Read Aramaic Peshita Joel 2 Bible Online

Joel 2 - Aramaic Peshita bible

Joel 2

¹ܩܪܵܘ ܫܝܼܦܘܿܪܵܐ ܒܨܸܗܝܘܿܢ: ܘܲܩܥܵܘ ܒܛܘܼܪܵܐ ܕܩܘܼܕ݂ܫܝ: ܢܙܘܼܥܘܼܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܡܸܛܠ ܕܲܡ̣ܛܵܐ ܝܵܘܡܹܗ ܕܡܵܪܝܵܐ.

²ܘܲܩ̣ܪܸܒ̣ ܝܵܘܡܵܐ ܕܚܸܫܘܿܟ݂ܵܐ ܘܲܕ݂ܥܲܡܛܵܢܵܐ: ܝܵܘܡܵܐ ܕܲܥܢܵܢܵܐ ܘܲܕ݂ܥܲܪܦܸܠܵܐ: ܐܲܝܟ݂ ܫܲܦܪܵܐ ܕܲܦܪܝܼܣ ܥܲܠ ܛܘܼܪܹ̈ܐ: ܥܲܡܵܐ ܣܲܓ̇ܝܼܵܐܐ ܘܥܲܫܝܼܢܵܐ ܕܐܲܟ݂ܘܵܬܹܗ ܠܵܐ ܗ̄ܘܼܵܐ ܡ̣ܢ ܥܵܠܲܡ: ܘܒ̣ܵܬܪܹܗ ܠܵܐ ܢܸܗܘܹܐ ܥܕܲܡܵܐ ܠܲܫܢܲܝ̈ ܕܵܪܕܵܪܹ̈ܝܢ.

³ܩܕ݂ܵܡܵܘܗܝ ܐܵܟ݂ܠܵܐ ܢܘܼܪܵܐ: ܘܒ̣ܵܬ̣ܪܹܗ ܡܵܘܩ̄ܕ݂ܵܐ ܫܲܠܗܹܒ̣ܝܼܬ̣ܵܐ: ܐܲܝܟ݂ ܦܲܪܕܲܝܣܵܐ ܕܲܥܕܸܢ ܐܲܪܥܵܐ ܩܕ݂ܵܡܵܘܗܝ: ܘܒܸܣܬ̇ܪܹܗ ܡܲܕ݂ܒ̇ܪܵܐ ܚܲܪܒܵܐ: ܘܠܲܝܬ̇ ܕܡܸܫܬܵܘܙܲܒ̣ ܡܸܢܹܗ.

⁴ܐܲܝܟ݂ ܚܸܙܘܵܐ ܕܪ̈ܲܟ݂ܫܵܐ ܚܸܙܘܹܗ: ܘܐܲܝܟ݂ ܦܲܪ̈ܵܫܹܐ ܗܵܟܲܢܵܐ ܪܵܗ̇ܛܝܼܢ.

⁵ܐܲܝܟ݂ ܩܵܠܵܐ ܕܡܲܪ̈ܟ̇ܒ̣ܵܬ̣ܵܐ ܕܲܡܢܲܗ̈ܙܵܢ ܥܲܠ ܪܹ̈ܫܲܝ ܛܘܼܪܹ̈ܐ: ܘܐܲܝܟ݂ ܩܵܠܵܐ ܕܫܲܠܗܹܒ̣ܝܼܬ̣ܵܐ ܕܢܘܼܪܵܐ ܕܐܵܟ݂ܠܵܐ ܚܲܒ̇ܬ̣ܵܐ: ܘܐܲܝܟ݂ ܥܲܡܵܐ ܥܲܫܝܼܢܵܐ ܕܲܣܕ݂ܝܼܪ ܠܲܩܪܵܒ̣ܵܐ.

⁶ܡ̣ܢ ܩܕ݂ܵܡܵܘܗܝ ܢܙܘܼܥܘܼܢ ܥܲܡܡܹ̈ܐ: ܘܟ݂ܠ ܐܲܦܝܼ̈ܢ ܢܹܐܟ݂̈ܡܵܢ ܐܲܝܟ݂ ܫܘܼܚܵܪܹ̈ܐ ܕܩܸܕ݂ܪܵܐ.

