Read Aramaic Peshita Hosea 9 Bible Online

Hosea 9 - Aramaic Peshita bible

Hosea 9

¹ܠܵܐ ܬܸܚܕܹ̇ܐ ܝܑܼܣܪܵܝܹܠ: ܘܠܵܐ ܬܕܼܘܼܨ ܐܲܝܟ ܥܲܡܡܹ̈ܐ: ܡܸܛܠ ܕܲܛܥܲܝ̣ܬ̇ ܡ̣ܢ ܐܲܠܵܗܵܟ: ܘܲܪܚܸܡ̣ܬ̇ ܡܵܘ̈ܗܒ̣ܵܬ̣ܵܐ ܡ̣ܢ ܟܠ ܐܸܕ̇ܪܹ̈ܐ.

²ܘܡ̣ܢ ܐܸܕ̇ܪܵܐ ܘܡ̣ܢ ܡܲܥܨܲܪܬܵܐ ܠܵܐ ܢܸܣܒ̇ܥܘܼܢ: ܘܡܸܫܚܵܐ ܢܟܲܕܸ̇ܒ̣ ܒܗܘܿܢ.

³ܠܵܐ ܢܸܬ̇ܒ̣ܘܼܢ ܒܐܲܪܥܹܗ ܕܡܵܪܝܵܐ: ܐܸܠܵܐ ܢܸܗܦܘܿܟ ܐܲܦܪܹܝܡ ܠܡܸܨܪܹܝܢ: ܘܒ̣ܵܐܬ̣ܘܿܪ ܛܲܢܦܘܼܬ̣ܵܐ ܢܹܐܟ̣ܠܘܼܢ.

⁴ܘܠܵܐ ܢܢܲܩܘܿܢ ܠܡܵܪܝܵܐ ܚܲܡܪܵܐ: ܘܠܵܐ ܢܸܒ̣ܣ̄ܡܘܼܢ ܠܹܗ ܕܸܒ̣ܚܲܝ̈ܗܘܿܢ: ܐܲܝܟ ܠܲܚܡܵܐ ܗ̄ܘܼ ܠܗܘܿܢ ܕܐܘܼܠܨܵܢܵܐ: ܟܠ ܐܵܟ̣ܘܿܠܵܘ̈ܗܝ ܢܸܬ̇ܛܲܢܦܘܼܢ ܡܸܛܠ ܕܠܲܚܡܵܐ ܕܢܲܦ̮ܫܗܘܿܢ ܠܵܐ ܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ.

⁵ܡܵܢܵܐ ܬܸܥܒ̇ܕܼܘܼܢ ܠܝܵܘܡܵܐ ܕܥܹܐܕܼܵܐ: ܘܲܠܝܵܘܡܵܐ ܕܥܲܕܼܥܹܕܹܗ ܕܡܵܪܝܵܐ.

⁶ܡܸܛܠ ܕܗܸܢ̣ܘܿܢ ܐܸܙܲܠ̣ܘ ܒܒܸܙܬ̣ܵܐ: ܘܡܸܨܪܹܝܢ ܬܟܲܢܸܫ ܐܸܢܘܿܢ: ܘܡܲܦܲܣ ܬܸܩܒ̇ܘܿܪ ܐܸܢܘܿܢ: ܪܸܓ̇ܬ̣ܵܐ ܕܣܹܐܡܗܘܿܢ ܢܘܼܟ̣ܪ̈ܵܝܹܐ ܢܹܐܪܬ̇ܘܼܢܵܗ̇: ܘܟ̣ܘܼ̈ܒܹ̇ܐ ܒܡܲܫܟ̇ܢܲܝ̈ܗܘܿܢ.

⁷ܡܲܛܝܼܘ ܝܵܘ̈ܡܵܬ̣ܵܐ ܕܲܬ̣ܒܲܥܬ̣ܵܐ: ܩ̣ܪܸܒ̣ܘ ܝܵܘ̈ܡܵܬ̣ܵܐ ܕܦܘܼܪܥܵܢܵܐ: ܢܸܕܲܥ ܝܑܼܣܪܵܝܹܠ ܣܲܟ̣ܠܵܐ ܢܒ̣ܝܵܐ ܫܵܛܝܵܐ: ܓܲܒ̣ܪܵܐ ܕܲܠܒ̣ܝܼܫܵܐ ܒܹܗ ܪܘܼܚܵܐ ܕܫܵܛܝܘܼܬ̣ܵܐ: ܡ̣ܢ ܣܘܿܓ̣ܵܐܐ ܕܥܵܘܼܠܵܟ ܐܸܬ̣ܝܲܬ̇ܪܲܬ̤ ܫܪܝܼܚܘܼܬ̣ܵܟ.

⁸ܕܵܘܩܵܐ ܐܲܦܪܹܝܡ ܥܲܡ ܐܲܠܵܗܝ: ܢܒ̣ܝܵܐ ܦܲܚܵܐ ܕܬ̣ܘܼܩܠ̱ܬ̣ܵܐ ܥܲܠ ܟܠܗܹܝܢ ܐܘܼܪ̈ܚܵܬܹܗ: ܘܲܫܪܝܼܚܘܼܬ̣ܵܐ ܒܒܲܝܬܹ̇ܗ ܕܐܲܠܵܗܵܐ.

