Read Aramaic Peshita Hosea 7 Bible Online

Hosea 7 - Aramaic Peshita bible

Hosea 7

¹ܡܵܐ ܕܐܲܣ̇ܝܬ̣ ܠܝܼܣܪܵܝܹܠ: ܘܐܸܬ̣ܓ̇ܠܝܼ ܥܵܘܼܠܹܗ ܕܐܲܦܪܹܝܡ: ܘܒ̣ܝܼܫܬܵܗ̇ ܕܫܵܡܪܹܝܢ: ܡܸܛܠ ܕܲܥ̣ܒܲܕܼܘ ܫܘܼܩܪܵܐ ܩܕܼܵܡܲܝ: ܘܓܲܢܵܒ̣ܵܐ ܥܵܐܹ̇ܠ ܗ̄ܘܼܵܐ: ܘܲܡܫܲܠܲܚ ܓܲܝܵܣܵܐ ܒܫܘܼܩܹ̈ܐ.

²ܘܠܵܐ ܐܵܡ̇ܪܝܼܢ ܒܠܸܒ̇ܗܘܿܢ ܕܟ̣ܠܗܘܿܢ ܕܟ̣ܠܗܹܝܢ ܒܝܼ̈ܫܵܬ̣ܗܘܿܢ ܥܵܗܹ̇ܕܼ ܐ̄ܢܵܐ: ܡܸܟܹ̇ܝܠ ܢܸܚܕ̇ܪ̈ܵܢ ܐܸܢܘܿܢ ܨܸܢ̈ܥܵܬ̣ܗܘܿܢ ܕܲܗ̤ܘܲܝ̈ ܩܕܼܵܡ ܐܲܦܲܝ̈.

³ܒܒ̣ܝܼܫܘܼܬ̣ܗܘܿܢ ܚܲܕ̇ܝܼܘ ܠܡܲܠ̈ܟܹ̇ܐ: ܘܲܒ̣ܕܲܓܵܠܘܼܬ̣ܗܘܿܢ.

⁴ܟܠܗܘܿܢ ܫܲܠܝܼܛܵܢܲܝ̈ܗܘܿܢ ܓܵܝ̇ܪܝܼܢ: ܐܲܝܟ ܬܲܢܘܼܪܵܐ ܕܝܵܩܹ̇ܕܼ ܠܡܹܐܦܝܼܬ̣ܵܐ: ܢܸܒ̣ܛܲܠ ܡ̣ܢ ܡܕܼܝܼܢ̄ܬܵܐ ܠܵܐܹ̇ܫ ܠܲܝܫܵܐ ܥܕܲܡܵܐ ܕܚܵܡܲܥ.

⁵ܝܵܘܡܵܐ ܕܡܲܠܟܲܝ̈ܢ ܫܲܪܝܼܘ ܪܵܘܪ̈ܒ̣ܵܢܸܐ ܠܡܸܪܓܲܙ ܡ̣ܢ ܚܲܡܪܵܐ: ܢܓܲܕܼܘ ܐܝܼܕܲܝ̈ܗܘܿܢ ܥܲܡ ܒܝܼܫܹ̈ܐ.

⁶ܡܸܛܠ ܕܚܲܡ̣ ܠܸܒ̇ܗܘܿܢ ܐܲܝܟ ܬܲܢܘܼܪܵܐ ܒܲܟ̣ܡܹܐܢܗܘܿܢ: ܘܟ̣ܠܹܗ ܠܸܠܝܵܐ ܥܬܸܩ̣ ܪܘܼܓ̣ܙܗܘܿܢ: ܘܲܒ̣ܨܲܦܪܵܐ ܝܵܩܹ̇ܕܼ ܗ̄ܘܼܵܐ ܐܲܝܟ ܢܘܼܪܵܐ ܘܫܲܠܗܹܒ̣ܝܼܬ̣ܵܐ.

⁷ܟܠܗܘܿܢ ܚܲܡ̣ܘ ܐܲܝܟ ܬܲܢܘܼܪܵܐ: ܘܐܸܟܲܠ̣ܘ ܠܕܲܝܵܢܲܝ̈ܗܘܿܢ: ܟܠܗܘܿܢ ܡܲܠܟܲܝ̈ܗܘܿܢ ܢܦܲܠ̣ܘ: ܘܠܲܝܬ̇ ܒܗܘܿܢ ܕܩܵܪܹܐ ܠܝܼ.

⁸ܐܲܦܪܹܝܡ ܒܥܲܡܡܹ̈ܐ ܐܸܬ̣ܚܲܠܲܛ: ܐܲܦܪܹܝܡ ܗܘ̤ܵܐ ܚܵܝܝܘܼܪܬܵܐ ܕܥܲܕܼܠܵܐ ܐܸܬ̣ܐܲܦܝܲܬ̤ ܐܸܬ̣ܐܲܟ̣ܠܲܬ̤.