⁷ܐܲܝܟ݂ ܓܲܢ̄ܒܵܪܹ̈ܐ ܢܸܪ̱ܗܛܘܼܢ: ܘܐܲܝܟ݂ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܢܸܣܩܘܼܢ ܒܫܘܼܪܹ̈ܐ: ܘܲܓ̣ܒܲܪ ܒܐܘܼܪܚܹܗ ܢܹܐܙ̄ܠܘܼܢ: ܘܠܵܐ ܢܸܣܛܘܿܢ ܡ̣ܢ ܐܘܼܪ̈ܚܵܬ̣ܗܘܿܢ.

⁸ܘܲܓ̣ܒܲܪ ܠܐܲܚܘܼܗܝ ܠܵܐ ܢܸܕ݂ܚ̄ܩܘܼܢ: ܐܸܠܵܐ ܓܒܲܪ ܒܲܫܒ̣ܝܼܠܹܗ ܢܹܐܙ̄ܠܘܼܢ: ܡ̣ܢ ܝܘܼܩܪܵܐ ܕܙܲܝܢܗܘܿܢ ܢܸܦܠܘܼܢ: ܘܠܵܐ ܢܸܣܩܘܼܢ ܠܪܹܫ.

⁹ܒܲܡܕ݂ܝܼ̈ܢܵܬ̣ܵܐ ܢܸܣܩܘܼܢ: ܘܥܲܠ ܫܘܼܪܹ̈ܐ ܢܸܪ̱ܗܛܘܼܢ: ܘܥܲܠ ܒܵـ̈ـܬܹ̇ܐ ܢܸܣܩܘܼܢ: ܘܡ̣ܢ ܟܵܘܹ̈ܐ ܢܸܥܠܘܼܢ ܐܲܝܟ݂ ܓܲܢܵܒܹ̈ܐ.

¹⁰ܩܕ݂ܵܡܵܘܗܝ ܐܸܬ̇ܕܲܠܚܲܬ̤ ܐܲܪܥܵܐ: ܘܙܵܥ̣ܘ ܫܡܲܝܵܐ: ܫܸܡܫܵܐ ܘܣܲܗܕܵܐ ܚ̣ܫܸܟ݂ܘ: ܘܲܥ̣ܪܲܒ̣ ܢܘܼܗܪܵܐ ܕܟ݂ܵܘܟ̇ܒܹ̈ܐ.

¹¹ܘܡܵܪܝܵܐ ܝܲܗ̄ܒ̣ ܩܵܠܹܗ ܩܕ݂ܵܡ ܚܲܝܠܹܗ: ܡܸܛܠ ܕܣܲܓ̇ܝܼܵܐܐ ܗ̄ܝܼ ܛܵܒ̣ ܡܲܫܪܝܼܬܹܗ: ܘܥܲܫܝܼܢ ܥܒ̣ܵܕ݂ܵܐ ܕܦܸܬ̣ܓ̣ܵܡܹܗ: ܡܸܛܠ ܕܪܲܒ̇ ܗ̄ܘܼ ܝܵܘܡܹܗ ܕܡܵܪܝܵܐ ܘܲܕ݂ܚܝܼܠ ܛܵܒ̣: ܘܡܲܢ̣ܘܼ ܡܸܫܟܲܚ ܡܣܲܝܒܲܪ ܠܹܗ.

¹²ܡܸܟܹ̇ܝܠ ܐܵܡܲܪ ܡܵܪܝܵܐ: ܐܸܬ̣ܦܢܵܘ ܠܘܵܬ̣ܝ ܡ̣ܢ ܟܠܹܗ ܠܸܒ̇ܟ݂ܘܿܢ: ܒܨܵܘܡܵܐ: ܘܒܲܒ̣ܟ݂ܵܬ̣ܵܐ: ܘܲܒ̣ܡܲܪ̈ܩܕ݂ܵܬ̣ܵܐ.

