Read Aramaic Peshita Hosea 2 Bible Online

Hosea 2 - Aramaic Peshita bible

Hosea 2

¹ܩ̣ܪܵܘ ܠܐܲܚܲܝ̈ܟ̇ܘܿܢ ܥܲܡܝ: ܘܠܲܐܚ̈ܘܵܬ̣ܟ̣ܘܿܢ ܪ̈ܚܝܼܡܵܬ̣ܵܐ.

²ܕܘܼܢܝ ܥܲܡ ܐܸܡܟ̣ܘܿܢ: ܕܘܼܢܝ: ܡܸܛܠ ܕܗ̤ܝ ܠܵܐ ܗܘ̤ܵܬ̣ ܐܲܢ̄ܬܲܬ̣ܝ: ܘܐܸܢܵܐ ܠܵܐ ܗܘܹ̇ܝܬ̣ ܒܲܥܠܵܗ̇: ܬܲܥܒܲܪ ܙܵܢܝܘܼܬ̣ܵܗ̇ ܡ̣ܢ ܐܲܦܹܝ̈ܗ̇: ܘܓ̣ܵܘܪܵܗ̇ ܡ̣ܢ ܒܲܝܢܵܬ̣ ܬܕܸܝ̈ܗ̇.

³ܕܠܵܐ ܐܲܫܠ̱ܚܝܼܗ̇ ܥܲܪܛܸܠ: ܘܐܸܫܒ̇ܩܝܼܗ̇ ܐܲܝܟ ܝܵܘܡܵܐ ܕܝܼܠܝܼܕܼܵܐ ܒܹܗ: ܘܐܸܥܒ̇ܕܼܝܼܗ̇ ܐܲܝܟ ܡܲܕܼܒ̇ܪܵܐ: ܘܐܲܝܟ ܐܲܪܥܵܐ ܨܗܝܼܬ̣ܵܐ: ܘܐܲܡܝܼܬ̣ܝܼܗ̇ ܒܨܲܗܝܵܐ.

⁴ܘܥܲܠ ܒܢܹ̈ܝܗ̇ ܠܵܐ ܐܹܪܲܚܸܡ: ܡܸܛܠ ܕܲܒ̣ܢܲܝ̈ ܙܵܢܝܼܬ̣ܵܐ ܐܸܢܘܿܢ.

⁵ܡܸܛܠ ܕܙܲܢܝܲܬ̤ ܐܸܡܗܘܿܢ: ܘܒܸܗܬܲܬ̤ ܝܵܠܹܕ̇ܬ̇ܗܘܿܢ: ܘܐܸܡܪܲܬ̤ ܐܹܙܲܠ ܒܵܬܲܪ ܪ̈ܵܚܡܲܝ: ܝܵܗ̄ܒܲܝ̈ ܠܲܚܡܝ ܘܡܲܝ̈ ܘܢܲܚܬܲܝ̈ ܘܟܸܬܵܢܲܝ̈: ܘܡܸܫܚ̄ܝ ܘܟ̣ܠ ܕܡܸܬ̣ܒ̇ܥܹܐ ܠܵܝܼ.

⁶ܡܸܛܠ ܗܵܠܹܝܢ ܗܵܐ ܣܵܐܹ̇ܓ̣ ܐ̄ܢܵܐ ܐܘܼܪܚܵܬ̣ܵܗ̇ ܒܕܲܪܕ̇ܪܹ̈ܐ: ܘܐܹܣܘܼܓ̣ ܫܒ̣ܝܼܠܹ̇ܝ̈ܗ̇: ܘܐܘܼܪܚܵܐ ܠܵܐ ܬܸܫܟܲܚ.

⁷ܘܬܹܐܙܲܠ ܒܵܬܲܪ ܪ̈ܵܚܡܹܝܗ̇ ܘܠܵܐ ܬܲܕܼܪܸܟ ܐܸܢܘܿܢ: ܘܬܸܒ̣ܥܸܐ ܐܸܢܘܿܢ ܘܠܵܐ ܬܸܫܟܲܚ ܐܸܢܘܿܢ: ܘܬܹܐܡܲܪ ܐܸܗܦܘܿܟ ܐܹܙܲܠ ܠܝܼ ܠܘܵܬ̣ ܒܲܥܠܝ ܩܲܕܼܡܵܝܵܐ: ܡܸܛܠ ܕܛܵܒ̣ ܗ̄ܘܼܵܐ ܠܝܼ ܗܵܝܕܹ̇ܝܢ ܡ̣ܢ ܕܗܵܫܵܐ.

