Read Aramaic Peshita Hosea 13 Bible Online

Hosea 13 - Aramaic Peshita bible

Hosea 13

¹ܟܲܕܼ ܡܡܲܠܸܠ ܐܲܦܪܹܝܡ ܪܵܐܹ̇ܬ̣ ܗ̄ܘܼܵܐ: ܘܲܗܘ̤ܵܐ ܪܲܒܵܐ ܒܝܼܣܪܵܝܹܠ: ܘܐܸܬ̣ܚܲܝܲܒ̣ ܒܒܲܥܠܵܐ ܘܡܝܼܬ̣.

²ܘܗܵܫܵܐ ܐܵܘܣܸܦܘ ܠܡܸܚܛܵܐ: ܘܲܥ̣ܒܲܕܼܘ ܠܗܘܿܢ ܢܣܝܼܟ̣ܵܐ ܡ̣ܢ ܣܹܐܡܗܘܿܢ: ܒܲܕܼܡܘܼܬ̣ܗܘܿܢ ܦܬܲܟ̣ܪܵܐ ܥܒ̣ܵܕܼܵܐ ܕܢܲܓܵܪܵܐ: ܘܐܵܡ̇ܪܝܼܢ ܗ̄ܘܼܵܘ ܠܗܘܿܢ: ܕܵܒ̣ܚܲܝ̈ ܒܢܲܝ̈ܢܵܫܵܐ ܘܲܠܥܸܓ̣ܠܵܐ ܡܢܲܫܩܝܼܢ.

³ܡܸܛܠ ܗܵܢܵܐ ܢܸܗܘܘܿܢ ܐܲܝܟ ܥܢܵܢܵܐ ܕܨܲܦܪܵܐ ܘܐܲܝܟ ܛܲܠܵܐ ܕܲܡܩܲܕܸ̇ܡ ܘܥܵܒܲܪ: ܘܐܲܝܟ ܓܸܠܵܐ ܕܦܵܪܲܚ ܡ̣ܢ ܐܸܕܼܪܵܐ: ܘܐܲܝܟ ܬܸܢܵܢܵܐ ܡ̣ܢ ܟܵܘܬ̣ܵܐ.

⁴ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ ܕܐܲܣܸܩ̇ܬܵܟ ܡ̣ܢ ܐܲܪܥܵܐ ܕܡܸܨܪܹܝܢ: ܐܲܠܵܗ ܠܒܲܪ ܡܹܢܝ ܠܵܐ ܬܸܕܲܥ: ܘܠܲܝܬ̇ ܕܦܵܪܹܩ ܐܸܠܵܐ ܐܸܢܵܐ.

⁵ܐܸܢܵܐ ܪܥܹܝ̇ܬ̣ܵܟ ܒܡܲܕܼܒ̇ܪܵܐ: ܒܐܲܪܥܵܐ ܚܲܪܒ̇ܬ̣ܵܐ ܕܠܵܐ ܝܵܬ̣ܒܵܐ.

⁶ܘܲܪܥܹ̇ܝܬ̣ ܐܸܢܘܿܢ: ܘܲܡ̣ܠܵܘ ܟܲܪܣܗܘܿܢ: ܘܐܸܬ̇ܬ̇ܪܝܼܡ ܠܸܒ̇ܗܘܿܢ: ܡܸܛܠ ܗܵܢܵܐ ܛܥܵܐܘܼܢܝ.

⁷ܘܲܗܘܹ̇ܝܬ̣ ܠܗܘܿܢ ܐܲܝܟ ܐܲܪܝܵܐ: ܘܐܲܝܟ ܢܸܡܪܵܐ ܒܐܘܼܪܚܵܐ ܕܐܵܬ̣ܘܿܪ.

⁸ܐܸܦ̮ܓܲܥ ܒܗܘܿܢ ܐܲܝܟ ܕܸܒܵܐ ܕܬ̣ܵܒ̣̇ܪܵܐ: ܘܐܸܒ̣ܙܘܿܥ ܡܲܩ̱ܪܡܵܐ ܕܠܸܒ̇ܗܘܿܢ: ܘܢܹܐܟ̣ܘܿܠ ܐܸܢܘܿܢ ܬܲܡܵܢ ܐܲܪܝܵܐ: ܘܚܲܝܘܲܬ̣ ܒܲܪܵܐ ܬܦܲܪܸܬ̣ ܐܸܢܘܿܢ.