¹³ܘܲܨܪܵܘ ܠܸܒܲܝ̈ܟ̇ܘܿܢ ܘܠܵܐ ܢܲܝ̈ܬܲܝܟ̇ܘܿܢ: ܘܐܸܬ̣ܦܢܵܘ ܠܘܵܬ̣ ܡܵܪܝܵܐ ܐܲܠܵܗܟ݂ܘܿܢ: ܡܸܛܠ ܕܲܡܪܲܚܡܵܢܵܐܗ̄ܘܼ ܘܲܡܪܲܚܦܵܢܵܐ: ܘܢܲܓ̇ܝܼܪܵܐ ܪܘܼܚܹܗ ܘܣܲܓ̇ܝܼܵܐܐ ܛܲܝܒ̇ܘܼܬܹܗ: ܘܡܲܗܦܸܟ݂ ܒܝܼܫܬܵܐ.

¹⁴ܡܲܢ ܝܵܕܲܥ̇ ܐܸܢ ܡܸܬ̣ܦܢܸܐ ܘܲܡܪܲܚܸܡ ܥܠܲܝܢ: ܘܡܵܘܬܲܪ ܒܐܲܬ̣ܪܹܗ ܒܘܼܪܟ̇ܬ̣ܵܐ: ܘܲܣܡܝܼܕ݂ܵܐ ܘܢܘܼܩܵܝܵܐ ܠܡܵܪܝܵܐ ܐܲܠܵܗܟ݂ܘܿܢ.

¹⁵ܩܪܵܘ ܫܝܼܦܘܿܪܵܐ ܒܨܸܗܝܘܿܢ: ܩܲܕܸ̇ܫܘ ܨܵܘܡܵܐ: ܩܪܵܘ ܟܢܘܼܫܝܵܐ.

¹⁶ܟܢܘܿܫܝ ܥܲܡܵܐ: ܩܲܕܸ̇ܫܘ ܥܹܕ̇ܬܵܐ: ܟܢܘܿܫܘ ܣܵܒܹ̈ܐ: ܘܲܟ݂ܢܘܿܫܘ ܥܠܲܝ̈ܡܹܐ ܘܝܵܢܩܲܝ̈ ܬܕܲܝܵܐ: ܢܸܦܘܿܩ ܚܲܬ̣ܢܵܐ ܡ̣ܢ ܩܲܝܛܘܿܢܹܗ: ܘܟܲܠܬ̣ܵܐ ܡ̣ܢ ܒܹܝܬ̣ ܓܢܘܿܢܵܗ̇.

¹⁷ܒܲܝܢܲܝ ܩܸܣܛܪܘܿܡܵܐ ܠܡܲܕ݂ܒ̇ܚܵܐ ܢܸܒ̣ܟ̇ܘܿܢ ܟܵܗ̈ܢܹܐ ܡܫܲܡܫܵܢܵܘ̈ܗܝ ܕܡܵܪܝܵܐ: ܘܢܹܐܡܪܘܼܢ: ܚܘܼܣܝ ܡܵܪܝܵܐ ܥܲܠ ܥܲܡܵܟ݂: ܘܠܵܐ ܬܸܬܸ̇ܠ ܝܵܪܬ̇ܘܼܬ̣ܵܟ݂ ܠܚܸܣܕܵܐ ܘܲܠܫܘܼܠܛܵܢܵܐ ܕܥܲܡܡܹ̈ܐ: ܕܠܵܐ ܢܹܐܡܪܘܼܢ ܥܲܡܡܹ̈ܐ ܐܲܝܟܵܘ ܐܲܠܵܗܗܘܿܢ.

¹⁸ܘܛܲܢ ܡܵܪܝܵܐ ܒܐܲܪܥܹܗ: ܘܚܵܣ̣ ܥܲܠ ܥܲܡܹܗ.

¹⁹ܘܲܥ̣ܢܵܐ ܡܵܪܝܵܐ ܘܐܸܡܲܪ ܠܥܲܡܹܗ: ܗܵܐ ܡܫܲܕܲܪ ܐ̄ܢܵܐ ܠܟ݂ܘܿܢ ܥܒ̣ܘܼܪܵܐ: ܘܚܲܡܪܵܐ: ܘܡܸܫܚܵܐ ܕܬܸܣܒ̇ܥܘܿܢ ܬܘܼܒ̣ ܠܚܸܣܕܵܐ ܕܥܲܡܡܹ̈ܐ.

