Read Aramaic Peshita Hosea 8 Bible Online

Hosea 8 - Aramaic Peshita bible

Hosea 8

¹ܦܘܼܡܵܟ ܐܲܝܟ ܩܲܪܢܵܐ: ܘܐܲܝܟ ܢܸܫܪܵܐ ܥܲܠ ܒܲܝܬܹ̇ܗ ܕܡܵܪܝܵܐ: ܥܲܠ ܕܲܥ̣ܒܲܪܘ ܥܲܠ ܩܝܵܡܝ: ܘܥܲܠ ܢܵܡܘܿܣܝ ܐܲܥ̣ܠܝܼܘ.

²ܠܝܼ ܩ̣ܪܵܘ: ܘܐܸܡܲܪܘ: ܝܑܼܕܲܥܢܵܟ ܐܲܠܵܗܲܢ.

³ܛܥ̣ܵܐ ܝܑܼܣܪܵܝܹܠ ܛܵܒ̣ܬ̣ܵܐ: ܘܲܒ̣ܥܸܠܕ̇ܒ̣ܵܒ̣ܵܐ ܪܕܲܦ̣ ܐܸܢܘܿܢ.

⁴ܐܲܡܠܸܟ̣ܘ ܐܸܠܵܐ ܠܵܐ ܡܹܢܝ: ܘܐܸܫܬܲܠܲܛܘ ܘܠܵܐ ܐܵܘܕ̇ܥܘܼܢܝ: ܣܹܐܡܗܘܿܢ ܘܕܲܗܒ̣ܗܘܿܢ: ܥ̣ܒܲܕܼܘ ܠܗܘܿܢ ܦܬܲܟ̣ܪܹ̈ܐ ܕܢܹܐܒ̣ܕ̇ܘܼܢ.

⁵ܛܥܵܘ ܒܥܸܓ̣ܠܹܟ̣ܝ ܫܵܡܪܹܝܢ: ܘܐܸܬ̣ܚܲܡܲܬ̣ ܪܘܼܓ̣ܙܝ ܥܠܲܝܗܘܿܢ: ܥܕܲܡܵܐ ܠܐܸܡܲܬ̣ܝ ܠܵܐ ܡܸܫܟ̇ܚܝܼܢ ܠܡܸܙܟܵܐ.

⁶ܡܸܛܠ ܕܡ̣ܢ ܝܑܼܣܪܵܝܹܠ ܗ̄ܘܼ: ܘܢܲܓܵܪܵܐ ܗ̄ܘܼ ܥܲܒ̣ܕܹ̇ܗ: ܘܠܵܐ ܗ̄ܘܼܵܐ ܐܲܠܵܗܵܐ: ܐܸܠܵܐ ܠܛܵܠܝܘܼܬ̣ܵܐ ܗܘ̤ܵܐ ܥܸܓ̣ܠܹܟ̣ܝ ܫܵܡܪܹܝܢ.

⁷ܡܸܛܠ ܕܪܘܼܚܵܐ ܙܪܲܥ̣ܘ: ܘܥܲܠܥܵܠܵܐ ܚܨܲܕܼܘ: ܘܩܵܝܹܡܬܵܐ ܠܲܝܬ̇ ܠܗܘܿܢ: ܘܐܵܦܠܵܐ ܫܸܒ̇ܠܵܐ ܕܥܵܒܹ̇ܕܼ ܩܲܡܚܵܐ: ܘܐܸܠܘܼ ܐܝܼܬ̣ ܗ̄ܘܼܵܐ ܠܗܘܿܢ: ܢܘܼܟ̣ܪ̈ܵܝܹܐ ܐܲܟ̣ܠܝܼܢ ܗ̄ܘܼܵܘ ܠܹܗ.

⁸ܐܸܬ̣ܒܲܠܥ ܝܑܼܣܪܵܝܹܠ: ܘܡܸܟܹ̇ܝܠ ܗܘ̤ܵܘ ܒܥܲܡܡܹ̈ܐ: ܐܲܝܟ ܡܵܐܢܵܐ ܕܠܲܝܬ̇ ܒܹܗ ܚܲܫܚܘܼ.

⁹ܡܸܛܠ ܕܗܸܢܘܿܢ ܣܠܸܩ̣ܘ ܠܐܵܬ̣ܘܿܪ ܐܲܝܟ ܥܪܵܕܼܵܐ ܝܼܚܝܼܕܼܵܝܵܐ: ܐܲܦܪܹܝܡ ܡܵܘ̈ܗܒ̣ܵܬ̣ܵܐ ܪܚܸܡ̣.

¹⁰ܐܵܦܸܢ ܢܸܫܬܲܠܡܘܼܢ ܒܥܲܡܡܹ̈ܐ: ܐܹܟܲܢܸܫ ܐܸܢܘܿܢ: ܘܢܸܬ̇ܬ̇ܢܝܼܚܘܼܢ ܩܲܠܝܼܠ ܡ̣ܢ ܫܸܩܠܵܐ ܕܡܲܠ̈ܟܹ̇ܐ ܘܲܕܼܫܲܠܝܼܛܵܢܹ̈ܐ.

¹¹ܡܸܛܠ ܕܐܲܣܓ̇ܝܼ ܐܲܦܪܹܝܡ ܡܲܕܼܒ̇ܚܹ̈ܐ ܠܲܚܛܝܼܬ̣ܵܐ: ܘܲܗܘ̤ܵܘ ܠܹܗ ܡܲܕܼܒ̇ܚܹ̈ܐ ܠܲܚܛܵܗܵܐ ܪܲܒܵܐ.

¹²ܘܟܸܬ̣ܒܹ̇ܬ̣ ܠܹܗ ܣܘܿܓ̣ܵܐܐ ܕܢܵܡܘܿܣܲܝ̈: ܘܐܲܝܟ ܢܘܼܟ̣ܪ̈ܵܝܬ̣ܵܐ ܚܫܲܒ̣ ܐܸܢܹܝܢ ܠܡܸܠܲܝ̈.

¹³ܕܸܒ̣ܚܹ̈ܐ ܕܓܸܒ̣̈ܝܵܬ̣ܵܐ ܡܕܲܒ̇ܚܝܼܢ: ܘܒܸܣܪܵܐ ܐܵܟ̣ܠܝܼܢ: ܘܡܵܪܝܵܐ ܠܵܐ ܨܵܒܹ̇ܐ ܒܗܘܿܢ: ܡܸܟܹ̇ܝܠ ܢܸܬ̇ܕܲܟܲܪ ܥܵܘܼܠܗܘܿܢ: ܘܢܸܦܩܘܿܕܼ ܚܛܵܗܲܝ̈ܗܘܿܢ: ܘܗܸܢܘܿܢ ܠܡܸܨܪܹܝܢ ܢܸܗܦ̄ܟ̣ܘܼܢ.

¹⁴ܛܥ̣ܵܐ ܝܼܣܪܵܝܹܠ ܠܡܲܢ ܕܥܲܒ̣ܕܹ̇ܗ: ܘܲܒ̣ܢܵܐ ܗܲܝ̈ܟ̇ܠܹܐ: ܘܲܝܗܘܼܕܼܵܐ ܐܲܣܓ̇ܝܼ ܡܕܼܝܼ̈ܢܵܬ̣ܵܐ ܥܲܫ̈ܝܼܢܵܬ̣ܵܐ: ܐܸܫܒ̇ܘܿܩ ܢܘܼܪܵܐ ܒܲܡܕܼܝܼ̈ܢܵܬܹܗ: ܘܬܹܐܟ̣ܘܿܠ ܣܵܚܪ̈ܵܬܹܗ.