܲܒܸ̇ܠ ܐܲܦܪܹܝܡ: ܘܝܼܣܪܵܝܹܠ ܢܸܒ̣ܗܲܬ̣ ܒܬܲܪܥܝܼܬܹܗ.

⁷ܫܕܼܵܬ̤ ܫܵܡ̇ܪܹܝܢ ܡܲܠܟܵܗ̇ ܐܲܝܟ ܓܸܠܵܐ ܥܲܠ ܐܲܦܲܝ̈ ܡܲـ̈ـܝܵܐ.

⁸ܘܢܸܚ̱ܪ̈ܒ̣ܵܢ ܦܪ̈ܲܟܹ̇ܐ ܕܐܘܿܢ ܚܛܝܼܬܹܗ ܕܝܼܣܪܵܝܹܠ: ܟܘܼܒܹ̇ܐ ܘܕܲܪܕ̇ܪܹ̈ܐ ܢܹܐܥܘܿܢ ܒܡܲܕܼܒ̇ܚܲܝ̈ܗܘܿܢ: ܘܢܹܐܡܪܘܿܢ ܠܛܘܼܪܹ̈ܐ ܕܟܲܣܵܐܘܼܢ: ܘܲܠܪ̈ܵܡܵܬ̣ܵܐ ܕܢܸܦ̈ܠܵܢ ܥܠܲܝܗܘܿܢ.

⁹ܡ̣ܢ ܝܵܘ̈ܡܵܬ̣ܵܐ ܕܪܵܡܬ̣ܵܐ ܚ̣ܛܲܝܬ̇ ܝܑܼܣܪܵܝܹܠ: ܬܲܡܵܢ ܢܩܘܼܡܘܿܢ ܘܠܵܐ ܢܲܕܼܪܸܟ ܐܸܢܘܿܢ ܩܪܵܒ̣ܵܐ ܒܪܵܡܬ̣ܵܐ ܥܲܠ ܒܢܲـ̈ـܝܵܐ ܕܥܵܘܼܠܵܐ.

¹⁰ܒܲܟ̣ܐܵܬ̣ܝ ܐܸܪܕܸ̇ܐ ܐܸܢܘܿܢ: ܘܢܸܬ̣ܟܲܢܫܘܼܢ ܥܠܲܝܗܘܿܢ ܥܲܡܡܹ̈ܐ: ܡܵܐ ܕܡܸܬ̣ܪ̱ܕܹܝܢ ܥܲܠ ܬܲܪ̈ܬܲܝܗܹܝܢ ܣܲܟ̣ـ̈ـܠ̱ܘܵܬ̣ܗܘܿܢ.

¹¹ܐܲܦܪܹܝܡ ܥܓܸܠܬܵܐ ܡܲܠܲܦܬܵܐ ܕܪܵܚ̇ܡܵܐ ܠܡܲܕܼܪܵܟ̣ܘܼ: ܘܐܸܢܵܐ ܥܸܒ̣ܪܹܬ̣ ܥܲܠ ܨܵܘܪܵܗ̇: ܐܸܪܟܲܒ̣ ܠܐܲܦܪܹܝܡ: ܘܢܲܕܼܪܸܟ ܝܑܼܗܘܼܕܼܵܐ: ܘܢܸܒ̇ܘܿܙ ܝܲܥܩܘܿܒ̣.

¹²ܙܪܘܿܥܘ ܠܟ̣ܘܿܢ ܙܲܕ̇ܝܼܩܘܼܬ̣ܵܐ: ܘܲܚܨܘܿܕܼܘ ܦܘܼܡܵܗ̇ ܕܛܲܝܒ̇ܘܼܬ̣ܵܐ: ܐܲܢܗܲܪܘ ܠܟ̣ܘܿܢ ܫܪܵܓ̣ܵܐ: ܡܸܛܠ ܕܙܲܒ̣ܢܵܐ ܗ̄ܘܼ ܠܡܸܒ̣ܥܝܹܗ ܠܡܵܪܝܵܐ: ܥܲܕܼܐܵܬܹ̇ܐ ܘܲܡܚܵܘܸܐ ܠܟ̣ܘܿܢ ܙܲܕ̇ܝܼܩܘܼܬܹܗ.

¹³ܕܒܲܪܬ̇ܘܿܢ ܚܛܝܼܬ̣ܵܐ ܘܥܵܘܼܠܵܐ: ܘܲܚܨܲܕ̇ܬ̇ܘܿܢ ܘܐܸܟܲܠ̣ܬ̇ܘܿܢ ܦܹܐܪܹ̈ܐ ܕܕܲܓܵܠܘܼܬ̣ܵܐ ܡܸܛܠ ܕܐܸܬ̇ܬ̇ܟܸܠܬ̇ܘܿܢ ܒܐܘܼܪ̈ܚܵܬ̣ܟ̣ܘܿܢ: ܘܲܒ̣ܣܘܿܓ̣ܵܐܐ ܕܓܲܢ̄ܒܵܪܘܼܬ̣ܟ̣ܘܿܢ.

¹⁴ܢܩܘܼܡ ܐܲܒ̣ܕܵܢܵܐ ܒܥܲܡܵܟ: ܘܟ̣ܠܗܘܿܢ ܟܲܪ̈ܟܲܝܟ ܢܸܬ̣ܒܲܙܙܘܼܢ ܐܲܝܟ ܒܸܙܬ̣ܵܐ ܫܠܡܢܨܪ: ܡ̣ܢ ܒܹܝܬ̣ ܐܹܝܠ ܒܝܵܘܡܵܐ ܕܲܩܪܵܒ̣ܵܐ: ܐܸܡܵܐ ܥܲܠ ܒܢܹܝ̈ܗ̇ ܫܲܩܸܦ̣ܘ.

¹⁵ܗܵܟܲܢܵܐ ܥ̣ܒܲܕܼܘ ܠܟ̣ܘܿܢ ܒܹܝܬ̣ ܐܹܝܠ: ܡ̣ܢ ܩܕܼܵܡ ܒܝܼܫܘܼܬ̣ ܒܝܼܫܘܼܬ̣ܟ̣ܘܿܢ. ܒܫܲܦܪܵܐ ܬܘܲܪ ܘܲܒ̣ܗܸܬ̣ ܡܲܠܟܵܐ ܕܝܼܣܪܵܝܹܠ.