²⁰ܘܲܠܓܲܪܒ̇ܝܵܐ ܐܸܕ݂ܚܘܿܩ ܡܸܢܟ݂ܘܿܢ: ܘܐܲܕ݂ܚ̄ܩܝܼܘܗܝ ܠܐܲܪܥܵܐ ܨܗܝܼܬ̣ܵܐ ܘܚܲܪܒ̇ܬ̣ܵܐ: ܐܲܦܵܘ̈ܗܝ ܠܝܲܡܵܐ ܩܲܕ݂ܡܵܝܵܐ: ܘܚܲܪܬܹܗ ܠܝܲܡܵܐ ܐ̄ܚܪܵܝܵܐ: ܘܢܸܡܚܸܐ ܪܹܝܚܹܗ ܘܬܸܣܲܩ ܣܘܵܬܹܗ: ܥܲܠ ܕܐܸܬ̇ܬ̇ܪܝܼܡ ܠܡܸܥܒܲܕ݂.

²¹ܠܵܐ ܬܸܕ݂ܚ̄ܠܝܼܢ ܐܲܪܥܵܐ: ܕܘܼܨܝ ܘܲܚܕ݂ܵܝ: ܡܸܛܠ ܕܐܸܬ̇ܬ̇ܪܝܼܡ ܡܵܪܝܵܐ ܠܡܸܥܒܲܕ݂.

²²ܠܵܐ ܬܸܕ݂ܚ̄ܠܝܼܢ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܡܸܛܠ ܕܝܼܥ̣ܵܐ ܬܸܕ݂ܐܵܐ ܒܕܲܝܪܹ̈ܐ ܕܡܲܕ݂ܒ̇ܪܵܐ: ܘܐܝܼܠܵܢܵܐ ܝܲܗ̄ܒ̣ ܦܹܐܪ̈ܵܘܗܝ: ܘܲܓ̣ܦܸܬܵܐ ܘܬܹܬܵܐ ܝܲܗ̄ܒ̣ ܚܲܝܠܗܹܝܢ.

²³ܒܢܲܝ̈ ܨܸܗܝܘܿܢ ܕܘܼܨܘ ܘܲܚܕ݂ܵܘ ܒܡܵܪܝܵܐ: ܐܲܠܵܗܟ݂ܘܿܢ: ܕܝܵܗܹ̇ܒ̣ ܠܟ݂ܘܿܢ ܡܹܐܟ݂ܘܼܠܬܵܐ ܕܙܲܕ̇ܝܼܩܘܼܬ̣ܵܐ: ܘܡܲܚܸܬ̣ ܠܟ݂ܘܿܢ ܡܸܛܪܵܐ ܪܒ̣ܝܼܥܵܝܵܐ ܘܲܠܩܝܼܫܵܝܵܐ ܐܲܝܟ݂ ܕܡ̣ܢ ܠܘܼܩܕܲܡ.

²⁴ܘܢܸܬ̣ܡ̱ܠܘܿܢ ܐܸܕ̇ܪܹ̈ܐ ܥܒ̣ܘܼܪܵܐ: ܘܢܲܫ̈ܦܥܵܢ ܡܲܥܨܪ̈ܵܬ̣ܵܐ ܚܲܡܪܵܐ ܘܡܸܫܚܵܐ.

²⁵ܘܐܸܦܪܘܿܥܟ݂ܘܿܢ ܫܢܲـ̈ـܝܵܐ ܕܐܸܟܲܠ ܩܲܡܨܵܐ ܦܵܪܚܵܐ: ܘܙܵܚܠܵܐ ܘܨܲܪܨܘܼܪܵܐ ܘܡܵܫܘܿܛܵܐ: ܚܲܝܠܝ ܪܲܒܵܐ ܕܫܲܕ̇ܪܹܬ̣ ܥܠܲܝܟ̇ܘܿܢ.