⁹ܚܲܒܹ̇ܠܬܵܟ ܝܑܼܣܪܵܝܹܠ. ܡܲܢܘܼ ܢܥܲܕ̇ܪܵܟ.

¹⁰ܐܲܝܟܵܘ ܗܵܟܹܝܠ ܡܲܠܟܵܟ: ܢܸܦ̱ܪܩܵܟ: ܘܲܠܟ̣ܠܗܹܝܢ ܡܕܼܝܼ̈ܢܵܬ̣ܵܟ: ܘܕܲܝܵܢܵܟ ܕܲܫܐܸܠ̣ܬܵܢܝ: ܘܐܸܡܲܪܬ̇ ܗܲܒ̣ܠܝܼ ܡܲܠܟܵܐ ܘܫܲܠܝܼܛܵܐ.

¹¹ܘܝܸܗ̄ܒܹ̇ܬ̣ ܠܵܟ ܡܲܠܟܵܐ ܒܪܘܼܓ̣ܙܝ: ܘܲܢܣܲܒ̣ܬܹ̇ܗ ܒܚܸܡܬ̣ܝ.

¹²ܨܪܝܼܪ ܥܵܘܼܠܹܗ ܕܐܲܦܪܹܝܡ: ܘܲܡܛܲܫܝܵܐ ܚܛܝܼܬܹܗ.

¹³ܚܸܒ̣̈ܠܹܐ ܐܲܝܟ ܕܝܵܠܕ̇ܬܵܐ ܢܹܐܬ̣ܘܿܢ ܥܠܵܘܗܝ: ܡܸܛܠ ܕܲܒ̣ܪܵܐ ܗ̄ܘܼ ܕܠܵܐ ܚܲܟ̇ܝܼܡ: ܡܸܟܹ̇ܝܠ ܠܵܐ ܢܩܘܼܡ ܒܚܸܒ̣̈ܠܹܐ ܕܲܒ̣ܢܲـ̈ـܝܵܐ.

¹⁴ܡ̣ܢ ܝܲܕܼ ܫܝܘܿܠ ܐܸܦܪܘܿܩ ܐܸܢܘܿܢ: ܘܡ̣ܢ ܡܵܘܬܵܐ ܐܲܦܲܨܸܐ ܐܸܢܘܿܢ: ܐܲܝܟܵܐ ܗ̄ܝܼ ܗܵܟܹܝܠ ܙܵܟ̣ܘܼܬ̣ܵܟ ܡܵܘܬܵܐ: ܐܵܘ ܐܲܝܟܵܐ ܗ̄ܘܼ ܥܘܼܩܣܹܟ̣ܝ ܫܝܘܿܠ: ܒܘܼܝܵܐܐ ܛܫܸܐ ܡ̣ܢ ܥܲܝ̈ܢܲܝ.

¹⁵ܡܸܛܠ ܕܗ̤ܘ ܒܹܝܬ̣ ܐܲܚܹ̈ܐ ܢܸܦܪܘܿܫ: ܬܹܐܬܹܐ ܡܲܕ̱ܢܚܵܐ ܪܘܼܚܹܗ ܕܡܵܪܝܵܐ ܡ̣ܢ ܡܲܕܼܒ̇ܪܵܐ: ܬܸܣܲܩ ܘܬܲܚܪܸܒ̣ ܡܥܝܼܢܵܘ̈ܗܝ: ܘܬ̣ܵܘܒܸ̇ܫ ܡܲܒ̇ܘܼܥܵܘ̈ܗܝ: ܘܗ̤ܘ ܢܸܒ̇ܘܿܙ ܓܲܙܵܐ ܕܟ̣ܠ ܡܵܐܢܹ̈ܐ ܕܪܸܓ̇ܬ̣ܵܐ.

¹⁶ܬܸܬ̣ܚܲܝܲܒ̣ ܫܵܡܪܹܝܢ ܥܲܠ ܕܡܲܪܡܪܲܬ̤ ܠܐܲܠܵܗܵܗ̇: ܒܚܲܪܒܵܐ ܢܸܦܠܘܼܢ: ܘܝܲܠܘܼܕܲܝ̈ܗܘܿܢ ܢܸܫܬܲܩܦܘܼܢ: ܘܒܲܛܢܵܬ̣̈ܗܘܿܢ ܢܸܬ̣ܦܲܪ̈ܬܵܢ.