⁸ܗ̤ܝ ܕܹܝܢ ܠܵܐ ܝܸܕܼܥܲܬ̤ ܕܐܸܢܵܐ ܝܸܗ̄ܒܹ̇ܬ̣ ܠܵܗ̇ ܥܒ̣ܘܼܪܵܐ: ܘܚܲܡܪܵܐ: ܘܡܸܫܚܵܐ: ܘܣܹܐܡܵܐ ܘܕܲܗܒ̣ܵܐ ܐܲܣܓ̇ܝܼܬ̣ ܠܵܗ̇: ܘܡܸܢܹܗ ܥ̣ܒܲܕܼܘ ܒܲܥܠܵܐ.

⁹ܡܸܛܠ ܗܵܢܵܐ ܐܸܗܦܘܿܟ ܐܸܣܲܒ̣ ܥܒ̣ܘܼܪܝ ܒܙܲܒ̣ܢܹܗ: ܘܚܲܡܪܝ ܒܙܲܒ̣ܢܹܗ: ܘܐܸܣܲܒ̣ ܥܲܡܪܝ ܘܟܸܬܵܢܝ̈: ܕܝܸܗ̄ܒܹ̇ܬ̣ ܠܵܗ̇ ܕܲܬ̣ܟܲܣܸܐ ܦܘܼܪܣܵܝܵܗ̇.

¹⁰ܡܸܟܹ̇ܝܠ ܐܸܓ̣ܠܸܐ ܦܘܼܪܣܵܝܵܗ̇ ܩܕܼܵܡ ܪ̈ܵܚܡܹܝܗ̇: ܘܐ̄ܢܵܫ ܠܵܐ ܢܦܲܨܸܝܗ̇ ܡ̣ܢ ܐܝܼܕܲܝ̈.

¹¹ܘܐܹܒܲܛܠ ܟܠܵܗ̇ ܚܲܕܼܘܼܬ̣ܵܗ̇: ܥܲܕܼܥܸܕܹܝ̈ܗ̇ ܘܪܹܫ ܝܲܪ̈ܚܹܝܗ̇: ܘܫܲܒ̇ܬ̣ܵܗ̇ ܘܟ̣ܠܗܘܿܢ ܥܹܐܕܹܝ̈ܗ̇.

¹²ܘܐܲܚܪܸܒ̣ ܓܘܼܦܢܹܝ̈ܗ̇ ܘܬܹܐܢܹܝ̈ܗ̇: ܕܐܸܡܪܲܬ̤ ܕܡܵܘ̈ܗܒ̣ܵܬ̣ܵܐ ܐܸܢܹܝܢ ܕܝܲܗ̄ܒ̣ܘ ܠܝܼ ܪ̈ܵܚܡܲܝ: ܘܐܸܥܒܸ̇ܕܼ ܐܸܢܹܝܢ ܥܵܒ̣ܵܐ: ܘܬܹܐܟ̣ܘܿܠ ܐܸܢܹܝܢ ܚܲܝܘܿܬ̣ ܒܲܪܵܐ.

¹³ܘܐܸܦܩܘܿܕܼ ܥܠܹܝܗ̇ ܝܵܘ̈ܡܵܬ̣ܵܐ ܕܒܲܥܠܵܐ ܕܣܵܝ̇ܡܵܐ ܗ̄ܘܼܵܬ̣ ܒܗܘܿܢ ܒܸܣܡܹ̈ܐ: ܘܫܸܩܠܲܬ̤ ܩܕܼܵܫܹܝ̈ܗ̇ ܘܡܲܪ̈ܓܵܢܝܵܬ̣ܵܗ̇ ܘܐܸܙܲܠ̱ܬ̤ ܒܵܬܲܪ ܪ̈ܵܚܡܹܝܗ̇: ܘܠܝܼ ܛܥܵܬ̤ ܐܵܡܲܪ ܡܵܪܝܵܐ.

¹⁴ܡܸܛܠ ܗܵܠܹܝܢ ܗܵܐ ܡܫܲܕܸ̇ܠ ܐ̄ܢܵܐ ܠܵܗ̇ ܘܡܵܘܒܸ̇ܠ ܐ̄ܢܵܐ ܠܵܗ̇ ܠܡܲܕܼܒ̇ܪܵܐ: ܘܐܸܡܠܸܐ ܒܠܸܒܵܗ̇.