²⁶ܘܬܹܐܟ݂ܠܘܼܢ ܘܬܸܣܒ̇ܥܘܼܢ: ܘܲܬ̣ܫܲܒ̇ܚܘܼܢ ܠܲܫܡܹܗ ܕܡܵܪܝܵܐ ܐܲܠܵܗܟ݂ܘܿܢ: ܕܥܵܒܹ̇ܕ݂ ܥܲܡܟ݂ܘܿܢ ܬܸܕ݂ܡܪ̈ܵܬ̣ܵܐ: ܘܠܵܐ ܢܸܒ̣ܗܲܬ̣ ܥܲܡܝ ܠܥܵܠܲܡ.

²⁷ܘܬܸܕ̇ܥܘܼܢ ܕܲܒ̣ܓ̣ܵܘ ܝܑܼܣܪܵܝܹܠ ܐ̄ܢܵܐ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ: ܘܠܲܝܬ̇ ܬܘܼܒ̣ ܠܒܲܪ ܡܹܢܝ: ܘܠܵܐ ܢܸܒ̣ܗܲܬ̣ ܥܲܡܝ ܠܥܵܠܲܡ.

²⁸ܘܡ̣ܢ ܒܵܬ̣ܪܟܸ̇ܢ ܐܹܫܘܼܕ݂ ܪܘܼܚܝ ܥܲܠ ܟܠ ܒܣܲܪ: ܘܢܸܬ̣ܢܲܒ̇ܘܿܢ ܒܢܲܝ̈ܟ̇ܘܿܢ ܘܲܒ̣̈ܢܵܬ̣ܟ݂ܘܿܢ: ܘܣܵܒܲܝ̈ܟ̇ܘܿܢ ܚܸܠܡܹ̈ܐ ܢܸܚ̱ܠܡܘܼܢ: ܘܲܥܠܲܝ̈ܡܲܝ̈ܟ̇ܘܿܢ ܚܸܙܘܵܢܹ̈ܐ ܢܸܚܙܘܿܢ.

²⁹ܘܐܵܦ ܥܲܠ ܥܲܒ̣̈ܕܹ̇ܐ ܘܥܲܠ ܐܲܡ̈ܗܵܬ̣ܵܐ: ܐܹܫܘܼܕ݂ ܪܘܼܚܝ ܒܝܵܘ̈ܡܵܬ̣ܵܐ ܗܵܢ̇ܘܿܢ.

³⁰ܘܐܸܥܒܸ̇ܕ݂ ܬܸܕ݂ܡܪ̈ܵܬ̣ܵܐ ܒܲܫܡܲܝܵܐ ܘܒܲܐܪܥܵܐ: ܕܡܵܐ: ܘܢܘܼܪܵܐ: ܘܥܸܛܪܵܐ ܕܬܸܢܵܢܵܐ.

³¹ܫܸܡܫܵܐ ܢܸܬ̣ܗ̱ܦܸܟ݂ ܠܚܸܫܘܿܟ݂ܵܐ: ܘܣܲܗܪܵܐ ܠܲܕ݂ܡܵܐ: ܩܕ݂ܵܡ ܕܢܹܐܬܹܐ ܝܵܘܡܹܗ ܕܡܵܪܝܵܐ ܪܲܒܵܐ ܘܲܕ݂ܚܝܼܠܵܐ.

³²ܘܟ݂ܠ ܕܢܸܩܪܸܐ ܫܡܹܗ ܕܡܵܪܝܵܐ ܢܸܬ̣ܦܲܨܹܐ: ܡܸܛܠ ܕܲܒ̣ܛܘܼܪܵܐ ܕܨܸܗܝܘܿܢ ܘܒ̣ܐܘܿܪܸܫܠܸܡ ܬܸܗܘܹܐ ܡܫܵܘܙܒ̣ܘܼܬ̣ܵܐ: ܐܲܝܟ݂ ܕܐܸܡܲܪ ܡܵܪܝܵܐ ܠܲܡܫܵܘܙܒܹ̈ܐ ܕܲܩ̣ܪܵܐ ܡܵܪܝܵܐ.