⁹ܗܵܟܲܢܵܐ ܐܸܟܲܠ̣ܘ ܢܘܼܟ̣ܪ̈ܵܝܹܐ ܚܲܝܠܹܗ ܘܠܵܐ ܝܑܼܕܲܥ̣: ܘܚܸܘܿܪ̈ܵܬ̣ܵܐ ܢܦܲܩ ܠܹܗ ܘܠܵܐ ܝܑܼܕܲܥ̣.

¹⁰ܘܐܸܬ̣ܡܲܟܲܟ ܐܝܼܩܵܪܹܗ ܕܝܼܣܪܵܝܹܠ ܩܕܼܵܡܵܘܗܝ: ܘܠܵܐ ܐܸܬ̣ܦ̄ܢܝܼܘ ܠܘܵܬ̣ ܡܵܪܝܵܐ ܐܲܠܵܗܗܘܿܢ: ܘܠܵܐ ܒܥ̣ܵܐܘܼܗܝ.

¹¹ܘܲܗܘ̤ܵܐ ܐܲܦܪܹܝܡ ܐܲܝܟ ܝܵܘܢܵܐ ܫܒܲܪܬ̣ܵܐ ܕܠܲܝܬ̇ ܒܵܗ̇ ܠܸܒܵܐ: ܠܡܸܨܪܹܝܢ ܐܸܬ̣ܵܘ: ܘܠܵܐܬ̣ܘܿܪ ܐܸܙܲܠ̣ܘ.

¹²ܠܐܲܬܲܪ ܕܢܹܐܙܠ̄ܘܿܢ ܐܸܦܪܘܿܣ ܥܠܲܝܗܘܿܢ ܡܨܝܼܕ̇ܬ̇ܝ: ܘܐܲܝܟ ܦܵܪܲܚܬ̣ܵܐ ܕܲܫܡܲܝܵܐ ܐܲܚܸܬ̣ ܐܸܢܘܿܢ: ܘܐܸܪܕܸ̇ܐ ܐܸܢܘܿܢ ܐܲܝܟ ܫܸܡܥܵܐ ܕܣܵܗܕ̇ܘܼܬ̣ܗܘܿܢ.

¹³ܘܵܝ ܠܗܘܿܢ ܕܢܲܕܼܘ ܡܹܢܝ: ܒܝܼܫܬܵܐ ܐܲܝܬܸ̇ܐ ܥܠܲܝܗܘܿܢ ܥܲܠ ܕܐܲܥ̣ܠܝܼܘ ܒܝܼ: ܐܸܢܵܐ ܓܹܝܪ ܦܸܪܩܹ̇ܬ̣ ܐܸܢܘܿܢ: ܘܗܸܢܘܿܢ ܡܲܠܸܠ̣ܘ ܥܠܲܝ ܕܲܓܵܠܘܼܬ̣ܵܐ.

¹⁴ܘܠܵܐ ܓܥ̣ܵܘ ܠܘܵܬ̣ܝ ܡ̣ܢ ܟܠܹܗ ܠܸܒ̇ܗܘܿܢ: ܐܸܠܵܐ ܐܲܝܸܠܠܘ ܥܲܠ ܡܲܫܟܲܒ̣ܗܘܿܢ: ܥܲܠ ܥܒ̣ܘܼܪܵܐ ܘܥܲܠ ܚܲܡܪܵܐ ܡܸܬ̣ܟܲܬ̇ܫܝܼܢ: ܘܲܡܪܲܕܼܘ ܥܠܲܝ.

¹⁵ܘܐܸܢܵܐ ܪܕܹܝ̇ܬ̣ ܘܐܲܥܫ̇ܢܹܬ̣ ܕܪܵܥܗܘܿܢ: ܘܲܥܠܲܝ ܐܸܬ̣ܚܲܫܲܒ̣ܘ ܒܝܼܫܬܵܐ.

¹⁶ܐܸܬ̣̱ܗܦܸܟ̣ܘ ܥܲܠ ܠܵܐ ܡܸܕܸ̇ܡ: ܘܲܗܘ̤ܵܘ ܐܲܝܟ ܩܸܫܬܵܐ ܢܟ̣ܝܼܠܬܵܐ: ܢܸܦܠܘܼܢ ܒܚܲܪܒܵܐ ܪܵܘܪ̈ܒ̣ܵܢܲܝܗܘܿܢ ܡ̣ܢ ܡܲܪܵܚܘܼܬ̣ܵܐ ܕܠܸܫܵܢܗܘܿܢ: ܗܵܢܵܘ ܥܘܼܪܙܵܠܗܘܿܢ ܕܒܲܐܪܥܵܐ ܕܡܸܨܪܹܝܢ.