¹⁵ܘܐܸܬܸ̇ܠ ܠܵܗ̇ ܟܲܪ̈ܡܹ̇ܝܗ̇ ܡ̣ܢ ܬܲܡܵܢ: ܘܥܘܼܡܩܵܐ ܕܥܵܟ̣ܵܪ: ܕܢܸܬ̣ܦܬܲܚ ܣܘܼܟܵܠܵܗ̇: ܘܬܸܬ̣ܡܲܟܸ̇ܟ ܬܲܡܵܢ ܐܲܝܟ ܝܵܘ̈ܡܲܝ ܛܲܠܝܘܼܬ̣ܵܗ̇: ܘܐܲܝܟ ܝܵܘܡܵܐ ܕܣܸܠܩܲܬ̤ ܒܹܗ ܡ̣ܢ ܐܲܪܥܵܐ ܕܡܸܨܪܹܝܢ.

¹⁶ܘܢܸܗܘܹܐ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ: ܬܸܩܪܹܝܢܝ ܓܲܒ̣ܪܝ ܘܠܵܐ ܬܘܼܒ̣ ܬܸܩܪܹܝܢܝ ܒܲܥܠܝ.

¹⁷ܘܐܲܥܒܲܪ ܫܡܵܐ ܕܒܲܥܠܵܐ ܡ̣ܢ ܦܘܼܡܵܗ̇: ܘܠܵܐ ܢܸܬ̇ܕܲܟ̣ܪܘܼܢ ܬܘܼܒ̣ ܫܡܹܗ.

¹⁸ܘܐܲܩܝܼܡ ܠܗܘܿܢ ܩܝܵܡܵܐ ܒܝܵܘܡܵܐ ܗܵܘܿ: ܥܲܡ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܘܥܲܡ ܦܵܪܲܚܬ̣ܵܐ ܕܲܫܡܲܝܵܐ: ܘܪ̈ܲܚܫܵܐ ܕܐܲܪܥܵܐ: ܘܩܸܫܬܵܐ ܘܣܲܝܦܵܐ ܘܲܩܪܵܒ̣ܵܐ ܐܹܒܲܛܸܠ ܡ̣ܢ ܐܲܪܥܵܐ: ܘܐܲܫܪܸܐ ܐܸܢܘܿܢ ܒܣܲܒ̣ܪܵܐ.

¹⁹ܘܐܸܡܟ̇ܪܹܟ̣ܝ ܠܝܼ ܠܥܵܠܲܡ: ܘܐܸܡܟ̇ܪܹܟ̣ܝ ܠܝܼ ܒܙܲܕ̇ܝܼܩܘܼܬ̣ܵܐ: ܘܲܒ̣ܕܼܝܼܢܵܐ: ܘܲܒ̣ܛܲܝܒ̇ܘܼܬ̣ܵܐ: ܘܲܒ̣ܪ̈ܲܚܡܹܐ.

²⁰ܘܐܸܡܟ̇ܪܹܟ̣ܝ ܠܝܼ ܒܗܲܝܡܵܢܘܼܬ̣ܵܐ: ܘܬܸܕ̇ܥܝܼܢ ܠܡܵܪܝܵܐ.

²¹ܘܢܸܗܘܹܐ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ: ܐܸܥܢܸܐ ܠܲܫܡܲܝܵܐ: ܘܗܸܢܘܿܢ ܢܸܥܢܘܿܢ ܠܐܲܪܥܵܐ.

²²ܘܐܲܪܥܵܐ ܬܸܥܢܸܐ ܠܲܥܒ̣ܘܼܪܵܐ: ܘܲܠܚܲܡܪܵܐ ܘܲܠܡܸܫܚܵܐ: ܘܗܸܢܘܿܢ ܢܸܥܢܘܿܢ ܠܐܝܼܙܲܪܥܹܝܠ.

²³ܘܐܸܙ̱ܪܥܝܼܗ̇ ܠܝܼ ܒܐܲܪܥܵܐ: ܘܐܹܪܲܚܸܡ ܥܲܠ ܠܵܐ ܐܸܬ̣ܪܲܚܡܲܬ̤: ܘܐܸܩܪܸܐ ܠܠܵܐ ܥܲܡܝ ܥܲܡܝ: ܘܗ̤ܘ ܢܸܩܪܹܝܢܝ ܐܲܠܵܗܝ.