⁹ܥܲܡܸܩ̣ܘ ܘܚܲܒܸ̇ܠܘ ܐܲܝܟ ܝܵܘ̈ܡܵܬ̣ܵܐ ܕܪܵܡܬ̣ܵܐ: ܡܸܟܹ̇ܝܠ ܢܸܬ̇ܕ̇ܟܲܪ ܥܵܘܼܠܗܘܿܢ ܘܢܸܦܩܘܿܕܼ ܚܛܵܗܲܝ̈ܗܘܿܢ.

¹⁰ܐܲܝܟ ܥܸܢ̈ܒܹܐ ܒܡܲܕܼܒ̇ܪܵܐ ܐܸܫܟ̇ܚܹ̇ܬ̣ ܠܝܼܣܪܵܝܹܠ: ܘܐܲܝܟ ܬܹܬܵܐ ܒܲܟܵܪܬܵܐ ܚܙܹ̇ܝܬ̣ ܠܐܲܒ̣ܵܗܲܝ̈ܗܘܿܢ: ܘܗܸܢܘܿܢ ܥܲܠ̣ܘ ܠܘܵܬ̣ ܒܥܸܠܦܥܘܿܪ: ܘܐܸܬ̣ܢ̱ܙܲܪܘ ܠܒܸܗܬ̇ܬ̣ܵܐ: ܘܲܗܘ̤ܵܘ ܠܛܲܢܦܘܼܬ̣ܵܐ ܐܲܝܟ ܕܲܪܚܸܡ̣ܘ.

¹¹ܐܲܦܪܹܝܡ ܐܲܝܟ ܦܵܪܲܚܬ̣ܵܐ ܦܪܲܚ̣ ܐܝܼܩܵܪܗܘܿܢ: ܡ̣ܢ ܝܲܠܕܵܐ ܘܡ̣ܢ ܟܲܪܣܵܐ ܘܡ̣ܢ ܒܲܛܢܵܐ.

¹²ܐܵܦܸܢ ܢܪܲܒ̇ܘܿܢ ܒܢܲـ̈ـܝܵܐ: ܐܹܓܲܝܸܙ ܐܸܢܘܿܢ ܡ̣ܢ ܒܢܲܝ̈ ܐ̄ܢܵܫܵܐ: ܡܸܛܠ ܕܘܵܝ ܠܗܘܿܢ ܡܸܬ̣ܦܪܲܥ ܐ̄ܢܵܐ ܡܸܢܗܘܿܢ.

¹³ܐܲܦܪܹܝܡ ܐܲܝܟ ܕܲܚ̣ܙܲܝܬ̇ ܠܨܘܿܪ ܕܲܫܬ̣ܝܼܠܵܐ ܒܒܸܢܝܵܢܹ̈ܝܗ̇: ܗܵܟܲܢܵܐ ܐܲܦܪܹܝܡ ܢܲܦܸܩ ܒܢܵܘ̈ܗܝ ܠܩܸܛܠܵܐ.

¹⁴ܗܲܒ̣ ܠܗܘܿܢ ܡܵܪܝܵܐ ܡܸܕܹ̇ܡ ܕܝܵܗܹ̇ܒ̣ ܐܲܢ̄ܬ̇: ܗܲܒ̣ ܠܗܘܿܢ ܡܲܪܒ̇ܥܵܐ ܡܓܲܙܝܵܐ: ܘܲܬ̇ܕܲܝܵـ̈ـܐ ܝܲܒ̇ܝܼܫܹ̈ܐ.

¹⁵ܟܠܗܹܝܢ ܒܝܼ̈ܫܵܬ̣ܗܘܿܢ ܒܓܲܠܓܵܠܵܐ: ܡܸܛܠ ܕܬܲܡܵܢ ܣܢܹ̇ܝܬ̣ ܐܸܢܘܿܢ ܒܒ̣ܝܼܫܘܼܬ̣ܵܐ ܕܨܸܢ̈ܥܵܬ̣ܗܘܿܢ: ܡ̣ܢ ܒܷܲܬ̇ܝ ܐܲܦܸܩ ܐܸܢܘܿܢ: ܘܠܵܐ ܐܵܘܣܸܦ ܠܲܡܪܲܚܵܡܘܼ ܥܠܲܝܗܘܿܢ: ܟܠܗܘܿܢ ܫܲܠܝܼܛܵܢܲܝ̈ܗܘܿܢ ܡܵܪܘܿܕܼܝܼܢ.

¹⁶ܡܚܵܐ ܐܲܦܪܹܝܡ ܥܸܩܵܪܵܐ: ܘܝܼܒܸܫ ܕܠܵܐ ܢܸܬܸ̇ܠ ܦܹܐܪܹ̈ܐ: ܘܐܸܢ ܢܵܘܠܕܼܘܼܢ ܒܢܲـ̈ـܝܵܐ: ܐܲܡܝܼܬ̣ ܪܸܓ̇ܬ̣ܵܐ ܕܸܡܥܲܝ̈ܗܘܿܢ.

¹⁷ܘܢܲܣܠܹܐ ܐܸܢܘܿܢ ܐܲܠܵܗܝ ܥܲܠ ܕܠܵܐ ܫܲܡ̣ܥܘܼܗܝ: ܘܢܸܗܘܘܿܢ ܛܵܥܹ̇ܝܢ ܒܹܝܬ̣ ܥܲܡܡܹ̈ܐ.