Read Aramaic Peshita Hosea 14 Bible Online

Hosea 14 - Aramaic Peshita bible

Hosea 14

¹ܐܸܬ̣ܦܲܢܝܼ ܝܑܼܣܪܵܝܹܠ ܠܘܵܬ̣ ܡܵܪܝܵܐ ܐܲܠܵܗܵܟ: ܡܸܛܠ ܕܐܸܬ̇ܬ̇ܩܸܠ̣ܬ̇ ܒܥܵܘܼܠܵܟ.

²ܣܲܒ̣ܘ ܥܠܲܝܟ̇ܘܿܢ ܡܸܠܹ̈ܐ: ܘܐܸܬ̣ܦܢܵܘ ܠܘܵܬ̣ ܡܵܪܝܵܐ ܐܲܠܵܗܟ̣ܘܿܢ: ܘܐܸܡܲܪܘ ܠܹܗ ܕܢܸܫܒ̇ܘܿܩ ܠܟ̣ܘܿܢ ܥܵܘܼܠܟ̣ܘܿܢ: ܘܩܲܒܸ̇ܠܘ ܛܵܒ̣ܵـ̈ـܬ̣ܵܐ: ܘܢܸܦܪܘܿܥܟ̣ܘܿܢ ܦܹܐܪܹ̈ܐ ܕܣܸܦ̈ܘܵܬ̣ܟ̣ܘܿܢ.

³ܘܐܸܡܲܪܘ ܐܵܬ̣ܘܿܪܵܝܵܐ ܠܵܐ ܢܸܦ̱ܪܩܲܢ: ܘܥܲܠ ܪ̈ܲܟ̣ܫܵܐ ܠܵܐ ܢܸܪܟ̣ܵܒ̣: ܘܠܵܐ ܢܸܩܪܸܐ ܬܘܼܒ̣ ܐܲܠܵܗܹ̈ܐ ܠܲܥܒ̣ܵܕܼ ܐܝܼܕܲܝ̈ܢ: ܡܸܛܠ ܕܐܲܢ̄ܬ̇ ܡܪܲܚܸܡ ܐܲܢ̄ܬ̇ ܥܲܠ ܝܲܬ̣ܡܹ̈ܐ.

⁴ܐܲܣܸܐ ܬܝܵܒ̣ܘܼܬ̣ܗܘܿܢ ܘܐܸܪܚܲܡ ܢܸܕܼܪ̈ܲܝܗܘܿܢ: ܘܢܸܗܦܘܿܟ ܪܘܼܓ̣ܙܝ ܡܸܢܗܘܿܢ.

⁵ܘܐܸܗܘܹܐ ܐܲܝܟ ܛܲܠܵܐ ܠܝܼܣܪܵܝܹܠ: ܘܢܲܦܪܲܥ ܐܲܝܟ ܫܘܿܫܲܢܬ̣ܵܐ: ܘܢܲܪܡܸܐ ܥܸܩܵܪ̈ܵܘܗܝ ܐܲܝܟ ܕܠܸܒ̣ܢܵܢ.

⁶ܘܢܸܫ̱ܘܼܚܘܼܢ ܥܵܘܦܵܘ̈ܗܝ: ܘܢܸܗܘܹܐ ܐܲܝܟ ܙܲܝܬܵܐ ܕܲܗܕܼܝܼܪ ܒܦܹܐܪ̈ܵܘܗܝ: ܘܪܹܝܚܹܗ ܐܲܝܟ ܕܠܸܒ̣ܢܵܢ.

⁷ܘܢܸܬ̣ܦܢܘܿܢ ܘܢܸܬ̇ܒ̣ܘܼܢ ܒܛܸܠܵܠܹܗ: ܘܢܸܚܘܿܢ ܡ̣ܢ ܥܒ̣ܘܼܪܵܐ: ܘܢܲܦ̱ܪܥܘܼܢ ܐܲܝܟ ܓܦܸܬܵܐ: ܘܕܼܘܼܟ̣ܪܵܢܗܘܿܢ ܐܲܝܟ ܚܲܡܪܵܐ ܕܠܸܒ̣ܢܵܢ.

⁸ܘܢܹܐܡܲܪ ܐܲܦܪܹܝܡ ܡܵܐ ܠܝܼ ܬܘܼܒ̣ ܘܠܲܦܬܲܟ̣ܪܹ̈ܐ: ܐܸܢܵܐ ܡܲܟܸ̇ܟ̇ܬܹ̇ܗ: ܘܐܸܢܵܐ ܐܹܫܲܒ̇ܚܝܼܘܗܝ: ܐܲܝܟ ܩܵܛܲܪܩܵܐ ܥܲܒ̇ܝܼܛܵܐ: ܘܡܹܢܝ ܐܸܫܬ̇ܟܲܚܘ ܦܹܐܪ̈ܲܝܟ̇ܝ.

⁹ܡܲܢ̣ܘܼ ܕܚܲܟ̇ܝܼܡ ܢܸܣܬܲܟܲܠ ܗܵܠܹܝܢ: ܘܲܕܼܡܸܬ̣ܒܲܝܲܢ ܢܸܫܬܵܘܕܲܥ ܐܸܢܹܝܢ: ܕܲܬ̣ܪ̈ܝܼܨܵܢ ܐܘܼܪ̈ܚܵܬܹܗ ܕܡܵܪܝܵܐ: ܘܙܲܕ̇ܝܼܩܹ̈ܐ ܡܗܲܠܟ̣ܝܼܢ ܒܗܹܝܢ: ܘܥܵܘܿܠܹܐ ܡܸܬ̇ܬܲܩܠܝܼܢ ܒܗܹܝܢ.