Read Aramaic Peshita Hosea 6 Bible Online

Hosea 6 - Aramaic Peshita bible

Hosea 6

¹ܘܢܹܐܡܪܘܼܢ ܢܸܗܦܘܿܟ ܢܹܐܙܲܠ ܠܘܵܬ̣ ܡܵܪܝܵܐ ܕܲܡܚܵܢ: ܘܗ̤ܘ ܢܲܐܣܹܝܢ: ܘܬܲܒ̣ܪܲܢ: ܘܗ̤ܘ ܢܸܥܨ̄ܒܲܢ.

²ܘܢܲܚܸܝܢ ܝܵܘ̈ܡܵܬ̣ܵܐ: ܘܲܒ̣ܝܵܘܡܵܐ ܬܠܝܼܬ̣ܵܝܵܐ ܢܩܝܼܡܲܢ ܘܢܸܚܸܐ ܩܕܼܵܡܵܘܗܝ.

³ܘܢܸܕܲܥ ܠܡܹܐܙܲܠ ܠܝܼܕܲܥܬܹܗ ܕܡܵܪܝܵܐ: ܐܲܝܟ ܫܲܦܪܵܐ ܕܲܬ̣ܩܸܢ ܡܲܦܩܹܗ: ܘܢܹܐܬܹܐ ܠܲܢ ܐܲܝܟ ܡܸܛܪܵܐ: ܘܐܲܝܟ ܪܒ̣ܝܼܥܵܐ ܕܡܲܪܘܸܐ ܠܐܲܪܥܵܐ.

⁴ܡܵܢܵܐ ܐܸܥܒܸ̇ܕܼ ܠܵܟ ܐܲܦܪܹܝܡ: ܘܡܵܢܵܐ ܐܸܥܒܸ̇ܕܼ ܠܵܟ ܝܑܼܗܘܼܕܼܵܐ: ܛܲܝܒ̇ܘܼܬ̣ܟ̣ܘܿܢ ܐܲܝܟ ܥܢܵܢܵܐ ܕܨܲܦܪܵܐ: ܘܐܲܝܟ ܛܲܠܵܐ ܕܲܡܩܲܕܸ̇ܡ ܘܥܵܒܲܪ.

⁵ܡܸܛܠܗܵܢܵܐ ܦܲܣܩܹ̇ܬ̣ ܢܒ̣ܝܹ̈ܐ: ܘܩܲܛܠܹ̇ܬ̣ ܐܸܢܘܿܢ ܒܡܹܐܡܲܪ ܦܘܼܡܝ: ܘܕܼܝܼܢܝ ܐܲܝܟ ܢܘܼܗܪܵܐ ܢܸܦܘܿܩ.

⁶ܡܸܛܠ ܕܼܨܒܹ̇ܝܬ̣ ܒܛܲܝܒ̇ܘܼܬ̣ܵܐ ܘܠܵܐ ܒܕܸܒ̣ܚ̱ܬ̣ܵܐ: ܘܝܼܕܲܥܬܹܗ ܕܐܲܠܵܗܵܐ ܛܵܒ̣ ܡ̣ܢ ܝܲܩ̈ܕܹ̇ܐ ܫܲܠܡܹ̈ܐ.

⁷ܘܗܸܢܘܿܢ ܐܲܝܟ ܒܲܪܢܵܫܵܐ ܥ̣ܒܲܪܘ ܥܲܠ ܩܝܵܡܝ: ܘܬܲܡܵܢ ܕܲܓܸ̇ܠ̣ܘ ܒܝܼ.

⁸ܓܸܠܥܵܕܼ ܡܕܼܝܼܢ̄ܬܵܐ ܗ̄ܝܼ ܕܥܵܒ̣ܕܲܝ̈ ܥܵܘܼܠܵܐ: ܘܲܡܦܲܠܦܠܵܐ ܒܲܕܼܡܵܐ: ܥܘܼܫܢܹܟ̣ܝ ܐܲܝܟ ܕܓܲܒ̣ܪܵܐ ܓܲܝܵܣܵܐ.

⁹ܐܸܫܬܵܘܬܲܦܘ ܟܵܗ̈ܢܹܐ ܒܐܘܼܪܚܵܐ: ܘܲܩ̣ܛܲܠܘ ܠܲܫܟܹܝܡ: ܡܸܛܠ ܕܥܵܘܼܠܵܐ ܥ̣ܒܲܕܼܘ.

¹⁰ܒܒܲܝܬܵܐ ܕܝܼܣܪܵܝܹܠ ܚܙܹ̇ܝܬ̣ ܬܸܡܗܵܐ: ܬܲܡܵܢ ܙܲܢܝܼ ܐܲܦܪܹܝܡ: ܘܐܸܬ̇ܛܲܢܲܦ ܝܑܼܣܪܵܝܹܠ.

¹¹ܘܐܵܦ ܝܑܼܗܘܼܕܼܵܐ ܥܒܸܕܼ ܠܵܟ ܩܛܵܦܵܐ: ܡܵܐ ܕܡܲܦܢܸܐ ܐ̄ܢܵܐ ܫܒ̣ܝܼܬܹܗ ܕܥܲܡܝ.