Read Aramaic Peshita Hosea 12 Bible Online

Hosea 12 - Aramaic Peshita bible

Hosea 12

¹ܐܲܦܪܹܝܡ ܪܥ̣ܵܐ ܪܘܼܚܵܐ: ܘܲܪܕܸܦ̣ ܥܲܠܥܵܠܵܐ ܝܵܘܡܵܐ ܟܠܹܗ: ܕܲܓܵܠܘܼܬ̣ܵܐ ܘܒܸܙܬܲܐ ܐܲܣܓ̇ܝܼܘ: ܘܲܕܼ ܝܵܬܹܩܵܐ ܥܲܡ ܐܵܬ̣ܘܿܪܵܝܵܐ ܦܣܲܩ̣ܘ: ܘܡܸܫܚܵܐ ܠܡܸܨܪܹܝܢ ܐܵܘܒܸ̇ܠܘ.

²ܘܕܼܝܼܢܵܐ ܐܝܼܬ̣ ܠܡܵܪܝܵܐ ܥܲܡ ܝܑܼܗܘܼܕܼܵܐ: ܘܢܸܬ̣ܒܲܠ ܠܝܲܥܩܘܿܒ̣ ܐܲܝܟ ܐܘܼܪ̈ܚܵܬܹܗ: ܘܐܲܝܟ ܨܸܢ̈ܥܵܬܹܗ ܢܸܦ̱ܪܥܝܼܘܗܝ.

³ܒܡܲܪܒ̇ܥܵܐ ܓܹܝܪ ܢܟܲܠ ܠܐܲܚܘܼܗܝ:ܘܲܒ̣ܥܘܼܫܢܹܗ ܐܸܬ̣ܪܵܘܪܲܒ̣ ܩܕܼܵܡ ܐܲܠܵܗܵܐ.

⁴ܘܐܸܬ̣ܡ̱ܨܝܼ ܚܹܝܠ ܡܲܠܲܐܟ̣ܵܐ ܘܲܒ̣ܥ̣ܵܐ ܡܸܢܹܗ: ܒܹܝܬ̣ ܐܹܝܠ ܐܸܫ̣ܟ̇ܚܹܗ: ܘܬܲܡܵܢ ܡܲܠܸܠ ܥܲܡܹܗ.

⁵ܘܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ ܐܸܬ̇ܕܲܟ̣ܪܹܗ.

⁶ܐܲܢ̄ܬ̇ ܕܹܝܢ ܐܸܬ̣ܦܲܢܝܼ ܠܘܵܬ̣ ܐܲܠܵܗܵܐ: ܘܛܲܝܒ̇ܘܼܬ̣ܵܐ ܘܕܼܝܼܢܵܐ ܛܲܪ: ܣܲܟܵܐ ܠܐܲܠܵܗܵܟ ܐܲܡܝܼܢܵܐܝܼܬ̣.

⁷ܡܲܣܲܐܬ̣ܵܐ ܕܢܸܟ̣ܠܵܐ ܒܐܝܼܕܹܗ ܕܲܟ̣ܢܲܥܢ: ܘܲܠܡܸܛܠܲܡ ܪܵܚܹ̇ܡ.

⁸ܘܐܸܡܲܪ ܐܲܦܪܹܝܡ ܕܥܸܬ̇ܪܹܬ̣ ܘܐܸܫܟ̇ܚܹ̇ܬ̣ ܠܝܼ ܟܹܐܒܹ̈ܐ: ܘܟ̣ܠܵܗ̇ ܠܐܹܘܲܬ̣ܝ ܠܵܐ ܣܵܦܩܵܐ ܠܝܼ ܠܲܚܛܵܗܵܐ ܕܲܚ̇ܛܹܝܬ̣.

⁹ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ ܕܐܲܣܩ̇ܬܵܟ ܡ̣ܢ ܐܲܪܥܵܐ ܕܡܸܨܪܹܝܢ: ܬܘܼܒ̣ ܐܵܘܬ̇ܒ̣ܵܟ ܒܡܲܫܟ̇ܢܹ̈ܐ ܐܲܝܟ ܝܵܘ̈ܡܵܬ̣ܵܐ ܕܥܲܕܼܥܹ̈ܕܹܐ.

¹⁰ܘܡܲܠܠܹܬ̣ ܥܲܡ ܢܒ̣ܝܹ̈ܐ: ܘܐܸܢܵܐ ܚܸܙ̈ܘܵܢܲܝ ܐܲܣܓ̇ܝܼܬ̣: ܘܒ̣ܐܝܼܕܼܵܐ ܕܲܢܒ̣ܝܹ̈ܐ ܐܸܬ̇ܕܲܡ̇ܝܼܬ̣.

¹¹ܒܓܸܠܥܵܕܼ ܟܹܐܒܹ̈ܐ ܘܲܒ̣ܓܲܠܓܵܠܵܐ ܠܲܣܪܝܼܩܘܼܬ̣ܵܐ ܕܲܒܲܚ̣ܬ̇ܘܿܢ ܬܵܘܪܹ̈ܐ: ܘܐܵܦ ܡܲܕܼܒ̇ܚܲܝ̈ܟ̇ܘܿܢ ܐܲܝܟ ܓܵܠܹ̇ܐ ܒܚܲܩܠܵܐ ܕܐܲܪܥܵܐ ܒܲܝܵܪܬܵܐ.

¹²ܘܲܥܪܲܩ̣ ܝܲܥܩܘܿܒ̣ ܠܐܲܪܥܵܐ ܕܐܵܪܵܡ: ܘܲܦܠܲܚ̣ ܝܑܼܣܪܵܝܹܠ ܚܠܵܦ ܐܲܢ̄ܬ̇ܬ̣ܵܐ: ܘܥܲܠ ܐܲܦܲܝ̈ ܐܲܢ̄ܬ̇ܬ̣ܵܐ ܢܛܲܪ.

¹³ܘܒܲܢܒ̣ܝܹ̈ܐ ܐܲܣܸܩ̣ ܡܵܪܝܵܐ ܠܝܼܣܪܵܝܹܠ ܡ̣ܢ ܡܸܨܪܹܝܢ: ܘܒܲܢܒ̣ܝܹ̈ܐ ܐܸܬ̣ܢ̱ܛܲܪ.

¹⁴ܐܲܪܓܸ̇ܙ ܐܲܦܪܹܝܡ ܘܡܲܪܡܲܪ: ܘܲܕܼܡܹܗ ܥܠܵܘܗܝ ܢܸܬ̣ܐ̱ܫܸܕܼ: ܘܚܸܣܕܹ̇ܗ ܢܦܲܢܸܐ ܠܹܗ ܡܵܪܹܗ.